Na Botee bja Lefase bo ka ba Gona?

NA LEFASE la rena le lebile khutšong goba le kotsing? Go bonagala e nngwe le e nngwe ya dipono tše e le e kwagalago.

Ka lehlakoreng le lengwe, baetapele ba bangwe ba lefase ba bolela ka kgodišego gore khutšo ya lefase ke pakane e ka fihlelelegago—mohlomongwe ka gobane maemo a mangwe e ka ba a tšhošago kudu go a nagana. Ka lehlakoreng le lengwe gape, ba bantši ba tšhošwa kudu ke dipotšišo tše di swanago le tše: Ke ditšhaba dife tšeo di nago le dibetša tše di ka bakago tshenyo e kgolo? Na ruri di ka leka go di diriša? Go tla direga’ng ge di ka dira bjalo?

Histori e bontšha gore ke kgale bonaba le kgethollo di thibela kholofelo le ge e le efe ya botee, gomme gantši bodumedi bo dirile mo gontši go bešeletša mollo wa go se kwane go e na le go o tima. Raditaba e lego James A. Haught o ngwala gore: “Selo le ge e le sefe seo se aroganyago batho se ka baka lehloyo, gomme bodumedi ke se sengwe sa dilo tše matla kudu tše di aroganyago batho. Go sa šetšwe tumelo e tlwaelegilego ya gore bodumedi bo dira gore batho e be bao go thwego ke ba lokilego, go molaleng gore bo dira gore batho ba bangwe ba dire ditiro tše šoro.” Mongwadi Steven Weinberg le yena o nagana bjalo. O ngwala gore: “Ke bodumedi bjo bo dirago gore batho ba lokilego ba dire bokgopo.”

Na go na le kholofelo le ge e le efe ya gore lefase la rena le ka tsoga le le boteeng? Ee! Eupša mothopo wa botee bja lefase ga se motho goba madumedi ao a hlomilwego ke batho, go etša ge re tla bona.

[Mantšu a ipiletšago a tsopotšwego go letlakala 3]

Na lefase le bjalo ka pomo yeo e lego kgaufsi le go thuthupa?