‘Emang Gomme Le Bone Phološo Ya Jehofa’

“Morêna ó na le nna; xa ke boife selô; batho ba ka ntira’ng?” —PSALME 118:6.

1. Ke ditiragalo dife tše dikgolo tša nakong e tlago tšeo batho ba tlago go lebeletšana le tšona?

BATHO mehleng ya lehono ba tlo lebeletšana le ditiragalo tše dintši tšeo ba sa kago ba lebeletšana le tšona pele. Ge a bolela se e sa le pele mabapi le mehla ya rena, Jesu o lemošitše balatedi ba gagwe gore: “Go tla ba le masetlapelo a magolo a sa kago a ba gona ga e sa le go tloga mathomong a lefase go ba go fihla gona bjale, aowa, le go ba gona a ka se sa ba gona gape. Ge e le gabotse, ka ntle le ge matšatši ao a be a ka fokotšwa, go be go ka se be le nama ye e bego e tla phologa; eupša ka baka la bakgethwa, matšatši ao a tla fokotšwa.”—Mateo 24:21, 22.

2. Ke’ng seo se thibelago go thoma ga masetlapelo a magolo?

² Le ge ba sa bonwe ke batho, ga bjale barongwa ba thibetše masetlapelo ao a magolo. Moapostola Johane o bile le tokelo ya go bona lebaka la thibelo ye kutollong yeo a e neilwego ke Jesu. Moapostola yo a tšofetšego o e hlalositše ka tsela ye: “Ka bona barongwa ba bane ba eme dikhutlong tše nne tša lefase ba kakatletše diphefo tše nne tša lefase . . . Ka bona morongwa yo mongwe a rotoga bohlabatšatši, a e-na le leswao la Modimo yo a phelago; a goeletša ka lentšu le le hlabošago barongwa ba bane . . . a re: ‘Le se senye lefase goba lewatle goba dihlare go fihla ge re swaile bahlanka ba Modimo wa rena diphatleng.’”—Kutollo 7:1-3.

3. Karolo ya pele ya masetlapelo a magolo e tla ba efe?

³ Go swaiwa ga mafelelo ga ‘bahlanka ba tloditšwego ba Modimo wa rena’ go kgaufsi le go fela. Barongwa ba bane ba itokišeleditše go lokolla diphefo tšeo tše di senyago. Ge ba dira bjalo, ke’ng seo se tla diregago pele? Morongwa o araba potšišo yeo ka gore: “Babilona motse o mogolo o tla kodumetšwa tlase . . . gomme o ka se hlwe o hwetšwa gape.” (Kutollo 18:21) Ruri go tla ba le lethabo le legolo legodimong ge se se direga, ge mmušo wa lefase wa bodumedi bja maaka o fedišwa!—Kutollo 19:1, 2.

4. Ke ditiragalo dife tšeo di sa tlogo direga?

⁴ Ditšhaba ka moka tša lefase di tla be di kopane kgahlanong le batho ba Jehofa. Na ditšhaba di tla atlega go fediša Bakriste bao ba ba botegago? Go ka bonagala eka di ka kgona. Eupša bona! Madira a legodimong ao a latelago Kriste Jesu a tla kgonthišetša gore madira a a batho a a fedišwa. (Kutollo 19:19-21) Mafelelong, Diabolo le barongwa ba gagwe ba tla lahlelwa sekoting seo go sona ba ka se kgonego go dira selo. Ba ka se sa hlwa ba kgona go aroša batho ka gobane ba tla be ba tlemilwe ka nywaga e sekete. A kimologo e kgolo gakaakang go lešaba le legolo la baphologi!—Kutollo 7:9, 10, 14; 20:1-3.

5. Bao ba dulago ba botegela Jehofa ba tla ba le lethabo lefe?

⁵ Re kgaufsi le go bona ditiragalo tše tšeo di kgahlišago le tše di makatšago. Ka moka ga tšona di mabapi le go godiša tshwanelo ya Jehofa ya go buša, bogoši bja gagwe bja legohle. Le gona nagana ka se: Ge e ba re dula re botegela Jehofa gomme re dula re tiile bakeng sa bogoši bja gagwe, re tla ba le sebaka sa go tšea karolo go kgethagatšweng ga leina la Jehofa le  go phethagatšweng ga morero wa gagwe. Leo ruri e tla ba lethabo leo le sa bapišwego!

6. Ka baka la ditiragalo tše di lego kgaufsi, ke’ng seo re tlago go se hlahloba?

⁶ Na re itokišeleditše ditiragalo tšeo tše di kgahlišago? Na re na le tumelo matleng a Jehofa a phološago? Na re na le kholofelo ya gore o tla re thuša ka nako e swanetšego le ka tsela e phalago tšohle? Ge re araba dipotšišo tše bjalo tša motho ka noši, re ka nagana ka seo moapostola Paulo a se boditšego Bakriste-gotee le yena kua Roma gore: “Dilo tšohle tšeo di ilego tša ngwalwa e sa le pele di ile tša ngwalelwa go re ruta, gore ka kgotlelelo ya rena le ka khomotšo e tšwago Mangwalong re be le kholofelo.” (Baroma 15:4) Gare ga dilo tšeo di ngwaletšwego go re ruta, tšeo di re neago khomotšo le kholofelo, ke pego ya ditiragalo tša ge Jehofa a be a phološa Baisiraele bokgobeng bjo thata bja bagateledi ba bona ba Baegipita. Go hlahlobišiša ditiragalo tše bjalo tše di kgahlišago tša ge Jehofa a be a tsena dilo gare ka go phološa barwa ba Isiraele go swanetše go re kgothatša kudu ge re dutše re fagahletše masetlapelo a magolo ao a batamelago ka lebelo.

Jehofa o Phološa Batho ba Gagwe

7. Ka 1513 B.C.E., go tsoga boemo bofe bjo bo sa kgahlišego kua Egipita?

⁷ Ngwaga ke wa 1513 B.C.E. Jehofa o šetše a otlile Egipita ka dikotlo tše senyane. Ka morago ga kotlo ya senyane, kapejana Farao o raka Moše ka mantšu a rego: “Tloxa fá! ’Me O itôtê xore O se kê wa hlwa Ò lebana le nna; ka xobane mohla O tl’o xo lebana le nna, O tlo hwa.” Moše a araba ka gore: “O boletše le le kwêxaxo! Nka se hlwê ke lebana le wêna.”—Ekisodo 10:28, 29.

8. Ke ditaelo dife tša phološo tšeo di neilwego Baisiraele, gona mafelelo e bile afe?

⁸ Ga bjale Jehofa o botša Moše gore go tla ba le kotlo e nngwe gape kgahlanong le Farao le Baegipita ka moka, kotlo ya mafelelo. Ka di-14 tša Abibi (Nisani), leitšibolo la motho yo mongwe le yo mongwe wa Egipita le la phoofolo e nngwe le e nngwe le tlo hwa. Eupša malapa a Baisiraele a ka phološwa ka go latela ka kelohloko ditaelo tšeo Modimo a di neilego Moše. Ba swanetše go gaša madi a kwana ya pholo dikarolong tša ka thoko tša mejako ya bona le karolong ya ka godimo ya mejako ya nywako ya bona gomme ba se ke ba tšwa. Go direga’ng bošegong bjoo? Anke Moše ka boyena a re botše: “Ya re è le mašexo-xare Morêna a bolaya maitšibulô ka moka a naxeng ya Egipita.” Farao o arabela le semeetseng. O bitša Moše le Arone gomme o re go bona: “Tsoxang, Le tšwê sethšabeng sa-ka, . . . Yang, Le dirêlê Morêna ka mokxwa wo Le o boletšexo.” Gomme Baisiraele ba sepela, e le ba ka fetago dimilione tše tharo gotee le palo e kgolo ya “lešaba la mahlakanasêla” ao e sego Baisiraele.—Ekisodo 12:1-7, 29, 31, 37, 38.

9. Ke tsela efe yeo Modimo a hlahlago Baisiraele go tšwa ka yona Egipita, gomme ke ka baka la’ng a ile a kgetha tsela yeo?

 ⁹ Tsela ya kgaufsi yeo Baisiraele ba bego ba ka sepela ka yona ke ya Lewatleng la Mediterranean le yeo e fetago nageng ya Bafilisita. Eupša yeo ke tikologo ya manaba. Ka baka leo, mohlomongwe e le bakeng sa go dira gore batho ba gagwe ba se ke ba ya ntweng, Jehofa o ba hlahla ka tsela ya lešokeng la Lewatle le Lehwibidu. Gaešita le ge go e-na le batho ba dimilione leetong le, ba ga se lešaba leo le hlakahlakanego. Pego ya Beibele e re: “’Me Ba-Isiraele ba tloxetše naxa ya Egipita bà ithlamile.”—Ekisodo 13:17, 18.

‘Bonang Phološo ya Jehofa’

10. Ke ka baka la’ng Modimo a botša Baisiraele gore ba bokane pele ga Pihagirothe?

¹⁰ Bjale go direga selo se se makatšago. Jehofa o botša Moše gore: “Botša Ba-Isiraele O re: Ba fapoxê tsela; ba bokanê bà fetile Pihaxirothe, mo xare xa Migidolo le lewatlê, bà lebane le Balatsefone.” Ge lešaba le le legolo le dutše le latela ditaelo tše, le ikhwetša le kgakgetšwe magareng ga dithaba le Lewatle le Lehwibidu. Go bonagala ba ka se phonyokge. Lega go le bjalo, Jehofa o tseba seo a se dirago. O botša Moše gore: “Nna ke tlo thatafatša pelo ya xaxwe, a ba hlômarêla. E tlo ba mo Nna ke tl’o xo ithetiša ka tše ke tl’o xo di dira Farao le dirá tša xaxwe ka moka. Ké mo Ba-Egipita ba tl’o xo lemoxa xe Morêna e le Nna.”—Ekisodo 14:1-4.

11. (a) Farao o dira’ng, gomme Baisiraele ba arabela bjang? (b) Moše o arabela bjang ge Baisiraele ba belaela?

¹¹ Farao, a nagana gore o dirile phošo ka go dumelela Baisiraele ba tloga Egipita, o ba rakediša a e-na le dikoloi tše di kgethilwego tša ntwa tše 600. Ge madira a Baegipita a tšwelela, Baisiraele ba thoma go tšhoga le go llela Moše ka gore: “Naa kwa Egipita xo be xo se mabitla naa, xe O re khudušeditše xo hwêla mo xare xa naxa?” A kgodišegile gore Jehofa o tla ba phološa, Moše o araba ka gore: “Le se boifê! Êmang! Lehono ké mo Le tl’o xo bôna phološô ye Morêna a tl’o xo Le dirêla lehono! ka xobane Ba-Egipita ba Le ba bônaxo lehono. . . . Morêna ó tlo Le hlabanêla, lena Lè ikhomoletše.”—Ekisodo 14:5-14.

12. Jehofa o phološa batho ba gagwe bjang?

¹² Ka go dumelelana le mantšu a Moše a gore Jehofa ka noši o tla lwela Baisiraele, madira a nago le matla a phagametšego a batho ga bjale a tsena dilo gare. Ka tsela ya mohlolo, morongwa wa Jehofa o tšea leru la thololo leo le bego le etile Baisiraele pele a le šuthišetša ka morago ga bona. Le ge leru le e e-ba mothopo wa lefsifsi go Baegipita, le ba mothopo wa seetša go Baisiraele. (Ekisodo 13:21, 22; 14:19, 20) Ka go kwa taelo ya Modimo, ga bjale Moše o otlolla letsogo la gagwe. Pego e tšwela pele ka gore: “Morêna a šuthiša lewatlê ka phefô e matla ya Bohlabêla bošexo ka moka. . . . Ké mo Ba-Isiraele ba tsenexo ka xare xa lewatlê, ba xata mo xo omilexo; ba hwetša meetse ka thokô ya le letona le ka thokô ya le lethsadi à eme byalo ka merakô.” Baegipita ba thoma go ba rakediša gape, eupša Jehofa o na le batho ba gagwe. O raranya madira a Baegipita, gomme o botša Moše gore: “Emiša letsôxô la xaxo O šupê lewatlê, xore meetse a boêlê xodimo xa Ba-Egipita le dikoloi tša bôná le banamedi ba bôná.” Madira a Farao a fedišetšwa sa ruri mo e lego gore ga go na le mohlabani o tee yo a šalago a phela!—Ekisodo 14:21-28; Psalme 136:15.

Ithute Phologong ya Baisiraele

13. Barwa ba Isiraele ba ile ba arabela bjang ge ba be ba hlakodišwa?

¹³ Tlhakodišo ye ya mohlolo e kgomile baphologi bjang? Ruri Moše le barwa ba Isiraele  ba ile ba gobela koša le semeetseng, ba reta Jehofa! Ba opetše ka gore: “A nke ke binêlê Morêna, ka xobane ó tsoxile a phaxama. . . . Kxoši neng le neng, ka mehla le mehla, ké Yêna Morêna.” (Ekisodo 15:1, 18) Ee, selo sa pele seo ba ilego ba se nagana e be e le go tumiša Modimo. Boemong bjoo, bogoši bja Jehofa bo ile bja bonagatšwa.

14. (a) Re ka ithuta’ng ka Jehofa phihlelong ya Baisiraele? (b) Temana ya ngwaga ya 2008 ke efe?

¹⁴ Ditiragalo tše tše di kgahlišago di re nea thuto, khomotšo le kholofelo efe? Ka kgonthe re kgona go bona gore Jehofa o ikemišeditše go swaragana le teko le ge e le efe yeo batho ba gagwe ba ka lebeletšanago le yona. O kgona go rarolla boemo le ge e le bofe bjo ba ka ikhwetšago ba le go bjona. Lewatle le Lehwibidu e be e se lepheko go Baisiraele ge Jehofa a be a dira gore go tsoge phefo e matla go tšwa ka bohlabela. Le gona o ile a dira gore Lewatle le Lehwibidu e be lebitla la meetse go madira a Farao. Re nagana ka se, re ka bolela mantšu a mopsalme yo a boletšego gore: “Morêna ó na le nna; xa ke boife selô; batho ba ka ntira’ng?” (Psalme 118:6) Le gona re ka homotšwa ke mantšu a Paulo ao a begilwego go Baroma 8:31, a rego: “Ge e ba Modimo a ema le rena, ke mang yo a tlago go ba kgahlanong le rena?” Ruri mantšu a ao a buduletšwego a re nea kholofelo! A fokotša dipoifo le dipelaelo tšeo re ka bago re e-na le tšona gomme a re nea kholofelo. Ka gona, temana ya ngwaga ya 2008 ke e swanetšego gakaakang, ge e re: ‘Emang gomme le bone phološo ya Jehofa’!—Ekisodo 14:13, PK.

15. Go kwa go be go le bohlokwa gakaaka’ng go hlakodišweng ga Baisiraele Egipita, gomme go bohlokwa gakaaka’ng lehono?

¹⁵ Re ka ithuta’ng gape Khudugong ya Baisiraele Egipita? Re ithuta gore re swanetše go kwa Jehofa go sa šetšwe seo a nyakago re se dira. Baisiraele ba ile ba bontšha go kwa ka go lokišetša Paseka kamoo ba laetšwego ka gona. Ba ile ba bontšha go kwa ka go dula ba le ka nywakong bošegong bja Nisani 14. Ge mafelelong ba be ba tloga Egipita, ba ile ba swanelwa ke go ‘itlhama.’ (Ekisodo 13:18) Lehono, go bohlokwa kudu gore re latele tlhahlo yeo re e newago ke “mohlanka yo a botegago le wa temogo”! (Mateo 24:45) Re swanetše go theetša ka kelohloko kudu lentšu la Modimo le le lego ka morago ga rena, ge le re: “Tsela šé! Tšeang ka yôna! Le se fapoxêlê ka xo le letona le xe e le xo la ntsôxôšô!” (Jesaya 30:21) Ge re dutše re batamela go phulega ga masetlapelo a magolo, re ka newa ditaelo tše di kwagalago. Go feta ga rena mehleng yeo e thata re šireletšegile go tla ithekga ka go sepedišana ga rena le bahlanka ba bangwe bao ba botegago ba Jehofa.

16. Re ka ithuta’ng tseleng yeo Modimo a ilego a tsena ditaba gare ka yona ge a phološa Baisiraele?

 ¹⁶ Le gona, gopola gore Jehofa o ile a fapošetša Baisiraele boemong bjo ba bego ba bonagala ba kgakgetšwe magareng ga dithaba le Lewatle le Lehwibidu. Mogato woo o fo ba o be o sa bonagale e le o swanetšego. Eupša tšohle di be di laolwa ke Jehofa, gomme tšohle di ile tša atlega tša ba tša dira gore go tumišwe yena le go dira gore batho ba gagwe ba phologe. Lehono, re ka no se kwešiše gabotse lebaka leo ka lona ditaba tše dingwe tša mokgatlo di swarwago ka tsela e itšego, eupša ruri re ka bota tlhahlo ya Jehofa ka mokero wa gagwe wa poledišano wo o botegago. Ka dinako tše dingwe, manaba a rena a ka bonagala a atlega. Ka ge re e-na le dikgopolo tše di fokolago, re ka no se kgone go kwešiša dilo ka moka. Lega go le bjalo, Jehofa o kgona go tsena ditaba gare ka nako e swanetšego, go fo swana le ge a dirile nakong e fetilego go barwa ba Isiraele.—Diema 3:5.

Holofela Jehofa

17. Ke ka baka la’ng re ka bota tlhahlo ya Modimo ka mo go feletšego?

¹⁷ Na o ka nagana ka maikwelo a go ba le kholofelo ao Baisiraele ba ka bago ba ile ba ba le ona ge ba be ba nagana ka leru la thololo mosegare le mollo wa thololo bošego? Go be go le molaleng gore “Morongwa wa Modimo” o be a ba hlahla leetong. (Ekisodo 13:21, 22; 14:19) Lehono, re ka ba le kholofelo ya gore Jehofa o na le batho ba gagwe bakeng sa go ba hlahla, go ba šireletša le go ba phološa. Re ka tšeela godimo kholofetšo e rego: “[Jehofa] baxauxêlwa ba xaxwe xa’ ba lahle; ó tlo ba lôtôla neng le neng.” (Psalme 37:28) Anke re se keng ra tsoga re lebetše madira ao a matla a barongwa ao a thušago bahlanka ba Modimo lehono. Ka thekgo ya ona, re ka ‘ema gomme ra bona phološo ya Jehofa.’—Ekisodo 14:13, PK.

18. Ke ka baka la’ng re swanetše go ‘apara ditlhamo tše feletšego tše di tšwago go Modimo’?

¹⁸ Ke’ng seo se tlago go re thuša ka moka ga rena go ‘ema’ tseleng ya therešo? Ke go apara ditlhamo tša moya tšeo Paulo a di hlalositšego lengwalong la gagwe leo le yago go Baefeso. Ela hloko gore moapostola o re kgothaletša go ‘apara ditlhamo tše feletšego tše di tšwago go Modimo.’ Na re apere dikarolo ka moka tša ditlhamo tša moya? Ngwageng wa 2008, e tla ba mo gobotse gore yo mongwe le yo mongwe a itlhahlobe go kgonthišetša gore o na le e nngwe le e nngwe ya ditlhamo tše le gore o e apere gabotse. Lenaba la rena, Sathane Diabolo, le tseba mafokodi a rena, gomme le leka go re tanya re sa nagana goba go re hlasela moo re fokolago kudu. Re “kakadipana” le madira a kgopo a moya. Lega go le bjalo, ka matla a Jehofa, re ka fenya!—Baefeso 6:11-18; Diema 27:11.

19. Ge e ba re kgotlelela, re ka ba le tokelo ya go dira’ng?

¹⁹ Jesu o boditše balatedi ba gagwe gore: “Ka go kgotlelela ga lena, le tla rua meoya ya lena.” (Luka 21:19) Eka re ka ba gare ga bao ba kgotlelelago ka potego mathata le ge e le afe ao ba ka bago ba lebeletšana le ona gomme ka go rialo re be le tokelo ya go ‘ema le go bona phološo ya Jehofa’ ka botho bjo bo sa swanelago bja Modimo.

O be o tla Araba Bjang?

• Ke ditiragalo dife tše di kgahlišago tšeo di letšego ka pele?

• Jehofa o bontšhitše bjang matla a gagwe a phološago ka 1513 B.C.E.?

• O ikemišeditše go dira’ng?

[Dipotšišo tša Thuto]

[Mantšu a ipiletšago a tsopotšwego go letlakala 20]

Temana ya ngwaga ya 2008 e re: ‘Emang gomme le bone phološo ya Jehofa.’ —Ekisodo 14:13, PK.

[Seswantšho go letlakala 17]

“Dilo tšohle tšeo di ilego tša ngwalwa e sa le pele di ile tša ngwalelwa go re ruta”

[Seswantšho go letlakala 18]

Go thatafiša molala ga Farao go ile gwa tlišetša Egipita kotsi

[Seswantšho go letlakala 19]

Baisiraele ba ile ba phologa ge ba be ba dira tšohle tšeo Jehofa a di laetšego