Dipotšišo tše Tšwago go Babadi

Na ke mo go swanetšego gore yo mongwe wa Dihlatse tša Jehofa a be gona monyanyeng wa lenyalo wa wa leloko goba wa motho yo a tlwaelanego le yena yo e sego Hlatse?

Manyalo ke ditiragalo tša lethabo, gomme go a kwagala gore Mokriste a ka nyaka go tšea karolo lethabong le bjalo. Go ba gona, bana bao ba laleditšwego gore ba be gona ba swanetše go kwa batswadi ba bona goba bafepi ba bona, bao ba tlago go dira phetho tabeng ye. (Baefeso 6:1-3) Eupša go thwe’ng ge monna yo e sego yo mongwe wa Dihlatse tša Jehofa a kgopela mosadi wa gagwe yo e lego Mokriste gore a ye le yena monyanyeng wa lenyalo wo o swarelwago kerekeng? Letswalo la mosadi yo le ka mo dumelela go ya ka morero wa go fo bogela a ikemišeditše go se tšee karolo ditirong le ge e le dife tša bodumedi tšeo di tswalanago le tiragalo ye.

Ka gona, go kgetha go ya goba go se ye monyanyeng o itšego, ke phetho ya motho ka noši. Lega go le bjalo, Mokriste yo mongwe le yo mongwe o swanetše go lemoga gore o ikarabela go Jehofa gomme o swanetše go ela hloko melao ya motheo e mmalwa ya Mangwalo ge a dira phetho mabapi le go ba gona monyanyeng wa lenyalo wa motho yo e sego Hlatse.

Selo se bohlokwa ke gore Mokriste o swanetše go nagana ka go ba yo a amogelegago go Modimo. Jesu o itše: “Modimo ke Moya, gomme bao ba mo rapelago ba swanetše go mo rapela ka moya le ka therešo.” (Johane 4:24) Ka baka leo, Dihlatse tša Jehofa ga di tšee karolo medirong ya go tswakanya ditumelo, e bjalo ka dithapelo, metlwae goba ditirelo tšeo di thulanago le therešo ya Beibele.—2 Bakorinthe 6:14-17.

Mokriste o a lemoga gore phetho ya gagwe e ka kgoma le ba bangwe. Ge o phetha ka gore o tla ya, na ba leloko la geno ba tla kgopišega ge o ka se tšee karolo ka botlalo dilong tše di dirago gore monyanya o thabiše? Tsela yeo badumedi-gotee ba ka kgomegago ka yona le yona e swanetše go elwa hloko. (Baroma 14:13) Gaešita le ge wena goba ditho tše dingwe tša lapa leno le ka phetha ka gore ga le bone bothata ka go ba gona monyanyeng wa motho yo e sego Hlatse, na bana beno le dikgaetšedi ba moya ba tla kgomega gampe? Na go ka gobatša matswalo a ba bangwe?

Ditirelo tša manyalo tšeo di akaretšago ba leloko bao e sego Dihlatse di ka baka maemo a hlohlago. Go thwe’ng ge e ba o kgopelwa go ba mofelegetši wa monyadi goba monyadiwa? Goba go thwe’ng ge e ba molekane wa gago e se Hlatse gomme a nyaka go tšea karolo ka botlalo? Ge e ba lenyalo le dirwa ka tirelo ya selegae gomme le swerwe ke moahlodi goba mohlankedi wa mmušo, go ba go ona go ka akaretša feela go hlatsela tiro yeo e dirilwego ka molao.

Lega go le bjalo, tirelo ya lenyalo yeo e swarelwago moagong wa bodumedi goba yeo e sepedišwago ke moruti e tsoša dipelaelo tše dingwe. E le gore o latele letswalo la gago leo le tlwaeditšwego ka Beibele gomme o pheme go kwanantšha ditumelo tša gago goba go dira selo seo se ka dirago gore monyanya e be wo o nyamišago, o ka phetha ka go se ye. (Diema 22:3) O ka phemela wena le lapa la gago kgateletšo e kgolo ka go hlalosa e sa le pele ditumelo tša gago tšeo di theilwego Beibeleng, o bontšha gore o ka rata go tšea karolo go fihla bokgoleng bofe goba mohlomongwe wa šišinya tsela e fapanego ya go dira dilo.

Ka morago ga go seka-seka dikarolo ka moka ka kelohloko, Bakriste ba bangwe ba ka phetha ka gore e ka ba mo go sa swanelago go ba gona monyanyeng wa motho yo e sego Hlatse ka morero wa go fo bogela seo se diregago. Eupša ge e ba Mokriste a bea mabaka ka gore ge a ka ba gona, a ka lekega go kwanantšha melao ya motheo ya Modimo, a ka phetha ka gore a se ke a lekela hlogong ka ge go dira bjalo go ka se mo hole. Ge e ba a phetha ka go se ye monyanyeng eupša a e-tla bjalo ka moeng yo a laleditšwego, e lego go ya meletlong yeo e swarwago ka morago ga moo, o swanetše go ikemišetša go “[dira] dilo tšohle bakeng sa letago la Modimo.” (1 Bakorinthe 10:31) “Yo mongwe le yo mongwe o tla rwala morwalo wa gagwe” wa boikarabelo ka go dira diphetho tše bjalo. (Bagalatia 6:5) Ka gona, go sa šetšwe gore o phetha ka go dira eng, gopola gore go bohlokwa go dula o e-na le letswalo le lebotse pele ga Jehofa Modimo.