Na o Diriša Dibaka tša go Bolela ka Ditumelo tša Gago?

“NA GO na le therešo e feletšego?” Seo e be e le sehlogo sa phadišano ya taodišo kua Poland. Ditaelo mabapi le taodišo ye di be di re: “Ga re nyake therešo e feletšego. Ga go na motho yo a e nyakago. Go ba gona, therešo e feletšego ga e gona.” Agata, morutwana sekolong se se phagamego, yo a nago le nywaga e 15 yoo gape e lego yo mongwe wa Dihlatse tša Jehofa, o ile a dira phetho ya go diriša sebaka se go boledišana le ba bangwe ka ditumelo tša gagwe tša bodumedi.

Bakeng sa go itokišeletša taodišo, Agata o ile a thoma ka go rapelela tlhahlo ya Jehofa gomme a thoma go kgobokanya dintlha tše di bolelago ka taba ye. O ile a hwetša tsebišo e tswalanago le taba yeo ka go Morokami wa July 1, 1995. O ile a tsopola potšišo yeo Pontio Pilato a ilego a e botšiša Jesu e rego: “Therešo ke eng?” (Johane 18:38) O boletše gore, potšišo yeo e be e bonagatša kgopolo ya go belaela, go le bjalo ka ge eka o re: ‘O re therešo? Ke’ng seo? Ga go na selo sa mohuta woo!’ Agata o ngwadile gore: “Potšišo ya Pilato e nkgopotša ditaelo tša mabapi le taodišo.”

Ke moka o ile a hlalosa go gola ga kgopolo ya gore therešo e ithekgile ka maemo—kgopolo ya gore seo motho yo mongwe a bonago e le therešo e ka no se be therešo go yo mongwe le gore bobedi bja bona go ka thwe ba nepile. O ile a botšiša dipotšišo tše bjalo ka e rego, “Ke mang wa rena yo a bego a ka lekela hlogong ka go namela sefofane mola a nagana gore melao ya balaola-difofane e be e sa nepagala ka mo go feletšego?” Ke moka o ile a tsopola Beibele, a re: “Go ithekga ka Lentšu la Modimo go theilwe ka go tia ditherešong tšeo di ka hlahlobjago.” O ile a bolela kholofelo ya gagwe ya gore bao ruri ba tsomago therešo ba ka se fele pelo go fihlela ba e hwetša.

Agata o ile a hwetša diploma e kgethegilego gomme a ba le sebaka sa go nea thero yeo pele ga klase ka moka. Ba mmalwa bao a tsenago le bona sekolo ba ile ba amogela taletšo ya gagwe ya go ithuta Beibele le bona. Agata o thabela gore o ile a diriša sebaka se go boledišana le ba bangwe ba bantši ka ditumelo tša gagwe. Ee, go phafogela dibaka tša go bolela ka tumelo ya gago go ka ba le dienywa tše dibotse. O ka diriša dibaka dife?