Go Theetša Letswalo La Gago

“Dilo ka moka di hlwekile go batho ba hlwekilego. Eupša go batho ba šilafetšego le ba se nago tumelo ga go na se se hlwekilego.”—TITO 1:15.

1. Paulo o kgathile tema efe diphuthegong tša Kereta?

KA MORAGO ga ge moapostola Paulo a phethile maeto a mararo a boromiwa, o ile a golegwa gomme a feleletša a rometšwe Roma, moo a ilego a dula nywaga e mebedi kgolegong. Ke eng seo a ilego a se dira ka morago ga go lokollwa? Lebakeng le lengwe, o ile a ya sehlakahlakeng sa Kereta a e-na le Tito, yoo Paulo a ilego a mo ngwalela gore: “Ke go tlogetše Kereta, gore o lokiše dilo tšeo di nyakago go lokišwa le gore o bee bagolo.” (Tito 1:5) Kabelo yeo ya Tito e be e akaretša go dirišana le batho bao matswalo a bona a bego a šoma goba a sa šome gabotse.

2. Ke bothata bofe bjoo Tito a bego a swanetše go bo lokiša kua sehlakahlakeng sa Kereta?

² Paulo o ile a eletša Tito ka ditshwanelego tša bagolo ba phuthego gomme a bontšha gore go be go e-na le “batho ba bantši bao ba sa laolegego, bao ba bolelago tše di se nago mohola, bafori ba monagano.” Ba be “ba dula ba phekgola malapa ka moka ka go ruta dilo tše ba sa swanelago go di ruta.” Tito o be a swanetše go ‘dula a ba sola.’ (Tito 1:10-14; 1 Timotheo 4:7) Paulo o boletše gore menagano le matswalo a bona di “šilafetše,” a diriša lentšu le ka kgopolo ya gore ba be ba e-na le sepatso, go swana le ge seaparo se sebotse se ka šilafatšwa ke sepatso. (Tito 1:15) Ba bangwe ba batho bao e ka ba e be e le Bajuda ba setlogo, ka ge ba be ba ‘kgomaretše tša lebollo.’ Diphuthego lehono ga di fapošwe ke batho bao ba nago le kgopolo e bjalo; lega go le bjalo, re ka ithuta go gontši mabapi le letswalo go tšwa keletšong yeo Paulo a e neilego Tito.

Bao ba Nago le Matswalo a Šilafetšego

3. Ke’ng seo Paulo a ilego a se ngwalela Tito mabapi le letswalo?

³ Ela hloko maemo ao go ona Paulo a bolelago ka letswalo. “Dilo ka moka di hlwekile go batho ba hlwekilego. Eupša go batho ba šilafetšego le ba se nago tumelo ga go na se se hlwekilego, ka ge menagano ya bona le matswalo a bona di šilafetše. Ba bolela phatlalatša gore ba tseba Modimo, eupša ba mo latola ka mediro ya bona.” Go molaleng gore ba bangwe nakong yeo ba be ba swanetše go dira diphetogo e le gore “ba phele tumelong.” (Tito 1:13, 15, 16) Ba be ba e-na le bothata bja go kgethologanya seo se hlwekilego go seo se šilafetšego, gomme se se be se akaretša matswalo a bona.

4, 5. Ke sepatso sa mohuta mang seo ba bangwe ka phuthegong ba bego ba e-na le sona, gomme se ile sa ba kgoma bjang?

⁴ Nywageng e fetago e lesome pejana, sehlopha se bušago sa Bakriste se ile sa dira phetho ya gore lebollo le be le se sa nyakega bakeng sa go dira gore motho e be morapedi wa therešo, gomme sa tsebiša diphuthego ka phetho yeo. (Ditiro 15:1, 2, 19-29) Lega go le bjalo, ba bangwe kua Kereta ba be ba sa dutše ba ‘kgomaretše lebollo.’ Ba be ba sa dumelelane le sehlopha se bušago, “ka go ruta dilo tše ba sa swanelago go di ruta.” (Tito 1:10, 11) Ka menagano e kgopamego, ba ka no ba ba be ba godiša dithulaganyo tša Molao  tšeo di lego mabapi le dijo gotee le ditirelo tša bohlweki. Mohlomongwe ba ka ba ba be ba feteletša seo se bolelwago ke Molao, ka ge go dirile bao ba phetšego pele ga bona ba mehleng ya Jesu, gaešita le go godiša dinonwane tša Bajuda le melao ya batho.—Mareka 7:2, 3, 5, 15; 1 Timotheo 4:3.

⁵ Dikgopolo tše bjalo di ile tša senya tsela ya bona ya go ahlola le ya boitshwaro e lego letswalo la bona. Paulo o ngwadile gore: “Go batho ba šilafetšego le ba se nago tumelo ga go na se se hlwekilego.” Matswalo a bona a be a kgopame moo e lego gore a ile a se sa ba tlhahlo e ka botwago ya ditiro le dikahlolo tša bona. Go feta moo, ba ile ba ahlola Bakriste-gotee le bona dilong tšeo e bego e le tša motho ka noši, dilong tšeo Mokriste a bego a ka di dira ka tsela e itšego mola yo mongwe a ka kgetha go di dira ka tsela e fapanego. Tabeng ye, Bakereta ba be ba lebelela dilo tšeo di sego tša šilafala e le tše šilafetšego. (Baroma 14:17; Bakolose 2:16) Le ge ba be ba bolela gore ba tseba Modimo, mediro ya bona e be e fapana le seo ba se bolelago.—Tito 1:16.

‘Dilo ka Moka di Hlwekile go ba Hlwekilego’

6. Paulo o boletše ka mehuta efe e mebedi ya batho?

⁶ Seo Paulo a se ngwaletšego Tito se ka re hola bjang? Ela hloko phapano e hwetšwago polelong ye: “Dilo ka moka di hlwekile go batho ba hlwekilego. Eupša go batho ba šilafetšego le ba se nago tumelo ga go na se se hlwekilego, ka ge menagano ya bona le matswalo a bona di šilafetše.” (Tito 1:15) Ka ntle le pelaelo, Paulo o be a sa bolele gore dilo ka moka di hlwekile e bile di a amogelega go Mokriste yo a itshwerego gabotse. Re ka kgodišega ka taba ye ka gobane Paulo o ile a e hlalosa gabotse lengwalong le lengwe ge a bolela gore yo a dirago bootswa, a rapelago medimo ya diswantšho, a dirišanago le meoya, le tše dingwe, a ka se “je bohwa bja Mmušo wa Modimo.” (Bagalatia 5:19-21) Ka gona re swanetše go phetha ka gore Paulo o be a bolela therešo ka mehuta e mebedi ya batho, ka bao ba nago le mekgwa e hlwekilego ya boitshwaro le go ba le tswalano e botse le Modimo gotee le ka bao ba sego bjalo.

7. Ke’ng seo Baheberu 13:4 e se ganetšago, gomme go ka rotoga potšišo efe?

⁷ Ga se gore dilo tšeo Mokriste yo a botegago a swanetšego go di efoga ke feela tšeo Beibele e di ganetšago ka go lebanya. Ka mohlala, ela hloko polelo ye yeo e lebanyago: “Lenyalo a le hlomphege go bohle, gomme malao a lenyalo a se be le ditšhila, gobane Modimo o tla ahlola diotswa le dihlotlolo.” (Baheberu 13:4) Gaešita le bao e sego Bakriste le bao ba sa tsebego selo ka Beibele ba ka phetha ka gore temana ye e iletša batho go dira bootswa. Go tšwa temaneng ye le ditemaneng tše dingwe tša Beibele, go molaleng gore Modimo ga a amogele monna goba mosadi yo a nyetšego yo a bago le dikopano tša botona le botshadi le motho yo mongwe yo e sego molekane wa gagwe wa lenyalo. Lega go le bjalo, go thweng ka batho ba babedi bao ba sego lenyalong bao ba bago le dikopano tša botona le botshadi ka go hupa ditho tša pelego? Bafsa ba lego mahlalagading ba bolela gore tiro ye ga e kotsi ka ge e se dikopano tša botona le botshadi. Na Mokriste a ka lebelela kopano ya botona le botshadi ya go hupa ditho tša pelego e le e hlwekilego?

8. Mabapi le dikopano tša botona le botshadi tša go hupa ditho tša pelego, Bakriste ba fapana bjang le batho ba lefase?

 ⁸ Baheberu 13:4 le 1 Bakorinthe 6:9 di bontšha gore Modimo o hloile mekgwa ye ka bobedi, bohlotlolo le bootswa (por·neiʹa, ka Segerika). Lentšu le la Segerika le akaretša’ng? Le akaretša go dirišwa ga ditho tša pelego ka tsela ya tlhago goba e gobogilego ka maikemišetšo a go dira selo se se gobogilego. Le akaretša mekgwa ka moka e sa amogelegego ya dikopano tša botona le botshadi tša ka ntle ga lenyalo leo le dumelelanago le Mangwalo. Ka gona seo se akaretša le dikopano tša botona le botshadi tša go hupa ditho tša pelego, go sa šetšwe gore bafsa ba bantši lefaseng ka bophara ba boditšwe gore dikopano tša botona le botshadi tša go hupa ditho tša pelego di a amogelega goba ba nagana bjalo. Bakriste ba therešo ga ba thee dikgopolo le ditiro tša bona dikgopolong tša “bao ba bolelago tše di se nago mohola [le] bafori ba monagano.” (Tito 1:10) Ba kgomarela tekanyetšo e phagamego ya Mangwalo a Makgethwa ya boitshwaro. Go e na le go leka go emelela dikopano tša botona le botshadi tša go hupa ditho tša pelego, ba kwešiša gore go ya ka Mangwalo seo ke bootswa, por·neiʹa, gomme ba tlwaetša matswalo a bona gore a se ke a thekga mokgwa wo. *—Ditiro 21:25; 1 Bakorinthe 6:18; Baefeso 5:3.

Mantšu a sa Swanego, Diphetho tše sa Swanego

9. Ge e ba “dilo ka moka di hlwekile,” letswalo le tla kgatha tema efe?

⁹ Eupša Paulo o be a e-ra go re’ng ge a be a re “dilo ka moka di hlwekile go batho ba hlwekilego”? Paulo o be a bolela ka Bakriste bao ba ilego ba dira gore dikgopolo tša bona le boitshwaro di dumelelane le ditekanyetšo tša Modimo, tšeo re di hwetšago ka Lentšung la gagwe leo le buduletšwego. Bakriste ba bjalo ba lemoga gore ditabeng tše dintši tšeo di sa iletšwego ka go lebanya, badumedi ba tla dira diphetho tše sa swanego. Go e na le gore ba ahlole ba bangwe, ba lebelela dilo tšeo Modimo a sa di iletšego di “hlwekile.” Ga ba letele gore batho ba bangwe ba nagane ka tsela yeo bona ba naganago ka yona ditabeng tše itšego tša bophelo tšeo go tšona Beibele e sa neego tlhahlo e lebanyago. Anke re boneng gore se se ka direga bjang.

10. Lenyalo (goba poloko) le ka tsoša tlhohlo bjang?

¹⁰ Go na le malapa a mantši ao molekane yo mongwe a fetogilego Mokriste eupša yo mongwe e sego Mokriste. (1 Petro 3:1; 4:3) Se se ka rotoša ditlhohlo tše sa swanego, go swana le ge go e-na le lenyalo goba lehu la wa leloko. Nagana ka boemo bja mosadi wa Mokriste yo monna wa gagwe a nago le ditumelo tša gagwe tše fapanego. Yo mongwe wa leloko labo monna o a nyala, gomme tirelo e tla swarelwa ka kerekeng ya Bojakane. (Goba, wa leloko, mohlomongwe motswadi, o hlokofetše gomme tirelo ya poloko e tla swarelwa ka kerekeng.) Balekane ba ba laleditšwe go ba gona, gomme monna o nyaka gore mosadi wa gagwe a ye le yena. Letswalo la mosadi wa gagwe le re’ng mabapi le go ya fao? Ke’ng seo a tlago go se dira? Nagana ka dilo tše tše pedi tšeo di ka diregago.

11. Hlalosa kamoo mosadi wa Mokriste a ka neago mabaka ka gona mabapi le go ya lenyalong leo le tlago go swarelwa ka kerekeng, gomme mafelelo e tla ba afe?

¹¹ Loisa o naganišiša ka taelo e bohlokwa ya Beibele e rego, ‘E-tšwang go Babilona o Mogolo,’ mmušo wa lefase wa bodumedi bja maaka. (Kutollo 18:2, 4) O kile a ba setho sa kereke yeo lenyalo le tlogo swarelwa go yona, gomme o a tseba gore nakong ya tirelo bohle bao ba lego gona ba tla kgopelwa gore ba tšee karolo ditirong tša bodumedi tše bjalo ka thapelo, go opela goba ditiro tše dingwe tša bodumedi. O ikemišeditše gore a se tšee karolo ditirong tšeo, e bile o tloga a sa nyake go ba fao moo a ka gateletšegago gore a robe potego ya gagwe. Loisa o hlompha monna wa gagwe, yoo go ya ka Mangwalo e lego Hlogo ya gagwe, gomme o nyaka go dirišana le yena; lega go le bjalo, ga a nyake go roba melao ya gagwe ya motheo ya Mangwalo. (Ditiro 5:29) Ka gona, ka bohlale o hlalosetša monna wa gagwe gore le ge monna a kgetha go ya fao, yena a ka se kgone go ya. A ka mo hlalosetša le gore ge a ka ya gomme a se tšee karolo ditirelong tše dingwe,  seo se ka hlabiša monna wa gagwe dihlong, ka gona go se ye ga gagwe go ka ba kaone bakeng sa monna wa gagwe. Phetho ya gagwe e dira gore a boloke letswalo le le hlwekilego.

12. Motho yo mongwe a ka nea mabaka bjang mabapi le go ya lenyalong leo le tlago go swarelwa ka kerekeng?

¹² Ruthe o na le bothata bjo bo swanago. O hlompha monna wa gagwe; o ikemišeditše go botegela Modimo, gomme o theetša letswalo la gagwe leo le tlwaeditšwego ka Beibele. Ka morago ga go nagana ka dintlha tše swanago le tšeo Loisa a di hlahlobilego, Ruthe ka thapelo o hlahloba “Dipotšišo tše Tšwago go Babadi” ka go Morokami wa May 15, 2002. O gopola gore Baheberu ba bararo ba ile ba kwa taelo ya go ya moo borapedi bja seswantšho bo bego bo tla dirwa gona, eupša ba ile ba dula ba botega ka go se tšee karolo tirelong yeo ya go rapela seswantšho. (Daniele 3:15-18) O kgetha go sepela le monna wa gagwe eupša a ka se tšee karolo ditirong le ge e ka ba dife tša borapedi, gomme o dira ka go dumelelana le letswalo la gagwe. Ka bohlale eupša ka tsela e kwagalago o hlalosetša monna wa gagwe seo letswalo la gagwe le ka mo dumelelago go se dira le seo le ka se mo dumelelego go se dira. Ruthe o holofela gore monna wa gagwe o tla bona phapano gare ga borapedi bja therešo le bja maaka.—Ditiro 24:16.

13. Ke ka baka la’ng re sa swanela go tshwenywa ke ge Bakriste ba babedi ba fihlelela diphetho tše di sa swanego?

¹³ Na taba ya gore Bakriste ba babedi ba ka fihlelela diphetho tše sa swanego e šišinya gore ga go na taba gore motho o dira eng goba na e bontšha gore yo mongwe o na le letswalo le le fokolago? Aowa. Ka baka la phihlelo ya gagwe ya pejana ka mmino le mekgabišo ditirelong tša kereke, Loisa a ka ba a lemoga gore go ba fao go ka mmea kotsing. Le gona ditirišano tša gagwe tša pele le monna wa gagwe mabapi le ditaba tša bodumedi di ka kgoma tsela yeo letswalo la gagwe le šomago ka yona. Ka gona o kgodišegile gore phetho yeo a e dirilego e mo swanetše.

14. Ke’ng seo Bakriste ba swanetšego go se gopola mabapi le ditaba tšeo di nyakago gore motho a itirele phetho?

¹⁴ Eupša na phetho ya Ruthe e ka ba e fošagetše? Ga go yo a swanetšego go mo ahlola. Ga se ba swanela go mo ahlola goba go mo sola ka ge a kgethile go ya moo eupša a sa tšee karolo ditirelong tša bodumedi. Gopola keletšo ya Paulo mabapi le diphetho tšeo motho a itirelago tšona mabapi le go ja goba go se je dijo tše itšego, ge a re: “Yo a jago a a se ke a lebelelela yo a sa jego fase, gomme yo a sa jego a a se ke a ahlola yo a jago . . . Ge a ema goba a e-wa ke tabeng ya mong wa gagwe. Ka kgonthe o tla emišwa, gobane Jehofa a ka mo emiša.” (Baroma 14:3, 4) Ka gona ga go na Mokriste yo a nyakago go kgothaletša motho yo mongwe go hlokomologa tlhahlo ya letswalo leo le tlwaeditšwego gabotse, ka gobane go dira bjalo go tla swana le go homotša lentšu leo le ka bolelago molaetša wa go phološa bophelo.

15. Ke ka baka la’ng matswalo le maikwelo a ba bangwe a swanetše go elwa hloko kudu?

¹⁵ Go tšwetša taba ye pele, Bakriste ka bobedi  ba swanetše go ela hloko dintlha tše oketšegilego, e nngwe e ka ba kamoo phetho e ka kgomago ba bangwe ka gona. Paulo o re eleditše gore: “Dirang se phetho ya lena gore le se bee tšhitišo goba sekgopi pele ga ngwanabo lena.” (Baroma 14:13) Loisa a ka tseba gore boemo bjo bo swanago bo bakile manyami ka phuthegong goba ka lapeng la gagwe, gomme seo a se dirago se ka kgoma bana ba gagwe. Go fapana le moo, Ruthe a ka ba a tseba gore diphetho tše swanago ga se tša ka tša kgopiša ba bangwe ka phuthegong goba motseng. Basadi ba ba babedi—le rena ka moka—ba swanetše go lemoga gore letswalo leo le tlwaeditšwego gabotse le lemoga kamoo phetho e ka kgomago ba bangwe ka gona. Jesu o itše: “Mang le mang yo a kgopišago yo mongwe wa ba banyenyane ba bao ba dumelago go nna, go kaone ge go ka be go tlemeletšwe lwala la go swana le leo le dikološwago ke pokolo molaleng wa gagwe gomme a nweletšwe lewatleng le legolo le le ahlamego.” (Mateo 18:6) Ge e ba motho a hlokomologa taba ya go kgopiša ba bangwe, a ka ba le letswalo leo le šilafetšego, go swana le Bakriste ba bangwe ba Kereta.

16. Ge nako e dutše e e-ya, ke diphetogo dife tšeo re ka di letelago go Mokriste?

¹⁶ Tšwelopele ya Mokriste ya moya e swanetše go gola, bjalo ka ge le go kwa le go theetša letswalo la gagwe go swanetše go tšwela pele. Anke re naganeng ka Mareka, yo a sa tšwago go kolobetšwa. Letswalo la gagwe le mmotša gore a efoge mekgwa e sego ya mangwalo yeo a bego a e dira pele, mohlomongwe yeo e akaretšago medingwana ya diswantšho goba madi. (Ditiro 21:25) Ge e le gabotse, ga bjale o efoga dilo ka šedi gaešita le dilo tšeo di nyakilego di swana le tšeo Modimo a di ganago. Ka lehlakoreng le lengwe, o makatšwa ke gore batho ba bangwe ba gana dilo tšeo yena a bonago di amogelwa, tše bjalo ka mananeo a itšego a thelebišene.

17. Bontšha kamoo go feta ga nako le go gola moyeng go ka kgomago letswalo le diphetho tša Mokriste.

¹⁷ Ge nako e dutše e e-ya, tsebo ya Mareka e a gola gomme o batamela kgaufsi le Modimo. (Bakolose 1:9, 10) Ka mafelelo afe? Lentšu leo le lego ka go yena le tlwaetšwa ka mo go tseneletšego. Ga bjale Mareka o sekametše kudu go theetšeng letswalo la gagwe le go hlahloba melao ya motheo ya Mangwalo ka kelohloko. Ge e le gabotse, o lemoga gore dilo tše dingwe tšeo “di nyakilego di swana” tšeo a bego a di efoga ge e le gabotse ga di thulane le kgopolo ya Modimo. Go oketša moo, ka go theetša melao ya motheo ya Beibele le go latela letswalo la gagwe leo le tlwaeditšwego gabotse, ga bjale Mareka o hlahlwa ke letswalo la gagwe go efoga mananeo ao pele a bego a nagana gore a a amogelega. Ee, letswalo la gagwe le hlwekišitšwe.—Psalme 37:31.

18. Ke’ng seo se re thabišago?

¹⁸ Diphuthegong tše dintši, go na le batho bao ba lego maemong ka moka a fapa-fapanego a kgolo ya Bokriste. Ba bangwe ba bona ke ba bafsa tumelong. Mohlomongwe matswalo a bona ga a re selo ditabeng tše itšego, eupša a ba kgoma ka mo go tseneletšego ditabeng tše dingwe. Ba bjalo ba ka nyaka nako le thušo gore ba tlwaele tlhahlo ya Jehofa le go latela matswalo a bona a tlwaeditšwego gabotse. (Baefeso 4:14, 15) Ka lethabo, ka diphuthegong tšona tšeo, go ka ba go e-na le ba bantši bao ba nago le tsebo e tseneletšego, phihlelo ya go diriša melao ya motheo ya Beibele, le matswalo ao a dumelelanago le kgopolo ya Modimo. Go thabiša gakaakang go ba gare ga ‘batho ba bjalo ba hlwekilego’ bao ba bonago “se se hlwekilego” dilong tšeo di amogelegago go Morena! (Baefeso 5:10) Eka ka moka ga rena re ka ba le pakane ya go gola go fihla bokgoleng bjoo le go kgomarela matswalo a bjalo ka go dumelelana le tsebo e nepagetšego ya therešo le ya boineelo go Modimo.—Tito 1:1.

[Mongwalo wa tlase]

O be o tla Araba Bjang?

• Ke ka baka la’ng Bakriste ba bangwe ba Kereta ba be ba e-na le matswalo a šilafetšego?

• Ke bjang Bakriste ba babedi bao ba nago le matswalo a šomago ba ka dirago diphetho tše sa swanego?

• Ge nako e dutše e e-ya, ke eng seo se swanetšego go direga ka matswalo a rena?

[Dipotšišo tša Thuto]

[Mmapa go letlakala 26]

(Bakeng sa taba e beakantšwego ka mokgwa wa kgatišo bona kgatišo ka boyona)

Sisilia

GERIKA

Kereta

ASIA MINOR

Tsipero

LEWATLE LA MEDITERRANEAN

[Seswantšho go letlakala 28]

Bakriste ba fapa-fapanego ge ba lebeletšane le maemo a swanago ba ka dira diphetho tše di sa swanego