Ke ka Baka La’ng Modimo A Dumelela Bokgopo?

GO GONGWE le go gongwe moo o lebelelago, o bona go oketšega ga bobe le tlaišego. Dintwa di bolaya badudi gotee le mašole. Bosenyi le bošoro di tlwaelegile. Mohlomongwe morago bjale o bile mohlaselwa wa kgethollo goba go hloka toka. Ge o nagana ka seo o se bonego le seo se ilego sa go wela, o swanetše go ba o ile wa ipotšiša gore, ‘Ke ka baka la’ng Modimo a dumelela bokgopo?’

Batho ba bantši ba ile ba botšiša potšišo yeo. Moo e ka bago nywaga e 3 600 e fetilego, mohlanka yo a bego a botega ka go se kwanantšhe wa Modimo e lego Jobo o ile a botšiša gore: “Ké ka ’baka la’ng xe ba babe ba phela?” (Jobo 21:7) A tshwentšwe ke ditiro tše mpe tša batho ba gabo, moporofeta Jeremia wa lekgolong la bošupa la nywaga B.C.E. o ile a botšiša gore: “Ké ka ’baka la’ng xe xo lêtlêxa tsela ya ba babe, ’me bahlanoxi bohle ba iketla?” (Jeremia 12:1) Jobo le Jeremia ba be ba tseba gore Modimo ke yo a lokilego. Lega go le bjalo, ba ile ba ipotšiša lebaka la go ba gona ga bokgopo bjo bokaakaa. Mohlomongwe le wena se se a go makatša.

Batho ba bangwe ba bea Modimo molato bakeng sa bokgopo le tlaišego. Ba bangwe ba ipotšiša gore: ‘Ge e ba Modimo e le yo matla ka moka, a e-na le toka le lerato, ke ka baka la’ng a sa fediše bobe le tlaišego? Ke ka baka la’ng a dumeletše bobe bo tšwela pele go ba go fihla mo mehleng ya rena?’ Sehlogo se se latelago se nea dikarabo tša dipotšišo tše gotee le tše dingwe tše bohlokwa.

[Mothopo wa Seswantšho go letlakala 3]

AP Photo/Adam Butler