Dipotšišo tše Tšwago go Babadi

Na e be e se phošo gore Jakobo a ikgakanye ka go itira Esau go etša ge go begilwe go Genesi 27:18, 19?

O ka ba o tlwaelane le pego ye. Ge Isaka a be a tšofetše, o ile a botša Esau gore a ye go tsoma phoofolo, a re: “O [e] tlišê ke jê; e bê xôna ke tl’o xo Xo šexofatša ké sešo ka hwa.” Ka ge Rebeka a kwele seo monna wa gagwe a se boletšego, o ile a apea dijo tše bose kudu gomme a laela Jakobo gore: “’Me wêna O tlo [iša sejo] xó tat’axo; ó tlo ja, ’me a Xo šexofatša à sešo a hwa.” Ke moka Jakobo o ile a ya go tatagwe a swere dijo tše bose kudu, a apere diaparo tša Esau e bile a apere matlalo a diputšana molaleng le matsogong a gagwe. Ge Isaka a be a mmotšiša gore, “Ké wêna mang, Ngwan’aka?” Jakobo a araba ka gore: “Ké nna Esau, wa leitšibulô la xaxo.” Isaka o ile a mo kgolwa gomme a mo šegofatša.—Genesi 27:1-29.

Beibele ga e bolele ditaba ka botlalo gore ke ka baka la eng Rebeka le Jakobo ba ile ba dira dilo ka tsela yeo ba di dirilego ka yona, eupša e bolela gore boemo bo ile bja tšwelela kapejana. Re swanetše go ela hloko gore Lentšu la Modimo ga le lokafatše goba go sola seo Rebeka le Jakobo ba se dirilego, ka baka leo pego ye ga e kgothaletše go bolela maaka le bofora. Lega go le bjalo, Beibele e nea tsebišo mabapi le boemo bjo.

Sa pele, pego ye e bontšha gabotse gore Jakobo o be a swanelwa ke go šegofatšwa ke tatagwe; Esau ga se a ka a ba bjalo. Pejana, Jakobo o be a rekile ka molao tshwanelo ya go ba yo mogolo go lefahla la gagwe leo le se nago tebogo, leo le ilego la rekiša tshwanelo yeo ka dijo bakeng sa go tlatša mpa. Esau o ‘nyaditše bogolo bja gagwe.’ (Genesi 25:29-34) Ka gona, ge Jakobo a be a e-ya go tatagwe, o be a nyaka tšhegofatšo yeo e mo swanelago.

Sa bobedi, ge Isaka a be a lemoga gore o šegofaditše Jakobo, ga se a ka a nyaka go fetoša seo a bego a se dirile. Mohlomongwe o ile a gopola seo Jehofa a bego a se boditše Rebeka pele ga ge mafahla a gagwe a ka belegwa gore: “Yo moxolo ó tlo hlankêla monn’axwe.” (Genesi 25:23) Selo se se lemogegago gape ke gore ge Jakobo a be a le kgaufsi le go tloga Harane, Isaka o ile a oketša tšhegofatšo yeo a bego a mo šegofaditše ka yona pejana.—Genesi 28:1-4.

Mafelelong, go swanetše go gopolwa gore Jehofa o be a lemoga e bile a thabela sohle seo se bego se direga. Tšhegofatšo ya Isaka e be e tswalana le kholofetšo yeo Modimo a e holofeditšego Aborahama. (Genesi 12:2, 3) Ge nkabe Modimo a be a sa nyake gore Jakobo e be yena a šegofatšwago, o be a tla tsena ditaba gare ka tsela e itšego. Go e na le moo, Jehofa o ile a tiišetša Jakobo ka taba ye a re: “Meloko ka moka ya lefase e tlo šexofatšwa ka . . . bana ba xaxo.”—Genesi 28:10-15.