Mmuši yo a Humilego o Dira Kgetho ya Bošilo

MMUŠI yo a humilego wa lesogana o be a lokile, a latela molao e bile e le modumedi. Ge a fihlile go Jesu, o ile a khunama gomme a botšiša a re: “Morutiši yo Botse, ke swanetše go dira’ng gore ke je bohwa bja bophelo bjo bo sa felego?”

Ge a araba, Jesu o ile a bontšha gore go hwetša bophelo go be go nyaka gore lesogana le le boloke melao ya Modimo. Ge Jesu a kgopelwa gore a hlalose ka go lebanya, o itše: “O se ke wa bolaya, O se ke wa hlotlola, O se ke wa utswa, O se ke wa nea bohlatse bja maaka, Godiša tatago le mmago, le . . . go re, O rate moagišani wa gago go etša ge o ithata.” Ye e be e le melao ya motheo yeo e bego e hwetšwa Molaong wa Moše. Ke moka, lesogana le ile la re: “Tšeo ka moka ke di bolokile; ke sa hlaelelwa ke eng?”—Mateo 19:16-20.

Jesu o ile “a kwa a mo rata” gomme a re: “Go na le selo se tee se se hlaelelago go wena: Sepela o yo rekiša dilo tše o nago le tšona o nee badiidi, gomme o tla ba le lehumo legodimong, ke moka o tle o be molatedi wa-ka.”—Mareka 10:17-21.

Kapejana mmuši wa lesogana o ile a swanelwa ke go dira phetho e boima. O be a tla dira’ng? Na o be a tla tlogela mahumo a gagwe a dilo tše di bonagalago ka go rata gomme a ba molatedi wa Jesu goba na o be a tla a gomarela? Na o be a tla phegelela mahumo lefaseng, goba na o be a tla tsoma mahumo legodimong? Go swanetše go ba go bile thata go dira kgetho. Go molaleng gore o be a kgahlegela dilo tša moya, ka ge a be a boloka Molao gomme a ile a nyaka go tseba dilo tše dingwe tše oketšegilego tšeo a bego a swanetše go di dira gore a amogelwe ke Modimo. O ile a dira phetho efe? O ile a “sepela a kwele bohloko, gobane o be a e-na le dilo tše dintši.”—Mareka 10:22.

Phetho ya mmuši wa lesogana e be e se e bohlale. Ge nkabe a bile molatedi yo a botegago wa Jesu, a ka be a ile a amogela seo a bego a se tsoma—bophelo bjo bo sa felego. Ga re botšwe seo se diregilego ka lesogana  leo. Lega go le bjalo, re a tseba gore ka morago ga nywaga-some e ka bago e mene, madira a Roma a ile a senya Jerusalema le karolo e kgolo ya Judea. Bajuda ba bantši ba ile ba lahlegelwa ke mahumo a bona gotee le maphelo a bona.

Go fapana le mmuši wa lesogana, moapostola Petro le barutiwa ba bangwe ba ile ba dira kgetho e bohlale. Ba be ba “tlogetše dilo ka moka” gomme ba latetše Jesu. Ruri phetho yeo e ile ya ba hola! Jesu o ba boditše gore ba tla amogela dilo tše dintši go feta tšeo ba di tlogetšego. Go oketša moo, ba be ba tla hwetša bophelo bjo bo sa felego e le bohwa. Ba be ba se na lebaka la go itshola ka phetho yeo ba e dirilego.—Mateo 19:27-29.

Go na le diphetho tšeo ka moka ga rena re swanetšego go di dira bophelong—tše dingwe ke tše dinyenyane, tše dingwe ke tše dikgolo. Jesu o neile keletšo efe mabapi le diphetho tše bjalo? Na o tla amogela keletšo ya gagwe? Ge o kgetha go dira bjalo, o tla putswa kudu. Anke ga bjale re hlahlobeng kamoo re ka latelago Jesu le go holwa ke seo a se boletšego.