Na o Lapološa ba Bangwe?

MAFELELONG a ka borwa bja Thaba ya Anti-Lebanon go na le Thaba ya Herimone, yeo tlhora ya yona e lego ya bophagamo bja dimithara tše 2 814. Karolong e kgolo ya ngwaga, tlhora ya thaba ya Herimone e dula e khupeditšwe ke lehlwa gomme se se dira gore moya o borutho wa bošego wo o fetago go yona o fetoge phoka. Lehlwa le wela mehlareng ya mephaene le ya dienywa yeo e lego meeding ya tlase le dirapa tša merara tšeo di lego ka tlasana. Nakong e telele ya komelelo kua Isiraeleng ya bogologolo, phoka e bjalo e lapološago e be e le yona yeo e nošetšago dimela.

Košeng yeo e buduletšwego ke Modimo, botee bjo bo lapološago bja barapedi ba Jehofa bo bapišwa le “phoka ya thaba ya Herimone, xe e êlêla dithabeng tša Tsione.” (Psalme 133:1, 3) Go fo swana le ge Thaba ya Herimone e tšweletša phoka e tsošološago dimela, re ka lapološa batho bao re kopanago le bona. Re ka dira bjalo bjang?

Mohlala wa Jesu o Lapološago

Jesu Kriste o be a kgoma ba bangwe ka tsela e kgolo kudu. Gaešita le go kopana le yena ka nako e kopana go be go lapološa kudu. Ka mohlala, mongwadi wa Ebangedi e lego Mareka o laodiša ka gore: “[Jesu] a gokarela bana a thoma go ba šegofatša, a ba bea diatla.” (Mareka 10:16) Ruri seo e swanetše go ba e bile selo se se thabišago gakaakang go bana bao!

Bošegong bja gagwe bja mafelelo a le motho lefaseng, Jesu o ile a hlapiša barutiwa ba gagwe maoto. Boikokobetšo bja gagwe bo swanetše go ba bo ile bja ba kgoma dipelo. Ka gona Jesu o ile a ba botša gore: “Ke le beetše mohlala gore go etša ge ke dirile go lena, le lena le dire bjalo.” (Johane 13:1-17) Ee, le bona ba be ba swanetše go ikokobetša. Gaešita le ge baapostola ba se ba ka ba kwešiša ntlha ka yona nako yeo gomme ba thoma go ganetšana ka morago bošegong bjona bjoo mabapi le gore ke mang wa bona yo a bonagalago e le yo mogolo, Jesu ga se a ka a galefa. Go e na le moo, o ile a boledišana le bona a sa fele pelo. (Luka 22:24-27) Gaešita le “ge a be a rogwa, [Jesu] ga se a ka a ithogela.” Ge e le gabotse, “ge a be a tlaišega, ga se a ka a tšhošetša, eupša o ile a dula a ikgafetše yo a ahlolago ka go loka.” Mohlala o lapološago wa Jesu o swanelwa ke go ekišwa.—1 Petro 2:21, 23.

Jesu o itše: “Rwalang joko ya-ka le ithute go nna, gobane ke wa moya o boleta e bile ke wa pelo e ikokobeditšego, gomme le tla hweletša meoya ya lena tapologo.” (Mateo 11:29) Inagane o rutwa ke Jesu ka boyena. Ka morago ga go mo kwa a ruta sinagogeng ya bona, bao ba dulago kgaufsi le gagabo ba ile ba makala gomme ba re: “Motho yo o tšere kae bohlale bjo le mediro ye e matla?” (Mateo 13:54) Go bala ka bophelo bja Jesu le bodiredi bja gagwe go ka re ruta mo gontši mabapi le go lapološa ba bangwe. Anke re hlahlobeng kamoo Jesu a beilego mohlala o lemogegago ka polelo e agago le ka go ba le boemo bja kgopolo bja go thuša.

Go Kgomarela Polelo e Agago

Go bonolo kudu go wiša moago go feta go aga o mofsa. Molao wa motheo o swanago wa go wiša le go aga o a šoma le polelong ya rena. Bjalo ka batho bao ba sa phethagalago, ka moka ga rena re na le mafokodi. Kgoši Solomone o itše: “Mo ’faseng xa xo motho-moloki mo-dira-tše-boló e a sa direxo sebe.” (Mmoledi 7:20) Go bonolo go lemoga diphošo tša motho  yo mongwe le go mo nyamiša ka mantšu a hlabago. (Psalme 64:2-4) Ka lehlakoreng le lengwe, go dula re bolela dilo tše di kgahlišago ga go bonolo.

Jesu o dirišitše leleme la gagwe go aga batho. O ile a ba lapološa moyeng ka go ba botša ditaba tše dibotse tša Mmušo. (Luka 8:1) Jesu gape o ile a lapološa bao e bilego barutiwa ba gagwe ka go ba botša ka Tatagwe wa legodimong. (Mateo 11:25-27) Ga go makatše ge batho ba ile ba gogelega go Jesu!

Ka mo go fapanego, bamangwalo le Bafarisei ba be ba sa ele hloko dinyakwa tša ba bangwe. Jesu o itše: “Ba rata dibaka tša ka pele-pele dilalelong le ditulo tša ka pele disinagogeng.” (Mateo 23:6) Ge e le gabotse, ba be ba nyatša batho ba tlwaelegilego, ba re: “Lešaba le leo le sa tsebego Molao ke batho ba rogakilwego.” (Johane 7:49) Ruri go be go se na selo se se lapološago ka boemo bja bona bja kgopolo!

Gantši seo re se bolelago se bontšha seo re se naganago le kamoo re lebelelago ba bangwe ka gona. Jesu o itše: “Motho yo bolo o tšweletša dilo tše dibotse go tšwa lehumong le lebotse la pelo ya gagwe, eupša motho yo kgopo o tšweletša seo se lego kgopo go tšwa lehumong la gagwe le lebe; gobane molomo wa gagwe o bolela se se tletšego pelong.” (Luka 6:45) Ka gona, re ka dira’ng go kgonthišetša gore seo re se bolelago se lapološa ba bangwe?

Se sengwe seo re ka se dirago ke gore re eme go se nene gomme re nagane pele re ka bolela. Diema 15:28 e re: “Pelo ya moloki e akanya diphetolô.” Go naganišiša mo go bjalo ga se gwa swanela go tšea nako e telele. Ka go nagana go se nene e sa le pele, gantši re ka lemoga kamoo seo re se bolelago se tlago go tšewa ka gona. Re ka ipotšiša gore: ‘Na se ke lego kgaufsi le go se bolela se bontšha lerato? Na ke therešo goba e fo ba mabarebare? Na ke “lentšu la xo tla lebakeng la xôna?” Na se tla lapološa le go aga bao ke ba botšago sona?’ (Diema 15:23) Ge e ba re phetha ka gore kgopolo e itšego ga se ya nepagala goba gore ga se e swanetšego ka nako yeo, anke re direng maiteko a magolo a go e tlogela. Go e na le moo, ke ka baka la’ng o sa leke go bolela selo se itšego se sebotse le se se swanetšego legatong la yona? Mantšu ao a gobatšago a bjalo ka ‘lerumo le le hlabago,’ gomme mantšu a agago ke “moreku.”—Diema 12:18.

Thušo e nngwe ke go ela hloko seo se dirago gore badumedi-gotee le rena e be bao ba rategago mahlong a Modimo. Jesu o itše: “Ga go motho yo a ka tlago go nna ge a sa gogwe ke Tate yo a nthomilego.” (Johane 6:44) Jehofa o bona dika tše dibotse go yo mongwe le yo mongwe wa bahlanka ba gagwe bao ba botegago—gaešita le bao re ka naganago gore ba na le semelo se thata. Ka go katanela go lemoga dika tša bona tše dibotse, re tla ba le mabaka a go bolela gabotse ka bona.

Thuša ba Bangwe

Jesu o be a kwešiša ka botlalo tlalelo ya bao ba gateletšegilego. Ee, “ge a bona mašaba a a šokela, gobane ba be ba šokiša gomme ba gašane  go swana le dinku tše di se nago modiši.” (Mateo 9:36) Eupša Jesu o dirile se se fetago go bona boemo bja bona bjo bo nyamišago; go na le seo a se dirilego bakeng sa go ba thuša. O ile a ba laletša ka gore: “Tlang go nna, lena bohle bao le lapišitšwego le go imelwa, ke tla le lapološa.” O ile a ba a nea kgonthišetšo e rego: “Joko ya-ka e botho, morwalo wa-ka o bohwefo.”—Mateo 11:28, 30.

Lehono, re phela ‘dinakong tše di hlobaetšago tšeo go lego thata go lebeletšana le tšona.’ (2 Timotheo 3:1) Batho ba bantši ba ikwa ba imelwa ke “pelaelo ya tshepedišo ye ya dilo.” (Mateo 13:22) Ba bangwe ba na le morwalo wa maemo a gateletšago a motho ka noši. (1 Bathesalonika 5:14) Re ka lapološa bjang bao ba nyakago go lapologa? Ka go swana le Kriste, re ka ba thuša ka go fokotša morwalo wa bona.

Batho ba bangwe ba rata go ikimolla morwalo ka go bolela ka mathata a bona. Ge batho bao ba imelwago ba e-tla go rena bakeng sa thušo, na re ipha nako ya go theetša ka kelohloko? Go ba motheetši yo a nago le kwelobohloko go nyaka boitayo. Go akaretša go dula re šeditše seo motho yo mongwe a se bolelago, go e na le go nagana mabapi le kamoo re tlago go arabela ka gona goba go rarolla bothata. Ka go mo theetša ka kelohloko, go mo lebelela ka mahlong le ka go myemyela ge go dira bjalo go swanetše, re bontšha gore re a kgomega.

Ka phuthegong ya Bokriste, go na le dibaka tše dintši tša go kgothatša badumedi-gotee le rena. Ka mohlala, ge re le dibokeng Holong ya Mmušo, re ka tsoma bao ba katanago le mathata a tša maphelo. Ka dinako tše dingwe, go ba aga go fo nyaka feela gore re fetše metsotso e sego kae le bona pele goba ka morago ga diboka e le gore re ba kgothatše. Gape re ka ela hloko le bao ba sa bego gona Thutong ya Puku ya Phuthego yeo re bago gona go yona. Mohlomongwe re ka ba leletša mogala le go bonagatša gore re kgahlegela boiketlo bja bona goba ra ba thuša.—Bafilipi 2:4.

Bagolo ba Bakriste ba rwele boikarabelo bjo boima ka phuthegong. Re ka dira mo gontši ka go thuša go fokotša morwalo wa bona ka go dirišana le bona le ka go dira ka boikokobetšo kabelo le ge e le efe yeo re ka e hwetšago. Lentšu la Modimo le re kgothatša ka gore: “Kwang bao ba etelelago pele gare ga lena gomme le ikokobetše, gobane ba hlokomela meoya ya lena e le bao ba tlago go ikarabela; e le gore ba dire se ka lethabo e sego ka go fegelwa, gobane se se tla le gobatša.” (Baheberu 13:17) Ka go bonagatša moya wa boikemišetšo, re ka lapološa “bao ba okamelago gabotse.”—1 Timotheo 5:17.

Ata Polelong e Botse le Ditirong tše Holago

Phoka e lapološago e tlišwa ke marothi a dikete a meetse ao a theogago ka boiketlo, mo go bonagalago eka ga go na mo a tšwago gona. Ka mo go swanago, go lapološa ba bangwe ga se gantši go ka tlišwago ke tiro e tee feela ya theto go swana le ge go ka tlišwa ke go bonagatša dika tše di swanago le tša Kriste ka dinako ka moka.

Moapostola Paulo o ngwadile gore: “Leratong la borwarre e-bang le maikwelo a borutho a bonolo go yo mongwe le yo mongwe. Go bontšhaneng kgodišo, etelelang pele.” (Baroma 12:10) Anke re dirišeng keletšo ya Paulo. Ka polelo ya rena le ditiro, anke re lapološeng ba bangwe e le ka kgonthe.

[Diswantšho go letlakala 16]

Phoka ya Thaba ya Herimone—mothopo o tsošološago dimela

[Seswantšho go letlakala 17]

Motheetši yo a bontšhago kwelobohloko o lapološa ba bangwe