Leba Seetšeng

DITORA TŠA MABONE di phološitše maphelo a sa balegego. Lega go le bjalo, seetša seo mosepedi yo a lapilego a se bonago se le kgole ga se fo nea temošo mabapi le mafsika a kotsi. Gape se bontšha gore o kgaufsi le go fihla moo a yago. Ka mo go swanago, Bakriste lehono ba kgaufsi le go fihla mafelelong a leeto le letelele, leo le ba sepedišitšego lefaseng leo le fsifetšego le leo le lego kotsi moyeng. Ka Beibeleng, batho ka kakaretšo—mašaba ao a arogilego go Modimo—ba swantšhwa le “lewatlê, xe le bilokana lè sa khutše, ’me meetse a lôna a nthša dirêtse le dithšila.” (Jesaya 57:20) Batho ba Modimo ba dikologilwe ke boemo bjo bjalo. Lega go le bjalo, ba na le tebelelo e phadimago ya phološo, yeo go bona e lego seetša sa seswantšhetšo seo se botegago. (Mika 7:8) Ka baka la Jehofa le Lentšu la gagwe le le ngwadilwego, “seedi se byaletšwe ba ba lokilexo; ba dipelo tša xo loka ba byaletšwe thabô.”—Psalme 97:11. *

Lega go le bjalo, Bakriste ba bangwe ba ile ba dumelela ditšhitišo di ba aroša seetšeng sa Jehofa moo e lego gore tumelo ya bona e ile ya pšhatlwa ke seo go ka thwego ke mafsika a radiago—go rata dilo tše di bonagalago, boitshwaro bjo bo gobogilego, goba gaešita le bohlanogi. Ee, go fo swana le lekgolong la pele la nywaga, ba bangwe lehono ‘tumelo ya bona e senyegile go swana le lesela-watle le le robegilego.’ (1 Timotheo 1:19; 2 Petro 2:13-15, 20-22) Lefase le lefsa le ka swantšhwa le boema-kepe bjoo re yago go bjona. Ka ge le le kgaufsi kudu gona bjale, ruri e tla ba mo go nyamišago ge yo mongwe a ka se sa hlwa a amogelwa ke Jehofa!

Phema go ‘Senyegelwa ke Tumelo ya Gago’

Nywaga-kgolong e fetilego, sekepe se be se ka sesa nako e telele ka lewatleng se šireletšegile gomme sa fo robega ge se batamela boema-kepe. Gantši karolo e tletšego boradia ya leeto e be e e-ba ge sekepe se batamela naga. Ka mo go swanago, go ba bantši nako e kotsi kudu historing ya batho ke ‘mehla ya bofelo’ bja tshepedišo ya gona bjale ya dilo. Beibele e bolela ka yona ka mo go nepagetšego e le e ‘lego thata go lebeletšana le yona,’ kudu-kudu go Bakriste bao ba ineetšego.—2 Timotheo 3:1-5.

Ke ka baka la’ng mehla ye ya bofelo e le e thata gakaakaa? Ge e le gabotse, Sathane o tseba gore o šaletšwe ke “nako e kopana” feela ya go lwa le batho ba Modimo. Ka gona, o okeditše lesolo la gagwe le lešoro la go senya tumelo ya bona. (Kutollo 12:12, 17) Lega go le bjalo, ga re hloke thušo goba tlhahlo. Jehofa o tšwela pele e le setšhabelo sa bao ba elago hloko keletšo ya gagwe. (2 Samuele 22:31) O re file mehlala ya temošo yeo e pepentšhago maano a Sathane a makatika le a mabe. Anke ga bjale re eleng hloko e mebedi ya mehlala e bjalo e akaretšago setšhaba sa Isiraele ge se be se batamela Naga ya Kholofetšo.—1 Bakorinthe 10:11; 2 Bakorinthe 2:11.

Kgaufsi le Naga ya Kholofetšo

Batho ba Isiraele ba ile ba kgona go tšwa Egipita ba etilwe pele ke Moše. Go se go ye kae, ba be ba le kgaufsi le mollwane wa ka borwa wa Naga ya Kholofetšo. Ke moka Moše o roma banna ba 12 gore ba ye go hlola naga. Dihlodi tše lesome tše di se nago tumelo di ile tša nea pego e mpe, di bolela gore Isiraele e be e ka se kgone go fenya Bakanana ka gobane e be e le banna “ba batelele” e bile ba e-na le matla go tša bohlabani.  Seo se ile sa kgoma Baisiraele bjang? Pego e re botša gore ba ile ba thoma go ngongorega pele ga Moše le Arone, ba re: “Ké eng Morêna à re iša naxeng yeo xore re y’o bolawa ka marumô, ’me basadi ba rena le bana ba rena e bê mathopya! . . . A re ipeeleng kxoši re boêlê Egipita.”—Numeri 13:1, 2, 28-32; 14:1-4.

Anke o nagane feela! Batho bona ba ba bone ge Jehofa a be a kokobetša Egipita e matla—mmušo wa lefase wa mehleng yeo—ka dikotlo tše lesome gotee le mohlolo wo o boifišago Lewatleng le Lehwibidu. Gomme ba be ba lebane le Naga ya Kholofetšo, moo e lego gore ba be ba ka fo leba go yona go swana le sekepe seo se lebago seetšeng seo se se bontšhago moo se yago gona. Lega go le bjalo, ba be ba dumela gore Jehofa ga a na bokgoni bja go pšhatlaganya mebušo e menyenyane le e aroganego ya Kanana. Ruri karabelo ye yeo e hlokago tumelo e swanetše go ba e nyamišitše Modimo le dihlodi tše pedi tše di nago le sebete, Jošua le Kalebe, tšeo di bego di bona Kanana e le “boxôbê [go Isiraele]”! Bobedi bjoo bo be bo bolela seo bo se bonego, ka ge bo ile bja ralala Kanana ka moka. Ge batho ba be ba sa tsene Nageng ya Kholofetšo, Jošua le Kalebe le bona ba ile ba swanelwa ke go tšwela pele ba ralala lešokeng ka nywaga e masome, eupša ga se ba ka ba hwela moo gotee le bao ba bego ba hloka tumelo. Ke therešo gore Jošua le Kalebe ba ile ba eta pele moloko o mofsa le go o ntšha lešokeng gomme ba o tsenya Nageng ya Kholofetšo. (Numeri 14:9, 30) Ge ba be ba batamela Naga ya Kholofetšo la bobedi, Baisiraele ba be ba tla lebana le teko e fapanego. Ba be ba tla arabela bjang?

Kgoši Balaka wa Moaba o ile a  leka go roga Isiraele a diriša moporofeta wa maaka e lego Bileama. Lega go le bjalo, Jehofa o ile a dira gore leano leo le folotše ka go dira gore Bileama a bolele ditšhegofatšo go e na le go bolela dithogako. (Numeri 22:1-7; 24:10) A se a nyamišwa ke go palelwa ga gagwe, Bileama o ile a loga leano le lengwe le lebe, leo le bego logetšwe go dira gore batho ba Modimo ba palelwe ke go hwetša naga. Bjang? Ka go ba dira gore ba wele boitshwarong bjo bo gobogilego le borapeding bja Baali. Gaešita le ge ka kakaretšo leano le ile la folotša, le ile la kgona go aroša Baisiraele ba 24 000. Ba ile ba ba le ditswalano tše di gobogilego le basadi ba Bamoaba gomme ba kgomarela Baali Peoro.—Numeri 25:1-9.

Anke o nagane ka seo! Ba bantši ba Baisiraele bona bao ba be ba bone ge Jehofa a ba eta pele a ba šireleditše ‘lešokeng leo le legolo le le šiišago.’ (Doiteronomio 1:19) Lega go le bjalo, ge ba le kgaufsi le go hwetša bohwa bja bona, batho ba Modimo ba 24 000 ba ile ba ineela dikganyogong tša nama gomme ba bolawa ke Jehofa. A temošo e kaakang go bahlanka ba Modimo lehono ge ba le kgaufsi le go hwetša bohwa bjo bogolo kudu!

Tekong ya gagwe ya mafelelo ya go thibela bahlanka ba Jehofa ba mehleng yeno go hwetša moputso wa bona, Sathane ga a tsome mekgwa e mefsa. Leanong la gagwe leo le re gopotšago seo se diragaletšego Isiraele ge e be e batamela Naga ya Kholofetšo la mathomo, Sathane gantši o leka go re dira gore re tšhoge le gore re belaele, e ka ba ka go diriša ditšhošetšo, tlaišo goba dikwero. Bakriste ba bangwe ba ile ba ineela ditšhošetšong tše bjalo. (Mateo 13:20, 21) Leano le lengwe leo le šomago ke la go senya boitshwaro bja batho. Ka dinako tše dingwe, ba bangwe bao ba tsenego ka phuthegong ya Bokriste ka maikemišetšo a mabe ba ile ba leka go senya bao ba fokolago moyeng le bao ba sa sepelego ka kgodišego seetšeng sa Modimo.—Juda 8, 12-16.

Go bao ba godilego e bile ba phafogilego moyeng, go phuhlama ka lebelo ga lefase boitshwarong ke bohlatse bjo matla bja tlalelo ya Sathane. Ee, Sathane o a tseba gore ga go na selo seo a tla kgonago go se dira bahlanka ba Modimo kgaufsinyane. Ka gona ye ruri ke nako ya gore re dule re phafogile moyeng, re phafogetše maano a Sathane.

Dithušo tša go Dula re Phafogile Moyeng

Moapostola Petro o hlalositše lentšu la Modimo la boporofeta e le “lebone le le bonegilego lefelong la lefsifsi,” ka gobane le thuša Bakriste go bona ka kwešišo go phethagatšwa ga morero wa Modimo. (2 Petro 1:19-21) Bao ba hlagolelago lerato la go rata Lentšu la Modimo le go tšwela pele ba hlahlwa ke lona ba kgona go bona gore Jehofa o tla ba thulela tsela. (Diema 3:5, 6) Ka ge ba e-na le kholofelo e tletšego, ba bjalo bao ba lebogago ba “hlalala ba iphsina,” mola bao ba sa tsebego Jehofa goba ba tlogelago tsela ya gagwe ka mo go feletšego ba e-na le “masetlapelo” e bile ba “hlôboxile.” (Jesaya 65:13, 14) Lega go le bjalo, ka go ithuta Beibele ka mafolofolo le ka go diriša seo re ithutago sona, re ka dula re tsepamišeditše mahlo a rena kholofelong e kgonthišeditšwego go e na le lethabong la lebakanyana la tshepedišo ya gona bjale ya dilo.

Thapelo le yona e bohlokwa ge re nyaka go dula re phafogile moyeng. Ge a be a bolela ka bofelo bja tshepedišo ya gona bjale ya dilo, Jesu o itše: “Ka gona, dulang le phakgame ka dinako tšohle le lopa gore le atlege ka go phonyokga dilo tše ka moka tše di reretšwego go direga, le go ema pele ga Morwa wa motho.” (Luka 21:34-36) Ela hloko tirišo ya Jesu ya lentšu “lopa,” e lego mohuta wa thapelo e tseneletšego kudu. Jesu o be a tseba gore kholofelo ya bophelo bjo bo sa felego e be e tla ba kotsing ya go lahlega mo dinakong tše tšeo di hlobaetšago. Na dithapelo tša gago di bontšha kganyogo ya gago ya go dula o phafogile moyeng?

A re se keng ra lebala gore nako e kotsi kudu ya leeto la go ya bohweng bja rena e ka ba mafelelong a leeto la rena. Ka gona, go bohlokwa kudu gore re se ke ra lahlegelwa ke seetša seo se ka re išago phologong.

Phafogela Dietša tša Maaka

Mehleng ya ge go be go sa seswa ka dikepe, kotsi e nngwe e be e e-tšwa go batho ba babe bao ba bego ba rata mašego a se nago ngwedi ge basesiši ba dikepe ba thatafalelwa ke go bona lebopo.  Batho ba ba ka tšama ba bea mabone mafelong a kotsi a lebopo e le go fora balaodi ba masela-watle gore ba fetoše tsela yeo ba e swerego. Bao ba forwago ba ka robegelwa ke dikepe tša bona, dithoto tša bona tša hulwa e bile ba ka lahlegelwa ke maphelo a bona.

Ka tsela e swanago, Sathane, “morongwa wa seetša” wa bofora, o nyaka go hula batho ba Modimo tswalano ya bona le Yena. Diabolo a ka diriša “baapostola ba maaka” le “badiredi ba toko” ba bahlanogi go fora bao ba sego ba tia. (2 Bakorinthe 11:13-15) Eupša go fo swana le molaodi wa sekepe yo a phafogilego le yo a nago le phihlelo gotee le banamedi bao ba sa forwego gabonolo ke dietša tše forago, Bakriste “bao ka go diriša matla a bona a tlwaeditšwego a go hlatha, ba kgethologanyago se se nepagetšego le se se fošagetšego” ga ba arošwe ke bao ba etišago pele dithuto tša maaka le difilosofi tše di gobatšago.—Baheberu 5:14; Kutollo 2:2.

Basesiši ba be ba swara lelokelelo la ditora tša mabone tšeo ba bego ba tla kopana le tšona tseleng. Lelokelelo leo le be le e-na le dika tša tora e nngwe le e nngwe ya lebone, go akaretša le lebone la yona la moswana-noši. The World Book Encyclopedia e re: “Basesiši ba hwetša gore ke tora efe ya lebone yeo ba e bonago—gomme ka go rialo ba bona gore ba tla kae—ka go šetša dika tša tora ya lebone le go lebelela lelokelelo leo la dietša.” Ka mo go swanago, Lentšu la Modimo le thuša batho ba dipelo tše di botegago go lemoga borapedi bja therešo le bao ba lego go bjona, kudu-kudu mo mehleng ya bofelo ge Jehofa a bo phagamišeditše godimo ga madumedi ka moka a maaka. (Jesaya 2:2, 3; Maleaki 3:18) Ge e bolela ka phapano e kgolo magareng ga borapedi bja therešo le bja maaka, Jesaya 60:2, 3 e re: “Lefsifsi le khurumeditše lefase, boso bo thibile dithšabeng; xomme wene, s’etša se Xo hlabêlaxo ké Yêna Morêna; xo bônala letaxô la xaxwe xodimo xa xaxo. Ba-ntlê ba tlo tla seetšeng sa xaxo, le dikxoši di tlo tlêla ’etša sa masa a xaxo.”

Ge ba dimilione ba tšwago ditšhabeng ka moka ba tšwela pele ba hlahlwa ke seetša sa Jehofa, ba ka se felelwe ke tumelo ya bona mo mafelelong a leeto la bona. Go e na le moo, ba tla sepela ba šireletšegile matšatšing a šaletšego a tshepedišo ya gona bjale ya dilo ba ba ba fihla boema-kepeng bjo bo nago le khutšo bja lefase le lefsa.

[Mongwalo wa tlase]

[Seswantšho go letlakala 15]

Go swana le basesiši, Bakriste ba ela hloko gore ba se ke ba forwa ke dietša tša maaka