Kamoo o Ka Hlagolelago Lerato la Modimo ka Pelong ya Ngwana wa Gago

MPHO e kaone-kaone yeo re ka e fago bana ba rena ke tswalano ya kgaufsi le Jehofa Modimo. (Psalme 16:8) Bjalo ka ge go porofetilwe, re phela ‘dinakong tše di hlobaetšago tšeo go lego thata go lebeletšana le tšona.’ Batho ba bantši ke “ba ratago maipshino go e-na le go rata Modimo.” (2 Timotheo 3:1-5) Ee, lerato la kgonthe la go rata Modimo le tloga le sa hwetšagale gabonolo lefaseng lehono.

Ga gwa swanela gore go letelwe gore lerato la go rata Modimo ka pelong ya ngwana le fo ba gona ka mohlolo. Go rata Jehofa Modimo go swanetše go hlagolelwa ka dipelong tša bana ba rena. Re ka dira bjang se?

Poledišano e Tšwago Pelong

Re ka hlagolela lerato la Modimo ka dipelong tša bana ba rena ge e ba dipelo tša rena ka noši di tletše lerato leo. (Luka 6:40) Beibele e bontšha se ge e re: “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka matla a xaxo ka moka. Mantšu a ke Xo laetšaxo lehono a a dulê a le pelong ya xaxo. O a tiišetšê bana ba xaxo.”—Doiteronomio 6:4-7.

Re ka hlagolela bjang lerato la Modimo ka pelong ya ngwana wa rena? Sa pele, re swanetše go tseba seo se lego ka pelong ya ngwana wa rena. Sa bobedi, re swanetše go bontšha seo se lego ka pelong ya rena ka noši.

Ge a le tseleng ya go ya Emause a e-na le ba babedi ba barutiwa ba gagwe, Jesu Kriste o ile a thoma ka go kgothaletša barutiwa ba gagwe gore ba hlalose dikholofelo tša bona le dipoifo tša bona. Ke ka morago ga ge a ba theeditše ka lebakanyana moo Jesu a ilego a phošolla kgopolo ya bona ka go ba hlalosetša Mangwalo. Ka morago ba ile ba bolela gore: “Na dipelo tša rena di be di sa fse ge a be a bolela le rena?” Poledišano yeo ke mohlala wa poledišano e tšwago pelong. (Luka 24:15-32) Re ka tseba maikwelo a bana ba rena bjang?

Morago bjale, batswadi ba bangwe bao ga bjale bana ba bona e lego batho ba bagolo goba ba fihlago bogolong e bile e lego mehlala e mebotse ya tumelo ba ile ba botšišwa mabapi le poledišano e tšwago pelong. Ka mohlala, Glen, wa kua Mexico, o na le bana ba bane ba bagolo. * O re: “Ga go fo itiragalela gore batswadi le bana ba boledišane ka bolokologi. Nna le mosadi wa-ka re beela dilo tše di sego bohlokwa gakaalo ka thoko e le gore re ka fetša nako re e-na le bana ba rena. Ge ba be ba sa le mahlalagading, ka dinako tše dingwe re be re dula le bona mantšiboeng ka moka, re bolela ka selo le ge e le sefe seo ba bego ba nyaka re bolela ka sona. Ka mo go swanago dinakong tša dijo, ka go theetša dipoledišano tša bona, re be re lemoga mathata a bona gomme ka botho re phošolla ditshekamelo tše di sa kgahlišego, gantši ba sa lemoge.”

Poledišano e tšwago pelong gape e akaretša go utolla seo se lego pelong ya rena ka noši. Jesu o itše: “Motho yo bolo o tšweletša dilo tše dibotse go tšwa lehumong le lebotse la pelo ya gagwe, . . . gobane molomo wa gagwe o bolela se se tletšego pelong.” (Luka 6:45) Toshiki, yoo bana ba gagwe ba bararo e lego badiredi ba nako e tletšego kua Japane, o re: “Ke ba boditše gantši lebaka leo ka lona ke ilego ka dumela go Jehofa—kamoo ke ilego ka dumela ka pelo ya-ka ka moka gore o gona le kamoo phihlelo ya-ka e nkgodišitšego ka gona gore Beibele e a rereša e bile ke tlhahlo e kaone-kaone bophelong.” Kua Mexico, Cindy o re: “Monna wa-ka o be a dula a rapela gotee le bana. Ge ba e-kwa mantšu a gagwe a tšwago pelong, ba ile ba lemoga gore Jehofa ke motho wa kgonthe.”

 Matla a Mohlala wa Rena

Seo se lego matla go feta mantšu a rena ke tsela yeo re phelago ka yona, ka gobane e bontšha bana ba rena gore re rata Modimo gakaakang. Ka go lemoga gore Jesu Kriste o kwa Jehofa, batho ba be ba ka bona gore o rata Modimo ka mo go tseneletšego. Jesu o itše: “E le gore lefase le tsebe gore ke rata Tate, go etša ge Tate a nneile taelo gore ke dire, ke dira bjalo.”—Johane 14:31.

Gareth, yo mongwe wa Dihlatse tša Jehofa kua Wales, o re: “Bana ba rena ba swanetše go bona gore re rata Jehofa e bile re leka go dira dilo ka tsela ya gagwe. Ka mohlala, bana ba-ka ba bona gore ke dumela diphošo tša-ka ka ge ke e-kwa seo Modimo a re botšago sona. Gona bjale bana ba-ka ba leka go dira se se swanago.”

Greg, wa mo-Australia, o re: “Re be re nyaka gore bana ba rena ba bone gore maphelo a rena a theilwe therešong. Ge re dira diphetho tša mabapi le mošomo goba boitapološo, re thoma ka go lebelela kamoo mediro ya rena ya Bokriste e tlago go kgomega ka gona. Re thaba kudu ge re bona morwedi wa rena wa nywaga e 19 a diriša mokgwa wo tirelong ya gagwe ya bobulamadibogo bja go thuša.”

Go Thuša Bana ba Rena go Kwešiša Modimo

Re ka se kgone go rata goba go bota motho yoo re sa mo kwešišego. Ge moapostola Paulo a be a nyaka gore Bakriste ba Filipi ba gole leratong la bona go Jehofa, o ngwadile gore: “Se ke seo ke tšwelago pele ke se rapelela, gore lerato la lena le gole ka mo go oketšegago ka tsebo e nepagetšego le temogo e tletšego.” (Bafilipi 1:9) Falconerio, yoo a godišago bana ba bane kua Peru, o re: “Go bala le go ithuta Beibele ka mehla le bona go aga tumelo ya bona. Ka dinako tše dingwe ke be ke palelwa ke go ithuta le bona, gomme ke be ke bona lerato la bona go Modimo le fokotšega.” Gary, yo a tšwago Australia, o re: “Gantši ke bontšha bana ba-ka bohlatse bja gore diporofeto tša Beibele di a phethagala. Gape ke bontšha le mehola ya go diriša melao ya motheo ya Beibele. Go swara thuto ya lapa la rena ya Beibele ka mehla e bile selo se bohlokwa sa go aga tumelo ya bona.”

Tsebo e tla fihlelela pelo ya ngwana gakaone kudu ge boemo e le bjo bo fodilego le bjo bo hlomphegago bjoo go bjona go ithuta e lego mo go thabelwago. (Jakobo 3:18) Shawn le Pauline ba Brithania, bao ba nago le bana ba bane, ba re: “Nakong ya thuto ya lapa ya Beibele, re be re leka  go se omanye bana ba rena, gaešita le ge ba be ba seleka. Re ile ra feto-fetoša tsela yeo re bego re swara thuto ka yona. Ka dinako tše dingwe re be re laletša bana go kgetha taba yeo re ka bolelago ka yona. Re be re diriša dibidio tšeo di tšweleditšwego ke mokgatlo wa Jehofa. Ka dinako tše dingwe re be re bapala karolo ya bidio gape goba go e emiša gore re be le nako ya go boledišana ka yona.” Mma yo a bitšwago Kim, yoo le yena a tšwago Brithania, o re: “Ke lokišetša thuto ya lapa ka kelohloko gore ke tle ke kgone go botšiša dipotšišo tšeo di tlago go dira gore bana ba-ka ba nagane. Re thabela go ithuta. Re sega kudu.”

Go Kgetha Bagwera

Go rata Jehofa le go tšeela borapedi bja therešo godimo go ka gola gabonolo kudu baneng ba rena ge eba ba dikologilwe ke batho bao e lego bagwera ba Modimo. Go rulaganya gore go be le bagwera bao bana ba rena ba ka bolelago le go bapala le bona go ka nyaka maiteko. Eupša go dira bjalo go na le mohola! Go oketša moo, go dira dibaka tša gore bana ba rena ba tsebane le Dihlatse tša Jehofa tšeo di tsenetšego tirelo ya nako e tletšego bjalo ka tsela ya tšona ya bophelo, go a hola. Ba bantši bao ba kgethilego tsela yeo ba dirile bjalo ka baka la go gwerana le bahlanka ba Modimo ba mafolofolo. Kgaetšedi yo a bilego moromiwa o re: “Batswadi ba-ka ba be ba laletša babulamadibogo dijong gantši. Go be go le molaleng gore ba thabela bodiredi bja bona moo e lego gore ke ile ka nyaka go hlankela Jehofa ka tsela e swanago.”

Ke therešo gore dikgopolo tša bana ba rena di ka tutuetšwa ka tsela e botse goba e mpe. Ka go rialo dikotsi tša ditlwaelano tše mpe di hlohla bokgoni bja rena bjalo ka batswadi. (1 Bakorinthe 15:33) Ke bokgoni go ruta bana go phema go fetša nako e ntši le bao ba sa ratego Jehofa goba ba sa mo tsebego. (Diema 13:20) Shawn, yo go boletšwego ka yena pejana, o re: “Re rutile bana ba rena gore ba bontšhe bao ba tsenago le bona sekolo bogwera eupša seo se felele gona fao—sekolong. Bana ba rena ba be ba kwešiša lebaka la go se swanele go tšea karolo ditiragalong tša ka morago ga sekolo goba dipapading tša sekolo.”

Mohola wa Tlwaetšo

Ka go tlwaetša bana ba rena go hlalosa tumelo ya bona, re ba thuša go thabela go bontšha gore ba rata Modimo. Mark, yo a dulago United States, o re: “Re be re nyaka gore bašemanyana ba rena ba bone gore ba ka bolela le ba bangwe ka tumelo ya bona ka nako le ge e le efe, e sego ge feela ba aparetše go ya go tšea karolo bodireding bja rena bja phatlalatša. Ka gona ge re e-ya felo-tsoko go yo ithabiša, bjalo ka phakeng, lebopong la lewatle goba sethokgweng, re sepela le Dibeibele le dikgatišo tše di theilwego Beibeleng, gomme ra bolela le batho fao mabapi le dilo tšeo re di dumelago. Ka tsela yeo, bašemanyana ba tloga ba thabela go nea bohlatse bjo sa rulaganyetšwago ba e-na le rena. Ba tšea karolo dipoledišanong gomme ba bolela ka tumelo ya bona.”

Moapostola wa mokgalabje Johane o thušitše batho ba bantši go godiša lerato la bona la go rata Modimo. O ngwadile mabapi le bona gore: “Ga ke na lebaka le legolo la go leboga go feta dilo tše, gore ke kwe gore bana ba-ka [ba moya] ba tšwela pele ba sepela therešong.” (3 Johane 4) Ge re hlagolela lerato la Modimo ka dipelong tša bana ba rena, le rena ka ntle le pelaelo re tla ba le lethabo le le swanago.

[Mongwalo wa ka tlase]

[Diswantšho go letlakala 9]

Poledišano e tšwago pelong ya mabapi le tumelo ga e fo itiragalela

[Seswantšho go letlakala 10]

Tlwaetša bana ba gago go bontšha gore ba go rata Modimo

[Mothopo]

Courtesy of Green Chimneys Farm