Na o a Gopola?

Na o thabetše go bala ditokollo tša morago bjale tša Morokami? Ge e ba go le bjalo, bona ge e ba o ka kgona go araba dipotšišo tše di latelago:

• Ke ka baka la’ng “Testamente ya Kgale” e dula e le bohlokwa?

Mongwadi wa yona ga se modimo yo a itšego yo kgopo eupša ke Modimo yo lerato, Jehofa. Jesu le balatedi ba gagwe ba pele ba ile ba tšwela pele ba diriša Mangwalo a Seheberu. A na le keletšo e šomago ya bophelo bja letšatši le letšatši gomme a nea kholofelo e kgahlišago ka bokamoso.—9/1, matlakala 4-7.

• Ke’ng seo se fihleletšwego ka go dumelela gore nako e fete ga e sa le go tloga mola Adama le Efa ba dirago sebe?

Go theoša le nywaga e dikete, Sathane o hlatsetšwe e le moaketši—Adama le Efa gotee le ditlogolo tša bona tše dimilione ba hwile. Nako e bontšhitše gore dilo ga di sepelele batho gabotse ge ba ikarola go Modimo le gore ga ba na tokelo goba bokgoni bja go hlahla dikgato tša bona.—9/15, matlakala 6-7.

• Ke ka baka la’ng Jakobo a se a solwa ka baka la go itira Esau?

Jakobo o be a swanelwa ke go šegofatšwa ke tatagwe, ka ge a ile a reka tshwanelo ya go ba yo mogolo go Esau. Ge a be a lemoga gore o šegofaditše Jakobo, Isaka ga se a ka a nyaka go fetoša seo. Le gona go molaleng gore Modimo, yo a ka bego a ile a tsena ditaba gare, o be a nyaka gore go šegofatšwe Jakobo.—10/1, letlakala 31.

• Ke bjang go ba ga rena le letswalo go ganetšanago le thuto ya tlhagelelo?

Merafong le ditšong ka moka, batho ba be ba dutše ba ikemišeditše go thuša ba bangwe gaešita le ge go dira bjalo go be go akaretša go bea bophelo bja bona kotsing. Go hloka boithati mo go bjalo ga se selo seo se bego se ka letelwa ge e ba batho e be e fo ba diphoofolo tšeo di katanelago go phela go sa šetšwe seo se diregago.—10/15, letlakala 20.

• Ke ka baka la’ng re ka re Modimo o ikokobeditše, gona o bonagatša seka se ka tsela efe?

Bjalo ka Mmuši wa legohle le Mmopi, Modimo ga a na mafokodi go swana le rena. Lega go le bjalo, ka go dumelelana le 2 Samuele 22:36, Modimo o ikokobeditše ka kwešišo ya gore o tshwenyega ka batho ba tlasana bao ba lekago go mo kgahliša gomme o ba bontšha kgaugelo. O theogela tlase ka tsela ya seswantšhetšo, e le gore a dirišane ka botho le bao ba boifago Modimo.—11/1, matlakala 4-5.

• Mangeta a bogologolo a hlatsela pego ya Beibele bjang?

Baepi ba marope ba hweditše dikgapetla tša letsopa kua Samaria tšeo di nago le maina a šupago a ba lešika ao a begilwego go Jošua 17:1-6. Dikgapetla tša Aradi di hlatsela tsebišo ya mabapi le malapa a boperisita e bile di na le leina la Modimo. Dikgapetla tša Lakisi di hlalosa boemo bja dipolitiki le moferefere wo o bego o le gona kua Juda pele Bababilona ba ka e hlasela.—11/15, matlakala 12-14.

• Ke’ng seo se re fihlišago phethong ya gore Luka ke yena a ngwadilego puku ya Ditiro?

Ebangedi ya Luka le Ditiro tša Baapostola di ngwaletšwe Theofilo, e lego seo se bontšhago gore Luka o di ngwadile ka bobedi. Go dirišwa ga mašupi a “re” le “rena,” go bontšha gore Luka o bile le karolo ditiragalong tše dingwe. (Ditiro 16:8-15)—11/15, letlakala 18.

• Mokriste o swanetše go ba le pono efe ka go rea dihlapi le go tsoma?

Ga e sa le go tloga mehleng ya Noa, Modimo o dumeletše batho go bolaya diphoofolo le go di ja. Lega go le bjalo, go nyakega ga gore di ntšhwe madi go gatelela gore bophelo bja diphoofolo bo swanetše go hlompšha ka ge bo e-tšwa go Modimo. Bakriste ga se ba swanela go bolaya bakeng sa papadi goba go kgahlwa ke go rakediša diphoofolo goba go di bolaya. Ke gabohlokwa go kwa melao ya Kesara le go naganela matswalo a ba bangwe. (Baroma 14:13)—12/1, letlakala 31.