“Hle Amogelang Mpho Ya-ka E Nyenyane”

MANTŠU a a tšwelela ka lengwalong leo le amogetšwego ke ofisi ya lekala ya Dihlatse tša Jehofa kua Russia. Lengwalo le le be le sepela le lepokisi le legolo leo le bego le tletše masokisi a wulu.

Mpho ye e be e rometšwe ke Alla yo a nago le nywaga e 67, yo mongwe wa Dihlatse tša Jehofa yoo a hlankelago phuthegong e lego ka Bohlabela bja Kgole bja Russia. Alla o be a dutše a hlankela Jehofa ka nywaga e fetago e lesome, a bolela ditaba tše dibotse tša Mmušo ka mafolofolo. Lega go le bjalo, kapejana o ile a golofatšwa ke go hwa lehlakore. Ka ge a tutueditšwe ke lerato, Alla o latetše tsela yeo e swanago le ya mosadi wa Mokriste wa lekgolong la pele la nywaga e lego Doroka, yo a ilego a direla badumedi-gotee le yena diaparo.—Ditiro 9:36, 39.

Ka lengwalong la gagwe, Alla o ngwadile gore: “Ga ke kgone go šikinya maoto a-ka, eupša ke sa kgona go diriša matsogo a-ka. Ka gona ke dira boboledi ka go ngwala mangwalo.” O ile a tlaleletša ka gore: “Ka ge matsogo a-ka a sa kgona go šoma, ke ile ka dira phetho ya go loga masokisi a mmalwa a borutho. Nka thaba ge masokisi a a ka fiwa bana babo rena le dikgaetšedi bao ba šomago go aga Diholo tša Mmušo mafelong ao a tonyago, a bjalo ka Bohlabela bja Kgole le Siberia.”

Jesu Kriste o boletše mabapi le balatedi ba gagwe ba therešo gore: “Bohle ba tla tseba ka se gore le barutiwa ba-ka, ge e ba le ratana.” (Johane 13:35) Lerato le le swanago le leo le bontšhitšwego ke Alla ke seka seo se hlaolago balatedi ba Jesu ba therešo.