Hlagolela Dika Tšeo Di Ka Go Thušago Go Dira Barutiwa

“E-yang le dire batho ba ditšhaba ka moka barutiwa.”—MATEO 28:19.

1. Ke bokgoni bofe le boemo bofe bja kgopolo tšeo bahlanka ba Modimo ba nakong e fetilego ba ilego ba swanelwa ke go ba le tšona?

BAHLANKA ba Jehofa ka dinako tše dingwe ba swanetše go hlagolela bokgoni le mekgwa yeo e tlago go ba thuša go phetha thato ya gagwe. Ka mohlala, Aborahama le Sara ba ile ba tloga nageng e atlegilego kudu ya Uri ba laetšwe ke Modimo gomme ba feleletša ba katanela go ba le dika le bokgoni tšeo batho bao ba dulago ditenteng ba bego ba swanetše go ba le tšona. (Baheberu 11:8, 9, 15) Go tsenya Baisiraele Nageng ya Kholofetšo bjalo ka moetapele go ile gwa nyaka gore Jošua a be le sebete, a bote Jehofa le go tseba Molao wa gagwe. (Jošua 1:7-9) Gomme bokgoni le ge e le bofe bjoo Betsaliele le Oholiaba ba ka bago ba be ba šetše ba e-na le bjona ruri bo ile bja oketšwa goba bja godišwa ka mo go oketšegilego ke moya wa Modimo, e le gore banna bao ba ka tsenya letsogo le go okamela modiro wa go agwa ga tabarenakele gotee le mediro e sepedišanago le wona.—Ekisodo 31:1-11.

2. Ke dipotšišo dife tšeo re tlago go di ahla-ahla tšeo di tswalanago le modiro wa go dira barutiwa?

² Nywaga-kgolo ka morago, Jesu Kriste o ile a nea barutiwa ba gagwe taelo ye: “E-yang le dire batho ba ditšhaba ka moka barutiwa, . . . le ba [rute] go boloka dilo tšohle tšeo ke le laetšego tšona.” (Mateo 28:19, 20) Le ka mohla batho ba be ba sa ka ba fiwa tokelo ya go dira selo se se swanago le se. Ke dika dife tšeo di nyakegago modirong wa go dira barutiwa? Re ka hlagolela bjang dika tše bjalo?

Bontšha go Rata Modimo ka mo go Tseneletšego

3. Taelo ya gore re dire barutiwa e re nea sebaka sefe?

³ Go bolela le batho gotee le go katanela go ba tutueletša go rapela Modimo wa therešo go nyaka gore re rate Jehofa ka mo go tseneletšego. Baisiraele ba be ba ka bontšha gore ba rata Modimo ka go kwa ditaelo tša gagwe ka pelo ka moka, ka go dira dihlabelo tše di amogelegago le ka go mo tumiša ka kopelo. (Doiteronomio 10:12, 13; 30:19, 20; Psalme 21:13; 96:1, 2; 138:5) Bjalo ka badiri ba barutiwa, le rena re kwa melao ya Modimo, eupša gape re bontšha gore re rata Jehofa ka go botša ba bangwe ka yena gotee le ka morero wa gagwe. Re swanetše go bolela ka kgodišego, re kgetha mantšu a nepagetšego  go bontšha maikwelo a rena a tšwago pelong a kholofelo yeo re e filwego ke Modimo.—1 Bathesalonika 1:5; 1 Petro 3:15.

4. Ke ka baka la’ng Jesu a be a thabela go ruta batho ka Jehofa?

⁴ Ka gobane o be a rata Jehofa ka mo go tseneletšego, Jesu o be a thabišwa kudu ke go bolela ka merero ya Modimo, Mmušo le borapedi bja therešo. (Luka 8:1; Johane 4:23, 24, 31) Ge e le gabotse, Jesu o itše: “Dijo tša-ka ke gore ke dire thato ya yo a nthomilego le go phetha modiro wa gagwe.” (Johane 4:34) Mantšu a a mopsalme a šoma go Jesu: “Ke kxahlwa ke xo dira tše di thabêlwaxo ke Wêna Modimo wa-ka; molaô wa xaxo o dula ò le pelong ya-ka. Phuthêxô e kxolo ke e anêxêla tša xo loka, ke se kê ka homola. Wene Morêna O a di tseba.”—Psalme 40:8, 9; Baheberu 10:7-10.

5, 6. Seka se segolo seo badiri ba barutiwa ba swanetšego go ba le sona ke sefe?

⁵ Ka go šušumetšwa ke go rata Modimo, bao ba sa tšwago go thoma go ithuta therešo ya Beibele ka dinako tše dingwe ba bolela ka Jehofa le Mmušo ka kgodišego e kgolo moo e lego gore ba kgona go tutueletša ba bangwe go hlahloba Mangwalo. (Johane 1:41) Go rata Modimo ke selo se segolo seo se re šušumeletšago go tšea karolo modirong wa go dira barutiwa. Ka gona, anke re bolokeng lerato leo le phela ka go bala le go naganišiša ka Lentšu la gagwe ka mehla.—1 Timotheo 4:6, 15; Kutollo 2:4.

⁶ Go rata Jehofa ka ntle le pelaelo go ile gwa thuša Jesu Kriste gore e be morutiši yo mafolofolo. Eupša seo ga se sona feela seo se dirilego gore a be mogoeledi yo a atlegago wa Mmušo. Ka gona, ke seka sefe se sengwe seo se dirilego gore Jesu a be modiri yo a atlegago wa barutiwa?

Bontšha go Tshwenyega ka Batho ka Tsela e Lerato

7, 8. Jesu o be a lebelela batho bjang?

⁷ Jesu o be a tshwenyega ka batho le gona o ile a bontšha gore o ba kgahlegela e le ka kgonthe. Gaešita le nakong ya pele a e-ba motho e le “mohlankana” wa Modimo, o be a rata dilo tšeo di sepedišanago le batho. (Diema 8:30, 31) Ge a be a le motho mo lefaseng, Jesu o be a kwela batho bohloko, e le yo a lapološago bao ba bego ba e-tla go yena. (Mateo 11:28-30) Jesu o ile a bonagatša lerato le kwelobohloko tša Jehofa, gomme se se ile sa gogela batho borapeding bja Modimo a nnoši wa therešo. Batho ba mehuta ka moka ba ile ba theetša Jesu ka gobane o be a bontšha gore o tshwenyega ka bona le ka maemo a bona ka tsela e lerato.—Luka 7:36-50; 18:15-17; 19:1-10.

⁸ Ge monna yo mongwe a be a botšiša seo a swanetšego go se dira gore a hwetše bophelo bjo bo sa felego, “Jesu [o ile] a mo lebelela, a kwa a mo rata.” (Mareka 10:17-21) Re bala mabapi le batho ba bangwe bao ba ilego ba rutwa ke Jesu kua Bethania gore: “Jesu o be a rata Mareta le ngwanabo le Latsaro.” (Johane 11:1, 5) Jesu o be a tshwenyega kudu ka batho moo a bego a gafa go khutša mo go nyakegago e le gore a ka ba ruta. (Mareka 6:30-34) Go tswenyega ka batho ka tsela e bjalo e tseneletšego le e lerato go dirile gore Jesu a gogele batho borapeding bja therešo ka katlego go feta motho le ge e le ofe.

9. Paulo o be a e-na le boemo bofe bja kgopolo bjalo ka modiri wa barutiwa?

⁹ Moapostola Paulo le yena o be a tshwenyega ka mo go tseneletšego ka batho bao a bego a dira boboledi go bona. Ka mohlala, o ile a botša bao ba ilego ba fetoga Bakriste kua Thesalonika gore: “Ka ge re e-na le maikwelo a borutho a bonolo ka lena, re ile ra kgahlišwa kudu ke go fetišetša go lena, e sego feela ditaba tše dibotse tša Modimo, eupša le meoya ya rena, gobane le bile ba rategago go rena.” Ka baka la maiteko a Paulo a lerato, ba bangwe kua Thesalonika ‘ba ile ba tšwa go medimo ya bona ya diswantšho gore ba be makgoba a Modimo yo a phelago.’ (1 Bathesalonika 1:9; 2:8) Ge e ba re tswenyega e le ka kgonthe ka batho, go swana le Jesu le Paulo, le rena re ka thabela go bona ge ditaba tše dibotse di fihlelela dipelo tša bao “ba nago le tshekamelo e swanetšego ka bophelo bjo bo sa felego.”—Ditiro 13:48.

Bontšha Moya wa Boikgafo

10, 11. Ke ka baka la’ng go nyakega moya wa boikgafo ge re leka go dira barutiwa?

¹⁰ Badiri bao ba atlegago ba barutiwa ba na le moya wa boikgafo. Ba tloga ba sa lebelele go  hwetša mahumo e le selo se bohlokwa kudu. Ge e le gabotse, Jesu o boditše barutiwa ba gagwe gore: “E tla ba selo se thata gakaakang go bao ba nago le tšhelete go tsena mmušong wa Modimo!” Barutiwa ba be ba makaditšwe ke go kwa se, eupša Jesu o ile a tlaleletša ka gore: “Bana, go tsena mmušong wa Modimo ke selo se se thata gakaakang! Go bonolo gore kamela e tsene ka lešobana la nalete go e na le gore mohumi a tsene mmušong wa Modimo.” (Mareka 10:23-25) Jesu o ile a eletša balatedi ba gagwe gore ba phele bophelo bjo bonolo e le gore ba ka lebiša tlhokomelo go direng barutiwa. (Mateo 6:22-24, 33) Ke ka baka la’ng moya wa boikgafo o re thuša go dira barutiwa?

¹¹ Go ruta dilo ka moka tšeo Jesu a di laetšego go nyaka maiteko a magolo. Modiri wa barutiwa gantši o katanela go swarela motho yo a nago le kgahlego thuto ya Beibele beke e nngwe le e nngwe. Gore ba oketše dibaka tša bona tša go hwetša batho ba botegago, bagoeledi ba bangwe ba Mmušo ba ile ba tlogela mešomo ya nako e tletšego gomme ba šoma mešomo ya nakwana. Bakriste ba dikete ba ithutile leleme le lengwe e le gore ba ka fihlelela batho bao ba bolelago maleme a mangwe ba lego tikologong ya gabo bona. Badiri ba bangwe ba barutiwa ba tlogetše magae a bona gomme ba khudugela lefelong le lengwe goba nageng e nngwe e le gore ba ka tšea karolo kudu punong. (Mateo 9:37, 38) Se ka moka se nyaka moya wa boikgafo. Eupša go ba modiri yo a atlegago wa barutiwa go nyaka se se fetago seo.

O se ke wa Fela Pelo Eupša o se ke wa Senya Nako

12, 13. Ke ka baka la’ng go se fele pelo go le bohlokwa gakaakaa ge go dirwa barutiwa?

¹² Go se fele pelo ke seka se sengwe seo se re thušago go dira barutiwa. Molaetša wa rena wa Bokriste o tsoma gore go gatwe mogato ka bjako, eupša go dira barutiwa gantši go tšea nako e teletšana e bile go tsoma go se fele pelo. (1 Bakorinthe 7:29) Jesu ga se a ka a felela ngwanabo ka motswadi o tee e lego Jakobo pelo. Gaešita le ge go bonala Jakobo a be a tlwaelane le mediro ya Jesu ya boboledi, go na le seo se ilego sa mo palediša go ba morutiwa ka nako e telele. (Johane 7:5) Lega go le bjalo, ka nako e nyenyane magareng ga lehu la Kriste le Pentekoste ya 33 C.E., go molaleng gore Jakobo o ile a ba morutiwa, ka gobane Mangwalo a bontšha gore yena le mmagwe ba ile ba tla thapelong gotee le bana ba gabo le baapostola. (Ditiro 1:13, 14) Jakobo o ile a dira tšwelopele e botse ya moya gomme ka morago o ile a ba le boikarabelo bjo bogolo ka phuthegong ya Bokriste.—Ditiro 15:13; 1 Bakorinthe 15:7.

¹³ Bjalo ka balemi, Bakriste ba hlagolela dilo tšeo gantši di melago ka go nanya—kwešišo ya Lentšu la Modimo, go rata Jehofa gotee le go ba le moya wa go swana le wa Kriste. Se se tsoma go se fele pelo. Jakobo o ngwadile gore: “Bontšhang go se fele pelo, bana bešo, go fihlela go beng gona ga Morena. Bonang! Molemi o dula a letile dienywa tše bohlokwa tša lefase, a bontšha go se di felele pelo go fihla ge a hwetša pula ya pele le pula ya morago. Le lena bontšhang go se fele pelo; tiišang dipelo tša lena, gobane go ba gona ga Morena go batametše.” (Jakobo 5:7, 8) Jakobo o be a kgothaletša badumedi-gotee le yena gore ba ‘bontšhe go se fele pelo go fihlela go beng gona ga Morena.’ Ge barutiwa ba be ba sa kwešiše selo se itšego, Jesu o be a ba hlalosetša goba go ba nea papišo a sa fele pelo. (Mateo 13: 10-23; Luka 19:11; 21:7; Ditiro 1:6-8) Gona bjale ka gore Morena o gona, ka mo go swanago go nyakega go se fele pelo ge re katanela go dira barutiwa. Bao ba fetogago balatedi ba Jesu mo mehleng ya rena ba tsoma go rutwa ntle le go fela pelo.—Johane 14:9.

14. Gaešita le ge re sa fele pelo, re ka diriša nako ya rena bjang ka bohlale bjalo ka badiri ba barutiwa?

¹⁴ Gaešita le ge re sa fele pelo, lentšu ga le enywe dienywa bathong ba bantši bao re thomago go ithuta Beibele le bona. (Mateo 13:18-23) Ka go rialo, ka morago ga go dira maiteko a kwagalago a go ba thuša, ka bohlale re tlogela go fetša nako re e-na le batho ba bjalo gomme ra tsoma go hwetša bao ba ka tšeelago therešo ya Beibele godimo. (Mmoledi 3:1, 6) Ke therešo gore gaešita le batho bao ba nago le tebogo ba ka tsoma thušo e oketšegilego e le gore ba fetoše dipono tša bona, boemo bja kgopolo le dilo tšeo ba di etišago pele bophelong. Ka baka leo ga re fele pelo, go fo swana le ge Jesu a be a sa felele barutiwa ba gagwe pelo bao ba bego ba thatafalelwa ke go ba le boemo bjo bo nepagetšego bja kgopolo.—Mareka 9:33-37; 10:35-45.

E-ba le Bokgoni bja go Ruta

15, 16. Ke ka baka la’ng go bolela ka tsela e bonolo le go lokišetša gabotse go le bohlokwa ge re dira barutiwa?

¹⁵ Go rata Modimo, go tshwenyega ka batho, moya wa boikgafo gotee le go se fele pelo ke dika tše bohlokwa go direng barutiwa ka katlego. Bokgoni bja go ruta le bjona bo swanetše go hlagolelwa, ka gobane bo re kgontšha go hlalosa ditaba ka tsela e kwagalago le e bonolo. Ka mohlala, dipolelo tše dintši tša Morutiši yo Mogolo, Jesu Kriste, di be di le matla ka baka la go ba bonolo ga tšona. O ka no ba o gopola dipolelo tša Jesu tše bjalo ka tše: “Ipolokeleng mahumo legodimong.” “Le se ke la nea dimpša se sekgethwa.” “Bohlale bo hlatselwa gore bo lokile ke mediro ya bjona.” “Neang Kesara tša Kesara, eupša Modimo le mo nee tša Modimo.” (Mateo 6:20; 7:6; 11:19; 22:21) Ke therešo gore Jesu o be a sa bolele mafoko a makopana feela. O be a ruta ka tsela e kwagalago e bile a hlalosa dilo ge go dira bjalo go be go swanetše. O ka ekiša bjang tsela ya Jesu ya go ruta?

¹⁶ Go lokišetša ka kelohloko ke senotlelo sa go ruta ka tsela e bonolo le e kwagalago. Modiredi yo a sa lokišetšago gantši o bolela kudu. A ka feleletša ka go bipa dintlha tše dikgolo ka tsebišo e ntši kudu, ka go bolela dilo ka moka tšeo a di tsebago ka taba yeo. Ka mo go fapanego, modiredi yo a lokišeditšego gabotse o nagana ka motho yoo a mo rutago, o naganišiša ka taba, gomme a bolela feela seo se nyakegago. (Diema 15:28; 1 Bakorinthe 2:1, 2) O ela hloko seo morutwana a šetšego a se tseba le dintlha tšeo di swanetšego go gatelelwa nakong ya thuto. Modiredi a ka ba a tseba dintlha tše dintši tšeo di kgahlišago tša taba yeo, eupša go kwagala ga yona go tlišwa ke go phaela ka thoko tsebišo e sa nyakegego.

17. Re ka thuša batho bjang go nea mabaka ka Mangwalo?

¹⁷ Jesu le gona o be a thuša batho go bea mabaka, go e na le go fo ba nea dintlha. Ka mohlala, lebakeng le lengwe o ile a botšiša gore: “O nagana’ng Simone? Magoši a lefase a hwetša ditshwanelo goba lekgetho la hlogo ka hlogo go bomang? Na ke go barwa ba bona goba go batho ba bangwe?” (Mateo 17:25) Re ka thabela go hlalosa Beibele kudu moo e lego gore go ka nyakega boitshwaro gore re dumelele morutwana a ntšha sa mafahleng a gagwe goba go hlalosa taba yeo e ahla-ahlwago nakong ya thuto ya legae ya Beibele. Ka tlhago, ga se ra swanela go imetša batho ka dipotšišo. Go e na le moo, ka  bohlale, ka dipapišo tše dibotse le ka dipotšišo tšeo di nagannwego gabotse, re ka ba thuša go kwešiša dintlha tša Mangwalo tšeo go bolelwago ka tšona ka dikgatišong tša rena tšeo di theilwego Beibeleng.

18. Go ba le “bokgoni bja go ruta” go akaretša’ng?

¹⁸ Mangwalo a bolela ka “bokgoni bja go ruta.” (2 Timotheo 4:2; Tito 1:9) Bokgoni bjo bjalo bja go ruta bo akaretša mo gontši kudu go feta go thuša motho go swara dintlha ka hlogo. Re swanetše go leka go thuša barutwana ba Beibele go kwešiša phapano magareng ga therešo le maaka, botse le bobe, gotee le bohlale le bošilo. Ge re dutše re dira se le go katanela go hlagolela lerato la go rata Jehofa ka pelong ya motho, a ka bona lebaka la gore a Mo kwe.

Tšea Karolo ka Mafolofolo go Direng Barutiwa

19. Bakriste ka moka ba tsenya letsogo bjang go direng barutiwa?

¹⁹ Phuthego ya Bokriste ke mokgatlo wa go dira barutiwa. Ge motho a e-ba morutiwa yo mofsa, Hlatse ya Jehofa yeo e mo hweditšego le go mo thuša go ithuta seo Beibele e se rutago ga se yona feela yeo e nago le lebaka la go thaba. Ge batho ba rulaganya sehlopha sa go tsoma ngwana yo a timetšego, ke setho se tee feela sa sehlopha se seo ge e le gabotse se ka hwetšago ngwana yoo. Eupša ge ngwana yoo a boelanywa le batswadi ba gagwe, bohle bao ba tsentšego letsogo ge a be a tsongwa ba a thaba. (Luka 15:6, 7) Ka mo go swanago, go dira barutiwa ke maiteko a sehlopha. Bakriste ka moka ba tšea karolo go tsomeng bao ba ka bago barutiwa ba Jesu. Gomme ge motho a thoma go tla dibokeng Holong ya Mmušo, Mokriste yo mongwe le yo mongwe yo a lego gona o tsenya letsogo go ageng tebogo ya gagwe bakeng sa borapedi bja therešo. (1 Bakorinthe 14:24, 25) Ka go rialo, Bakriste bohle ba ka thabela gore go dirwa barutiwa ba bafsa ba dikete tše makgolo ngwaga o mongwe le o mongwe.

20. Ke’ng seo o swanetšego go se dira ge e ba o nyaka go ruta ba bangwe therešo ya Beibele?

²⁰ Bakriste ba bantši ba botegago ba ka thabela go ruta motho ka Jehofa le borapedi bja therešo. Lega go le bjalo, go sa šetšwe maiteko a bona a magolo kudu, ba ka no ba ba sa ka ba kgona go dira bjalo. Ge e ba o le boemong bjo bjalo, tšwela pele o matlafatša lerato la gago la go rata Jehofa, tshwenyega ka batho, e-ba le moya wa boikgafo, o se ke wa fela pelo le gona o katanele go kaonefatša bokgoni bja gago bja go ruta. Godimo ga tšeo ka moka, rapela ka kganyogo ya gago ya go ruta ba bangwe therešo. (Mmoledi 11:1) Homotšwa ke go tseba gore sohle seo o se dirago tirelong ya Jehofa se kgatha tema modirong wa go dira barutiwa woo o neago Modimo letago.

Na o ka Hlalosa?

• Ke ka baka la’ng go dira barutiwa go leka lerato la rena la go rata Modimo?

• Badiri ba barutiwa ba swanetše go ba le dika dife?

• “Bokgoni bja go ruta” bo akaretša’ng?

[Dipotšišo tša Thuto]

[Seswantšho go letlakala 21]

Ka go dira barutiwa, Bakriste ba bontšha gore ba rata Modimo ka mo go tseneletšego

[Seswantšho go letlakala 23]

Ke ka baka la’ng badiri ba barutiwa ba swanetše go kgahlegela ba bangwe?

[Seswantšho go letlakala 24]

Ke dika dife tše dingwe tšeo badiri ba barutiwa ba swanetšego go ba le tšona?

[Seswantšho go letlakala 25]

Bakriste bohle ba thabela go bona mafelelo a mabotse a modiro wa go dira barutiwa