Bophelo bjo bo Nago le Morero bo a Kgonega!

BATHO ba bantši ba phelela tšhelete le dilo tšeo e di rekago. Ba bangwe ba phelela go tuma lefaseng. Ba bangwe ba phelela go ba dikgwari go tša bokgabo. Le gona go na le bao ba phelelago go thuša batho ba bangwe. Eupša ba bantši ga ba tsebe seo ba se phelelago goba gore ke ka baka la’ng ba phela.

Go thwe’ng ka wena? Na o kile wa naganišiša gabotse gore ke ka baka la’ng o phela? Ke ka baka la’ng o sa hlahlobe dilo tšeo batho ba di phegelelago go bona ge e ba di dira gore ba ikwe ba e-na le bokgoni e bile ba kgotsofetše? Ke’ng seo se dirago gore bophelo bo be le morero?

Tšhelete le Boipshino di na le Sebaka sa Tšona

Go Mmoledi 7:12 (PK), Beibele e re: “Bohlale ke tšhireletšo, tšhelete le yona ke tšhireletšo; eupša tsebo ke e phalago, gobane e tsebiša motho ge bohlale bo nea mong wa bjona bophelo.” Ee, tšhelete e na le mohola. O nyaka tšhelete gore o phele, kudu-kudu ge e ba o e-na le boikarabelo bja go hlokomela lapa.—1 Timotheo 5:8.

Bophelo e ka ba’ng ntle le maipshino a mangwe ao tšhelete e a tlišago? Le ge Jesu Kriste, Mothomi wa Bokriste, a ile a dumela gore o be a se na moo a ka beago hlogo ya gagwe, ka dinako  tše dingwe o be a e-ja dijo le beine tša maemo. Go feta moo, o be a sa pheme go apara seaparo sa go bitša.—Mateo 8:20; Johane 2:1-11; 19:23, 24.

Lega go le bjalo, bophelo bja Jesu e be e se bja go phegelela maipshino. Dilo tšeo a bego a di etiša pele di be di kwagala. Jesu o itše: “Gaešita le ge motho a atetšwe ke dilo, fela bophelo bja gagwe ga bo tlišwe ke dilo tše a nago le tšona.” O ile a tšwela pele gomme a bolela ka papišo ya monna yo mongwe wa mohumi yoo a bego a bunne mabele a mantši, yo a ilego a bea mabaka ka gore: “Ke tla dira’ng ge e le mo ke se na mo ke tlago go kgobela puno ya-ka gona? . . . Ke tla phušola nywako ya-ka ya polokelo ka aga e megolo, gomme ka kgobela mabele a-ka ka moka le dilo tša-ka ka moka tše dibotse moo; ke moka ka re go moya wa-ka: ‘Moya, o na le dilo tše dintši tše dibotse tše di kgobeletšwego nywaga e mentši; iketle, e-ja, e-nwa gomme o ipshine.’” Ke’ng seo se bego se fošagetše ka kgopolo ya monna yo? Papišo e tšwela pele ka gore: “Modimo a re go yena [monna wa mohumi], ‘Wena motho yo a hlokago tlhaologanyo, bošegong bjo ba nyaka moya wa gago go wena. Ka gona, dilo tše o di kgobetšego e tla ba tša mang?’” Gaešita le ge monna yo a be a bolokile mabele a gagwe, ge a e-hwa o be a ka se ke a diriša mahumo ao a a kgobokeditšego. Ge a phetha, Jesu o rutile batheetši ba gagwe gore: “Go bjalo le ka motho yo a ikgobelelago lehumo, eupša a se a huma go Modimo.”—Luka 12:13-21.

Ke therešo gore re nyaka tšhelete gomme re nyaka le boipshino. Lega go le bjalo, dilo tše bohlokwa bophelong ga se tšhelete goba maipshino. Go huma go Modimo, ke gore, go phela bophelo bjoo bo dirago gore re amogelwe ke Modimo, ke selo se bohlokwa seo re swanetšego go se phegelela.

Na go Bohlokwa go Itirela Leina?

Batho ba bantši ba phelela go itirela leina. Ga se gore go ba le kganyogo ya go itirela leina go fošagetše, e lego go nyaka go gopolwa ke ba bangwe. Beibele e re: “’Ina le botse le phala makhura a mabotse; ’tšatši la xo hwa le phala la xo tswalwa.”—Mmoledi 7:1.

Re ka re letšatšing leo motho a hwago ka lona, pego ya bophelo bja gagwe ka moka e ba e ngwadilwe. Ge e ba a dirile dilo tše dibotse, letšatši leo motho yoo a hwago ka lona le phala letšatši la matswalo a gagwe kudu e lego nakong ya ge pego ya gagwe e be e sešo ya ngwalwa.

Puku ya Beibele ya Mmoledi e ngwadilwe ke Kgoši Solomone. Mogolo wa Solomone ka motswadi o tee, e lego Abesalomo, o be a nyaka go itirela leina. Lega go le bjalo, go bonagala barwa ba gagwe ba bararo bao a ka bego a ba neile leina la gagwe gore ba le fetišetše melokong e latelago, ba hwile e sa le ba banyenyane. Ka gona, Abesalomo o ile a dira’ng? Mangwalo a re: “Abesalomo . . . ó be a itsemetše lefsika la thololo moeding wa dikxoši, xobane a re: Xa ke na morwa yo leina la-ka lè kaxo šala lè xopolwa ka yêna. Thololo yeo ó e reetše leina la xaxwe.” (2 Samuele 14:27; 18:18) Lefsika leo la thololo ga se la ka la hwetšwa. Ge e le Abesalomo o tsebja ke diithuti tša Beibele e le lerabele le le tumilego ka bobe leo le ilego la loga maano a go thopa bogoši bja tatago lona, Dafida.

Ba bantši lehono ba leka go gopolwa ka seo ba se fihlelelago. Ba nyaka go tumišwa ke batho bao dinyakwa tša bona di fetogago le dihla ge di fetoga. Lega go le bjalo, go direga’ng ka botumo bjoo? Ka pukung ya The Culture of Narcissism, Christopher Lasch o ngwala gore: “Mehleng ya  rena, yeo go atlega go lebelelwago e le go dula o le yo mofsa, yo a kgahlišago le ka go ba yo a fapanego; botumo bo hwelela ka pela go feta le ge e le neng pele, gomme bao ba nago le botumo setšhabeng ba tshwenyega kudu ka go lahlega ga bjona.” Ka baka leo, batho ba bantši ba tumilego ba retologela dihlare-taging le bjaleng, tšeo gantši di dirago gore ba hwe ka pela. Ka kgonthe, go tsoma botumo ke ga lefeela.

Ka gona, ke mang yo re swanetšego go ba le botumo bjo bobotse go yena? Ge Jehofa a diriša moporofeta wa gagwe Jesaya go bolela ka ba bangwe bao ba ilego ba boloka Molao wa gagwe, o itše: “Bôná-bao ntlong ya-ka le mo morakong wa-ka ke tlo ba nea bodulô le ’ina . . . ’ina le sa hwexo, le sa phomolwexo.” (Jesaya 56:4, 5) Ka baka la go kwa ga bona Modimo, bao ba amogelegago go yena ba tla ba le “bodulô le ’ina.” Gore ba se ke ba fedišwa, Modimo o tla gopola maina a bona ao a “sa hwexo.” Woo ke mohuta wa leina leo Beibele e re kgothaletšago go le dira—botumo bjo bobotse mahlong a Jehofa, Mmopi wa rena.

Jesaya o be a porofeta mabapi le nako yeo batho ba botegago ba tlago go hwetša bophelo bjo bo sa felego Paradeiseng mo lefaseng. “Bophelo bjo bo sa felego” Paradeiseng yeo e tlo ba ‘bophelo bja kgonthe’—bophelo bjoo Modimo a bego a bo reretše batho ge a be a ba bopa. (1 Timotheo 6:12, 19) Go e na le go phela bophelo bjo bokopana le bjo bo sa kgotsofatšego, na ga se ra swanela go phegelela go hwetša bophelo bjo bo sa felego?

Go Phegelela Bokgabo Goba go Thuša Batho ga go Kgotsofatše

Bo-rabokgabo ba bantši ba kganyoga go kaonefatša mošomo wa bona gore o fihlelele seo ba se bitšago bokgwari. Bophelo bja bjale ke bjo bokopana gore ba ka fihlelela seo. Ge a be a le nywageng ya gagwe ya bo-90, Hideo, sekgwari sa tša bokgabo seo go boletšwego ka sona sehlogong se se fetilego, o šomile ka thata go kaonefatša bokgoni bja gagwe. Le ge rabokgabo a ka fihla boemong bja go kgotsofatšwa ke modiro wa gagwe, ka nako yeo a ka no se sa kgona go tšweletša dilo tše dintši go swana le ge e be e sa le yo mofsa. Eupša go be go ka thwe’ng ge nkabe a be a e-na le bophelo bjo bo sa felego? Nagana ka ditsela tšohle tšeo a ka bego a bile le tšona tša go kaonefatša modiro wa gagwe wa tša bokgabo!

Ke’ng seo se ka bolelwago mabapi le go phegelela bophelo bja go thuša batho? Ge motho a šetša badiidi gomme a diriša matlotlo a gagwe go ba thuša o a retwa. Beibele e re: “Go na le lethabo le legolo go neeng go feta go amogeleng.” (Ditiro 20:35) Go bontšha go tshwenyega ka boiketlo bja ba bangwe go ka kgotsofatša e le ka kgonthe. Lega go le bjalo, ke selo se segolo gakaaka’ng seo motho a ka se fihlelelago gaešita le ge a neetše bophelo bja gagwe ka moka modirong wo? Seo rena batho re ka se fihlelelago ge re thuša batho bao ba tlaišegago se lekanyeditšwe. Ga go na dimpho tše di bonagalago tšeo di ka kgotsofatšago senyakwa sa motheo seo se hlokomologwago ke batho ba bantši le seo ba sa kago ba se fihlelela maphelong a bona. Ke senyakwa sefe?

Go Kgotsofatša Senyakwa Seo re Belegwego le Sona—Go Bohlokwa

Thutong ya gagwe ya Thabeng, Jesu o boletše ka kganyogo ya motheo yeo re belegwago re e-na le yona ge a re: “Go thaba bao ba lemogago go nyaka ga bona dilo tša moya, ka ge mmušo wa magodimo e le wa bona.” (Mateo 5:3) Ka gona, go ya ka Beibele, lethabo la kgonthe ga se la ithekga ka lehumo, botumo, go atlega dilong tša tša bokgabo goba go phegeleleng go thuša batho ba tlaišegago. Go e na le moo, le ithekgile ka go kgotsofatša senyakwa sa rena sa moya—go nyaka go rapela Modimo.

Moapostola Paulo o ile a kgothaletša bao ba bego ba sa tsebe Mmopi gore ba mo tsome. Paulo o itše: “Go tšwa mothong o tee [Modimo] o dirile setšhaba se sengwe le se sengwe sa batho, gore ba dule godimo ga lefase ka moka, gomme o laetše gore go be le dinako tše di beilwego le mellwane e beilwego ya bodulo bja batho, gore ba tsome Modimo ge e ba ba ka mo phopholetša gomme ba mo hwetša e le ka kgonthe, gaešita le ge ruri a se kgole le yo mongwe le yo mongwe wa rena. Gobane ka yena re na le bophelo, re a sepela e bile re gona.”—Ditiro 17:26-28.

Go kgotsofatša senyakwa sa go rapela Modimo wa therešo ke senotlelo sa go hwetša lethabo la kgonthe bophelong. Go kgotsofatša kganyogo ya rena go re nea le sebaka sa go hwetša ‘bophelo  bja kgonthe.’ Ela hloko mohlala wa Teresa, yo a ilego a tuma thelebišeneng nageng ya gabo ka go ba moanegwa-thwadi wa mathomo wa mo-Afrika wa Amerika yo a ilego a bapala tshwantšhetšo-dikgaong ya gagwe yeo e bego e bapala iri thelebišeneng. Lega go le bjalo, kapejana o ile a tlogela dilo tšeo ka moka. Ka baka la’ng? O itše: “Ke kgodišegile gore go latela keletšo ya Lentšu la Modimo ke tsela e kaone kudu ya go phela.” Teresa o be a sa nyake go senya tswalano ya gagwe le Modimo ka go bapala tshwantšhetšo-dikgao ya thelebišene yeo e kgothaletšago dikopano tša botona le botshadi le dintwa. Mahlong a batho e be e se sa le naletšana ya thelebišene eupša o ile a thoma go phela bophelo bjo bo kgotsofatšago e le ruri, ka ge a ile a hlankela e le mmoledi wa ka mehla wa ditaba tše dibotse tša Mmušo wa Modimo, a leka go thuša ba bangwe gore ba be le tswalano e botse le Modimo.

Ge a bolela mabapi le phetho ya Teresa ya go tlogela go ba sebapadi sa tshwantšhetšo-dikgao, yo mongwe wa bao ba bego ba bapala le yena, o ile a tsopolwa a re: “Pelo ya-ka e ile ya kwa bohloko ka gobane ke be ke sa nyake go bona a lahla seo ke bego ke nagana gore o na le sona. Eupša ka ntle le pelaelo o hweditše selo se sengwe se segolo le se bohlokwa.” Teresa ka morago o ile a hwa kotsing. Lega go le bjalo, ka morago ga lehu la gagwe, yena motho yoo a ilego a tsopolwa o itše: “O be a thabile, gomme seo ke se o ka se kgopelago bophelong. Ke ba bakae ba rena bao ba ka bolelago se se swanago?” Go bao ba hwago ba dutše ba etiša tswalano ya bona le Modimo pele maphelong a bona, go na le tebelelo e kgahlišago ya tsogo nakong ya pušo ya Mmušo.—Johane 5:28, 29.

Mmopi o na le morero ka lefase le ka batho bao ba lego go lona. O nyaka gore o kwešiše morero wo le gore o thabele bophelo bjo bo sa felego Paradeiseng mo lefaseng. (Psalme 37:10, 11, 29) Ga bjale ke nako ya go ithuta ka mo go oketšegilego ka Jehofa, Mmopi wa magodimo le lefase, le ka morero wa gagwe ka wena. Dihlatse tša Jehofa motseng wa geno di tla thabela go go thuša gore o hwetše tsebo yeo. Hle ikgokaganye le tšona goba o ngwalele bagatiši ba makasine wo.

[Seswantšho go letlakala 5]

Ke’ng seo se bego se fošagetše ka mokgwa wa go bea mabaka wa monna wa mohumi papišong ya Jesu?

[Seswantšho go letlakala 7]

Na o ka rata go phela ka mo go sa felego Paradeiseng mo lefaseng?