“Therešo ke Eng?”

MMUŠIŠI wa Roma yo a bego a belaela, Pontio Pilato, o ile a botšiša Jesu potšišo ye. O be a sa nyake karabo, gomme Jesu ga se a ka a mo araba. Mohlomongwe Pilato o be a lebelela therešo e le selo seo se ka se kego sa kwešišwa.—Johane 18:38.

Ba bantši le bona lehono ba na le tshekamelo e bjalo ya lenyatšo, go akaretša le baetapele ba bodumedi, barutiši le bo-radipolitiki. Ba dumela gore therešo—kudu-kudu therešo ya boitshwaro le ya moya—ga se selo sa kgonthe eupša e ithekgile ka maemo gomme e dula e fetoga. Ka kgonthe, se se bolela gore batho ba ka itirela phetho ya seo se nepagetšego le seo se fošagetšego. (Jesaya 5:20, 21) Le gona se dumelela batho go gana ditekanyetšo tše bohlokwa tša boitshwaro tšeo go thwego di fetilwe ke nako tšeo di bego di kgomaretšwe ke meloko e fetilego.

Polelo yeo e dirilego gore Pilato a botšiše potšišo yeo, e swanetše go elwa hloko. Jesu o be a itše: “Ke tswaletšwe sona se gomme ke sona se ke se tletšego lefaseng, gore ke hlatsele therešo.” (Johane 18:37) Jesu o be a sa dumele gore therešo ke selo se se sa kwagalego le se se raraganego. O ile a holofetša barutiwa ba gagwe gore: “Le tla tseba therešo, gomme therešo e tla le lokolla.”—Johane 8:32.

Therešo yeo e ka hwetšwa kae? Lebakeng le lengwe, Jesu o ile a bolela ge a be a rapela Modimo gore: “Lentšu la gago ke therešo.” (Johane 17:17) Beibele, yeo e buduletšwego ke Modimo, e utolla therešo yeo e neago tlhahlo e ka botwago le kholofelo ya kgonthe ya bokamoso—bophelo bjo bo sa felego.—2 Timotheo 3:15-17.

Pilato ka go se šetše o ile a gana sebaka sa go ithuta therešo e bjalo. Go thwe’ng ka wena? Ke ka baka la’ng o sa botšiše Dihlatse tša Jehofa gore “therešo” yeo Jesu a bego a e ruta ke eng? Di tla thabela go boledišana le wena ka therešo ye.