Dipotšišo tše Tšwago go Babadi

Mokriste o swanetše go ba le pono efe ka go rea dihlapi le go tsoma?

Beibele ga e iletše go rea dihlapi le go tsoma. (Doiteronomio 14:4, 5, 9, 20; Mateo 17:27; Johane 21:6) Lega go le bjalo, Bakriste bao ba reago dihlapi goba ba tsomago ba swanetše go ela hloko melao e mmalwa ya motheo ya Mangwalo.

Modimo o ile a dumelela Noa le ditlogolo tša gagwe go bolaya diphoofolo le go di ja, ge feela ba be ba di ntšha madi pele ba ka di ja. (Genesi 9:3, 4) Taelo ye e be e gatelela gore bophelo bja phoofolo bo swanetše go hlompšha ka ge bo e-tšwa go Modimo. Ka go rialo, Bakriste ga ba bolaye diphoofolo feela bakeng sa go bapala goba go ithabiša e bile ga ba di bolaye ka tsela e sehlogo e bontšhago go se hlomphe bophelo.—Diema 12:10.

Go na le selo se sengwe gape seo se swanetšego go elwa hloko seo se akaretšago boemo bja rena bja kgopolo. Baapostola bao e bego e le barei ba dihlapi go bonala ba be ba kgotsofatšwa ke ge ba tantše dihlapi tše dintši. Lega go le bjalo, ga go seo se bontšhago gore ba be ba ikgantšha ka bokgoni bja bona bja go rea dihlapi goba bja go tsoma goba seo se bontšhago gore ba be ba rea dihlapi goba ba tsoma e le feela go phadišana le ba bangwe, go bontšha gore ke banna goba go kgahlwa ke go di rakediša, go lwa le tšona goba go di bolaya.—Psalme 11:5; Bagalatia 5:26.

Ka gona, re ka ipotšiša gore: ‘Na ke bea mohlala o bontšhago gore ke hlompha pono ya Jehofa ka bophelo? Na ke dula ke nagana le go bolela ka go rea dihlapi goba go tsoma? Na tsela yeo ke phelago ka yona e bontšha gore ke na le moya wa go tsoma, goba na e bontšha gore ke modiredi wa Modimo? Na go rea dihlapi goba go tsoma go dira gore ke gwerane kudu le batho bao e sego badumedi goba na go ntira gore ke hlokomologe lapa la-ka?’—Luka 6:45.

Ba bangwe bao ba reago dihlapi goba go tsoma gore ba hwetše dijo ba ka kwa ba e-na le lebaka la go hlokomologa dilo tša moya nakong ya sehla sa go rea dihlapi le sa go tsoma. Lega go le bjalo, re bontšha tumelo le go bota Modimo ge re sa dumelele selo le ge e le sefe se e-tla pele ga dikgahlego tša gagwe. (Mateo 6:33) Go oketša moo, Bakriste ba kwa melao ka moka ya “Kesara” ya mabapi le go rea dihlapi le go tsoma, go sa šetšwe gore balaodi ba kgonthišetša gore e a phethwa goba go se bjalo.—Mateo 22:21; Baroma 13:1.

Ba bangwe ba ka swanelwa ke go fetoša tsela ya bona ya go nagana gore e dumelelane le ditekanyetšo tša Jehofa, e le gore ba be le pono e swanago le ya gagwe ka go rea dihlapi le go tsoma. (Baefeso 4:22-24) Ka lehlakoreng le lengwe, re swanetše go hlompha diphetho tša ba bangwe tšeo di theilwego matswalong a bona. Keletšo ya moapostola Paulo ke e swanetšego tabeng ye, ge a re: “A re se ke ra hlwa re ahlolana, eupša go e-na le moo dirang se phetho ya lena gore le se bee tšhitišo . . . pele ga ngwanabo lena.” (Baroma 14:13) Go bontšha lerato le bjalo le se nago boithati gotee le tlhompho go dira gore go be le khutšo ka phuthegong e bile go kgahla Mmopi wa rena, e lego Mothopo wa bophelo ka moka.—1 Bakorinthe 8:13. *

[Mongwalo wa tlase]