“Disilifêra Le Dixauta Ké Tša-ka”

LEKGOLONG la botshelela la nywaga B.C.E., Kgoši Korese wa Peresia o ile a lokolla batho ba Modimo bothopša Babilona. Ba dikete ba ile ba boela Jerusalema go yo tsošološa tempele ya Jehofa, yeo e bego e le lešope. Boemo bja tša boiphedišo bja bao ba boilego bo be bo se bja tsepama, le gona dinaga tša baagišani di be di sa nyake gore ba tsošološe moago. Ke ka baka leo ba bangwe ba baagi ba ilego ba ipotšiša ge e ba ba tla tsoga ba feditše modiro woo o bohlokwa.

Ka moporofeta wa gagwe Hagai, Jehofa o ile a kgonthišetša baagi gore O na le bona. Modimo o itše: “Dithšaba ka moka ke tlo di šišinya, xwa tseb’o tla matsaka a dithšaba ka moka; ’me Ntlo yé ke tlo e tlatša letaxô.” Mabapi le go tshwenyega ka tša boiphedišo ga baagi, Hagai o ile a ba botša molaetša wo: “Disilifêra le dixauta ké tša-ka.—Ó r’yalo Morêna wa mašaba.” (Hagai 2:7-9) Nywaga e mehlano ka morago ga ge Hagai a boletše mantšu ao a kgothatšago, mošomo wa go aga o ile wa phethwa.—Esera 6:13-15.

Mantšu a Hagai a kgothaditše le bahlanka ba Modimo kudu mehleng yeno nakong ya mediro e megolo yeo e tswalanago le borapedi bja Jehofa. Ka 1879 ge sehlopha sa mohlanka yo a botegago le wa temogo se be se thoma go gatiša makasine wo, woo ka nako yeo o bego o bitšwa Zion’s Watch Tower and Herald of Christ’s Presence, o be o e-na le tsebišo e latelago: “Re dumela gore ‘Zion’s Watch Tower’ e thekgwa ke JEHOFA, gomme ge se se le ka tsela ye le ka mohla e ka se ke ya kgopela goba ya lopa batho gore ba e thekge. Nakong ya ge Yo a rego: ‘Gauta ka moka le silifera ya dithabeng ke tša-ka’ a palelwa ke go nea tšhelete e nyakegago, gona re tla lemoga se e le nako ya go kgaotša go gatiša.”

Go gatiša ga se gwa ka gwa kgaotša. Kgatišo ya mathomo e bile le dikopi tše 6 000, ka Seisemane feela. Lehono, go gatišwa palo-gare ya dikopi tše 28 578 000 bakeng sa kgatišo e nngwe le e nngwe, ka maleme a 161. * Makasine wa Phafoga! wo o sepedišanago le wa Morokami, o gatišwa ka palo-gare ya dikopi tše 34 267 000, ka maleme a 81.

Dihlatse tša Jehofa di phetha mešomo e megolo yeo e nago le morero o swanago le wa Morokami—e lego go godiša Jehofa bjalo ka Morena yo a Phagamego wa legohle le go tsebatša ditaba tše dibotse tša Mmušo wa gagwe. (Mateo 24:14; Kutollo 4:11) Dihlatse le lehono di sa na le kgodišego e swanago le yeo e boletšwego ke makasine wo ka 1879. Di dumela gore Modimo o thekga modiro wa tšona le gore ditšhelete di tla hwetšagala bakeng sa mešomo yeo a e šegofatšago. Lega go le bjalo, mediro ya Dihlatse tša Jehofa e thekgwa bjang ka tša ditšhelete? Le gona ke mešomo efe yeo di e dirago bakeng sa go bolela ditaba tše dibotse lefaseng ka bophara?

Mošomo o Hlokomelwa Bjang ka tša Ditšhelete?

Gantši ge Dihlatse tša Jehofa di bolela phatlalatša di botšišwa potšišo ye, “Na le a lefša bakeng sa modiro wa lena?” Karabo ke aowa, ga di lefše. Di neela ka nako ya tšona ntle le tefo. Baebangedi ba ba fetša diiri tše dintši ba boledišana le batho ba bangwe ka Jehofa le ka kholofetšo ya Beibele ya bokamoso bjo bokaone ka baka la gore tebogo yeo ba nago le yona e ba šušumetša go dira bjalo. Ba leboga seo Modimo a ba diretšego sona le kamoo molaetša wa ditaba tše dibotse o kaonefaditšego maphelo le ponagalo ya bona ka gona. Ka baka leo, ba nyaka go boledišana le ba bangwe ka ditaba tše tše dibotse. Ka go dira bjalo, ba latela molao wa motheo woo o ilego wa bolelwa ke Jesu, o rego: “Le amogetše feela, neang feela.” (Mateo 10:8) Ka kgonthe, kganyogo ya bona ya go ba Dihlatse tša Jehofa le tša Jesu e ba tutueletša go diriša  tšhelete ya bona bakeng sa go boledišana le ba bangwe ka ditumelo tša bona, gaešita le bao ba dulago kgole le bona.—Jesaya 43:10; Ditiro 1:8.

Bogolo bja modiro wo wa go bolela le mekgwa yeo e dirišetšwago go o phetha—mafelo a go gatiša, diofisi, Diholo tša Dikopano, magae a baromiwa, bjalo bjalo—di dira gore go be le ditshenyagalelo tše dintši. Tšhelete e tšwa kae? Tšhelete yeo e dirišwago go lefelela dilo tše ka moka e tšwa meneelong ya boithatelo. Dihlatse tša Jehofa ga di gapeletše ditho tša phuthego gore di ntšhe tšhelete bakeng sa go thekga mediro ya mokgatlo, goba go rekišetša batho dipuku tšeo di di sepedišago. Ge motho le ge e le ofe a kganyoga go neela bakeng sa go thekga modiro wa tšona wa go ruta, Dihlatse di amogela moneelo woo ka lethabo. A re hlahlobeng seo se akaretšwago karolong e tee feela ya maiteko a go bolela ditaba tše dibotse lefaseng ka bophara—bofetoledi.

Dikgatišo ka Maleme a 437

Ka nywaga e mentši dikgatišo tša Dihlatse tša Jehofa e be e dutše e le tše dingwe tša tšeo di fetolelwago ka bontši lefaseng. Go fetolelwa dipampišana, diporoutšha, dimakasine le dipuku ka maleme a 437. Go ba gona, go swana le mediro e mengwe yeo e akaretšwago go boleleng ditaba tše dibotse, bofetoledi bo nyaka didirišwa tše dintši. Modiro wa bofetoledi o akaretša’ng?

Ge barulaganyi ba dikgatišo tša Dihlatse tša Jehofa ba feditše go ngwala dikagare tša sehlogo sa Seisemane, ba di romela lefaseng ka bophara ka elektroniki go dihlopha tša bafetoledi bao ba tlwaeditšwego. Sehlopha se sengwe le se sengwe sa go fetolela se ikarabela ka le lengwe la maleme ao dikgatišo tšeo di tlogo tšweletšwa ka lona. Dihlopha tše di ka bopša ke batho ba e ka bago ba 5 go ya go ba 25, go ithekgile ka palo ya mediro yeo di e dirago le ka go raragana ga leleme—leo go fetolelwago go lona.

Taba yeo e fetoletšwego e a lekolwa le go hlahlobja. Morero ke gore dikgopolo  tšeo di ngwadilwego ka Seisemane di fetolelwe ka tsela e nepagetšego le e kwagalago ka mo go kgonegago. Se se baka mathata a mantši. Ge ba fetolela taba yeo e dirišitšego tlotlontšu e kgethegilego, go ka nyakega gore bafetoledi le bahlahlobi ba mmalelo ba dire nyakišišo e tseneletšego ka leleme leo taba e ngwadilwego ka lona (Seisemane, goba leleme le lengwe leo go ka bago go fetolelwa go tšwa go lona, bjalo ka Sefora, se-Russia, goba Sepaniši) le ka leleme leo go fetolelwago go lona bakeng sa go kgonthišetša gore seo ba se fetolelago se nepagetše. Ka mohlala, ge sehlogo sa Phafoga! se ahla-ahla taba yeo e raraganego goba ya histori, bafetoledi ba swanetše go dira nyakišišo e tseneletšego gore ba tle ba kgone go e fetolela ka tsela e nepagetšego.

Bafetoledi ba bantši ba šoma diofising tša makala tša Dihlatse tša Jehofa, ka nako e tletšego goba ka nakwana. Ba bangwe ba šoma lefelong leo go bolelwago leleme leo ba le fetolelago. Bafetoledi ga ba lefše bakeng sa modiro wo ba o dirago. Bafetoledi ba nako e tletšego ba newa feela phapoši ya go robala, dijo le tšhelete e nyenyane ya tebogo ya go lefela ditshenyagalelo tša bona tša motheo. Lefaseng ka bophara, go na le Dihlatse tše 2 800 tšeo di hlankelago e le bafetoledi. Ga bjale, diofisi tša makala tša Dihlatse tša Jehofa tše 98 di na le dihlopha tša bafetoledi goba di hlokomela dihlopha tšeo di lego mafelong a mangwe. Go nea mohlala o tee feela, lekala la Russia le hlokomela bafetoledi ba 230 ba nako e tletšego goba ba nakwana bao ba fetolelago malemeng a fetago a 30, go akaretšwa le ao a sa tsebjego dinageng tše dingwe, a bjalo ka se-Chuvash, se-Ossetia le se-Uighur.

Go Kaonefatša Modiro wa Bofetoledi

Ka ge yo mongwe le yo mongwe yo a kilego a leka go ithuta leleme le lengwe a tseba, ga go bonolo go fetolela dikgopolo tše raraganego ka mo go nepagetšego. Morero ke go fetolela gabotse dintlha le dikgopolo tšeo di tšwago ka lelemeng leo go fetolelwago go tšwa go lona gomme ka nako e swanago go dirwe gore seo se fetolelwago se kwagale ka tsela ya tlhago, moo o ka rego se ngwadilwe ka leleme leo go  fetolelwago go lona. Go fihlelela se go nyaka bokgoni. Go tšea nywaga gore bafetoledi ba bafsa ba be le bokgoni bjoo, gomme Dihlatse tša Jehofa di ba nea tlhahlo e tšwelago pele. Bahlahli ka dinako tše dingwe ba etela dihlopha tše bakeng sa go di thuša go kaonefatša bokgoni bja go fetolela le bja go diriša lenaneo la computer.

Lenaneo le la go ruta le ba le mafelelo a mabotse. Ka mohlala, ofisi ya lekala ya Dihlatse tša Jehofa ya Nicaragua e bega gore: “Ke la mathomo bafetoledi ba rena ba se-Miskito ba hwetša tlhahlo go tšwa go mohlahli yo a tšwago lekaleng la Mexico mabapi le mekgwa le dithulaganyo tša bofetoledi. Se se dirile gore go be le phapano e kgolo tseleng yeo bafetoledi ba rena ba phethago kabelo ya bona ka yona. Bofetoledi bo kaonafetše kudu.”

Mantšu ao a Kgomago Pelo

Maiteko a go tšweletša Beibele le dipuku tšeo di theilwego Beibeleng ka leleme leo batho ba le bolelago a dirwa ka morero wa go fihlelela dipelo tša bona gomme seo se a direga. Ka 2006, Dihlatse tša Jehofa tša kua Bulgaria di ile tša thabišwa ke go lokollwa ga Phetolelo ya Lefase le Lefsa ya Mangwalo a Bakriste a Segerika ka se-Bulgaria. Lekala la Bulgaria le bega gore le lebogwa gantši bakeng sa yona. Ditho tša phuthego di bolela gore, “ga bjale Beibele e kgoma dipelo tša bona e le ka kgonthe, e sego menagano ya bona feela.” Monna yo mongwe yo a tšofetšego, yo a tšwago Sofia o boletše gore: “Ke badile Beibele ka nywaga e mentši, eupša ga se ka ka ka bala phetolelo yeo e kwešišegago gabonolo le yeo e fihlelelago pelo go swana le ye.” Ka mo go swanago, Hlatse e nngwe ya kua Albania e  boletše ka morago ga go hwetša kopi ya yona e feletšego ya New World Translation ka se-Albania, gore: “Ruri Lentšu la Modimo le a kgahliša ka se-Albania! Ke tokelo e kgolo gore Jehofa a bolele le rena ka leleme la rena!”

Go ka tšea sehlopha sa bafetoledi nywaga e mmalwa go fetolela Beibele ka moka. Eupša ge e ba mafelelo a seo a dira gore batho ba dimilione ba kgone go kwešiša Lentšu la Modimo e le ka kgonthe la mathomo, na ga o dumele gore seo se tloga se nyaka boiteko?

“Re Badirišani ba Modimo”

Go ba gona, bofetoledi ke feela o mongwe wa mediro e mentši yeo e nyakegago bakeng sa go bolela ditaba tše dibotse ka katlego. Go ngwala, go gatiša le go romela dipuku tšeo di theilwego Beibeleng le mediro e mengwe yeo e sepedišanago le yona ya makala, ditikologo le diphuthego tša Dihlatse tša Jehofa go nyaka boiteko bjo bogolo le ditšhelete. Lega go le bjalo, batho ba Modimo ‘ba ithapela’ go phetha modiro woo. (Psalme 110:3) Ba go lebelela e le tokelo go tsenya letsogo le gona ba go lebelela e le kgodišo ge Jehofa a ba lebelela e le ‘badirišani ba gagwe.’—1 Bakorinthe 3:5-9.

Ke therešo gore yo a rego “disilifêra le dixauta ké tša-ka” ga se a ithekga ka ditšhelete tša rena gore a phethe modiro wa gagwe. Lega go le bjalo, Jehofa o godišitše bahlanka ba gagwe ka go ba nea tokelo ya go tsenya letsogo go kgethagatšweng ga leina la gagwe ka go thekga modiro wa bona wa “ditšhaba tšohle” wa ditherešo tšeo di phološago maphelo. (Mateo 24:14; 28:19, 20) Na ga o kwe o tutueletšega go dira sohle seo o ka se kgonago go thekga modiro wo woo o ka se kego wa dirwa gape?

[Mongwalo wa tlase]

[Lepokisi go letlakala 18]

“DI DIRA GORE RE NAGANE KA MO GO TSENELETŠEGO”

Ngwanenyana wa nywaga e 14 o ngwaletše lekala la Dihlatse tša Jehofa la Cameroon gore: “Ka morago ga ge ke feditše go reka ditlabakelo tša sekolo tša ngwaga, ke ile ka kgona go rekiša dipuku tša mphato o fetilego ka di-franc tše 2 500 [R37]. Ke neela ka tšhelete ye e bile ke e tlaleletša ka di-franc tše 910 [R13,50] tše tšwago bobolokelong bja-ka. Ke rata go le kgothaletša gore le tšwele pele ka modiro o mobotse woo le o dirago. Ke leboga dimakasine tša Morokami le Phafoga! Di dira gore re nagane ka mo go tseneletšego.”

[Lepokisi/Seswantšho go letlakala 18]

MONEELO WA MOSWANA-NOŠI

Ofisi ya lekala ya Dihlatse tša Jehofa ya Mexico e amogetše lengwalo le le latelago go tšwa go Manuel wa nywaga e tshelelago, yo a dulago Chiapas State. Ka ge ga bjale a se a hlwa a kgona go ngwala, o ngwaletšwe ke mogwera wa gagwe. Manuel o re: “Makgolo o ile a mpha kolobe ya tshadi. Ge e be e hlatšitše dikolobjana, ke ile ka kgetha e botse go di feta gomme ka e godiša ke thušwa ke bana babo rena. Ka lerato ke le romela moneelo woo ke o hweditšego ge ke rekiša kolobe yeo. E be e imela di-pound tše 220 [100 kg] gomme ke ile ka e rekiša ka di-peso tše 1 250 [R830]. Hle dirišang tšhelete ye bakeng sa Jehofa.”

[Lepokisi go letlakala 19]

“E DIRIŠETŠENG GO FETOLELA BEIBELE”

Kopanong ya selete ya Dihlatse tša Jehofa kua Ukraine, go ile gwa lokollwa Phetolelo ya Lefase le Lefsa ya Mangwalo a Bakriste a Segerika ka se-Ukraine. Letšatšing le le latetšego, go ile gwa hwetšwa molaetša ka gare ga lepokisi la meneelo o rego: “Ke na le nywaga e senyane. Ke leboga Mangwalo a Segerika kudu. Mma o file nna le kgaetšedi ya-ka yo monyenyane tšhelete gore re lefelele pese ge re e-ya sekolong. Eupša ge pula e be e sa ne, re be re sepela ka maoto gomme re ile ra kgona go boloka di-hryvnia tše tše 50 [R73]. Nna le kgaetšedi ya-ka re rata gore le e dirišetšeng go fetolela Beibele e feletšego ka leleme la se-Ukraine.”

[Lepokisi go letlakala 20, 21]

DITSELA TŠEO KA TŠONA BA BANGWE BA KGETHAGO GO NEA

MENEELO BAKENG SA MODIRO WA LEFASE KA BOPHARA

Ba bantši ba beela ka thoko tekanyo ya tšhelete yeo ba e tsenyago ka mapokising a ngwadilwego “Meneelo Bakeng sa Modiro wa Lefase ka Bophara—Mateo 24:14.”

Kgweding e nngwe le e nngwe, diphuthego di romela ditšhelete tše ofising ya Dihlatse tša Jehofa yeo e hlankelago naga ya gabo tšona. Meneelo ya boithatelo ya ditšhelete le yona e ka romelwa ka go lebanya go Watch Tower Bible and Tract Society of South Africa, Attention: Accounting Office, Private Bag X2067, Krugersdorp, 1740, South Africa, goba ofising ya lekala ya Dihlatse tša Jehofa yeo e hlankelago naga ya geno. Ditšheke tšeo di romelwago atereseng yeo e lego ka mo godimo di swanetše go dirwa gore di lefelelwe go “Watch Tower.” Hle ikgokaganye le Ofisi ya Lekala ge e ba o rata go neela ka mabenyabje goba dilo tše dingwe tše bohlokwa. Ka morago ga moo, lengwalo le le kopana leo le bolelago gore selo se se bjalo ke mpho e neelwago ka go lebanya le swanetše go sepela le meneelo ye.

GO NEA MO GO RULAGANYEDITŠWEGO

Go tlaleletša go dimpho tša ditšhelete tše di newago ka go lebanya, go na le mekgwa e mengwe ya go nea bakeng sa go hola tirelo ya Mmušo ya lefase ka bophara. Ye e akaretša:

Phemelo (Inšuranse): Watch Tower Bible and Tract Society of South Africa e ka ngwadišwa e le moja-bohwa wa thulaganyo ya tša phemelo ya bophelo goba thulaganyo ya go rola modiro/phenšene.

Di-Stock le Di-Bond: Di-Stock le di-bond di ka neelwa go Watch Tower Bible and Tract Society of South Africa e le mpho e neelwago ka go lebanya.

Mafelo ao e Lego Dithoto: Mafelo ao e lego dithoto tšeo di ka rekišwago a ka neelwa e le mpho e neelwago ka go lebanya goba ge e ba e le lefelo la bodulo, ka go boloka thoto e le go monei, yo a ka tšwelago pele a dula go yona ge a sa dutše a phela. Ikgokaganye le ofisi ya lekala ya nageng ya geno pele o fetiša lefelo le ge e le lefe leo e lego thoto.

Dikeno: Dithoto goba tšhelete di ka tlogelelwa Watch Tower Bible and Tract Society of South Africa e le bohwa ka go dirišwa ga keno e dirilwego ka molao.

Bakeng sa tsebišo e oketšegilego, o ka ikgokaganya le Accounting Office, e ka ba ka go ngwala goba ka mogala atereseng yeo e lokeleditšwego ka mo tlase goba wa ikgokaganya le ofisi ya lekala ya Dihlatse tša Jehofa yeo e hlankelago naga ya geno.

Accounting Office

Watch Tower Bible and Tract Society of South Africa

Private Bag X2067

Krugersdorp, 1740

South Africa

Mogala: 011 761 1000

[Seswantšho go letlakala 19]

Bafetoledi ba se-Miskito, lekala la Nicaragua