Go Tsoma Morero wa Modimo Lehono

“[Kriste] o hwetše bohle gore bao ba phelago ba se sa hlwa ba iphelela.”—2 BAKORINTHE 5:15.

1. Anega phihlelo ya ge moromiwa yo mongwe a le kabelong ya gagwe.

MOROMIWA yoo a bitšwago Aaron * o gopola ka gore: “Koloi ya rena e bile ya mathomo ya modudi yeo e ilego ya tsena motsaneng o lego lekatana wa Afrika ka morago ga go fela ga ntwa ya selegae. Re ile ra palelwa ke go boledišana le phuthego e nyenyane ya motsaneng woo, gomme re be re swanelwa ke go hlokomela dinyakwa tša bana babo rena. Go oketša go dijo, diaparo le dikgatišo tša Beibele, re ile ra tla le kopi ya bidio ya Jehovah’s Witnesses—The Organization Behind the Name. * Ka gona batho ba bantši bao ba nago le kgahlego ba ile ba kgeregela go tla go e bogela moagong woo go thwego ke wa go bapalela dipapadi tša sefaleng wa motsaneng woo—ngwako o mogolo wa bjang wo o nago le VCR gotee le thelebišene—moo e lego gore re ile ra swanelwa ke go e bapala gabedi. Dithuto tše dintši tša Beibele di be di hwetšwa nako le nako ka morago ga go e bapala. Ke therešo gore maiteko a rena ka moka a ile a atlega.”

2. (a) Ke ka baka la’ng Bakriste ba dira phetho ya go diriša maphelo a bona tirelong ya Modimo? (b) Ke dipotšišo dife tšeo ga bjale re tlago go di ahla-ahla?

² Ke ka baka la’ng Aaron le bagwera ba gagwe ba ile ba tsenela lesolo le thata ka tsela ye? Ke ka baka la gore ba neetše maphelo a bona go Modimo e bile ba nyaka go a diriša ka go dumelelana le morero wa Modimo, e le ge ba bontšha tebogo sehlabelong sa Jesu Kriste sa topollo. Ka go swana le bona, Bakriste ka moka ba ineetšego ba dirile phetho ya go “se sa hlwa ba iphelela,” eupša ya go dira sohle seo ba ka se kgonago “bakeng sa ditaba tše dibotse.” (2 Bakorinthe 5:15; 1 Bakorinthe 9:23) Ba tseba gore ge tshepedišo ye ya dilo e fela, tšhelete ka moka le maemo mo lefaseng di ka se sa hlwa di e-ba le mohola. Ka gona ka ge ba e-na le bophelo e bile ba phetše gabotse mmeleng, ba nyaka go diriša dilo tše ka go dumelelana le morero wa Modimo. (Mmoledi 12:1) Re ka dira bjang se? Re ka hwetša kae sebete se se nyakegago le matla a go dira bjalo? Le gona ke dibaka dife tša tirelo tšeo di re bulegetšego?

Go Gata Megato e Tšwelago Pele le e Šomago

3. Go dira thato ya Modimo go akaretša megato efe ya motheo?

³ Go Bakriste ba therešo, go dira thato ya Modimo ke tsela ya bophelo ka moka. E thoma ka megato ya motheo e bjalo ka go ngwadiša Sekolong sa Bodiredi sa Pušo ya Modimo, go bala Beibele ka mehla, go tšea karolo modirong wa boboledi le go tšwela pele go fihla kolobetšong. Ge go dutše go dirwa tšwelopele, re gopola mantšu a moapostola Paulo a rego: “Eleletša ka dilo tše; nwelela go tšona, gore tšwelopele ya gago e bonagale go batho bohle.” (1 Timotheo 4:15) Tšwelopele e bjalo ga se go ikgodiša eupša ke go bonagatša boikemišetšo bja rena bja go dira thato ya Modimo ntle le boithati. Go tšea tsela e bjalo go bontšha gore re dumelela Modimo go hlahla dikgato tša rena ditabeng ka moka tša bophelo, gomme o dira bjalo kudu go feta kamoo re ka dirago ka gona.—Psalme 32:8.

4. Re ka fenya bjang dipoifo tše di sa nyakegego?

⁴ Lega go le bjalo, go dika-dika goba go tshwenyega kudu ka rena go ka re thibela go dira tšwelopele tirelong ya rena go Modimo. (Mmoledi 11:4) Ka go rialo, pele re ka hwetša lethabo la  kgonthe ge re hlankela Modimo le ba bangwe, re swanetše go fenya dipoifo tša rena ka noši. Ka mohlala, Erik o be a nagana go hlankela phuthegong ya leleme le šele. Eupša o be a tshwenyega ka gore: ‘Na ke tla ka ka kgona? Na ke tla rata bana bešo? Na ba tla nthata?’ O anega ka gore: “Ke ile ka feleletša ka go lemoga gore ke swanetše go tshwenyega kudu ka bana babo rena go e na le go tshwenyega ka nna. Ke ile ka ikemišetša go kgaotša go tshwenyega le gore ke fo neela seo nka se kgonago ntle le boithati. Ke ile rapelela thušo gomme ka tšwela pele. Gona bjale ke thabela tirelo ya-ka fao.” (Baroma 4:20) Ee, ge re dutše re hlankela Modimo le ba bangwe ka ntle le boithati, re tla hwetša lethabo le kgotsofalo.

5. Ke ka baka la’ng go rulaganya dilo ka kelohloko ge re phegelela morero wa Modimo go nyakega? Bontšha.

⁵ Go phegelela morero wa Modimo ka katlego go nyaka le gore re rulaganye maemo a rena ka kelohloko. Ka bohlale re phema go dira dikoloto tše dintši tšeo di ka re dirago makgoba a tshepedišo ye le go re hlokiša tokologo ya go dira modiro wa Modimo. Beibele e re gopotša ka gore: “Moadingwa ó tlo hlankêla moadimi.” (Diema 22:7) Go bota Jehofa le go etiša dilo tša moya pele go re thuša go dula re tsepame. Ka mohlala, Guoming le dikgaetšedi tša gagwe tše pedi ba dula le mmago bona lefelong leo nywako ya gona e bitšago kudu e bile go ka bago thata go hwetša mešomo e ka botwago. Ka go diriša tšhelete ka kelohloko le ka go arolelana ditshenyagalelo, ba tšwela pele gabotse gaešita le ge e se ka moka ga bona bao ba šomago. Guoming o re: “Ka dinako tše dingwe, ga re hwetše mogolo ka moka ga rena. Lega go le bjalo, re kgona go tšwela pele bodireding bja bobulamadibogo gotee le go hlokomela mma gabotse. Re leboga gore mma ga a nyake gore re tlogele go phegelela dilo tša moya e le gore re mo fe manobonobo a bophelo.”—2 Bakorinthe 12:14; Baheberu 13:5.

6. Ke mehlala efe yeo e bontšhago kamoo re ka dumelelanyago maphelo a rena le morero wa Modimo?

⁶ Ge e ba o phegelela dilo tša boiphedišo ka mo go tseneletšego—tša tša ditšhelete goba tše dingwe—go etiša morero wa Modimo pele go ka nyaka gore go dirwe diphetogo tše dikgolo. Diphetogo tše bjalo gantši ga di dirwe ka bjako, gomme go dira diphošo maitekong a mathomo ga gwa swanela go lebelelwa e le go palelwa. Ela hloko Koichi, yo a bego a e-na le bothata bja go fetša nako e ntši a ithabiša. Koichi o ithutile Beibele a sa le mahlalagading, eupša dipapadi tša bidio e bile karolo e kgolo ya bophelo bja gagwe ka nywaga e mentši. Letšatšing le lengwe Koichi o ile a ipotša gore: ‘Ke’ng seo o se dirago? O nywageng ya gago ya bo-30 gomme ga go na selo se se nago le morero seo o se dirago bophelong bja gago!’ Koichi o ile a thomološa thuto ya gagwe ya Beibele gomme a amogela thušo ya phuthego. Gaešita le ge a be a fetoga ganyenyane-ganyenyane, ga se a ka a bea fase. Ka go rapela kudu le ka kgothatšo e lerato e tšwago go ba bangwe, o ile a feleletša a fentše temalelo ya gagwe. (Luka 11:9) Gona bjale Koichi o thabela go hlankela bjalo ka mohlanka wa bodiredi.

Ithute go ba yo a Leka-lekanego

7. Ke ka baka la’ng go nyakega teka-tekano ge re dira modiro wa Modimo?

⁷ Go phegelela morero wa Modimo go nyaka maiteko a rena a moya ka moka. Le ka mohla ga se ra swanela go itšimeletša goba go ba dibodu ge re dira bjalo. (Baheberu 6:11, 12) Lega go le bjalo, Jehofa ga a nyake gore re itapiše ka mo go feletšego—mmeleng, monaganong goba maikwelong. Go lemoga ka boipoetšo gore re ka se kgone go phetha modiro wa Modimo ka matla a rena ka noši go mo nea letago e bile go bontšha gore re na le teka-tekano. (1 Petro 4:11) Jehofa o re holofetša gore o tla re fa matla a nyakegago gore re phethe thato ya gagwe, eupša ga se ra swanela o ikgapeletša go feta tekano, e le ge re leka go dira dilo tšeo a sa lebelelago gore re ka di dira. (2 Bakorinthe 4:7) Go tšwela pele re hlankela Modimo ntle le go itapiša, re swanetše go diriša matla a rena ka bohlale.

8. Go diregile’ng ge Mokriste yo mongwe yo monyenyane a be a leka go fa Jehofa gotee le lefase seo a ka se kgonago, le gona ke diphetogo dife tšeo a ilego a di dira?

⁸ Ka mohlala, ka nywaga e mebedi Ji Hye, yo a dulago Asia Bohlabela, o be a šoma mošomo wo o nyakago mo gontši a dutše a bula madibogo.  O anega ka gore: “Ke be ke leka go nea Jehofa gotee le lefase seo nka se kgonago, eupša ke be ke robala feela diiri tše tlhano bošego. Mafelelong, ke be ke sa hlwe ke e-na le matla a monagano a šetšego bakeng sa therešo, gomme dilo tša moya di ile tša se sa hlwa di nthabiša gakaalo.” Gore a kgone go hlankela Jehofa ka ‘pelo ya gagwe ka moka, moya, monagano le matla,’ Ji Hye o ile a tsoma mošomo o sa nyakego mo gontši go yena. (Mareka 12:30) O re: “Go sa šetšwe kgateletšo ya lapa lešo ya gore ke tsome katlego ya tša ditšhelete, ke ile ka katanela go etiša morero wa Modimo pele. Ke sa dutše ke hwetša tšhelete e lekanego bakeng sa dilo tša motheo, tše bjalo ka diaparo tše di bogegago. Go kgona go robala nako e teletšana le gona go a kgahliša! Ke thabela bodiredi bja-ka, gomme ke yo matla moyeng gona bjale. Ke ka baka la gore ga ke sa le kotsing ya dikgoketšo le ditšhitišo tša lefase.”—Mmoledi 4:6; Mateo 6:24, 28-30.

9. Maiteko a rena a ka kgoma batho bjang bodireding?

⁹ Ga se batho ka moka bao ba ka hlankelago Modimo bjalo ka baebangedi ba nako e tletšego. Ge e ba o swanetše go lwantšhana le botšofadi, boemo bjo bo sa kgahlišego bja tša maphelo goba mafokodi a mangwe, gopola gore Jehofa o tšeela godimo potego ya gago le tirelo le ge e le efe ya gago ya moya ka moka yeo o ka kgonago go e nea. (Luka 21:2, 3) Ka baka leo, ga go le o tee wa rena yoo a swanetšego go tšeela fase tutuetšo yeo maiteko a rena, gaešita le ge e le a manyenyane, a ka bago le yona go ba bangwe. Ka mohlala, a re re re tsene dintlong tše mmalwa gomme ra se hwetše motho yo a bonagalago a kgahlegela molaetša wa rena. Ge re se na go sepela, beng ba dintlo ba ka fetša diiri goba matšatši ba boledišana ka ketelo ya rena, gaešita le moo ba sa kago ba re amogela! Ga se ra lebelela gore yo mongwe le yo mongwe yo a kwago ditaba tše dibotse o tla arabela gabotse, eupša ba bangwe ba tla dira bjalo. (Mateo 13:19-23) Ba bangwe ba ka arabela ka morago ge maemo a lefase goba a bophelo bja bona a fetoga. Boemong le ge e le bofe, ka go dira seo re ka se kgonago bodireding bja phatlalatša, re dira modiro wa Modimo. Re “badirišani ba Modimo.”—1 Bakorinthe 3:9.

10. Ke dibaka dife tšeo di bulegetšego bohle ka phuthegong?

¹⁰ Go oketša moo, ka moka ga rena re ka thuša ditho tša malapa a rena gotee le bana babo rena le dikgaetšedi ba moya. (Bagalatia 6:10) Tutuetšo ya rena e botse go ba bangwe e ka ba e kgolo kudu le e swarelelago. (Mmoledi 11:1, 6) Ge bagolo le bahlanka ba bodiredi ba phetha  dikabelo tša bona ka mafolofolo, ba thuša bao ba lego ka phuthegong gore ba phele gabotse le go tia moyeng, gomme modiro wa Bokriste o a gola. Re kgonthišeditšwe gore ge re e-na le ‘mo gontši mo re go dirago modirong wa Morena,’ boitapišo bja rena “ga se bja lefeela.”—1 Bakorinthe 15:58.

Go Phelela Morero wa Modimo

11. Ke dibaka dife tše dingwe tšeo di ka bulegago ka ntle le go šoma le phuthego ya lefelong la geno?

¹¹ Bjalo ka Bakriste, re rata bophelo gomme re nyaka go nea Modimo letago ka sohle seo re se dirago. (1 Bakorinthe 10:31) Ge ka potego re bolela ditaba tše dibotse tša Mmušo le go ruta ba bangwe go boloka dilo tšohle tšeo Jesu a di laetšego, re tla bulegelwa ke dibaka tše dintši tša tirelo. (Mateo 24:14; 28:19, 20) Ka ntle le go dirišana le phuthego ya gabo rena, re ka ba le dibaka tša go hlankela mo go nyakegago bagoeledi ba bantši, e ka ba tšhemong e nngwe, ya leleme le lengwe goba nageng e nngwe. Bagolo ba swanelegago le bahlanka ba bodiredi bao ba sa hlwago ba tsena lenyalong ba ka laletšwa Sekolong sa Tlwaetšo ya Bodiredi, gomme ka morago ga fao ba yo hlankela diphuthegong tšeo go nyakegago thušo ya Bakriste ba godilego ka tsebo, e ka ba nageng ya gabo bona goba e šele. Banyalani bao ba lego bodireding bja nako e tletšego ba ka swanelegela go hwetša tlwaetšo ya boromiwa ya Gilead le go hlankela nageng e šele. Le gona go dula go nyakega baithapi gore ba ye go dira mediro e fapa-fapanego Bethele le ba go aga gotee le go hlokomela mafelo ao go kopanelwago go wona le diofisi tša makala.

12, 13. (a) O ka kgetha bjang mohuta wa tirelo yeo o ka e phelelago? (b) Bontšha kamoo phihlelo yeo e hwetšwago kabelong e itšego e ka šomago go tše dingwe.

¹² Ke tirelo ya mohuta mang yeo o ka e phegelelago? Bjalo ka mohlanka yo a ineetšego wa Jehofa, dula o tsoma tlhahlo go yena le mokgatlong wa gagwe. ‘Moya wa gagwe wa tše bolo’ o tla go thuša go dira phetho e nepagetšego. (Nehemia 9:20) Gantši kabelo e itšego e re tlwaeletša go dira e nngwe, gomme phihlelo le bokgoni bjo bo hwetšwago mohuteng wa tirelo di ka ba le mohola go e nngwe.

¹³ Ka mohlala, Dennis le mosadi wa gagwe, Jenny, ba thekga mediro ya go aga Diholo tša Mmušo ka mehla. Ka morago ga ge Ledimo la Katrina le hlasetše borwa bja United States, ba ile ba ithapa bakeng sa modiro wa tlhakodišo. Dennis o bega gore: “Go diriša bokgoni bjoo re ithutilego bjona modirong wa go aga Diholo tša Mmušo bakeng sa go thuša bana babo rena go ile gwa re thabiša kudu. Tebogo yeo e bontšhitšwego ke bao re ba thušitšego e kgoma pelo e le ka kgonthe. Dihlopha tše dingwe tša tlhakodišo  di be di sa nape di atlega gakaalo go ageng lefsa. Dihlatse tša Jehofa di šetše di lokišitše goba go aga lefsa dintlo tše fetago tše 5 300 le Diholo tša Mmušo tše dintši. Batho ba a bona gomme gona bjale ba kgahlegela molaetša wa rena kudu.”

14. Ke’ng seo o ka se dirago ge e ba o kganyoga go tsenela bodiredi bja nako e tletšego?

¹⁴ Na o ka phelela morero wa Modimo ka go kgetha bodiredi bja nako e tletšego? Ge e ba go bjalo, o tla hwetša ditšhegofatšo tše dintši. Ge e ba maemo a gago ga bjale a sa go dumelele, mohlomongwe o ka dira diphetogo. Rapela go swana le Nehemia ge a be a hlologetše go phetha kabelo e bohlokwa, o itše: “Morêna, hlê . . . Lehono O kê O kxonišê mohlanka wa xaxo.” (Nehemia 1:11) Ke moka, go bota “Mokwi wa dithapêlô,” go dira gore o dire dilo ka go dumelelana le thapelo ya gago. (Psalme 65:2) Gore Jehofa a šegofatše maiteko a gago a go mo hlankela ka botlalo, o swanetše go thoma ka go dira maiteko ao. Ge o se na go tšea bodiredi bja nako e tletšego, kgomarela phetho ya gago. Ge nako e dutše e e-ya, phihlelo ya gago e tla gola gomme lethabo la gago la oketšega.

Bophelo bjo bo Tlogago bo E-na le Mohola

15. (a) Re holwa bjang ke go bolela le bao ba nago le nako e telele ba hlankela Modimo le go bala ka bona? (b) Tsopola phihlelo yeo o bonago e le e tlogago e kgothatša.

¹⁵ Ke mafelelo afe ao o ka a lebelelago ge o phegelela morero wa Modimo? Bolela le bao ba nago le nako e telele ba hlankela Jehofa, kudu-kudu bao ba feditšego nywaga e mentši ba le bodireding bja nako e tletšego. Ba phela maphelo a humilego le a nago le morero gakaakang! (Diema 10:22) Ba tla go botša gore Jehofa ga se a ka a palelwa ke go ba thuša gaešita le maemong a thata gore ba hwetše seo ba tlogago ba se tsoma le tše dintši. (Bafilipi 4:11-13) Go tloga ka 1955 go ya go 1961, Morokami (wa Seisemane) o be o gatiša tlhatlamano ya diphihlelo tša batho ba botegago ka tlase ga sehlogo se rego “Go Phegelela Morero Wa-ka Bophelong.” Ga e sa le go tloga ka nako yeo, go gatišitšwe diphihlelo tše dingwe tše makgolo. Phihlelo e nngwe le e nngwe e bonagatša moya wa mafolofolo le lethabo wo o re gopotšago woo o hwetšwago ka pukung ya Beibele ya Ditiro. Go bala dipego tše bjalo tše di kgahlišago go tla go šušumeletša go bolela gore, ‘Bjo ke bophelo bjo ke nyakago go bo phela!’

16. Ke’ng seo se dirago gore bophelo bja Mokriste e be bjo bo nago le morero le lethabo?

¹⁶ Aaron, yo go boletšwego ka yena mathomong, o gopola ka gore: “Afrika, ke kopane le bafsa bao ba bego ba ralala le naga ba tsomana le morero bophelong. Bontši bja bona ga bja ka bja o hwetša. Eupša re be re phegelela morero wa Modimo ka go godiša ditaba tše dibotse tša Mmušo, gomme re be re e-na le bophelo bjo e lego tlhohlo eupša e le bjo nago le morero. Re bone e le ka kgonthe gore go na le lethabo le legolo go neeng go feta go amogeleng.”—Ditiro 20:35.

17. Ke ka baka la’ng re swanetše go ba re phegelela morero wa Modimo gona bjale?

¹⁷ Go thwe’ng ka wena? Ke morero ofe wo o o phegelelago? Ge e ba o se na dipakane tše itšego tša moya, dilo tše dingwe di tla tšea nako ya gago le matla kapejana. Ke ka baka la’ng o senya bophelo bja gago bjo bohlokwa ka lefase la boikgopolelo la tshepedišo ya Sathane? Go se go ye kae ge “masetlapelo a magolo” a fihla, mahumo a dilo tše di bonagalago le maemo a lefaseng a ka se be le mohola. Se bohlokwa e tla ba tswalano ya rena le Jehofa. Re tla leboga gakaakang gore re hlanketše Modimo le ba bangwe e bile re phegeletše morero wa Gagwe bophelong bja rena!—Mateo 24:21; Kutollo 7:14, 15.

[Mengwalo ya ka tlase]

Na o ka Hlalosa?

• Jehofa o ikwa bjang ka tirelo ya rena go yena?

• Go dira diphetho tše šomago le go ba le teka-tekano go re thuša bjang go hlankela Modimo le ba bangwe?

• Re bulegetšwe ke dibaka dife tša go hlankela?

• Re ka phela bjang bophelo bjo bo tlogago bo e-na le morero gona bjale?

[Dipotšišo tša Thuto]

[Diswantšho go letlakala 23]

Go nyakega teka-tekano gore re tšwele pele re hlankela Jehofa ka moya ka moka

[Diswantšho go letlakala 24]

Tirelo e kgethwa e ka dibopego tše dintši