Le ‘Šokelane ka Botho’

BATHO ba bantši ba tloga ba nyaka go kwelwa bohloko go feta le ge e le neng pele ka ge ba lebeletšana le tlala, bolwetši, bodiidi, bosenyi, dintwa tša selegae le dikotsi tša tlhago. Kwelobohloko e bolela go šokela motho yo mongwe ka baka la tlaišego goba mathata ao a nago le ona gotee le kganyogo ya go mo imolla go ona. Go swana le mahlasedi a borutho a letšatši le le phadimago, kwelobohloko e ka thoba motho yo a gateletšegilego, ya fokotša bohloko le go kgothatša motho yo a tlaišegago.

Re ka bontšha kwelobohloko ka ditiro tša rena le mantšu—go hlokomela ba bangwe le go ba gona ge ba re nyaka. Ke mo gobotse gore re se lekanyetše kwelobohloko go ba lapa, bagwera le bao re ba tlwaetšego feela. Re ka akaretša le batho bao re sa ba tsebego. Jesu Kriste o ile a botšiša Thutong ya Thabeng gore: “Ge e ba le rata bao ba le ratago, le na le moputso ofe?” Le gona, monna yo yo a nago le kwelobohloko o itše: “Ka baka leo, dilo tšohle, tše le nyakago batho ba le dira tšona, le lena ka mo go swanago le ba dire tšona.”—Mateo 5:46, 47; 7:12.

O ka bala mantšu a—ao a tsebjago e le Molao wa Gauta—ka Mangwalong a Makgethwa. Batho ba bantši ba dumela gore Beibele ke tlhahlo e phagamego ya kamoo go ka bontšhwago kwelobohloko. Mangwalo a bolela leboelela ka boikarabelo bja rena bja go thuša bao ka mabaka a itšego ba sa kgonego go itirela dilo. Beibele e tšweletša Mongwadi wa yona le Mmopi wa rena, Jehofa Modimo, e le mohlala o mogolo kudu go bontšheng kwelobohloko.

Ka mohlala, re bala gore: “[Modimo] o lwela ditshwanelo tša dišuana le bahlologadi. O hlokomela bašele gomme o ba nea dijo le diaparo.” (Doiteronomio 10:18, Contemporary English Version) Jehofa Modimo o hlaloswa e le yo a “ahlolelago ba ba patwago, E a fago ba tlala bogobe.” (Psalme 146:7, PK) Mabapi le bašele bao ba diilago, Jehofa o laetše gore: “Moeng e a diiletšexo xo lena a dulê xo lena byalo ka motho wa xeno e a tswaletšwexo xaê. O mo ratê ka mokxwa wo O ithataxo ka wôna.”—Lefitiko 19:34.

Lega go le bjalo, go bontšha kwelobohloko ga go fo itlela. Moapostola Paulo o ngwaletše Bakriste ba Kolose gore: “Hlobolang motho wa kgale le ditlwaelo tša gagwe, gomme le apare motho yo mofsa yo ka tsebo e nepagetšego a mpshafatšwago go ya ka seswantšho sa Yo a mmopilego . . . Le le bahlaolwa ba Modimo, ba bakgethwa le ba ba ratwago, aparang maikwelo a borutho a bonolo a lešoko.”—Bakolose 3:9, 10, 12.

 Ka gona, go hlagolela kwelobohloko go nyaka boiteko. Boemo bjo bjalo bja kgopolo ke karolo ya “motho yo mofsa” yoo go letetšwego gore Bakriste ba mo apare. Paulo o phetše lefaseng le sehlogo la Roma ya bogologolo. O kgothaleditše badumedi-gotee le yena go dira diphetogo tše dikgolo semelong sa bona e le gore ba be le kwelobohloko le lešoko kudu.

Matla a Kwelobohloko

Batho ba bangwe ba lebelela bao ba bontšhago kwelobohloko e le ba fokolago le bao ba hlaselegago gabonolo. Na pono e bjalo e nepagetše?

Le gatee! Kwelobohloko ya kgonthe e tšwa leratong le le tseneletšego, leo le tšwago go Modimo, mothofatšo wa seka seo. “Modimo ke lerato.” (1 Johane 4:16) Jehofa o bitšwa ka mo go swanetšego gore ke “Tate wa dikgaugelo tše bonolo le Modimo wa khomotšo yohle.” (2 Bakorinthe 1:3) Polelwana yeo e fetoletšwego e le “dikgaugelo tše bonolo” ge e le gabotse e bolela “go kwela ba bangwe bohloko ka baka la mathata a bona.” Ruri Jehofa ke “yo botho go ba sa lebogego le ba kgopo”!—Luka 6:35.

Mmopi wa rena o nyaka gore le rena re bontšhe dika tše botho tše bjalo ka kwelobohloko. Go Mika 6:8 re bala gore: “Hee wene motho! O boditšwe se e lexo se se botse, le se Morêna a se nyakaxo xo wene: Ké xo dira tokò, ké xo rata botho.” Go Diema 19:22 re bala gore: “Motho ó nkxahla ka botho.” Morwa wa Modimo, Jesu Kriste yo a bonagaditšego semelo sa Tatagwe ka mo go phethagetšego, ka mo go swanago o eleditše balatedi ba gagwe gore: “Tšwelang pele le le ba gaugelago, go etša ge Tatago lena le yena e le yo a gaugelago.” (Luka 6:36) The Jerusalem Bible e fetolela keletšo ye ka gore: “E-bang le kwelobohloko go etša ge Tatago lena a e-na le kwelobohloko.”

Re na le mabaka a mabotse a go ba bjalo, ka ge kwelobohloko e kgona go re tlišetša ditšhegofatšo tše dintši. Gantši re bona therešo ya mantšu ao a ngwadilwego go Diema 11:17 (PK) ao a rego: “Motho yo botho, o direla moya wa gagwe tše botse.” Ge re bontšha kwelobohloko go motho yo a e hlokago, Modimo o lebelela seo e le se se direlwago Yena. O ithweša boikarabelo bja go lefa barapedi ba gagwe ka botho bakeng sa kwelobohloko le ge e le efe yeo ba e bontšhago. Kgoši Salomo o boletše a le ka tlase ga pudulelo gore: “Thlalla-badiidi ó adima Morêna; ’me Yêna ó tlo mmušetša tše a di neilexo bála.” (Diema 19:17) Le gona, Paulo o ngwadile gore: “Le  tseba gore yo mongwe le yo mongwe, botse bjo a bo dirago, o tla bo bušetšwa ke Jehofa.”—Baefeso 6:8.

Kwelobohloko e na le matla a go boloka khutšo le go thuša go rarolla dikgohlano. E thuša go rarolla go se kwešišane, le gona e dira gore go lebalelana go kgonege. Go se kwešišane go ka ba gona ka gobane ga se ka mehla re hlalosago dikgopolo goba maikwelo a rena ka tsela yeo re bego re ka rata go di hlalosa ka yona, goba ditiro tša rena di ka no se kwešišwe gabotse. Mo ke moo kwelobohloko e thušago gona, e boloka khutšo. Go bonolo go lebalela motho yo a tsebjago ka go ba le kwelobohloko. Kwelobohloko e re thuša go dumelelana le keletšo ya Paulo go Bakriste e rego: “Tšwelang pele le kgotlelelana gomme le lebalelana ka bolokologi ge e ba motho a e-na le lebaka la go ba le pelaelo ka yo mongwe.”—Bakolose 3:13.

Kwelobohloko—Lešoko Leo le Bontšhwago ka Mediro

Go oketša moo, kwelobohloko e na le matla a go okobatša tlaišego. Ka ge re bone, e bonagatša moya wa lešoko go bao ba gateletšegilego gomme e re tutueletša go tlaišega le bao ba tlaišegago. Kwelobohloko e akaretša go ba le maikwelo a bonolo bakeng sa bao ba tlaišegago le go gata megato e šomago ya go thuša batho ba bjalo.

Ka go ba le kwelobohloko, Bakriste ba ekiša Jesu. O be a ipha nako ya go thuša ba bangwe ka dilo tša nama le tša moya. Ge a be a lemoga gore ba bangwe ba hloka thušo, ka kwelobohloko o be a hwetša tsela ya go ba thuša.

Ela hloko kamoo Jesu a ilego a arabela ka gona ge a bona mašaba a batho bao ba bego ba diila moyeng: “Ge a bona mašaba a a šokela, gobane ba be ba šokiša gomme ba gašane go swana le dinku tše di se nago modiši.” (Mateo 9:36) Mabapi le lentšu leo le fetoletšwego mo e le “šokela,” seithuti se sengwe sa Beibele se re le bolela “maikwelo ao a tutuetšago motho go tsenelela ka gare-gare ga gagwe.” Ge e le gabotse, lentšu le le ile la bitšwa le lengwe la mantšu a matla kudu a Segerika bakeng sa maikwelo a kwelobohloko.

Ka tsela e swanago, Bakriste bao ba nago le kwelobohloko ba arabela ka pela e le gore ba thuše ba bangwe nameng le moyeng. Moapostola Petro o ngwadile gore: “Ka moka ga lena e-bang le kgopolo e swanago, le kwelana bohloko, le e-na le maikwelo a borutho a borwarre, le šokelana ka botho.” (1 Petro 3:8) Ka mohlala, ge lapa la Bakriste leo le diilago le be le swanelwa ke go hudugela lefelong le lefsa ka mabaka a tša maphelo, badumedi-gotee le bona ba moo ba ile ba ba dumelela go dula ka ntlong ka dikgwedi tše tshela ntle le go lefa rente. Monna o re: “Letšatši le letšatši ba be ba e-tla go tlo hlola gore re tsogile bjang, gomme mantšu a bona a kgothatšago a ile a dira gore re ikwe re le gae ga mahlaku.”

Bakriste ba therešo ba tshwenyegile le ka dinyakwa tša batho bao ba sa ba tsebego. Ba diriša nako ya bona, matla le dilo tše di bonagalago ka lethabo e le gore ba ka hlankela batho bao ba sa ba tsebego. Baithapi bao ba thušitšego batho bao ba sa ba tsebego le gatee, bao go boletšwego ka bona sehlogong se se fetilego ke Dihlatse tša Jehofa.

Ka gona, phuthego ya Bokriste e tletše moya wa kwelobohloko le botho bjo lerato. Ditho tša phuthego di tutueletšega go hwetša ditsela tša go thuša ba bangwe ka baka la lerato. Ka phuthegong, ditšhiwana le bahlologadi ba ka nyaka tlhokomelo ya gago le gore o ba kwele bohloko ka baka la mathata a bona a fapa-fapanego. Na o ka thuša ba bjalo go lebeletšana ka katlego le bodiidi, tlhokomelo ya tša kalafo e lekanyeditšwego, go hloka madulo goba mathata a mangwe a motho ka noši?

Ela hloko banyalani ba bangwe kua Gerika. Monna o ile a hwa lehlakore. Yena le mosadi wa gagwe ba ile ba išwa sepetlele seo se lego bokgole bja dikhilomithara tše makgolo. Lega go le bjalo, tšhelete e nyenyane yeo ba bego ba iphediša ka yona e be e hwetšagala feela ge ba bunne tšhemo ya bona ya dinamune. Ke mang yo a bego a tla dira modiro wo ge ba be ba le sepetlele? Phuthego ya lefelong leo e ile ya gata mogato. E ile ya buna dinamune le go di rekiša gomme ya nea banyalani bao tšhelete yeo  ba bego ba e hloka gaešita le go ba nea khutšo ya monagano.

Kwelobohloko e ka bontšhwa ka ditsela tše dintši. Ka mohlala, Bakriste ba nago le kwelobohloko ba lemoga gore ka dinako tše dingwe, dilo tša motheo tšeo batho bao ba tlaišegago ba di nyakago ke ketelo e botho ya batho bao ba tlago go ba theetša ka kwelobohloko, ba ba šokela le go ba nea khomotšo ya Mangwalo.—Baroma 12:15.

Thabela Moya wa Kwelobohloko

Phuthego ya lefase ka bophara ya Bokriste ke lefelo leo le nago le khutšo le boiketlo le moo go bontšhwago kwelobohloko le botho. Bakriste ba therešo ba lemoga gore kwelobohloko e gogela batho mola go ba sehlogo go ba raka. Ka gona, ge ba leka go ekiša Tatago bona wa legodimong, ba katanela go ‘šokelana ka botho’ ka ditsela tše di šomago.

Dihlatse tša Jehofa di go laletša ka borutho gore o tle o thabele moya wa kwelobohloko le lerato wo o lego gona gare ga tšona. Di kgodišegile gore o tla hwetša moya woo e le o borutho le wo o ipiletšago.—Baroma 15:7.

[Seswantšho go letlakala 5]

Paulo o kgothaleditše Bakriste ba Kolose gore ba apare maikwelo a borutho a bonolo a lešoko

[Diswantšho go letlakala 7]

Ge Jesu a be a lemoga gore batho ba hloka thušo, ka kwelobohloko o be a hwetša tsela ya go ba thuša