Na O Na le Moeletši Wa Moya?

GE A be a e-na le nywaga e 16, Usia o ile a ba kgoši ya mmušo wa ka borwa wa Juda. O bušitše nywaga e fetago e 50, go tloga mafelelong a lekgolo la senyane la nywaga B.C.E. go ya mathomong a lekgolo la seswai la nywaga B.C.E. Usia “ó dirile tše di bexo di kxahla Morêna” go tloga bjaneng. Ke’ng seo se ilego sa mo tutueletša go swara tsela e lokilego? Pego ya histori e re: “[Usia] e be e le motho e a nyakaxo Morêna mehleng ya xe Sakaria a mo ruta xo boifa Modimo. Xomme mehleng yeo xe a sa nyaka Morêna, Modimo ó be a mo atla.”—2 Koronika 26:1, 4, 5.

Ga go tsebje gakaalo ka Sakaria, moeletši wa kgoši, ka ntle le pegong ye ya Beibele. Lega go le bjalo, bjalo ka ‘morutiši yo a boifago Modimo,’ Sakaria o ile a ba le tutuetšo e botse go mmuši yo monyenyane gore a dire seo se nepagetšego. The Expositor’s Bible e re go molaleng gore Sakaria e be e le “monna yo a bego a tseba thuto e kgethwa, a e-na le phihlelo e ntši ya dilo tša moya, e bile a kgona go abela ba bangwe tsebo ya gagwe.” Seithuti se sengwe sa Beibele se dirile phetho ye mabapi le Sakaria: “O be a tseba boporofeta gabotse e bile . . . e le monna yo bohlale, yo a boifago Modimo le yo a lokilego; gomme go bonagala a bile le tutuetšo e kgolo go Usia.”

Tsela ya Usia ya potego e ile ya mo tlišetša ditšhegofatšo tše dintši, le gona o be a “tiile matla xa-xolo” ka gobane “Modimo ó mo thušitše.” Ee, katlego maitekong a gagwe a go dira dilo e ile ya tlišwa ke ge a atlegile dilong tša moya “mehleng ya . . . Sakaria.” (2 Koronika 26:6-8) Ka morago ga ge Usia a atlegile, o ile a tlogela dithuto tša Sakaria, moeletši wa gagwe. “Pelo ya [Usia e ile] ya ikxoxomoša ya mo iša thsenyexong; a hlanoxêla Morêna.” Ka baka la tiro e itšego ya go hloka tlhompho, o ile a otlwa ka bolwetši bjo bo šišimišago bja letlalo, bjo bo ilego bja mo palediša go dira dilo, moo e lego gore o ile a se sa kgona go phetha mediro ya gagwe ka moka bjalo ka kgoši.—2 Koronika 26:16-21.

Na o na le motho yo go ka thwego ke mohlahli wa gago, moeletši, yo a go tutueletšago go “nyaka Morêna”? O ka ba le moeletši yo bjalo go sa šetšwe gore o yo monyenyane goba yo mogolo, goba gore o monna goba mosadi. Tšeela moeletši yoo godimo, ka gobane keletšo ya gagwe e ka go thuša go dula o dira seo se lokilego mahlong a Jehofa. Theetša Mokriste yo yoo a godilego ka tsebo, gomme o ele hloko kudu keletšo yeo a go neago yona. Le ka mohla o se ke wa hlokomologa mantšu a bohlale a ‘mohlahli yo bjalo yo a go rutago go boifa Modimo wa therešo.’—Diema 1:5; 12:15; 19:20.