“Mpho Ya Gago E Bohlokwa Kudu”

KE KAMOO yo e kilego ya ba tona-kgolo ya Belgium a hlalositšego puku ya Motho yo a Phagamego Kudu yo a Kilego a Phela. * O ile a etelwa ke moagišani, gomme a amogela kopi ya puku ye. Ka morago, o ile a ngwala lengwalo la tebogo, a re: “Ketelo ya gago e borutho e ile ya nkgoma kudu, e bile ke kgahlilwe kudu ke mpho ya gago e bohlokwa kudu: puku yeo e bolelago ka ‘Motho yo a Phagamego Kudu.’”

Yo e kilego ya ba tona-kgolo o hlahlobile puku ye gomme a phetha ka gore: “Ge e ba batho ba be ba ka kgahlegela kudu molaetša wa Ebangedi gomme ba diriša melao ya motheo ya Jesu Kriste, lefase lehono le be le tla bonagala e le le le fapanego kudu. Ke moka re be re ka se hloke Lekgotla la tša Polokego; e bile go be go ka se be le ditlhaselo tša botšhošetši, gomme bošoro bo be bo ka thibelwa lefaseng.” Le ge a be a dumela gore se e ka bonagala e le kgopolo yeo e ka se diregego, o ile a hlompha ketelo ya moagišani wa gagwe.

Lengwalo le tšwetše pele ka gore: “O karolo ya sehlopha se segolo sa batho ba botho bao e sego ditho tša sehlopha se segolo sa ditšhaba-tšhaba goba batho ba go letela tše mpe eupša o karolo ya ba dumelago gore lefase le ka kaonefala le gore batho ba ka dira gore le kaonefale, ke gore, batho bao ba dumelago kaonefalong ya batho le ya dilo.”

Dihlatse tša Jehofa di dumela gore ke Modimo feela yo a ka tlišago lefase le lekaone, e sego maiteko a batho. Di leka go ekiša motho yo a phagamego kudu, Jesu Kriste. Na o sa tšwa go etelwa ke Dihlatse tša Jehofa? Mohlomongwe o ka thabela go boledišana le tšona mabapi le motho yo a phagamego kudu yo a kilego a phela. Le gona di tla thabela go go nea puku yeo e ilego ya kgahla yo e kilego ya ba tona-kgolo.

[Mongwalo wa tlase]