Phihlelo

Ke Ithutile Go Bota Jehofa Ka Mo Go Feletšego

KA GE GO ANEGA AUBREY BAXTER

Mantšiboeng a Mokibelo o mongwe ka 1940, banna ba babedi ba ile ba ntlhasela, ba mpetha kudu ka ba ka wela fase. Maphodisa a mabedi a be a eme kgaufsi eupša go e na le gore a nthuše, a ile a nthoga gomme a reta bomphenyašilo bao. Maemo a bophelo bja-ka ao a ilego a dira gore ke swarwe gampe ka tsela yeo, a thomile nywaga e mehlano pejana ge ke be ke šoma moepong wa malahla. E re ke hlalose.

KE BELEGWE ka 1913 kua Swansea, motse o lego lebopong wa New South Wales, Australia, gomme ke mošemane wa boraro go bašemane ba bane. Ge ke be ke e-na le nywaga e mehlano, ditho tša lapa lešo ka moka di ile tša swarwa ke bolwetši bjo kotsi bja Kwatama, bjoo bo bolailego batho ba dimilione lefaseng ka bophara. Se se thabišago ke gore ka moka re ile ra fola. Lega go le bjalo, ka 1933 re ile ra welwa ke manyami ge mma a be a e-hwa a e-na le nywaga e 47. Ka ge e be e le mosadi yo a boifago Modimo, pejana o be a ile a amogela dibolumo tše pedi tša puku ya Light, tšeo di bego di sepedišwa ke Dihlatse tša Jehofa bakeng sa go thuša go ithuta Beibele.

Ka nako yeo, ke be ke šoma moepong wa malahla. Ka ge go be go e-ba le dinako tšeo mošomo o bego o e-ba o montši le dinako tšeo o bego o e-ba o monyenyane, ke be ke e-ya le dibolumo tšeo mošomong gomme ke di bala ke thušwa ke seetša sa lebone leo le lego kefeng ya-ka. Kapejana ke ile ka lemoga gore ke hweditše therešo. Le gona ke ile ka thoma go theetša dithuto tša Beibele tšeo Dihlatse di bego di di gaša seyalemoyeng. Go tlaleletša lethabong la-ka, tate le bo-mogolo’a-ka ba ile ba thoma go kgahlegela therešo ya Beibele.

Ka 1935, lapa lešo le ile la welwa ke manyami gape ge ngwanešo, Billy, a tsenwa ke nyumonia yeo e ilego ya mmolaya. O be a e-na le nywaga e 16 feela.  Lega go le bjalo, mo lebakeng le lapa lešo le ile la homotšwa ke kholofelo ya tsogo. (Ditiro 24:15) Ge nako e dutše e e-ya, tate le bo-mogolo’a-ka, Verner le Harold, gotee le basadi ba bona ba ile ba neela maphelo a bona go Modimo. Ka lapeng lešo ke nna feela yo a sa phelago. Lega go le bjalo, Marjorie e lego mosadi wa bobedi wa Verner, le Elizabeth mosadi wa Harold ba sa tšea karolo ka mafolofolo tirelong ya Jehofa.

Go Ithuta go Bota Jehofa

La mathomo ge ke be ke kopana le Dihlatse tša Jehofa ka go lebanya e be e le ka bo-1935, ge re be re etelwa ke mosadi wa mo-Ukraine yo a bego a sepela ka paesekele. Sontaga se se latetšego, ke ile ka ya sebokeng sa Bokriste la mathomo, ka morago ga beke, ke ile ka sepela le sehlopha seo se bego se e-ya bodireding bja tšhemo. Hlatse yeo e bego e swara seboka sa tirelo ya tšhemo e ile ya nnea dipukwana tše mmalwa gomme ka makala kudu ge e ntaela gore ke sepele ke nnoši. Ruri ke be ke tšhogile kudu ntlong ya mathomo yeo ke ilego ka tsena go yona moo ke bego ke duma eka lefase le ka bulega gomme ka tsena! Eupša mong wa ntlo o be a le botho gomme o ile a ba a amogela puku.

Mangwalo a bjalo ka Mmoledi 12:1 le Mateo 28:19, 20 a ile a nkgahla kudu moo ke ilego ka nyaka go ba mmulamadibogo, goba modiredi wa nako e tletšego. Tate o ile a thekga phetho ya-ka. Le ge ke be ke sešo ka kolobetšwa, ke ile ka bea letšatši la July 15, 1936, e le la go thoma modiro wa bobulamadibogo. Ka letšatši leo, ke ile ka ya ofising ya Dihlatse tša Jehofa kua Sydney, moo ke ilego ka laletšwa go šoma le sehlopha sa babulamadibogo ba 12 motseng o lego ka ntle ga toropo wa Dulwich Hill kua Sydney. Ba ile ba nthuta go diriša motšhene wa go šila korong, woo babulamadibogo ba bego ba o diriša go dira folouru e le gore ba fokotše ditshenyagalelo.

Go Bula Madibogo ka Sethokgweng

Ka morago ga ge ke kolobeditšwe moragonyana ngwageng woo, ke ile ka abelwa go ya Queensland ke e-na le babulamadibogo ba bangwe—Aubrey Wills le Clive Shade. Thoto ya rena e be e akaretša koloi ya Aubrey, dipaesekele, keramafomo e nyenyane bakeng sa go gaša dithuto tša Beibele, tente yeo e ilego ya fetoga legae la rena nywageng e meraro yeo e latetšego, mepete e meraro, tafola le pitša ya tšhipi. Bošegong bjo bongwe ge e be e le sebaka sa-ka sa go apea, ke be ke naganne go apea dijo tša go lalela tšeo di rothišago mare ka merogo le dijo tša korong. Eupša ga go le o tee wa rena yo a ilego a kgona go di ja. Go be go e-na le pere kgaufsi gomme ke ile ka e nea dijo tšeo. E ile ya di dupa, ya šikinya hlogo gomme ya sepela! Seo se ile sa dira gore ke se sa leka go apea dijo ka mekgwa e sa tlwaelegago.

Ge nako e dutše e e-ya, re ile ra dira phetho ya go aroganya tšhemo ya rena ka diripa tše tharo e le gore re e fetše ka pela gomme yo mongwe le yo mongwe o ile a šoma seripa sa gagwe. Gantši bofelong bja letšatši ke be ke sa boele lefelong la rena la tente ka ge ke be ke e-ba kgole le lona, ka gona ka dinako tše dingwe ke be ke robala bathong bao ba bego ba nkamogela ka borutho ba motse woo ke lego go wona. Lebakeng le lengwe ke ile ka robala mpeteng wa manobonobo ka phapošing ya go amogela baeng morakeng wa dikgomo, gomme bošegong bjo bo latetšego ka robala fase lebatong la ditšhila ngwakwaneng wa motsomi wa dikankaru, ke dikologilwe ke mekgopa yeo e nkgago. Gantši ke be ke robala ka sethokgweng. Ka nako e  nngwe, dimpša tša naga di ile tša ntikologa eupša di be di le kgole, ke be ke kgona go kwa feela ge di goba lefsifsing. Ka morago ga go se robale, ke ile ka lemoga gore di be di sa nyake nna eupša di be di nyaka diretlo tšeo di bego di lahlilwe kgaufsi.

Go Dira Boboledi ka Koloi e Nago le Segodiša-modumo

Re ile ra diriša koloi ya segodiša-modumo go tsebatša Mmušo wa Modimo. Motseng wa Townsville wo o lego ka leboa la Queensland, maphodisa a ile a re dumelela go ema bogareng bja toropo. Lega go le bjalo, thero yeo e gatišitšwego e ile ya galefiša ditho tše dingwe tša Salvation Army, tšeo di ilego tša re botša gore re tloge fao. Ge re gana, ba bahlano ba bona ba ile ba šikinya koloi ya rena ka matla. Ka nako yeo, ke be ke le ka gare ke laola segodiša-modumo. E be e se gabohlale go gapeletša go dula moo ka baka la ditokelo tša rena, ka gona ge banna bao ba tloga le rena re ile ra tloga.

Kua Bundaberg monna yo a bego a e-na le kgahlego o ile a re adima sekepe gore re ye go gaša ditaba tše dibotse re le ka Nokeng ya Burnett, yeo e putlago ka gare ga toropo. Aubrey le Clive ba ile ba sepela ka sekepe ba swere segodiša-modumo mola nna ke ile ka šala ka holong yeo re bego re e hirile. Bošegong bjoo lentšu le matla leo le gatišitšwego la Joseph F. Rutherford, a le ntlong-kgolo ya lefase ya Dihlatse tša Jehofa, le ile la goelela Bundaberg ka moka, le tsebatša molaetša o matla wa Beibele. Go ba gona, tšeo e be e le dinako tše thabišago kudu tšeo di bego di nyaka gore batho ba Modimo ba be le sebete le tumelo.

Ntwa e Tliša Ditlhohlo tše Oketšegilego

Ka moragonyana ga ge Ntwa ya II ya lefase e thomile ka September 1939, Morokami wa November  1 o ile wa ahla-ahla boema-gare bja Bakriste ditabeng tša dipolitiki le dintweng. Ka morago, ke ile ka thabela gore ke badile dintlha tšeo di bego di le nakong. Lega go le bjalo, ka morago ga nywaga e meraro re le gotee, nna, Aubrey le Clive re ile ra amogela dikabelo tšeo di ilego tša re iša mafelong a fapanego. Ke ile ka kgethwa bjalo ka molebeledi wa mosepedi kua leboa la Queensland, e lego kabelo yeo gantši e bego e tla bea go bota ga-ka Jehofa tekong.

Ka August 1940, ke ile ka hlankela phuthego ya Townsville, yeo e bego e e-na le babulamadibogo ba bane—Percy le Ilma Iszlaub * le bana ba motho e lego Norman le Beatrice Bellotti. Ka morago ga nywaga e tshelelago, Beatrice o ile a ba mosadi wa-ka. Mantšiboeng a Mokibelo o mongwe ka morago ga ge sehlopha sa rena se feditše go dira modiro wa setarateng, tlhaselo yeo e begilwego matsenong e ile ya direga. Lega go le bjalo, go hloka toka moo go ile gwa mpha matla a oketšegilego a gore ke tšwele pele tirelong ya Jehofa.

Dikgaetšedi tše pedi tša babulamadibogo, Una le Merle Kilpatrick, di be di šoma ka mafolofolo di le ka leboa. Ke ile ka fetša letšatši le le thabišago le tšona re le tirelong gomme di ile tša nkgopela gore ke di tshediše noka ka sekepe ke di iše lapeng leo le bego le bontšhitše kgahlego. Seo se be se bolela gore ke swanetše go rutha ke late seketswana seo se bego se emišitšwe ka lehlakoreng le lengwe la noka, ke boe ka sona gomme ke sesišetše dikgaetšedi tše ka lehlakoreng le lengwe la noka. Lega go le bjalo, ge ke fihla sekepeng mahuduo a sona a be a se gona! Re ile ra lemoga ka morago gore moganetši  yo mongwe o be a a utile. Eupša boradia bja gagwe ga se bja-ka bja re šitiša. Ka nywaga e mentši ke be ke le mohlakodiši wa batho bao ba nwelelago lewatleng gomme ke be ke sa na le bokgoni bja go rutha. Ka gona ke ile ka bofa thapo ya tshetledi dinokeng tša-ka, ka gogela sekepe go dikgaetšedi tšeo gomme ka boa le tšona. Jehofa o ile a šegofatša maiteko a rena, ka morago ga nako e itšego lapa leo le bego le kgahlegela le ile la fetoga Dihlatse.

Moriting wa Seatla sa Jehofa

Ka mabaka a tšhireletšo, mašole a ile a hloma mapheko a mebileng ka tlasenyana ga motse wa Innisfail. Ka ge ke be ke dula motseng woo, ke ile ka kgona go hwetša lengwalo la tumelelo la go tsena go wona, leo le ilego la ipontšha le se na mohola nakong ya ge baemedi ba tšwago ofising ya lekala ya Dihlatse tša Jehofa ba nketela. Ke be ke ba uta ka tlase ga setulo sa ka morago sa koloi ya-ka e le gore ke ba fetiše lephekong le.

Ka nako yeo makhura a be a lekanetšwa, gomme dikoloi tše ntši di be di tsentšwe ditlabakelo tša go fehla kgase. Go dira gore entšene e sepele, sedirišwa se se be se goga kgase go tšwa malahleng a tukago. Ke be ke sepela bošego ke rwele malahla ao a pakeletšwego moo ngwanabo rena a bego a khutile gona. Ge ke be ke ema lephekong la tsela, ke be ke gakantšha baleti ka go dira gore entšene e tšwele pele e duma le go kgonthišetša gore fanele ya malahla e fiša tšhiritšhiri. Ke ile ka goeletša bahlapetši bošegong bjo bongwe bjo bjalo ka re, “Ge nka emiša koloi, ke tla šitiša tshepedišo ya kgase gomme go e tloša gape go tla ba thata.” Ka ge baleti ba be ba rakwa ke phišo, lešata le mošidi ba ile ba lekola koloi ka bjako gomme ba ntlogela ka sepela.

Mehleng yeo ke be ke abetšwe go rulaganya kopano kua Townsville bakeng sa Dihlatse tša fao. Dijo di be di lekanyetšwa, gomme go be go tla nyakega tumelelo ya maseterata wa fao go hwetša tekanyo yeo re bego re e nyaka. Ka nako yeo, bana babo rena ba Bakriste ba be ba golegwa ka baka la boema-gare bja bona. Ka gona ge ke kgopetše sebaka sa go bona maseterata, ke ile ka ipotšiša gore, ‘Na ke dira ka bohlale goba na ke kgotla semana?’ Lega go le bjalo, ke ile ka tšwela pele bjalo ka ge ke be ke laetšwe.

A dutše ka morago ga tafola e botse e kgolo, maseterata o ile a re ke dule fase. Ge ke be ke mmotša morero wa ketelo ya-ka, o ile a šošobanya sefahlego gomme a ntebelela ka go se rate. Ka morago o ile a theoša maswafo gomme a re, “O nyaka dijo tše kaaka’ng?” Ke ile ka mo nea lelokelelo la tekanyo e nyenyane kudu ya dijo tšeo re bego re di nyaka. O ile a le hlahloba gomme a re: “Dijo tše di ka se lekane. Go kaone re di oketše gabedi.” Ke tšwile ka ofising ya gagwe ke leboga Jehofa kudu, yoo a nthutilego thuto e nngwe gape ya go mmota.

Modiro wa Dihlatse tša Jehofa o ile wa thibelwa kua Australia ka January 1941. Batho ba bantši ba ile ba re belaela ba ba ba re latofatša ka gore re ditshebi tša Japane! Ka nako e nngwe, dikoloi tše pedi tše tletšego maphodisa le mašole di ile tša šwahlela Polaseng ya Mmušo, karolo ya naga ya Atherton Plateau yeo re bego re e reketše go lema. Ba be ba tsoma lebone leo ba bego ba belaela gore re le dirišetša go lemoša manaba. Le gona re ile ra latofatšwa ka gore re bjetše mabele ka mokgwa wa go ngwala seka seo se bego se ka balwa ke motho yo a lego ka sefofaneng! Therešo ke gore ditatofatšo tše di ile tša bonagala gore ke tša maaka.

Ka baka la thibelo, re ile ra swanelwa ke go ba šedi—le go ba bohlale—ge re be re sepediša dipuku. Ka mohlala, ge puku ya Children e be e lokollwa, ke ile ka hwetša lepokisi la tšona kua Brisbane, ka ya leboa ka setimela gomme ke tšama ke tlogela dipuku tšeo maema-timeleng ao a bego a le kgaufsi le diphuthego. Go gakantšha bahlahlobi ba maphodisa le ba mašole gore ba se ke ba bula lepokisi, ke ile ka tla le saga e nyenyane gomme ke e bofelela lepokising pele ke fologa. Le ge leano le le be le le bonolo, le be le šoma ka mehla. Seo se ilego sa thabiša batho ba Jehofa ke gore thibelo—yeo moahlodi wa tsheko a e hlalositšego e “se ya molao, e se ya naganwa gabotse e bile e gatelela”—e ile ya tlošwa ka June 1943.

Go Biletšwa Tirelong ya tša Bohlabani

Nywageng e fetilego, Nna, Aubrey Wills le Norman Belloti, re ile ra biletšwa go tsenela tirelo ya bohlabani. Aubrey le Norman ba ile ba bitšwa beke pele ga-ka gomme ba ile ba ahlolelwa dikgwedi tše tshela kgolegong. Ka nako yeo, ofisi ya poso e be e thopa dimakasine tša Morokami tšeo di bego di rometšwe go Dihlatse tše tsebegago eupša e sa thope tšeo di bego di rometšwe go babeeletši ba bangwe. Kabelo ya rena e be e le go hwetša yo mongwe wa batho bao, re kopiše dimakasine, gomme re di abele Dihlatse tše  dingwe. Ka tsela ye re ile ra hwetša dijo tša moya ka mehla.

Ge kotlo yeo ke bego ke e letetše ya go ahlolelwa dikgwedi tše tshela e be e tsebatšwa, kapejana ke ile ka ipelaetša, ka ge ke be ke laetšwe ke ofisi ya lekala ya Sydney. Morero wa rena e be e le go ja nako pele nka thoma kotlo ya-ka, e le gore go kgethwe motho yo a ka hlokomelago modiro. Ke ile ka diriša tokologo yeo ya-ka go etela Dihlatse tše 21 tšeo di golegilwego kua leboa la Queensland. Bontši bja tšona bo be bo le ka kgolegong e tee gomme mohlokomedi wa kgolego wa moo o be a re hloile. Ge ke be ke mo gopotša gore baruti ba madumedi a mangwe ba be ba kgona go etela batho ba bona, o ile a galefa kudu. O ile a goeletša ka gore: “Ge nkabe ke e-na le matla, Dihlatse tša Jehofa ka moka di be di tla bewa ka methaladi gomme tša thunywa!” Kapejana bahlokomedi ba ile ba nkgogela ka ntle.

Ge nako ya go ipelaetša e be e fihla, ke ile ka hwetša moemedi ka ge molao o be o nyaka seo. Lega go le bjalo, ge e le gabotse ke ile ka ikemela, e lego seo se bego se bolela gore ke ithekge ka Jehofa ka mo go feletšego. Yena ka lehlakoreng le lengwe ga se a ka a nnyamiša. (Luka 12:11, 12; Bafilipi 4:6, 7) Ka mo go makatšago, boipelaetšo bja-ka bo ile bja atlega ka gobane go ile gwa hwetšwa letlakala la ditatofatšo le e-na le diphošo.

Ka 1944, ke ile ka abelwa tikologong e kgolo yeo e bego e akaretša Australia Borwa ka moka, leboa la Victoria, le toropo ya Sydney ya New South Wales. Ngwageng o latetšego, go ile gwa hlongwa lesolo la modiro wa lefase ka bophara wa go bolela phatlalatša gomme seboledi se sengwe le se sengwe se be se swanetše go lokišetša polelo ya sona, se e thea thulaganyong ya polelo ya letlakala le tee yeo e bego e neilwe ke mokgatlo. Go nea dipolelo tšeo di tšeago iri go ile gwa tšweletša ditlhohlo, eupša re ile ra tšwela pele re botile Jehofa gomme o ile a šegofatša maiteko a rena.

Lenyalo le Maikarabelo a Mafsa

Ka July 1946, nna le Beatrice Belloti re ile ra nyalana gomme re hlanketše gotee re le babulamadibogo. Ntlo ya rena e be e le kharabane ya mapolanka. Morwedi wa rena yo e lego ngwana a nnoši Jannyce (Jann), o ile a belegwa ka December 1950. Re ile ra bula madibogo mafelong a mantši, go akaretša le toropong ya Kempsey kua New South Wales moo re bego re le Dihlatse re nnoši. Sontaga se sengwe le se sengwe re be re e-ya holong ya setšhaba gomme ke be ke dula ke itokišeditše go nea polelo ya phatlalatša yeo re bego re e kwala-kwaditše ka dipampišana. Ka dikgwedi tše mmalwa, Beatrice le ngwana wa rena Jann e be e e-ba bona feela batheetši. Lega go le bjalo, go se go ye kae ba bangwe ba ile ba thoma go rothela. Lehono Kempsey go na le diphuthego tše pedi tšeo di atlegago.

Ge Jann a be a e-na le nywaga e mebedi, re ile ra dula Brisbane. Ka gona ge a fetša sekolo, re ile ra bula madibogo re le lapa ka nywaga e mene kua toropong ya New South Wales ya Cessnock, pele re ka boela Brisbane go yo thuša mmago Beatrice. Ga bjale ke na le tokelo ya go hlankela ke le mogolo Phuthegong ya Chermside.

Nna le Beatrice re leboga Jehofa ka ge a re šegofaditše kudu, go akaretša le tokelo ya go thuša batho ba 32 gore ba mo tsebe. Nna ke leboga ge Jehofa a nneile mosadi wa-ka yo a rategago, yoo le ge a le bonolo le borutho, a ilego a lwela therešo ya Beibele ka sebete. Go rata ga gagwe Modimo, go mmota ga gagwe le ‘leihlo la gagwe le lokilego’ di dirile gore e be mosadi le mma yo a swanelegago. (Mateo 6:22, 23; Diema 12:4) Nna le yena re ka bolela go tšwa pelong gore: “Dithšexofatšô di tlo tlêla eo a botaxo Morêna.”—Jeremia 17:7.

[Mongwalo wa tlase]

[Seswantšho go letlakala 9]

Re dirišitše koloi ye yeo e nago le segodiša-modumo kua leboa la Queensland

[Seswantšho go letlakala 10]

Ke thuša dikgaetšedi tša ga Kilpatrick go šuthiša koloi ya tšona nakong ya sehla sa dipula kua leboa la Queensland

[Seswantšho go letlakala 12]

Letšatšing la rena la lenyalo