Phihlelo

Tseleng Ya Go Ya Lefaseng Le Lefsa

KA GE GO ANEGA JACK PRAMBERG

Ka ntle ga Arboga, toropo e nyenyane e botse bogareng bja Sweden, Dihlatse tša Jehofa di na le ofisi ya lekala e nago le baithapi ba fetago 80. Mo ke moo nna le mosadi wa-ka, Karin, re dulago le go šoma gona. Go tlile bjang gore re tle mo?

GO YA bofelong bja lekgolo la bo-19 la nywaga, ngwanenyana wa nywaga e 15 wa mo-Sweden o ile a falalela United States. O ile a kopana le mosesiši wa sekepe wa mo-Sweden ge a be a le ngwakong wa bafaladi kua New York City. Se se ile sa dira gore ba ratane, ba nyalane le go ba le morwa—nna. Seo se diregile kua Bronx, New York, U.S.A., ka 1916, nakong ya Ntwa ya I ya Lefase.

Kapejana ka morago ga moo, re ile ra hudugela Brooklyn, meago e sego kae feela go tloga Brooklyn Heights. Tate ka morago o ile a mpotša gore nna le yena re ile ra sesa ka seketswana kgaufsi le Leporogo la Brooklyn, leo le bego le ka bonwa gabonolo ge o le ntlong-kgolo ya lefase ka moka ya Dihlatse tša Jehofa. Ke be ke sa lemoge gore seo se dirwago moo se be se tla kgoma bophelo bja-ka.

Ka 1918, Ntwa ya I ya Lefase e ile ya fela, gomme ka nakwana, go bolawa ga batho ntle le lebaka kua Yuropa go ile gwa fela. Mašole a ile a boa gae gore a tle a lebeletšane le mohuta o mofsa wa lenaba—go hloka  mošomo le bodiidi. Tate o ile a nagana gore go be go tla ba kaone ge re ka boela Sweden, e lego seo re ilego ra se dira ka 1923. Re ile ra ikhwetša re le Erikstad, motsana o lego kgaufsi le seteišene sa ditimela, tikologong ya Dalsland. Moo tate o ile a bula feketori ya boentšineare gomme ke ile ka golela gona moo le go tsena sekolo.

Peu e Ile ya Bjalwa

Kgwebo ya tate ga se ya ka ya sepela gabotse. Ka gona, mathomong a bo-1930 o ile a ba mosesiši gape. Re ile ra tlogelwa re nnoši—mma o ile a šala a e-na le dipelaelo tše dintši gomme nna ke hlokometše kgwebo. Ka letšatši le lengwe, mma o ile a etela molamo wa gagwe, e lego ramogolo Johan. Ka ge a be a lapišitšwe ke maemo a lefase, o ile a botšiša ka gore: “Johan, na go tlo fo dula go le ka mokgwa wo?”

O ile a araba ka gore: “Aowa, Ruth.” O ile a tšwela pele go botša mma ka kholofetšo ya Modimo ya go fediša bokgopo le go tliša pušo e lokilego mo lefaseng a diriša Mmušo woo Jesu Kriste e lego Kgoši ya wona. (Jesaya 9:5, 6; Daniele 2:44) O hlalositše gore Mmušo, woo Jesu a re rutilego go o rapelela, e be e le pušo e lokilego yeo e bego e tla tliša paradeise mo lefaseng.—Mateo 6:9, 10; Kutollo 21:3, 4.

Dikholofetšo tšeo tša Beibele di ile tša kgahla mma kudu. O ile a boela gae, a leboga Modimo tseleng ka moka. Lega go le bjalo, nna le Tate re be re sa thabele gore mma o thoma go kgahlegela bodumedi. Moo e ka bago ka yona nako ye, bogareng bja bo-1930, ke ile ka hudugela Trollhättan ka bodikela bja Sweden, e lego moo ke ilego ka hwetša mošomo feketoring e kgolo. Kapejana mma le tate, yoo a bego a sa tšwa mošomong wa gagwe wa ka lewatleng, ba ile ba hudugela gona moo. Ka go rialo lapa lešo le ile la kopana gape.

Gore a kgotsofatše tlala ya gagwe ya moya, mma o ile a tsoma Dihlatse tša Jehofa tša lefelong leo. Nakong yeo, di be di kopanela ka magaeng, go fo swana le Bakriste ba pele. (Filemone 1, 2) Letšatšing le lengwe, e be e le sebaka sa go swarela diboka ka ngwakong wa mma. A tshwenyegile, mma o ile a botšiša tate ge e ba a ka laletša bagwera ba gagwe. Tate o ile a araba ka gore, “Bagwera ba gago ke bagwera ba-ka.”

Ka go rialo batho ba ile ba amogelwa ka gešo. Ge batho ba be ba tsena ka mojako, ke ile ka tšwa. Lega go le bjalo, ka morago ge ba be ba e-tla, ke be ke dula. Bogwera bja Dihlatse le go nea mabaka ga tšona ka tsela e kwagalago le e bonolo go ile gwa fediša kgethollo ka moka yeo e bego e le ka kgopolong ya-ka. Peu e ile ya thoma go mela ka pelong ya-ka—kholofelo ya bokamoso.

Go ya Lewatleng

Ke swanetše go ba ke abetše go ba mosesiši go tate, ka gobane le nna ke ile ka ya lewatleng. Le gona ke ile ka lemoga dinyakwa tša-ka tša moya ka mo go oketšegilego. Ge re be re le boema-kepeng, gantši ke be ke leka go ikopanya le Dihlatse tša Jehofa. Kua Amsterdam, Holland (yeo gona bjale e lego Netherlands), ke ile ka ya ka posong go botšiša moo ke bego nka di hwetša gona. Ka morago ga poledišano, ke ile ka fiwa aterese yeo ke ilego ka ya go yona le semeetseng. Ngwanenyana wa nywaga e lesome o ile a nkamogela ka borutho. Ke be ke se ka ba tlwaela, eupša kapejana ke ile ka ikwa ke e-na le kgokagano le yena gotee le lapa labo—e lego tatso ya borwarre bjo bo kgahlišago bja ditšhaba-tšhaba!

Gaešita le ge re be re sa bolele leleme le tee, ge lapa le be le tšea almanaka le lenaneo la setimela gomme le thoma go thala mmapa, ke ile ka kwešiša  gore go be go tlo swarwa kopano toropong e lego kgaufsi ya Haarlem. Ke ile ka ya, gomme go sa šetšwe go palelwa ga-ka ke go kwešiša gaešita le lentšu le tee, ke ile ka e thabela. Ge ke be ke bona Dihlatse di sepediša dipampišana tša taletšo tša polelo ya phatlalatša ya Sontaga, ke ile ka kwa ke tutueletšega go tšea karolo. Ka go rialo ke ile ka topa dipampišana tšeo tša taletšo tšeo batho ba bego ba di lahlile gomme ka di nea ba bangwe gape.

Lebakeng le lengwe, re ile ra ema boemakepeng bja Buenos Aires, Argentina, gomme fao ke ile ka hwetša ofisi ya lekala ya Dihlatse tša Jehofa. Ka go yona go be go e-na le ofisi gotee le phapoši ya bobolokelo. Mosadi o be a dutše tesekeng a loga gomme ngwanenyana, yoo mohlomongwe e lego morwedi’agwe, o be a bapadiša popi. E be e le bošego kudu, gomme monna o be a tšea dipuku rakeng ya dipuku, go akaretša le puku ya Creation ya se-Sweden. Ge ke bona difahlego tša bona tše tletšego lethabo le kamogelo, ke ile ka tseba gore ke nyaka go ba karolo ya batho bao.

Leetong la go boela gae, sekepe sa rena se ile sa nametša sehlopha seo se bego se e-tšwa ka sefofaneng sa madira sa Canada seo se bego se wele lebopong la Newfoundland. Matšatši a mmalwa ka morago, re be re le kgaufsi le Scotland, moo sekepe sa Maisemane sa ntwa se ilego sa re iša kgolegong. Re ile ra išwa Kirkwall Dihlakahlakeng tša Orkney go yo lekolwa. Ntwa ya II ya Lefase e be e thomile, gomme madira a Manazi a Hitler a be a šwahletše Poland ka September 1939. Ka morago ga matšatši a mmalwa, re ile ra lokollwa gomme ra kgona go boela Sweden ntle le mathata.

Ke be ke le gae ka ditsela tše pedi—nameng le moyeng. Bjale ke be ke tloga ke nyaka go ba yo mongwe wa batho ba Modimo e bile ke sa nyake go tlogela go bokana gotee le bona. (Baheberu 10:24, 25) Ke thaba kudu ge ke gopola gore ge ke be ke le mosesiši, ke be ke dula ke nea basesiši ba bangwe bohlatse, le gona ke tseba gore yo mongwe wa bona o ile a ba Hlatse.

Mohuta o Kgethegilego wa Tirelo

Mathomong a 1940, ke ile ka etela ofisi ya lekala ya Dihlatse tša Jehofa ya Stockholm. Ke ile ka amogelwa ke Johan H. Eneroth, yoo ka nako yeo a bego a okamela modiro wa boboledi kua Sweden. Ge ke be ke mmotša gore ke nyaka go tšea karolo modirong wa boboledi bjalo ka modiredi wa mmulamadibogo wa nako e tletšego, o ile a ntsepelela gomme a mpotšiša gore, “Na o dumela gore mokgatlo wo ke wa Modimo?”

Ke ile ka araba ka re, “Ee.” Seo se ile sa dira gore ke kolobetšwe ka June 22, 1940, gomme ke ile ka thoma go hlankela lekaleng lona leo le nago le boemo bjo bobotse go akaretša le bašomi-gotee ba lokilego. Re be re fetša mafelo-beke a rena re le bodireding. Ge e le selemo, gantši re be re e-ya ditšhemong tša kgole ka dipaesekela, re dira boboledi mafelo-beke ka moka, gomme bošego re robala mekgobong ya furu.

Lega go le bjalo, gantši re be re bolela ka ntlo le ntlo kua Stockholm le mafelong ao a e dikologilego. Lebakeng le lengwe, ke ile ka bona monna yo mongwe a le ka phapošing ya ka tlase ga ngwako, a lokiša sebediši sa gagwe ka lebelo e bile a tšhogile. Ka gona ke ile ka phutha matsogo a gempe ya-ka gomme ka mo thuša. Ge go se na go thibja moo se bego se dutla, monna yoo o ile ntebelela ka tebogo gomme a re: “Ke nagana gore o be o tlile fa ka morero o mongwe. Ka gona a re rotoge re yo hlapa diatla gomme re nwe kofi.” Re ile ra dira bjalo, gomme ka mo nea bohlatse re dutše re e-nwa kofi yeo. Ge nako e dutše e e-ya, o ile a ba Mokriste-gotee.

Batho ba Sweden ba ile ba kgongwa ke ntwa gaešita le ge naga yeo e be e re ga e tšee karolo ntweng. Banna ba bantši ba ile ba biletšwa tirelong ya tša bohlabani, go akaretša le nna. Ge ke be ke gana go itlwaetša tša bohlabani, ke be ke išwa kgolegong ka nakwana. Ka morago, ke ile ka ahlolelwa go ya kampeng ya mošomo. Bafsa ba Dihlatse gantši ba be ba tlišwa pele ga baahlodi, gomme re be re kgona go nea bohlatse ka Mmušo wa Modimo. Ye e bile phethagalo ya boporofeta bja Jesu bjo bo rego: “Le tla gogelwa pele ga babuši le dikgoši ka baka la-ka, gore e be bohlatse go bona le go ditšhaba.”—Mateo 10:18.

Bophelo Bja-ka bo a Fetoga

Ntwa e ile ya fela ka 1945 kua Yuropa. Ka morago ngwageng wona woo, Nathan H. Knorr, yoo ka nako yeo a bego a etelela pele modiro wa lefase ka bophara, o ile a re etela a e-tšwa Brooklyn, a e-na le mongwaledi wa gagwe, Milton Henschel.  Ketelo ya bona e ile ya ba e bohlokwa kudu go rulaganyweng lefsa modiro wa boboledi kua Sweden—le go nna. Ge ke be ke e-kwa mabapi le kgonagalo ya go ya Sekolong sa Beibele sa Watchtower sa Gilead, ke ile ka dira kgopelo le semeetseng.

Ngwageng o latetšego, ke ge ke dutše ka klaseng gona moo sekolong, seo ka nako yeo se bego se le ka ntlenyana ga Lansing Borwa, New York. Nakong ya thuto ya dikgwedi tše tlhano, ke hweditše tlwaetšo yeo e ilego ya ntira gore ke tšeele Beibele godimo le mokgatlo wa Modimo ka mo go tseneletšego. Ke ile ka lemoga gore bao ba etelelago pele modiro wa lefase ka bophara wa boboledi ba a batamelega e bile ba a naganela. Ba be ba šoma ka thata, ba e-na le rena ka moka. (Mateo 24:14) Gaešita le ge se se be se sa mmakatše, ke ile ka thabišwa ke go se bona ka mahlo a-ka ka noši.

Kapejana go ile gwa fihla nako—February 9, 1947—ya go aloga ga klase ya boseswai ya Sekolo sa Gilead. Ngwanabo rena Knorr o ile a tsebiša dinaga tšeo rena barutwana re bego re tla romelwa go tšona. Ge go e-tla sebaka sa-ka, o ile a re, “Ngwanabo rena Pramberg o boela Sweden go yo hlankela bana babo moo.” Ge ke bolela therešo, ke be ke sa ikwe ke fagahlela go ya gae.

Go Lebeletšana le Tlhohlo e Kgolo

Ge ke boela Sweden, ke ile ka kwa ka modiro o mofsa woo o bego o thoma dinageng tše dintši lefaseng ka bophara—modiro wa selete. Ke ile ka kgethelwa go hlankela bjalo ka molebeledi wa mathomo wa selete kua Sweden, gomme kabelo ya-ka e be e le go okamela naga ka moka. Ke be ke rulaganya le go hlokomela seo se ilego sa tla sa bitšwa dikopano tša tikologo, tšeo di bego di swarelwa ditoropong le ditorotswaneng tša Sweden ka moka. Ka ge tokišetšo ye e be e sa le e mpsha, ditaelo tša-ka e be e se tše kae. Nna le Ngwanabo rena Eneroth re ile ra dula fase ra lokišetša lenaneo gakaone ka mo re ka kgonago. Kabelo yeo e ile ya ntšhoša kudu gomme ke ile ka batamela Jehofa gantši kudu ka thapelo. Ke bile le tokelo ya go hlankela bjalo ka molebeledi wa selete nywaga e 15.

Mehleng yeo, go be go le thata go hwetša mafelo a swanelegago ao go ka kopanelwago go ona. Re ile ra swanelwa ke go diriša meago ya go tantshetša le meago e swanago le yeo, yeo gantši e bego e se ya ruthela e bile ka dinako tše dingwe e sa hlokomelwe gabotse. Kopano ya kua Rökiö, Finland, ke e nngwe ya dikopano tše bjalo. Holo ya gona e be e le moago wa setšhaba wa kgale woo o bego o e-na le nako e telele o sa hlokomelwe. Go be go e-na le ledimo la lehlwa gomme boemo bja leratadima e le -20°C. Ka gona re ile ra gotša mollo ka ditofo tše pedi tšeo di dirilwego ka ditanka tša oli. Lega go le bjalo, re be re sa tsebe gore dinonyana di be di agile sehlaga ka tšhimeleng. Re ile ra kgangwa ke muši! Lega go le bjalo, yo mongwe le yo mongwe o be a sa dutše, a apere jase gomme mahlo a hlohlona. Se se ile sa dira gore kopano yeo e gopolege kudu.

Go tlaleletša go tlhahlo ya go rulaganya dikopano tše tša tikologo tša matšatši a mararo, go be go e-na le tlhahlo ya gore re lokišeletše baeng dijo. Mathomong, re be re se na didirišwa le phihlelo ya go dira modiro o bjalo. Eupša re be re e-na le bana babo rena le dikgaetšedi bao ba ilego ba amogela modiro woo o thata ka lethabo. Letšatši pele ga kopano, ke ge ba be ba inametše ka  sekotlelong ba ebola ditapola ba dutše ba anega diphihlelo ba thabile. Ditswalano tše swarelelago di thomile mabakeng ao ge bana babo rena le dikgaetšedi ba šoma gotee.

Karolo e nngwe ya mošomo wa rena nakong yeo e be e le go sepela re rwele dipampiri gomme re kwala-kwatša dikopano tše tša tikologo. Re be re phatša toropo goba motse ka molokoloko, re laletša badudi ba moo go tlo kwa polelo ya phatlalatša. Gantši batho ka kakaretšo ba be ba le botho e bile ba e-na le tlhompho. Lebakeng le lengwe kua toropong ya Finspång, setarata se be se tletše ka batho bao ba bego ba e-tšwa ka feketoring. Gatee-tee, yo mongwe wa bona o ile a goeletša ka gore: “Banna ba gešo, se ke sehlopha seo Hitler a ilego a palelwa ke go se fenya!”

Tiragalo e Kgolo Kudu Bophelong Bja-ka

Bophelo bja-ka bjalo ka molebeledi wa mosepedi bo be bo le kgaufsi le go fetoga ka morago ga ge ke kopane le Karin, kgarebe e kgahlišago kudu. Re ile ra laletšwa kopanong ya ditšhaba-tšhaba kua Lepatlelong la Yankee, New York City, ka July 1953. Gona moo, nakong ya go khutša ya lenaneo ka Mošupologo wa di-20, Milton Henschel o ile a re nyadiša. E be e le tiragalo e sa tlwaelegago ka mo sebong sa lefase la baseball. Ka morago ga go hlankela modirong wa bosepedi re le gotee go ba go fihla ka 1962, nna le Karin re ile ra laletšwa go hlankela le lapa la Bethele ya Sweden. Mathomong, ke ile ka šoma Lefapheng la Dimakasine. Ke moka, ka baka la tlwaetšo ya-ka ya go ba makhanikhi, ke ile ka abelwa go hlokomela metšhene ya go gatiša gotee le metšhene e mengwe mo lekaleng. Karin o šomile nywaga e mmalwa ka bohlatswetšong bja diaparo. Gona bjale o na le nywaga e mentši a hlankela Lefapheng la go Hlahloba Dingwalwa.

A bophelo bjo bo tletšego ditiragalo gakaakang le bjo bo nago le morero bjoo re bo thabetšego tirelong ya rena go Jehofa ya nywaga e fetago e 54 bjalo ka banyalani! Jehofa ruri o šegofaditše mokgatlo wa gagwe wa bahlanka ba nago le lerato le ba šomago ka thata. Morago kua ka 1940 ge ke be ke thoma go hlankela lekaleng, Sweden go be go e-na le Dihlatse tše 1 500 feela. Eupša gona bjale ke tše fetago 22 000. Koketšego e bile e kgolo kudu dikarolong tše dingwe tša lefase, moo e lego gore gona bjale re ba fetago dimilione tše tshela le seripa lefaseng ka bophara.

Moya wa Jehofa ke wona woo o thekgago modiro wa rena, o dulago o tlatša diseila tša rena tša seswantšhetšo. Ka mahlo a tumelo, re lebeletše lewatle le le bilogago la batho, eupša ga re boife. Kua pele ga rena re bona lefase le lefsa la Modimo gabotse. Nna le Karin re leboga Modimo bakeng sa go loka ga gagwe ka moka gomme re rapela ka mehla gore a re fe matla a go tšwela pele re botega le go feleletša ka go fihlelela pakane ya rena—go amogelwa ke Modimo le go hwetša bophelo bjo bo sa felego!—Mateo 24:13.

[Seswantšho go letlakala 12]

Letolong la mma

[Seswantšho go letlakala 13]

Moo nna le tate re ilego ra sesa ka seketswana mathomong a bo-1920

[Seswantšho go letlakala 15]

Ke e-na le Herman Henschel (tatago Milton) kua Gilead, ka 1946

[Diswantšho go letlakala 16]

Re nyalane Lepatlelong la Yankee ka July 20, 1953