Na Letšatši la Maikhutšo la Boheitene le ka Dirwa la Bokriste?

MAREGENG a 2004, go ile gwa ba le ngangišano e kgolo sehleng sa Keresemose kua Italy. Barutiši ba bangwe ba be ba thekga kgopolo ya go fokotša goba gaešita le go fediša thuto le ge e le efe ya mabapi le metlwae ya bodumedi ya Keresemose. Ba be ba thekga se ka baka la go hlompha bana ba sekolo ba bantši bao e sego Makatholika goba Maprotestanta. Lega go le bjalo, ba bangwe bao ba lego lefapheng la tša thuto le ba lego mafapheng a mangwe ba be ba nyaka gore metlwae ye e hlompšhe gomme e bolokwe ka botlalo.

Lega go le bjalo, go sa šetšwe phapano ye, ke kae moo ge e le gabotse metlwae ya Keresemose e thomilego gona? Ge ngangišano e be e fihla seremong, kuranta ya Vatican ya L’Osservatore Romano e ile ya bolela ka dilo tše dingwe tšeo di kgahlišago.

Mabapi le letšatši-kgwedi leo Keresemose e ketekwago ka lona, kuranta ya Katholika e boletše gore: “Letšatši-kgwedi la kgonthe la matswalo a Jesu, go ya ka pono ya histori, le širilwe ke lešira la go se kgonthišege la histori ya Roma, taelo ya mmušiši ya nako yeo ya gore batho ba balwe le nyakišišo yeo e dirilwego nywaga-kgolong e latetšego. . . . Letšatši la di-25 December,  ka ge le tsebja gabotse, le kgethilwe ke Kereke ya Roma lekgolong la bone la nywaga. Letšatši-kgwedi le nakong ya Roma ya boheitene le be le neetšwe go modimo wa Letšatši . . . Le ge Bokriste bo be bo šetše bo amogetšwe kua Roma ka Molao wa Constantine, ba bantši ba be ba sa dumela go . . . modimo wa Letšatši, kudu-kudu mašole. Menyanya yeo e boletšwego ka mo godimo, yeo e bego e ketekwa ka di-25 December, e thomile motlwaeng o tumilego. Se se ile sa nea Kereke ya Roma kgopolo ya gore go gatelelwe bohlokwa bja bodumedi bja Bokriste ka letšatši leo ka go bea Letšatši la kgonthe la Toka, e lego Jesu Kriste, legatong la modimo wa Letšatši, ka go le kgetha e le letšatši la go keteka matswalo a gagwe.”

Go thwe’ng ka mohlare wa Keresemose, woo ga bjale e lego karolo ya motlwae wa Katholika?

Sehlogo se se lego ka kuranteng ya Katholika se bontšhitše gore morago kua mehleng ya bogologolo, go be go naganwa gore mehlare yeo e dulago e le e metala, e bjalo ka “holly, butcher’s broom, laurel le makala a mophaene e na le matla a maleatlana goba a go alafa ao a bego a ka thibela malwetši.” E ile ya tšwela pele ka gore: “Bošegong bja Pele ga Keresemose, 24 December, Adama le Efa ba tla gopolwa ka tiragatšo e tumilego kudu ya Mohlare wa lefaseng la Paradeise . . . Mohlare woo e ka ba e be e le moapola, eupša ka ge moapola o be o ka se be o swanetšego marega, mophaene o be o bewa sefaleng gomme diapola di bewa makaleng a tšona goba, go swantšhetša Topollo ya nakong e tlago, dipapetlana tšeo di bego di dirilwe ka dipisikiti tšeo di šitšwego tšeo di bego di le ka dibopego tše di kgethegilego tšeo di bego di swantšhetša Jesu nakong ya Selalelo, gotee le malekere le dimpho tša bana.” Go thwe’ng ka nako ya ka morago ga moo?

Ge e hlalosa gore motlwae wa go diriša mohlare wa Keresemose o thomile kua Jeremane lekgolong la bo-16 la nywaga, L’Osservatore Romano e itše: “Italy e bile e nngwe ya dinaga tša mafelelo tša go amogela mohlare wa Keresemose, bonyenyane ka baka la gore mabare-bare a tumilego a re go dirišwa ga mehlare ya Keresemose e be e le motlwae wa Protestanta gomme go swanetše go tšeelwa legato ke legopo [tiragatšo ya Matswalo a Jesu].” Mopapa Paul VI “o ile a thoma motlwae wa go bea mohlare o mogolo wa Keresemose [kua St. Peter’s Square, Roma]” kgaufsi le tiragatšo ya Matswalo a Jesu.

Na go a amogelega gore baetapele ba bodumedi ba nee seo se bonagalago e le tlhaloso ya Bokriste ya ditiragalo le dika tšeo di thomilego boheiteneng bja bogologolo? Mangwalo a eletša Bakriste ba therešo mabapi le tsela e swanetšego ka gore: “Toko le go hloka molao di na le segwera sefe? Goba seetša se abelana eng le lefsifsi?”—2 Bakorinthe 6:14-17.

[Diswantšho go letlakala 8, 9]

Mohlare wa Keresemose (letlakaleng le le bapilego le le) le tiragatšo ya Matswalo a Jesu kua Vatican

[Tlhaloso ya Mothopo]

© 2003 BiblePlaces.com

[Seswantšho go letlakala 9]

Modingwana wa letšatši

[Tlhaloso ya Mothopo]]

Museum Wiesbaden