Ekiša Modiri Yo Mogolo Wa Barutiwa
Ekiša Modiri Yo Mogolo Wa Barutiwa
“Elang hloko kamoo le theetšago ka gona.”—LUKA 8:18.
1, 2. Ke ka baka la’ng o swanetše go ela hloko tsela yeo Jesu a ilego a dirišana le batho ka yona nakong ya bodiredi bja gagwe?
JESU KRISTE o be a phetha modiro wa gagwe bjalo ka Morutiši yo Mogolo le Modiri wa Barutiwa ge a be a botša balatedi ba gagwe gore: “Elang hloko kamoo le theetšago ka gona.” (Luka 8:16-18) Molao woo wa motheo o a šoma bodireding bja gago bjalo ka Mokriste. Ge e ba o ela hloko ditaelo tša moya, o tla dira seo di se bolelago gomme wa ba mogoeledi yo atlegago wa Mmušo. Ke therešo gore o ka se kwe lentšu la Jesu lehono, eupša o ka bala ka dilo tšeo a di boletšego le tšeo a di dirilego, bjalo ka ge di utollwa ka Mangwalong. Di utolla’ng mabapi le tsela yeo Jesu a ilego a dirišana le batho ka yona nakong ya bodiredi bja gagwe?
2 Jesu e be le mogoeledi yo a nago le bokgoni kudu wa ditaba tše dibotse le morutiši yo mogolo kudu wa therešo ya Mangwalo. (Luka 8:1; Johane 8:28) Modiro wa go dira barutiwa o akaretša boboledi le go ruta, eupša Bakriste ba bangwe bao ba nago le bokgoni ba thatafalelwa ke go ruta batho ka katlego. Gaešita le ge boboledi bo akaretša go bolela molaetša, go ruta batho ka Jehofa le merero ya gagwe gantši go nyaka gore modiri wa barutiwa a dire bogwera le bona. (Mateo 28:19, 20) Se se ka dirwa ka go ekiša Jesu Kriste, Morutiši yo Mogolo le Modiri wa Barutiwa.—Johane 13:13.
3. Go ekiša Jesu go ka kgoma bjang maiteko a gago a go dira barutiwa?
3 Ge e ba o ekiša mekgwa ya Jesu ya go ruta, o tla ba o dira ka go dumelelana le keletšo ya moapostola Paulo e rego: “Tšwelang pele le sepela ka bohlale go bao ba lego ka ntle, le ithekela nako e swanetšego. Anke polelo ya lena ka mehla e be e kgahlišago, e nokilwego ka letswai, e le gore le tsebe kamoo le swanetšego go araba yo mongwe le yo mongwe ka gona.” (Bakolose 4:5, 6) Go ekiša Jesu modirong wa go dira barutiwa go nyaka maiteko, eupša go tla dira gore o rute ka katlego ka gobane go tla go thuša “go araba yo mongwe le yo mongwe” go ya ka dinyakwa tša gagwe ka noši.
Jesu o be a Kgothaletša ba Bangwe go Bolela
4. Ke ka baka la’ng go ka thwe Jesu e be e le motheetši yo botse?
4 Go tloga bjaneng, Jesu o be a e-na le mokgwa wa go theetša batho le go ba kgothaletša go bolela dipono tša bona. Ka mohlala, ge a be a e-na le nywaga e 12, batswadi ba gagwe ba ile ba mo hwetša a le gare ga barutiši ka tempeleng, “a ba theeditše gomme a ba botšiša dipotšišo.” (Luka 2:46) Jesu o be a se a ya tempeleng gore a ye go hlabiša barutiši dihlong ka tsebo ya gagwe. O be a ile go theetša, gaešita le ge a be a fela a botšiša dipotšišo. Tshekamelo ya gagwe ya go ba motheetši yo botse e ka no ba e le yona yeo e dirilego gore a amogelwe ke Modimo le batho.—Luka 2:52.
5, 6. Re tseba bjang gore Jesu o ile a theetša dipolelo tša bao a bego a ba ruta?
5 Ka morago ga kolobetšo ya gagwe le go tlotšwa bjalo ka Mesia, Jesu o ile a dula a kgahlegela go theetša batho. Ga se a ka a nwelela kudu go seo a bego a se ruta moo a ilego a lebala ka batho bao ba bego ba tlela go mo kwa a bolela. Gantši o be a emanyana, a ba botšiša seo ba se naganago, ke moka a theetša dikarabo tša bona. (Mateo 16:13-15) Ka mohlala, ka morago ga lehu la kgaetšedi’a Mareta, Latsaro, Jesu o ile a mmotša gore: “Yo mongwe le yo mongwe yo a phelago e bile a dumela go nna, a ka se ke a hwa le gatee.” Ke moka o ile a mmotšiša gore: “Na o dumela se?” Gomme Jesu ka ntle le pelaelo o ile a theetša ge Mareta a araba ka gore: “Ee Morena; ke dumetše gore o Kriste Morwa wa Modimo.” (Johane 11:26, 27) E swanetše go ba e be e le mo go lapološago gakaakang go kwa Mareta a hlalosa tumelo ya gagwe ka tsela e bjalo!
6 Ge barutiwa ba bantši ba be ba lahla Jesu, o ile a nyaka go kwa pono ya baapostola ba gagwe. Ka gona o ile a botšiša ka gore: “Na le lena le nyaka go sepela?” Simone Petro o ile a araba ka gore: “Morena, re tla ya go mang? O na le mantšu a bophelo bjo bo sa felego; re dumetše gomme ra tseba gore o Mokgethwa wa Modimo.” (Johane 6:66-69) Mantšu ao a swanetše go ba a thabišitše Jesu e le ruri! Ge morutwana wa Beibele a bontšha tumelo ka tsela e swanago, le wena ruri o tla thaba.
Jesu o be a Theetša ka Tlhompho
7. Ke ka baka la’ng Basamaria ba bantši ba ile ba dumela go Jesu?
7 Selo se sengwe seo se dirilego gore Jesu e be modiri yo a atlegago wa barutiwa ke gore o be a tshwenyega ka batho e bile a ba theetša ka tlhompho. Ka mohlala, lebakeng le lengwe Jesu o ile a nea mosadi wa Mosamaria bohlatse kgaufsi le sediba sa Jakobo kua Sikara. Ge ba be ba boledišana, Jesu e be e se yena feela yo a bolelago; o ile a theetša seo mosadi yoo a bego a se bolela. Ge a be a mo theeditše, Jesu o ile a lemoga gore mosadi yo o be a kgahlegela borapedi gomme a mmotša gore Modimo o be a nyaka bao ba bego ba tla Mo rapela ka moya le ka therešo. Jesu o ile a bontšha go hlompha le go tshwenyega ka mosadi yo, moo e lego gore mosadi yo o ile a botša ba bangwe ka Jesu gomme “ba bantši ba Basamaria bao ba tšwago motseng woo ba [ile ba] dumela go yena ka baka la lentšu la mosadi yo.”—Johane 4:5-29, 39-42.
8. Tshekamelo ya batho ya go bolela pono ya bona e ka go thuša bjang go thoma poledišano bodireding?
8 Batho gantši ba thabela go bolela dipono tša bona. Ka mohlala, badudi ba Athene ya bogologolo ba be ba thabela go nea dipono tša bona le go theetša selo se itšego se sefsa. Se se ile sa dira gore moapostola Paulo a nee polelo ya gagwe e matla a le Areopago motseng woo. (Ditiro 17:18-34) Ge o thoma poledišano le mong wa ntlo bodireding bja gago lehono, o ka no re, “Ke go etetše gore ke tle ke kwe pono ya gago ka [taba e itšego].” Theetša pono ya motho gomme o nee tlhaloso ka yona, goba o botšiše potšišo ka yona. Ke moka ka botho o bontšhe seo Beibele e se bolelago ka taba yeo.
Jesu o be a Tseba Seo a Tlago go se Bolela
9. Jesu o dirile’ng pele a ka ‘bulela Kleopa le mosepedi-gotee le yena Mangwalo’?
9 Jesu o be a sa felelwe ke mantšu. Ka ntle le go ba motheetši yo mobotse, o be a dula a lemoga seo batho ba se naganago le gona o be a tseba tlwaa seo a swanetšego go se bolela. (Mateo 9:4; 12:22-30; Luka 9:46, 47) Ka mohlala: Kapejana ka morago ga tsogo ya Jesu, ba babedi ba barutiwa ba gagwe ba be ba sepela ba e-tšwa Jerusalema ba e-ya Emause. Pego ya Ebangedi e re: “Ge ba be ba dutše ba boledišana le go ahla-ahla se, Jesu ka noši a batamela gomme a thoma go sepela le bona; eupša mahlo a bona a be a širegile gore a se mo lemoge. A re go bona: ‘Ke ditaba dife tše tšeo le ngangišanago ka tšona ge le dutše le sepela?’ Ke moka ba ema ka difahlego tše di nyamilego. Yo a bitšwago Kleopa, ge a araba a re go yena: ‘Na o dula o le modiiledi o nnoši mo Jerusalema, gomme ga o tsebe dilo tše di diregilego go yona matšatšing a?’ A re go bona: ‘Dilo dife?’” Morutiši yo Mogolo o ile a theetša ge ba be ba hlalosa gore Jesu wa Natsaretha o rutile batho, a dira mehlolo ke moka a bolawa. Gona bjale ba bangwe ba be ba re o tsošitšwe bahung. Jesu o ile a dumelela Kleopa le mosepedi-gotee le yena ba ntšha sa mafahleng a bona. Ke moka a hlalosa seo ba bego ba nyaka go se tseba, a ba “bulela Mangwalo ka mo go feletšego.”—Luka 24:13-27, 32.
10. O ka tseba bjang pono ya bodumedi ya motho yoo o kopanago le yena bodireding?
10 O ka no ba o sa tsebe selo ka pono ya bodumedi ya mong yo a itšego wa ntlo. Gore o e tsebe, o ka no bolela gore o thabela go kwa seo batho ba se naganago mabapi le thapelo. Ke moka o ka botšiša gore, “Na o nagana gore go na le motho yoo ruri a theetšago dithapelo?” Karabo e ka utolla mo gontši ka pono ya motho le bodumedi bja gagwe. Ge e ba a e-na le tshekamelo ya bodumedi, o ka kgona go mo fata kgopolo ka go botšiša gore, “Na o nagana gore Modimo o theetša dithapelo ka moka, goba na go ka ba go e-na le dithapelo tšeo a sa di amogelego?” Dipotšišo tše bjalo di ka dira gore go boledišanwe ka bolokologi. Ge go swanetše gore o ka mmontšha kgopolo ya Mangwalo, o ka swanelwa ke go dira bjalo ka bohlale, o sa lwe le seo motho a se dumelago. Ge a thabela go go theetša, a ka thabela gore o boe gape. Eupša a re re motho yoo o botšiša potšišo yeo o sa kgonego go e araba. O ka dira nyakišišo gomme wa boela go yena o loketše go mo nea ‘lebaka la kholofelo e lego go wena, o dira bjalo ka moya o boleta le ka tlhompho e tseneletšego.’—1 Petro 3:15.
Jesu o be a Ruta Bao ba Swanelegago
11. Ke’ng seo se ka go thušago go hwetša bao ba swanelwago ke go rutwa?
11 Motho yo a phethagetšego, Jesu, o be a e-na le temogo yeo e bego e mo kgontšha go bona bao ba bego ba swanelwa ke go rutwa. Re hwetša go le thata kudu go lemoga bao “ba nago le tshekamelo e swanetšego ka bophelo bjo bo sa felego.” (Ditiro 13:48) Go bile bjalo le ka baapostola bao Jesu a ilego a ba botša gore: “Motse goba motsana le ge e le ofe wo le tsenago go wona, le nyakeng yo a swanelegago go wona.” (Mateo 10:11) Go swana le baapostola ba Jesu, o swanetše go tsoma batho bao ba ikemišeditšego go theetša le go rutwa therešo ya Mangwalo. O ka hwetša bao ba swanelegago ka go theetša ka kelohloko batho bohle bao o bolelago le bona, le ka go ela hloko boemo bja kgopolo bja yo mongwe le yo mongwe.
12. O ka tšwela pele bjang o thuša motho yo a nago le kgahlego?
12 Ka morago ga go tlogela motho yoo a bontšhitšego kgahlego molaetšeng wa Mmušo, ke mo go holago go tšwela pele o nagana ka dinyakwa tša moya tša motho yoo. Ge e ba o ngwala seo o ithutilego sona ka morago ga go boledišana le motho yo mongwe ka ditaba tše dibotse, se se tla go thuša go tšwela pele o thuša motho yoo moyeng. Nakong ya leeto la go boela, o swanetše go theetša ka kelohloko ge e ba o nyaka go ithuta ka mo go oketšegilego ka ditumelo tša motho yoo, boemo bja kgopolo, goba maemo a gagwe.
13. O ka thušwa ke eng go lemoga kamoo motho a ikwago ka gona ka Beibele?
13 O ka kgothaletša batho bjang go go botša kamoo ba ikwago ka gona ka Lentšu la Modimo? Dikarolong tše dingwe, potšišo e atlegago e ka ba e rego, “Na o hweditše go le thata go kwešiša Beibele?” Karabo ya potšišo yeo gantši e utolla kamoo motho a ikwago ka gona ka dilo tša moya. Tsela e nngwe e ka ba go bala lengwalo gomme wa botšiša gore, “O le kwa bjang?” Go swana le Jesu, o ka dira mo gontši bodireding bja gago ka go diriša dipotšišo tše di nepagetšego. Lega go le bjalo, o swanetše go ba šedi.
Jesu o Dirišitše Dipotšišo ka Katlego
14. Ka ntle le go botšološiša batho, o ka bontšha bjang gore o kgahlegela pono ya bona?
14 Bontšha go kgahlegela batho ba bangwe ka ntle le go ba nyamiša. Latela mohlala wa Jesu. E be e se mmotšološiši yo a sego bohlale, eupša o be a diriša dipotšišo tšeo di šišinyago kgopolo. Jesu gape e be e le motheetši yo botho yoo a bego a lapološa batho ba botegago le go ba dira gore ba lokologe. (Mateo 11:28) Batho ba mehuta ka moka ba be ba ikwa ba lokologile go mmotša mathata a bona. (Mareka 1:40; 5:35, 36; 10:13, 17, 46, 47) Gore batho ba ikwe ba lokologile go go botša seo ba se naganago ka Beibele le dithuto tša yona, o swanetše go phema go ba botšološiša.
15, 16. O ka thoma bjang go boledišana le batho ka ditaba tša bodumedi?
15 Go tlaleletša go botšišeng dipotšišo ka tsela e šomago, o ka dira gore poledišano e tšwele pele ka go bolela taba e itšego e kgahlišago ke moka wa theetša karabo. Ka mohlala, Jesu o ile a botša Nikodemo gore: “Ka ntle le gore motho a tswalwe gape, a ka se ke a bona mmušo wa Modimo.” (Johane 3:3) Mantšu ao e be e le a kgahlišago kudu moo Nikodemo a ilego a gapeletšega go araba le go theetša Jesu. (Johane 3:4-20) O ka kgona go akaretša batho poledišanong ka tsela e swanago.
16 Lehono, go tšwelela ga madumedi a mafsa ke selo seo go bolelwago ka sona mafelong a bjalo ka Afrika, Yuropa Bohlabela le Latin Amerika. Mafelong a bjalo ka a, gantši o ka thoma poledišano ka gore: “Ke fo ba ke tshwenywa ke gore go na le madumedi a mantši. Eupša ke duma go bona kgaufsinyane batho ba ditšhaba ka moka e e-ba batee borapeding bja therešo. Na o rata go bona seo se direga?” Ka go bolela selo seo se makatšago mabapi le kholofelo ya gago, o ka kgona go dira gore batho ba bolele dipono tša bona. Le gona go bonolo go araba dipotšišo ge e ba di ka arabja ka ditsela tše pedi. (Mateo 17:25) Ka morago ga ge mong wa ntlo a neile karabo ya potšišo ya gago, wena e arabe ka lengwalo le tee goba a mabedi. (Jesaya 11:9; Tsefanya 3:9) Ka go theetša ka kelohloko le ka go ela hloko karabo ya motho, o ka kgona go tseba seo o ka tlago wa se ahla-ahla nakong e tlago ge o boa.
Jesu o be a Theetša Bana
17. Ke’ng seo se bontšhago gore Jesu o be a kgahlegela bana?
17 Jesu o be a sa kgahlegele batho ba bagolo feela eupša o be a kgahlegela le bana. O be a tseba dipapadi tša bana le dilo tšeo ba bego ba di bolela. Ka dinako tše dingwe o be a bitša bana gore ba tle go yena. (Luka 7:31, 32; 18:15-17) Bana ba bantši ba be ba le makgatheng a batho bao ba bego ba theeditše Jesu. Ge bašemanyana ba be ba goeletša ba reta Mesia, Jesu o ile a ba kwa gomme a bontšha gore Mangwalo a be a boletše seo e sa le pele. (Mateo 14:21; 15:38; 21:15, 16) Lehono, bana ba bantši ba fetoga barutiwa ba Jesu. Bjale o ka ba thuša bjang?
18, 19. O ka thuša ngwana wa gago bjang moyeng?
18 Gore o thuše ngwana wa gago moyeng, o swanetše go mo theetša. O swanetše go kwešiša dikgopolo tšeo a ka bago a e-na le tšona tšeo di sa dumelelanego le kgopolo ya Jehofa. Go sa šetšwe seo ngwana wa gago a se bolelago, ke gabohlale go thoma ka go mo reta. Ke moka o ka diriša mangwalo a swanetšego go thuša ngwana wa gago go kwešiša tsela yeo Jehofa a lebelelago dilo ka yona.
19 Dipotšišo di na le mohola. Eupša go no swana le batho ba bagolo, bana ga ba rate go botšološišwa. Go e na le go imetša ngwana wa gago ka morwalo wa go araba dipotšišo tše thata tše mmalwa, o re’ng o sa mmotše ka wena ka boripana? Go ithekgilwe ka taba yeo go boledišanwago ka yona, o ka no bolela gore o ile wa ikwa ka tsela e itšego gomme wa hlalosa lebaka. Ke moka o ka botšiša gore, “Na le wena o ikwa ka mokgwa wo?” Tsela yeo ngwana wa gago a arabelago ka yona e ka lebiša poledišanong e thušago le e kgothatšago ya Mangwalo.
Dula o Ekiša Modiri yo Mogolo wa Barutiwa
20, 21. Ke ka baka la’ng o swanetše go ba motheetši yo botse modirong wa gago bjalo ka modiri wa barutiwa?
20 Go sa šetšwe gore o boledišana le ngwana wa gago ka taba e itšego goba motho le ge e le ofe yo mongwe, go theetša gabotse go bohlokwa. Ee, ke go bontšha lerato. Ka go theetša, o dira dilo ka boikokobetšo gomme yo a theeditšego o bontšhwa tlhompho le go elwa hloko ka lerato. Ke therešo gore go theetša go nyaka gore o ele hloko dipolelo tša motho yoo o bolelago le yena.
21 Ge o tšea karolo bodireding bja Bokriste, tšwela pele o theetša beng ba dintlo ka kelohloko. Ge e ba o theetša ka kelohloko seo ba se bolelago, gantši o ka lemoga dikarolo tša Beibele tšeo ba ka di kgahlegelago. Ke moka katanela go ba thuša ka go diriša mekgwa ya Jesu e fapa-fapanego ya go ruta. Ge o dutše o dira bjalo, o tla hwetša moputso wa lethabo le kgotsofalo ka gobane o ekiša Modiri yo Mogolo wa Barutiwa.
O be o tla Araba Bjang?
• Jesu o ile a kgothaletša ba bangwe bjang go ntšha sa mafahleng a bona?
• Ke ka baka la’ng Jesu a be a theetša bao a bego a ba ruta?
• O ka diriša dipotšišo bjang bodireding bja gago?
• O ka dira’ng go thuša bana moyeng?
[Dipotšišo tša Thuto]
[Seswantšho go letlakala 28]
Ge o dira boboledi, kgonthišetša gore o a theetša
[Seswantšho go letlakala 30]
Ge re thuša bana moyeng, re ekiša Jesu