Na O Itokišeleditše Letšatši La Jehofa?
Na O Itokišeleditše Letšatši La Jehofa?
“Letšatši le legolo la Jehofa le kgaufsi, le kgaufsi le a kganyela ka matla!” —TSEFANYA 1:14, PK.
1-3. (a) Beibele e re’ng ka letšatši la Jehofa? (b) Ke ‘letšatši lefe la Jehofa’ leo re le letetšego?
LETŠATŠI le legolo la Jehofa ga se la diiri tše 24. Ke nako e telele yeo go yona go tlago go phethagatšwa kahlolo ya Modimo bathong ba kgopo. Batho bao ba sa boifego Modimo ba na le lebaka la go boifa letšatši leo la lefsifsi, la bogale, la kgalefo e tukago, la kgateletšego le la tshenyo. (Jesaya 13:9; Amosi 5:18-20; Tsefanya 1:15) Boporofeta bja Joele bo re: “Joo, ’tšatši joo! Ka kxonthe ’tšatši la Morêna le kxaufsi; le tla byalo ka thšwal’lanyô ye e tšwaxo xo Ra-matla.” (Joele 1:15) Lega go le bjalo, letšatšing leo le legolo, Modimo e tla ba Mophološi wa ba “’pelo-tsôrô.”—Psalme 7:10.
2 Polelwana e rego “’tšatši la Morêna” e bolela ka go phethagatšwa ga kahlolo ya Modimo ka dinako tše di fapa-fapanego. Ka mohlala, “’tšatši la Morêna” le ile la tlela badudi ba Jerusalema ge ba be ba fedišwa ke Bababilona ka 607 B.C.E. (Tsefanya 1:4-7) Phethagatšo e swanago ya kahlolo ya Modimo e diregile ka 70 C.E. ge Modimo a be a diriša Baroma go phethagatša kahlolo ya gagwe go Bajuda bao ba ilego ba gana Morwa wa gagwe. (Daniele 9:24-27; Johane 19:15) Beibele gape e bolela e sa le pele ka “’tšatši la Morêna” la ge a tlo ‘tšwela ditšhaba tšohle dira.’ (Sakaria 14:1-3) A le ka tlase ga pudulelo, moapostola Paulo o ile a tswalanya letšatši leo le go ba gona ga Kriste, moo go thomilego ge Jesu a be a bewa sedulong e le Kgoši ya legodimong ka 1914. (2 Bathesalonika 2:1, 2) Ka ge letšatši la Jehofa le e-tla ka lebelo le legolo, temana ya ngwaga ya Dihlatse tša Jehofa ya 2007 e be e le e swanelago ka mo go kgethegilego. E tšerwe go Tsefanya 1:14 (PK) gomme e balega ka gore: “Letšatši le legolo la Jehofa le kgaufsi.”
3 Ka ge letšatši le legolo la Modimo le le kgaufsi, gona bjale ke nako ya gore o itlhatsele o itokišitše. O ka itokišeletša letšatši leo bjang? Na o swanetše go gata megato e mengwe gape gore o itokišeletše letšatši la Jehofa?
Itlhatsele o Itokišitše
4. Jesu o be a itokišeleditše teko efe e kgolo?
4 Boporofeteng bja gagwe bjo bo lego mabapi le bofelo bja tshepedišo ya dilo, Jesu Kriste o boditše barutiwa ba gagwe gore: “Le itlhatsele le le ba itokišitšego.” (Mateo 24:44) Ge Jesu a be a bolela mantšu ao, yena ka noši o be a itokišeleditše teko e kgolo—lehu la gagwe la sehlabelo sa topollo. (Mateo 20:28) Re ka ithuta’ng tseleng yeo Jesu a ilego a itokiša ka yona?
5, 6. (a) Go rata Modimo le batho go kgatha tema efe go itokišeletšeng letšatši la Jehofa? (b) Jesu o beile mohlala ofe mabapi le go rata moagišani?
5 Jesu o be a rata Jehofa ka pelo ka moka gotee le ditekanyetšo tša Gagwe tša go loka. Baheberu 1:9 e bolela mabapi le Jesu gore: “O ratile toko gomme wa hloya go hloka molao. Ke ka lebaka leo Modimo, Modimo wa gago a go tloditšego ka makhura a tlhalalo go feta bao ba nago le kabelo le [wena].” Ka ge a be a rata Tatagwe wa legodimong, Jesu o ile a dula a mmotegela. Ge e ba re rata Modimo ka mo go swanago gomme re phela ka go dumelelana le dinyakwa tša gagwe, o tla re šireletša. (Psalme 31:23) Lerato le bjalo le go kwa go tla re thuša go itokišeletša letšatši le legolo la Jehofa.
6 Go rata batho e be e le selo se se kgahlišago ka semelo sa Jesu. Ee, o ile “a [ba] šokela, gobane ba be ba šokiša gomme ba gašane go swana le dinku tše di se nago modiši.” (Mateo 9:36) Ka baka leo, Jesu o ile a botša batho ditaba tše dibotse, go fo swana le ge lerato le re tutueletša go tsebatša molaetša wa Mmušo go baagišani ba rena. Go rata Modimo le go rata moagišani go dira gore re dule re le badiredi ba Bakriste ba mafolofolo gomme ka go rialo go re thuša ka go re lokišeletša letšatši le legolo la Jehofa.—Mateo 22:37-39.
7. Ge re dutše re letetše letšatši la Jehofa, ke ka baka la’ng re ka ba ba thabilego?
7 Jesu o be a thabela go dira thato ya Jehofa. (Psalme 40:8) Ge e ba re e-na le boemo bjo bjalo bja kgopolo, re tla thabela go direla Modimo tirelo e kgethwa. Ka go swana le Jesu, re tla ba banei bao ba nago le seatla se se bulegilego, gomme se se tla dira gore re be ba thabilego e le ruri. (Ditiro 20:35) Ee, “Xo thabêla Morêna ké ôna matla a rena.” Ge re e-na le lethabo leo, re tla kgona go itokišeletša letšatši le legolo la Jehofa.—Nehemia 8:10.
8. Ke ka baka la’ng re swanetše go batamela Jehofa ka thapelo?
8 Go rapela Modimo go tšwa pelong go ile gwa thuša Jesu go itokišeletša diteko tša tumelo. O be a rapela ge Johane a be a mo kolobetša. Jesu o ile a rapela bošego ka moka pele ga ge a kgetha baapostola ba gagwe. (Luka 6:12-16) Le gona ke mmadi ofe wa Beibele yo a sa kgahlwego ke dithapelo tša Jesu tše tšwago pelong tša bošegong bja gagwe bja mafelelo a le lefaseng? (Mareka 14:32-42; Johane 17:1-26) Na o rapela gantši, bjalo ka Jesu? Boledišana le Jehofa gantši, rapela nako e teletšana, tsoma tlhahlo ya moya o mokgethwa, le gona amogela tlhahlo yeo ge e thoma go bonala. Tswalano e tiilego le Tatago rena wa legodimong e bohlokwa nakong ye e thata ya ge letšatši la Modimo le e-tla ka lebelo. Ka gona, o se ke wa dika-dika go batamela go Jehofa ka thapelo.—Jakobo 4:8.
9. Go tshwenyega ka go kgethagatšwa ga leina la Jehofa go bohlokwa gakaaka’ng?
9 Go tshwenyega ka go kgethagatšwa ga leina la Jehofa le lekgethwa le gona go ile gwa thuša Jesu go itokišeletša diteko tšeo a ilego a lebeletšana le tšona. Ge e le gabotse, o ile a botša balatedi ba gagwe gore ge ba rapela Modimo, dithapelo tša bona di swanetše go akaretša kgopelo e rego: “Leina la gago a le kgethagatšwe.” (Mateo 6:9) Ge e ba re tloga re nyaka gore leina la Jehofa le kgethagatšwe, goba go dirwa le lekgethwa, re tla katanela go efoga go dira selo le ge e le sefe seo se ka le gobošago. Ka baka leo, re tla ba ba itokišeleditšego letšatši le legolo la Jehofa.
Na o Swanetše go Dira Diphetogo?
10. Ke ka baka la’ng e le mo go swanetšego go hlahloba maphelo a rena?
10 Ge letšatši la Jehofa le ka tla gosasa, na ruri o tla be o itokišeleditše lona? Yo mongwe le yo mongwe wa rena o tla dira gabotse ge a ka hlahloba bophelo bja gagwe go bona ge e ba a swanetše go fetoša ditiro goba mekgwa e itšego. Ka ge bophelo bja gona bjale e le bjo bokopana e bile bo sa kgonthišege, yo mongwe le yo mongwe wa rena o swanetše go phafoga moyeng letšatši le lengwe le le lengwe. (Mmoledi 9:11, 12; Jakobo 4:13-15) Ka gona anke re hlahlobeng dintlha tše dingwe tšeo di ka nyakago gore re di ele hloko maphelong a rena.
11. O ipeetše pakane efe mabapi le go bala Beibele?
11 Ntlha e nngwe e bohlokwa ke keletšo ya ‘mohlanka yo a botegago’ ya gore re bale Beibele letšatši le letšatši. (Mateo 24:45) O ka itirela pakane ya go bala Mangwalo le go naganišiša ka ona go tloga go Genesi go ya go Kutollo ka ngwaga. Ka go bala dikgaolo tše e ka bago tše nne ka letšatši, o ka bala dikgaolo tše 1 189 tša Beibele ka ngwaga. Kgoši e nngwe le e nngwe ya Isiraele e be e swanetše go bala Molao wa Jehofa “mehla ka moka ya bophelô bya [yona].” Go molaleng gore Jošua le yena o dirile selo se se swanago. (Doiteronomio 17:14-20; Jošua 1:7, 8) Ruri go bohlokwa gore badiši ba moya ba bale Lentšu la Modimo letšatši le letšatši, ka gobane se se ba thuša go nea “thuto e phelago”!—Tito 2:1.
12. Go batamela ga letšatši la Jehofa go swanetše go go tutueletša go dira’ng?
12 Go batamela ga letšatši la Jehofa go swanetše go go šušumeletša go ba gona dibokeng tša Bokriste ka mehla le go tšea karolo go tšona ka botlalo ka mo go ka kgonegago. (Baheberu 10:24, 25) Go dira bjalo go tla go thuša go kaonefatša bokgoni bja gago bjalo ka mogoeledi wa Mmušo yo a tsomago go hwetša le go thuša bao ba nago le tshekamelo e swanetšego ya bophelo bjo bo sa felego. (Ditiro 13:48) Mohlomongwe o ka ba mafolofolo kudu ka phuthegong ka ditsela tše dingwe gape, tše bjalo ka go thuša bao ba tšofetšego le go kgothatša ba bafsa. Maiteko a e ka ba ao a kgotsofatšago e le ruri!
Tswalano ya Gago le ba Bangwe
13. Re ka ipotšiša dipotšišo dife mabapi le go apara motho yo mofsa?
13 Ka ge letšatši la Jehofa le le kgaufsi, na o swanetše go dira boiteko bjo bo oketšegilego bja go “[apara] motho yo mofsa yo a bopilwego go ya ka thato ya Modimo tokong ya therešo le potegong”? (Baefeso 4:20-24) Ge o dutše o hlagolela dika tše di swanago le tša Modimo, ba bangwe ba tla lemoga gore o ‘sepela ka moya wa Modimo’ gomme o bonagatša dienywa tša wona. (Bagalatia 5:16, 22-25) Na o ka šupa mediro e itšego yeo e bontšhago gore wena le lapa la gagwe le apere motho yo mofsa? (Bakolose 3:9, 10) Ka mohlala, na o tsebja ka go dira ditiro tša botho go badumedi-gotee le wena le ba bangwe? (Bagalatia 6:10) Go ithuta Mangwalo ka mehla go tla go thuša go hlagolela dika tše di swanago le tša Modimo tšeo di tlago go go lokišeletša letšatši la Jehofa.
14. Ke ka baka la’ng motho a swanetše go rapelela moya o mokgethwa ge a dutše a hlagolela boitshwaro?
14 Go thwe’ng ge e ba o befelwa ka pela gomme o lemoga gore o swanetše go ba le boitshwaro bjo bo oketšegilego? Seka seo ke se sengwe sa dienywa tšeo moya o mokgethwa wa Modimo o ka di tšweletšago ka go wena. Ka baka leo, rapelela moya o mokgethwa, ka go dumelelana le mantšu a Jesu a rego: “Tšwelang pele le kgopela, gomme le tla newa; tšwelang pele le tsoma, gomme le tla hwetša; tšwelang pele le kokota, gomme le tla bulelwa. . . . Ge e ba lena gaešita le ge le le ba kgopo le tseba go nea bana ba lena dimpho tše dibotse, gona Tate yo a lego legodimong o tla nea gakaakang moya o mokgethwa go bao ba mo kgopelago!”—Luka 11:9-13.
15. Go swanetše go dirwa’ng ge e ba wena le modumedi-gotee le sa kwane?
15 Anke re re go na le go se kwane magareng ga gago le modumedi-gotee le wena yo a itšego. Boemong bjoo, dira maiteko ao o ka a kgonago a go lokiša bothata, ka go dira bjalo o tla be o godiša khutšo le botee bja phuthego. (Psalme 133:1-3) Diriša keletšo ya Jesu bjalo ka ge e begilwe go Mateo 5:23, 24 goba Mateo 18:15-17. Ge e ba o tlwaetše go dumelela letšatši le dikela o sa galefile, akgofela go lokiša ditaba. Gantši seo se nyakegago ke go ikemišetša go lebalela. Paulo o ngwadile gore: “E-bang ba botho yo mongwe go yo mongwe, le šokelane ka bonolo, le lebalelane ka bolokologi go etša ge Modimo le yena a le lebaletše ka bolokologi ka Kriste.”—Baefeso 4:25, 26, 32.
16. Ke bjang lešoko e lego le le nyakegago lenyalong?
16 Tswalano ya lenyalo e nyaka gore go be le go šokelana le go lebalelana ka dinako tše dingwe. Ge e ba o swanetše go ba yo lerato le yo a šokelago kutšwanyana go molekane wa gago wa lenyalo, katanela go fihlelela morero wo ka thušo ya Modimo le Lentšu la gagwe. Na go na le selo seo o swanetšego go se dira gore o dumelelane le 1 Bakorinthe 7:1-5 e le gore o fokotše kgateletšego gomme o pheme go se botege? Ruri ye ke karolo ya bophelo yeo e nyakago gore monna le mosadi ba “šokelane ka bonolo.”
17. Motho yo a dirilego sebe se segolo o swanetše go gata megato efe?
17 Go thwe’ng ge e ba o dirile sebe segolo ka tsela e itšego? Gata megato ya go lokiša boemo ka pela ka mo go ka kgonegago. Dira ka mo o ka kgonago ka gona go tsoma thušo ya bagolo ba Bakriste. Dithapelo tša bona le keletšo di tla go thuša go go bušetša sekeng moyeng. (Jakobo 5:13-16) Rapela Jehofa o dutše o bontšha boemo bja kgopolo bja go itshola. Go palelwa ke go dira bjalo go tla dira gore o ikwe o le molato e bile o tshwenywa ke letswalo. Dafida o bile le phihlelo e bjalo, eupša e bile mo gobotse kudu go imologa ka morago ga ge a ipobotše go Jehofa! Dafida o ngwadile gore: “Wa lehlôxônôlô ké mo-lebalêlwa-dikaroxô, yo dibe tša xaxwe di khupeditšwexo. Wa lehlôxônôlô ké motho eo Morêna a sa mmalelexo molato, a se naxo bofora mo pelong.” (Psalme 32:1-5) Jehofa o lebalela bao ba itsholago e le ka kgonthe ka morago ga ge ba dirile sebe.—Psalme 103:8-14; Diema 28:13.
Dula o se Karolo ya Lefase
18. O swanetše go lebelela lefase bjang?
18 Ga go pelaelo gore o fagahletše lefase le lefsa le lebotse leo Tatago rena wa legodimong a le holofeditšego. Lega go le bjalo, o lebelela bjang lefase le le sa lokago la batho bao ba arogilego go Modimo? Sathane, “mmuši wa lefase,” ga se a ka a ba le matla go Jesu Kriste. (Johane 12:31; 14:30) Ruri ga o nyake gore Diabolo le lefase la gagwe ba be le matla go wena, ka gona theetša mantšu a moapostola Johane a rego: “Le se ke la rata lefase goba dilo tše di lego lefaseng.” Yeo ke tsela e bohlale ka gobane “lefase le a feta gomme go bjalo le ka kganyogo ya lona, eupša yo a dirago thato ya Modimo o dula a le gona ka mo go sa felego.”—1 Johane 2:15-17.
19. Bafsa ba Bakriste ba kgothaletšwa go ipeela dipakane tša mohuta mang?
19 Na o thuša bana ba gago go ‘itota ba se na sepatso go tšwa lefaseng’? (Jakobo 1:27) Sathane a ka rata go tanya bana ba gago go swana le ge motho a tanya dihlapi. Dihlopha tše di fapa-fapanego le mekgatlo di rulaganyeditšwe go dira gore bafsa ba be karolo ya lefase la Sathane. Eupša bahlanka ba Jehofa ba šetše ba le ka mokgatlong o nnoši wo o tlago go phologa phedišo ya tshepedišo ye ya dilo. Ka gona bafsa ba Bakriste ba swanetše go kgothaletšwa go ba “le go gontši mo [ba] go dirago modirong wa Morena.” (1 Bakorinthe 15:58) Batswadi bao ba boifago Modimo ba swanetše go thuša bana ba bona go ipeela dipakane tšeo di tla ba neago bophelo bjo bo thabišago le bjo bo putsago bjo bo godišago Modimo le go ba thuša gore e be bao ba itokišeleditšego letšatši la Jehofa.
Lebelela ka Kua ga Letšatši le Legolo la Jehofa
20. Ke ka baka la’ng re swanetše go dula re nagana ka bophelo bjo bo sa felego?
20 O tla kgona go letela letšatši la Jehofa o sa boife selo ge e ba o dula o nagana ka bophelo bjo bo sa felego. (Juda 20, 21) O fagahletše bophelo bjo bo sa felego Paradeiseng, gomme ka go rialo o na le kholofelo ya go ba le mafolofolo a bofsa ao a mpshafaditšwego le nako e sa lekanyetšwago ya go phegelela dipakane tše di agago le go ithuta mo go oketšegilego ka Jehofa. Ge e le gabotse, o ka tšwela pele o ithuta ka Modimo ka mo go sa felego ka gobane batho ga bjale ba tseba feela “merumô ya ’tsela tša xaxwe.” (Jobo 26:14) A ditebelelo tše di kgahlišago gakaakang!
21, 22. Ke dipoledišano dife tšeo di ka bago gona magareng ga gago le bao ba tsošitšwego?
21 Paradeiseng, bao ba tsošitšwego ba tla kgona go re hlalosetša dilo tše re sa di tsebego tša nakong e fetilego. Henoge o tla be a le gona go hlalosa kamoo a bilego le sebete seo se bego se nyakega bakeng sa go tsebatša molaetša wa Jehofa go batho bao ba sa boifego Modimo. (Juda 14, 15) Ka ntle le pelaelo, Noa o tla laodiša kamoo go bego go le ka gona go aga areka. Aborahama le Sara ba tla kgona go utolla kamoo ba ilego ba ikwa ka gona mabapi le go tlogela manobonobo a Uri gomme ba yo phela ditenteng. Nagana ka Esitere a laodiša ditaba ka botlalo mabapi le kamoo a ilego a šireletša batho ba gabo le go folodiša leano la Hamani kgahlanong le bona. (Esitere 7:1-6) Nagana Jona a hlalosa ka go ba ga gagwe ka teng ga hlapi e kgolo ka matšatši a mararo goba Johane Mokolobetši a hlalosa kamoo a ilego a ikwa ka gona ge a be a kolobetša Jesu. (Luka 3:21, 22; 7:28) A dilo tše di kgahlišago e le ruri tšeo re tlago go ithuta tšona!
22 Nakong ya Pušo ya Kriste ya Nywaga e Sekete, o ka ba le tokelo ya go thuša bao ba tsošitšwego go “fihlêla xo tseba Modimo.” (Diema 2:1-6) Lehono, ruri go a thabiša go bona batho ba hwetša tsebo ka Jehofa Modimo le go dira ka go dumelelana le yona! Eupša nagana ka lethabo leo o tla bago le lona ka nako yeo ge Jehofa a šegofatša maiteko a gago a go ruta batho bao ba phetšego nakong e fetilego gomme ba arabela ka dipelo tše di nago le tebogo!
23. Re swanetše go ikemišetša go dira’ng?
23 Mehola yeo ga bjale re e thabelago bjalo ka batho ba Jehofa e feta maiteko a rena a sa phethagalago a go e bala goba go e lekanya. (Psalme 40:5) Se re se lebogago ka mo go kgethegilego ke ditokišetšo tša Modimo tša moya. (Jesaya 48:17, 18) Go sa šetšwe maemo a rena, anke re direng tirelo e kgethwa ka pelo ka moka ge re dutše re letetše letšatši le legolo la Jehofa.
O be o ka Araba Bjang?
• “Letšatši la Jehofa” ke’ng?
• O ka ipontšha bjang gore o itokišeleditše letšatši la Jehofa?
• Ka ge letšatši le legolo la Modimo le le kgaufsi kudu, re ka swanelwa ke go dira diphetogo dife?
• Ke’ng seo o se fagahletšego ka morago ga letšatši la Jehofa?
[Dipotšišo tša Thuto]
[Seswantšho go letlakala 12]
Jesu o ile a ipontšha a itokišeleditše diteko
[Seswantšho go letlakala 15]
Ruri e tla ba tokelo go thuša bao ba tsošitšwego go hwetša tsebo ka Jehofa!