Tlhohlo ya Boikokobetšo

BATHO ba bantši ba ka bona boikokobetšo bo se na mohola lefaseng la lehono. Bao ba nyakago go tšeelwa godimo e bile ba bonagalago ba atlegile kudu ba a iphagamiša, ba a ikgantšha, e bile ba gapeletša gore dilo di dirwe ka tsela ya bona. Batho ka kakaretšo ba duma go ba bahumi le go tuma, e sego go ba baikokobetši le go ba boleta. Bao dilo di ba sepelelago gabotse gantši ba rata go ikgantšha ka gore ba atlegišitšwe ke go šoma ga bona ka thata. Go e na le gore ba ikokobetše, ba ikgantšha ka katlego ya bona.

Monyakišiši yo a tšwago Canada o boletše ka “go tšwelela ga moya wa ‘nna pele’” nageng ya gabo. Ba bangwe ba bona eka re phela setšhabeng seo go sona boithati bo lebelelwago bo le bohlokwa kudu go feta go phela ka tsela e bontšhago boikarabelo gomme ba lemoga gore batho lehono ba tshwenyega kudu ka bona ka noši. Lefaseng le bjalo, boikokobetšo bo ka bonagala e le seka se se sa kgahlišego.

Ke therešo gore ke batho ba sego kae feela bao ba ka ganetšago kgopolo ya gore boikokobetšo ke seka seo se swanetšego ba bangwe, ka ge go le bonolo go phedišana le batho ba ikokobeditšego. Lega go le bjalo, lefaseng la rena leo le tletšego phadišano, batho ba bangwe ba na le poifo ya gore ge ba ka ikokobetša, ba bangwe ba tla ba lebelela e le ba fokolago.

Lentšu la Modimo, Beibele, le boletše e sa le pele gore mo mehleng ya rena batho ba tla ba “ba go ipona [le] ba ikgogomošago.” (2 Timotheo 3:1, 2) Na ga o dumele gore boporofeta bjo bo a phethagala? Na o nagana gore boikokobetšo bo na le mohola? Goba na o nagana gore motho yo a ikokobeditšego o tla lebelelwa e le yo a fokolago, yoo ba bangwe ba ka bapalago ka yena gabonolo?

Taba ke gore Beibele e nea mabaka a kwagalago a go tšeela boikokobetšo godimo le go bo hlagolela. E nea pono e leka-lekanego le e nepagetšego ka seka se e bile e bontšha gore boikokobetšo bja kgonthe ke seka sa go ba matla, e sego bofokodi. Sehlogo se se latelago se tla hlalosa lebaka la seo.

[Seswantšho go letlakala 3]

Re swanetše go ikwa bjang ka dilo tšeo re di fihleletšego?