Ke Eng Seo se Dirago Gore Bophelo bja Gago bo be le Morero?

KENNY o be a šoma khamphaning e kgolo ya go bapatša, a e-na le koloi ya mabaibai e tšwago moše wa mawatle, e bile a dula foleteng e lego ka toropong e kgolo moo go dulago bahumi. Ka ge a be a e-na le bokgoni bja go akalala moyeng, o be a thabela go akalala dimithara tše dikete go tloga fase. Na tše ka moka di mo tlišeditše kgotsofalo bophelong? Go ya ka The Wall Street Journal, o boletše gore: “Ke nna yo, ke na le nywaga e 45 gomme bophelo bja-ka ga bo ye felo . . . Bophelo bja-ka ga bo na morero.”

Elyn o ile a šoma ka thata gore e be sebapadi se se atlegilego sa go thelela lehlweng. Mafelelong o ile a fihlelela maemo a phagamego. Elyn o be a hweditše botumo bjoo a bego a bo tsoma. O llile ka gore: “Eupša lethabo leo ke bego ke swanetše go ba le lona le kae? Ke lewa ke bodutu kudu. Mafelelong ke tla tšofala gomme, le ge ke be ke šireletšegile ka tša ditšhelete, bophelo bo tla be bo se na mohola ge e ba se e le wona feela morero wa bjona.”

 Hideo, yoo a bego a tsebja ka bokgoni bja gagwe bja go diriša mebala, o be a ineetše modirong wa tša bokgabo. Ga se a ka a rekiša dilo tšeo a di dirilego; o be a nagana gore go dira bjalo go be go tla theoša boineelo bja gagwe go tša bokgabo. Go ya bofelong bja bophelo bja gagwe bja nywaga e 98, o ile a nea musiamo bontši bja dilo tša bokgabo tšeo a di dirilego. Bophelo bja gagwe ka moka o be a bo dirišetša go phegelela dilo tša bokgabo. Lega go le bjalo, o be a se a kgotsofala, a nagana gore a ka se tsoge a kgonne go kaonefatša modiro wa gagwe.

Batho ba bangwe ba dira sohle seo ba ka se kgonago go thuša ba bangwe. Ka mohlala, ela hloko mošomi yo mongwe wa maemo a godimo wa difilimi kua Hollywood. Ka ge e le motlatša-mopresidente go e nngwe ya dikhamphani tše kgolo tša difilimi tša kua United States, o be a tlwaelane le batho ba tumilego gomme a dula lefelong leo le bitšago kudu le la maemo a godimo. Ge a be a etetše Cambodia nakong ya maikhutšo, ngwanenyana o ile a tla go yena a mo kgopela tšhelete ge a be a le gare a e-ja dijo tša go lalela ka lebenkeleng la go jela kua Phnom Penh. O ile a mo nea tolara le seno-tšididi. Ngwanenyana o ile a thaba kudu. Lega go le bjalo, bošegong bjo bo latetšego, ngwanenyana o be a le moo gape, a kgopela. Mošomi yo o ile a bona gore go tloga go nyakega thušo e kgolo.

Ka morago ga ngwaga, mošomi yo yo a nago le maemo a phagamego o ile a dira phetho ya go fetoša mošomo—a tlogele go šoma intasetering ya tša boithabišo gomme a thuše bahloki kua Cambodia. O ile a hloma sekolo seo se neago madulo, dijo le thuto. Lega go bjalo, ka mehla o ba le maikwelo a lwantšhanago—lethabo le kgotsofalo tšeo di tlišwago ke seo a se fihlelelago gotee le go nyama le kgakanego tšeo di bakwago ke mathata a oketšegago ao a swanetšego go lebeletšana le ona.

Batho ba ba bane ka moka bao go sa tšwago go bolelwa ka bona ba be ba nagana gore ba tseba seo ba se phelelago. Lega go le bjalo, ba ile ba ikwa ba se na lethabo ge ba be ba fihlelela pakane yeo ba e šometšego ka thata. Ke’ng seo o se phelelago? Ke’ng seo se tlago pele bophelong bja gago? Na o kgodišegile gore o ka se ke wa itshola ka morago ka baka la tsela yeo o phelago ka yona?