Bogoši Bja Jehofa Le Mmušo Wa Modimo

“Morêna, boxolo ké bya xaxo, le matla, le letaxô, le dithêtô, le borêna . . . O mmuši.” —1 KORONIKA 29:11.

1. Ke ka baka la’ng Jehofa e le Mmuši yo a swanelegago wa legohle?

“MORÊNA, sedulô sa xaxwe ó se theile kwa maxodimong; ’me mmušô wa xaxwe o buša tše xo fêla.” (Psalme 103:19) Ka mantšu ao, mopsalme o be a bontšha therešo ya motheo mabapi le bobuši. Jehofa Modimo, ka ge e le Mmopi, o na le tshwanelo ya go ba Mmuši yo Mogolo wa legohle.

2. Daniele o hlalositše lapa la Jehofa la moya bjang?

² Ee, gore mmuši a buše, go swanetše go ba le balata. Sa pele, Jehofa o ile a thoma ka go buša dibopiwa tša moya tšeo a di hlotšego—sa mathomo e bile Morwa wa gagwe yo a tswetšwego a nnoši gomme ka morago ya ba dibopiwa tše dintši tša barongwa. (Bakolose 1:15-17) Ka morago ga nako e telele, moporofeta Daniele o ile a bontšhwa bogoši bja Jehofa bja legodimong. O begile gore: “Ya re kè sa lebeletše, xwa bewa didulô, xwa dula Motála-wa-mabaka, . . . ó hlankêlwa ke ba dikete tše sekete.” (Daniele 7:9, 10) Ka nywaga e mentši Jehofa, “Motála-wa-Mabaka,” o ile a okamela e le Yo a Phagametšego lapa la gagwe le legolo le leo le rulagantšwego gabotse la barwa ba moya, bao e bego e dutše e le “bahlanka” ba gagwe bao ba dirago thato ya gagwe.—Psalme 103:20, 21.

3. Pušo ya Jehofa e ile ya katološetšwa bjang legohleng le le bonagalago?

³ Mafelelong, Jehofa o ile a katološa pušo ya gagwe ka go hlola legohle le legolo le le bonagalago le leo le raraganego, go akaretša le lefase. (Jobo 38:4, 7) Go yo a lebeletšego a le lefaseng, dilo tšeo di lego legodimong di šoma ka tsela e rulagantšwego le e nepagetšego moo e lego gore ga go nyakege gore di hlahlwe goba di laolwe. Lega go le bjalo, mopsalme o boletše gore: “[Jehofa] ké Yêna a lailexo, xomme tša hlôlêxa. ’Me ó di beile ya ba tša neng le neng; a di beêla mokxwa, di se o tloxêlê.” (Psalme 148:5, 6) Ka mehla Jehofa o be a buša ka go hlahla, go sepetša ka molao le ka go buša tshepedišo ya dilo tikologong ya moya le legohleng le le bonagalago.—Nehemia 9:6.

4. Jehofa o buša batho bjang?

⁴ Ge a se na go bopa batho ba babedi ba pele, Modimo o ile a bontšha bogoši bja gagwe ka tsela e nngwe gape. Ntle le gore Jehofa o neile batho dilo tšohle tšeo ba di nyakago gore ba phele bophelo bjo bo nago le  morero le bjo bo kgotsofatšago, o ile a ba nea le matla a go laola dibopiwa tša lefase tša tlasana—go abela ba bangwe matla a go laola. (Genesi 1:26-28; 2:8, 9) Ka gona, go molaleng gore ga se feela gore bogoši bja Modimo ke bjo bo kgahlišago le bjo bobotse, eupša gape bo nea balatedi ba gagwe tlhompho le seriti. Ge feela Adama le Efa ba be ba ka dula ba ikokobeletša bogoši bja Jehofa, ba be ba ka ba le tebelelo ya go phela ka mo go sa felego lefaseng la paradeise.—Genesi 2:15-17.

5. Re ka hlalosa bjang tsela ya Jehofa ya go buša?

⁵ Re ka phetha ka go re’ng go se ka moka? Sa pele, Jehofa o be a dutše a buša dibopiwa tša gagwe ka moka. Sa bobedi, pušo ya Modimo e a kgahliša e bile e nea balatedi ba gagwe seriti. Mafelelong, go kwa le go thekga pušo ya Modimo go tla feleletša ka ditšhegofatšo tša ka mo go sa felego. Ga go makatše ge Kgoši Dafida wa Isiraele ya bogologolo a ile a tutueletšega go bolela gore: “Morêna, boxolo ké bya xaxo, le matla, le letaxô, le dithêtô, le borêna; xobane tšohle kwa lexodimong le mo lefaseng ké tša xaxo. O mmuši, O hlôxô ye e iphaxamišitšexo xodimo xa tšohle.”—1 Koronika 29:11.

Ke ka Baka la’ng Mmušo wa Modimo o Nyakega?

6. Go na le tswalano efe gare ga bogoši bja Modimo le Mmušo wa gagwe?

⁶ Ka ge Jehofa, Mmuši wa Legohle, a be a dutše a diriša matla le bogolo bja gagwe, ke ka baka la’ng go nyakega Mmušo wa Modimo? Mmuši gantši o diriša baemedi go buša balata ba gagwe. Ka baka leo, Mmušo wa Modimo ke pontšho ya bogoši bja Modimo bja legohle go dibopiwa tša gagwe, e lego tsela yeo a e dirišago ya go buša.

7. Ke ka baka la’ng Jehofa a ile a hloma tsela e mpsha ya go buša?

⁷ Jehofa o bušitše ka ditsela tše sa swanego le ka dinako tše sa swanego. O ile a hloma tsela e mpsha ya go buša ka go dumelelana le ditokišetšo tše difsa. Se se diragetše nakong ya ge lerabele, morwa wa Modimo wa moya, Sathane, a be a atlega go tutueletša Adama le Efa go rabela kgahlanong le bogoši bja Jehofa. Borabele bjoo bo ile bja hlohla tsela ya Modimo ya go buša. Ka ditsela dife? Ka go botša Efa gore ge a ka ja seenywa se se ileditšwego ‘a ka se ke a hwa lehu,’ Sathane o be a e-ra gore Jehofa ga a bolele therešo gomme ka go rialo ga se yo a ka botwago. Sathane o ile a tšwela pele go botša Efa a re: “Modimo, yêna ó tseba xore mohla Lè se jaxo mahlô a lena a tlo buduloxa la ba byalo ka Modimo, la tseba botse le bobe.” Sathane o be a bolela gore Adama le Efa ba ka phela gabotse ge ba ka hlokomologa taelo ya Modimo gomme ba dira dilo ka tsela ya bona. (Genesi 3:1-6) Seo e be e le go hlaselwa mo go lebanyago ga tshwanelo ya bogoši bja Jehofa. Jehofa o be a tla dira’ng?

8, 9. (a) Mmuši yo e lego motho o be a tla swaragana bjang le borabele mmušong wa gagwe? (b) Jehofa o ile a dira’ng go lwantšha borabele bja Edene?

⁸ Ke’ng seo re letetšego gore mmuši yo e lego motho a se dire ge go e-na le borabele bjo bo lego molaleng nageng ya gagwe? Batho bao ba tlwaelanego le histori ba ka gopola maemo a mangwe a bjalo. Go e na le gore a hlokomologe boemo, gantši mmuši—gaešita le yo botho—o tla ahlola marabele, a a bea molato wa boradia. Ke moka mmuši a ka nea motho yo mongwe matla a go lwantšha madira a marabele le go dira gore go be le khutšo. Ka mo go swanago, Jehofa o bontšhitše gore o laola dilo tšohle ka go gata mogato ka pela-pela ka morago ga borabele gomme a tsebatša kahlolo kgahlanong le marabele ao. O ile a tsebiša gore Adama le Efa ga ba sa na tshwanelo ya go phela ka mo go sa felego, gomme A ba raka tšhemong ya Edene.—Genesi 3:16-19, 22-24.

⁹ Ka go tsebiša kotlo kgahlanong le Sathane,  Jehofa o ile a utolla mokgwa o mofsa wa go buša, woo a tlago go o diriša go tliša khutšo le toka mmušong wa gagwe ka moka. Modimo o boditše Sathane gore: “Ke bea lehlôyô xare xa xaxo le mosadi, le xare xa peu ya xaxo le peu ya xaxwe. Yôna e tlo Xo phšatla hlôxô; ’me wêna O tlo e loma serêthê.” (Genesi 3:15) Ka gona Jehofa o ile a utolla gore e be e le morero wa gagwe go nea “peu” matla a go fediša Sathane le madira a gagwe gotee le a go hlatsela gore mmušo wa Gagwe ke wona o lokilego.—Psalme 2:7-9; 110:1, 2.

10. (a) Ke mang yo e ilego ya tla ya ba “peu”? (b) Ke’ng seo Paulo a se boletšego mabapi le go phethagatšwa ga boporofeta bjo bja mathomo?

¹⁰ “Peu” yeo e bile Jesu Kriste gotee le sehlopha sa babuši-gotee le yena. Ba le gotee, ba bopa Mmušo wa Modimo wa Mesia. (Daniele 7:13, 14, 27; Mateo 19:28; Luka 12:32; 22:28-30) Lega go le bjalo, ditaba tše ga se tša ka tša utollwa ka yona nako yeo. Ge e le gabotse, go phethagatšwa ga boporofeta bja mathomo go ile gwa dula e le “sephiri se sekgethwa seo se ilego sa homolelwa ka mehla e sa felego.” (Baroma 16:25) Ka nywaga-kgolo e mentši, banna ba tumelo ba be ba hlologela nako yeo “sephiri se sekgethwa,” se tlago go utollwa ka yona le yeo boporofeta bja mathomo bo bego bo tla phethwa bakeng sa go godiša bogoši bja Jehofa.—Baroma 8:19-21.

“Sephiri se Sekgethwa” se Utollwa Ganyenyane-ganyenyane

11. Ke’ng seo Jehofa a ilego a se tsebiša Aborahama?

¹¹ Ge nako e dutše e feta, Jehofa o ile a utolla ganyenyane-ganyenyane dikarolo tša “sephiri se sekgethwa sa mmušo wa Modimo.” (Mareka 4:11) Yo mongwe wa bao Jehofa a ilego a ba utollela sona ke Aborahama, yo a ilego a bitšwa “mogwera wa Jehofa.” (Jakobo 2:23) Jehofa o holofeditše Aborahama gore O tla mo “dira sethšaba se sexolo.” Ka morago, Modimo o ile a tsebiša Aborahama gape gore: “Xo wêna xo tlo tšwa dikxoši,” le gore “dithšaba ka moka tša lefase di tlo šexofala ka peu ya xaxo.”—Genesi 12:2, 3; 17:6; 22:17, 18.

12. Peu ya Sathane e ile ya itšweletša bjang ka morago ga Meetse-fula?

¹² Mehleng ya Aborahama, batho ba be ba šetše ba lekile go buša ba bangwe le go ba laola. Ka mohlala, Beibele e bolela mabapi le Nimirode, setlogolwana sa Noa, gore: “Ó thomile xo ba yo matla mo lefaseng. Ké yêna a bexo a le motsomi yo matla pele xa Morêna; le byale ba sa re: Mo-etša-Nimirode, motsomi yo matla pele xa Morêna!” (Genesi 10:8, 9) Go molaleng gore Nimirode le batho ba bangwe bao ba ipeilego bobušing ba be ba laolwa ke Sathane. Bona le balatedi ba bona ba ile ba fetoga karolo ya peu ya Sathane.—1 Johane 5:19.

13. Ke’ng seo Jehofa a ilego a se bolela e sa le pele ka Jakobo?

¹³ Go sa šetšwe maiteko a Sathane a go tšweletša babuši ba lefase, morero wa Jehofa o sa dutše o tšwela pele. A diriša motlogolo wa Aborahama e lego Jakobo, Jehofa o utollotše  gore: “Molamó wa boxoši ó ka se tloxé xo Juda; lepara la mmuši xa le tloxe mo ’naong tša xaxwe, xo bê xo tlê [“Silo,” PK]. Xomme Yêna-eo dithšaba di tlo mo kwa.” (Genesi 49:10) Lentšu “Silo” le ra gore “Bjo e Lego bja Gagwe; Yoo e Lego bja Gagwe.” Ka gona, mantšu a a boporofeta a be a bontšha gore go tla tla yo a nago le tshwanelo ya go tšea “molamó” goba bogoši, le “molamó wa boxoši” goba pušo, go “dithšaba” goba go batho ka moka. Yena Yo e tla ba mang?

‘Go be go tle Silo’

14. Ke kgwerano efe yeo Jehofa a ilego a e dira le Dafida?

¹⁴ Go ditlogolo tša Juda, wa pele wa go kgethwa ke Jehofa go ba kgoši ya batho ba gagwe e bile Dafida wa modiši, morwa wa Jese. * (1 Samuele 16:1-13) Go sa šetšwe dibe tša gagwe le diphošo, Dafida o ile a amogelwa ke Jehofa ka baka la gore o be a botegela pušo ya Jehofa. A hlalosa gabotse boporofeta bjo bo boletšwego Edene, Jehofa o ile a dira kgwerano le Dafida, a re: “Ke tl’o . . . tsoša wa peu ya xaxo, a tla moraxo xa xaxo, à tšwile mmeleng wa xaxo, ka tiiša boxoši bya xaxwe.” Seo se be se ka se akaretše feela morwa wa Dafida yoo a bego a tla mo latela, Solomone, ka ge kgwerano e itše: “’Me sedulô sa mmušô wa xaxwe ke tlo se thêkxa ka xo sa felexo.” Kgwerano yeo ya Dafida e dirile gore go kwagale gabotse gore “peu” ya Mmušo yeo e holofeditšwego e be e tla tšwelela lešikeng la Dafida.—2 Samuele 7:12, 13.

15. Ke ka baka la’ng mmušo wa Juda o be o ka lebelelwa o swantšhetša Mmušo wa Modimo?

¹⁵ Leloko la dikgoši leo le ilego la tlotšwa ka makhura ke moperisita yo a phagamego, le ile la thoma ka Dafida. Ka gona dikgoši tše di be di ka bitšwa batlotšwa, goba bo-mesia. (1 Samuele 16:13; 2 Samuele 2:4; 5:3; 1 Dikxoši 1:39) Di ile tša hlaloswa e le tšeo di dutšego sedulong sa Jehofa le tšeo di bušago legatong la Jehofa kua Jerusalema. (2 Koronika 9:8) Ka kgopolo yeo, mmušo wa Juda o be o emela Mmušo wa Modimo gomme o bontšha bogoši bja Jehofa.

16. Ditla-morago tša pušo ya dikgoši tša Juda e bile dife?

¹⁶ Ge kgoši le batho ba be ba ikokobeletša bogoši bja Jehofa, ba be ba hwetša tšhireletšo le tšhegofatšo ya Gagwe. Pušo ya Solomone e bile nako ya khutšo le katlego yeo e ka se kego ya bapetšwa, e nea ponelo-pele ya boporofeta ya mabapi le pušo ya Mmušo wa Modimo ge tutuetšo ya Sathane e tla be e fedišitšwe gomme pušo ya Jehofa e phagamišitšwe. (1 Dikxoši 4:20, 25) Ka manyami, dikgoši tše dintši tša lešika la Dafida di paletšwe ke go phela ka go dumelelana le dinyakwa tša Jehofa, gomme batho ba ile ba rapela medimo ya diswantšho le go wela boitshwarong bjo bo gobogilego. Mafelelong, Jehofa o ile a dumelela mmušo o senywa ke Bababilona ka 607 B.C.E. Sathane o ile a bonala eka o a atlega maitekong a gagwe a go senya bogoši bja Jehofa.

17. Ke’ng seo se bontšhago gore Jehofa o be a sa dutše a laola dilo le ge mmušo wa Dafida o be o wele?

¹⁷ Go wa ga mmušo wa Dafida—le go wa moo go diragetšego pejana ga mmušo wa ka leboa wa Isiraele—go tšweleditše bohlatse, e sego bja gore pušo ya Jehofa ga e na bokgoni goba e paletšwe ka tsela le ge e le efe, eupša bja ditla-morago tše di nyamišago tša tutuetšo ya Sathane le ya motho yo a sa bušwego ke Modimo. (Diema 16:25; Jeremia 10:23) Go bontšha gore o be a sa dutše a buša, Jehofa o boletše a diriša moporofeta Hesekiele gore: “Tloša seala, O rolê mphapahlôxô! . . . Mphapahlôxô woo ke o beetše xo senyêxa ruri-ruri; fêla, e ka se bê moka. Xo tlo bá xwa tla e a swanetšwexo ke wôna, ka o nea yêna.” (Hesekiele 21:31, 32) Mantšu ao a bontšha gore “peu” e holofeditšwego, Yeo e  “swanetšwego ke wôna,” e be e sešo ya tšwelela.

18. Ke taba efe yeo morongwa Gabariele a ilego a e tsebiša Maria?

¹⁸ A re feteleng pele mo e ka bago ngwageng wa 2 B.C.E. Morongwa Gabariele o ile a romelwa go Maria, kgarebe ya kua Natsaretha, motseng wa Galilea ka leboa la Palestina. O ile a bolela gore: “Bona! o tla ima popelong ya gago gomme wa belega morwa, leina la gagwe o mmitše Jesu. Yo e tla ba yo mogolo gomme o tla bitšwa Morwa wa Yo Godimo-dimo; Jehofa Modimo o tla mo nea sedulo sa bogoši sa Dafida tatagwe, gomme o tla buša e le kgoši ntlong ya Jakobo ka mo go sa felego, mmušo wa gagwe o ka se fele.”—Luka 1:31-33.

19. Ke nako ya ditiragalo dife tše di thabišago yeo e batametšego?

¹⁹ Mafelelong, nako ya go utolla “sephiri se sekgethwa” e be e batametše. Karolo ya motheo ya “peu” e holofeditšwego e be e le kgaufsi le go tšwelela. (Bagalata 4:4; 1 Timotheo 3:16) E be e tlo longwa serethe ke Sathane. Eupša “peu” yeo ka lehlakoreng le lengwe e be e tlo pšhatla hlogo ya Sathane, ya fediša yena le badirišani ba gagwe ka moka. E be e tlo nea le bohlatse bja gore ka Mmušo wa Modimo, tshenyo ka moka yeo e bakilwego ke Sathane e tlo lokišwa gomme pušo ya Jehofa e phagamišwe. (Baheberu 2:14; 1 Johane 3:8) Jesu o tla phetha se bjang? Ke mohlala ofe woo a re tlogeletšego wona? Re tla hwetša dikarabo sehlogong se se latelago.

[Mongwalo wa tlase]

Na o ka Hlalosa?

• Ke’ng seo se dirago gore Jehofa e be Mmuši yo a swanelegago wa legohle?

• Ke ka baka la’ng Jehofa a ile a rera go hloma Mmušo?

• Jehofa o ile a utolla “sephiri se sekgethwa” ganyenyane-ganyenyane bjang?

• Ke’ng seo se bontšhago gore Jehofa o be a laola dilo ka mo go feletšego go sa šetšwe go wa ga mmušo wa Dafida?

[Dipotšišo tša Thuto]

[Seswantšho go letlakala 23]

Ke’ng seo Jehofa a ilego a se bolela e sa le pele a diriša Aborahama?

[Seswantšho go letlakala 25]

Ke ka baka la’ng go wa ga mmušo wa Dafida e se bohlatse bja go palelwa ga pušo ya Jehofa?