Na o Swanetše go Phelela Lehono Feela?

“GA NKE ke nagana ka bokamoso. Bo tla ka pela kudu.” Mantšu ao a tsopolwago gantši go thwe a boletšwe ke rathutamahlale yo a tumilego e lego Albert Einstein. Batho ba bantši ba ikwa ka tsela e swanago. Ba ka bolela gore: “O re’ng o tshwenyega ka bokamoso?” Goba o ka ba o kwile batho ba bolela dilo tše swanago le tše: “E-fo tšwela pele ka bophelo.” “Phelela lehono.” “Lebala ka la gosasa.”

Ke therešo gore kgopolo e bjalo e apareditšego ga e thome lehono. “E-ja, o nwe, gomme o thabe. Tše dingwe ka moka ga di bohlokwa.” Woo e be e le moano wa Baepikure ba bogologolo. Batho ba bangwe bao ba phetšego mehleng ya moapostola Paulo ba be ba e-na le pono e swanago. Pono ya bona e be e le ya gore “a re jeng gomme re nweng, gobane gosasa re tla hwa.” (1 Bakorinthe 15:32) Ba be ba dumela gore ke bophelo bjo bjo bokopana feela bjo bo lego gona, gomme ba ile ba kgothaletša kgopolo ya gore re swanetše go diriša bophelo bjoo ka botlalo.

Go badudi ba dimilione ba lefase, ruri go diriša bophelo bjo ka botlalo ga go bolele go phegelela maipshino ka kgopolo ya gore ke ona a bohlokwa kudu bophelong. Maemo a nyamišago ao batho ba bantši ba ikhwetšago ba le go ona a dira gore go katanela ga bona go phela lehono go dule go le bohloko e bile go le thata. Ke ka baka la’ng ba swanetše go nagana ka bokamoso, e lego “gosasa” mo gantši go bonagalago go tloga go sa phadime e bile go se na kholofelo?

Na re Swanetše go Rulaganyetša Bokamoso?

Gaešita le batho bao ba lego maemong ao a sa gateletšego kudu gantši ba nagana gore go rulaganyetša bokamoso ga go na mohola. Ba ka botšiša gore: “Ke tla be ke itshwenyetša’ng?” Ba bangwe ba ka bolela gore batho bao ba rulaganyago dilo ba tla feleletša ba nolegile moko goba ba nyamile. Gaešita le mopatriareka Jobo wa mehleng ya bogologolo o ile a lebeletšana le go hloka kholofelo mo gogolo ge a be a bona maano a gagwe a fo ‘pala,’ gomme go senyega seo nkabego se ile sa tlišetša yena le lapa la gagwe bokamoso bjo bo thabišago.—Jobo 17:11; Mmoledi 9:11.

Sereti sa mo-Scotland e lego Robert Burns se bapišitše boemo bja rena bja go ba tlalelong le bja legotlo la naga leo segola sa lona se ilego sa senywa ke Burns a se a ikemišetša nakong ya ge a be a lema. Legotlo le le ile la leka go iphološa ka morago ga ge le be le senyeditšwe segola sa lona. Sereti se ile sa nagana ka gore, ‘Ee, ruri ke gantši mo re  ikhwetšago re felelwa ke matla ge re lebeletšane le maemo ao re tlogago re sa kgone go a laola moo e lego gore gaešita le maano ao a logilwego gabotse kudu, gantši a a folotša.’

Ka gona, na go rulaganyetša bokamoso ga go na mohola? Therešo ke gore go se be le bokgoni bja go rulaganya gabotse go ka ba le mafelelo a kotsi kudu, ge madimo goba dikotsi tše dingwe tša tlhago di direga. Ka mohlala, ke therešo gore ga go na motho yo a bego a ka thibela Ledimo la Katrina. Eupša na ponelo-pele e kaone le thulaganyo e kaone nkabe di sa ka tša fokotša ditla-morago tšeo di bilego gona motseng woo le baduding ba wona?

O nagana’ng? Na ruri ke gabohlale go phelela lehono feela gomme ra hlokomologa bokamoso? Ela hloko seo sehlogo se se latelago se se bolelago tabeng ye.

[Diswantšho go letlakala 3]

“E-ja, o nwe, gomme o thabe. Tše dingwe ka moka ga di bohlokwa”

[Seswantšho go letlakala 4]

Na ponelo-pele le go rulaganya dilo go be go ka fokotša mafelelo ao a bilego gona a Ledimo la Katrina?

[Tlhaloso ya Mothopo]

U.S. Coast Guard Digital