Ba Dirile Gore Maphelo a Bona a be le Morero Kudu​—Na o ka Dira se se Swanago?

MARC, ngwanabo rena wa kua Canada, o be a thwetšwe ke feme yeo e hlamago diroboto tše di raraganego tšeo di dirišwago ke mekgatlo ya tša lefaufau. O be a šoma ka nakwana e bile a hlankela e le mmulamadibogo wa ka mehla. Ke moka, mookamedi o ile a holofetša Marc go mo hlatloša mošomong—mošomo wa nako e tletšego woo o lefago tšhelete e ntši. Marc o ile a dira’ng?

Amy, kgaetšedi ya kua Philippines, o be a hlankela e le mmulamadibogo wa ka mehla ge a be a feleletša sekolo. Ge a se na go aloga, o ile a newa mošomo wa nako e tletšego wo o bego o mo nyaka nako e ntši eupša o tloga o lefa. Amy o ile a dira kgetho efe?

Marc le Amy ba ile ba dira diphetho tše di sa swanego, gomme mafelelo a dikgetho tša bona a bontšha bohlale bja keletšo yeo e neilwego Bakriste ba Korinthe ya bogologolo. Moapostola Paulo o ngwadile gore: “Anke ... bao ba dirišago lefase ba etše bao ba sa le dirišego ka mo go tletšego.”—1 Bakor. 7:29-31.

Diriša Lefase, Eupša e Sego ka mo go Tletšego

Pele ga ge re e-kwa gore go diragetše’ng ka Marc le Amy, anke re hlahlobeng ka boripana seo se bolelwago ke lentšu “lefase” (goba koʹsmos ka Segerika) leo Paulo a le dirišitšego lengwalong la gagwe leo le yago go Bakorinthe. Temaneng yeo ya Beibele, koʹsmos e šupa go tshepedišo ya lefase yeo re phelago go yona—lekoko la batho ka kakaretšo—gomme le akaretša le dilo tše di tlwaelegilego tšeo e lego karolo ya bophelo bja letšatši le letšatši, tše bjalo ka madulo, dijo le diaparo. Bontši bja rena re swanetše go ba le mošomo wa boiphedišo gore re hwetše dinyakwa tše bjalo tša ka mehla. Ruri, ga go  tsela-pedi, re swanetše go diriša lefase gore re phethagatše boikarabelo bja rena bja Mangwalo bja go itlhokomela le go hlokomela malapa a rena. (1 Tim. 5:8) Lega go le bjalo, ka nako e swanago re a lemoga gore “lefase le a feta.” (1 Joh. 2:17) Ka baka leo, re diriša lefase go fihla tekanyong e nyakegago, eupša e sego “ka mo go tletšego.”—1 Bakor. 7:31.

Ba tutueditšwe ke keletšo yeo ya Beibele ya go lekanyetša go diriša ga bona lefase go fihla tekanyong e kgonegago, bana babo rena ba bantši le dikgaetšedi ba ile ba hlahloba lefsa maemo a bona, ba fokotša mošomo wa boiphedišo, gomme ba nolofatša tsela ya bona ya go phela. Ka morago ga go dira bjalo, kapejana ba ile ba lemoga gore ge e le gabotse ba dirile gore maphelo a bona a be le morero kudu ka gobane ba na le nako e ntši yeo ba e dirišago ba e-na le malapa a bona le go e dirišetša tirelong ya Jehofa. Go feta moo, bophelo bja bona bjo bonolo bo ba dirile gore ba se ke ba ithekga kudu ka lefase go e na le moo ba ithekge kudu ka Jehofa. Na o ka dira se se swanago—wa nolofatša bophelo bja gago e le gore o tšwetše pele dikgahlego tša Mmušo wa Modimo?—Mat. 6:19-24, 33.

“Re Ikwa re le Kgaufsi Kudu le Jehofa go Feta le ge e le Neng Pele”

Marc, yo go boletšwego ka yena matsenong, o ile a kwa keletšo ya Beibele ya go se diriše lefase ka mo go tletšego. O ile a gana go hlatlošwa mošomong wo o lefago kudu wo a bego a o newa. Matšatši a sego kae ka morago, mookamedi wa Marc o ile a mo holofetša gaešita le tšhelete ya mogolo e ntši kudu e le go leka go mo goketša gore a amogele mošomo o mofsa. Marc o re: “E be e le teko, eupša ke ile ka gana gape.” O hlalosa lebaka: “Nna le mosadi wa-ka, Paula, re be re nyaka go gafela maphelo a rena go hlankeleng Jehofa ka botlalo ka mo go ka kgonegago. Ka go rialo, re ile ra dira phetho ya gore re nolofatše mokgwa wa rena wa go phela. Re ile ra rapela Jehofa gore a re nee bohlale bja go fihlelela pakane ya rena gomme ra bea letšatši-kgwedi le itšego leo re bego re tla thoma ka lona go hlankela Jehofa ka nako e oketšegilego kudu.”

Paula o re: “Ke be ke šoma matšatši a mararo ka beke ke le mongwaledi sepetlele gomme ke gola tšhelete e lekanego. Ke be ke bile ke hlankela bjalo ka mmulamadibogo wa ka mehla. Lega go le bjalo, go swana le Marc, le nna ke be ke nyaka go ikgafa gore ke hlankele Jehofa moo go bego go nyakega bagoeledi ba bantši ba Mmušo. Lega go le bjalo, ge ke be ke tsenya lengwalo la go rola modiro, mookamedi wa-ka o ile a mpotša gore ke be ke swanelegela sekgoba seo se bego se sa tšwa go tšwelela sa go ba mongwaledi-mogolo. E be e le mošomo o lefago go feta mešomo ka moka ya bongwaledi sepetlele, eupša ke ile ka kgomarela phetho ya-ka ya go rola modiro. Ge ke be ke botša mookamedi wa-ka lebaka la gore ke se tsenye kgopelo ya sekgoba seo sa mošomo, o ile a ntheta bakeng sa tumelo ya-ka.”

Kapejana ka morago ga moo, Marc le Paula ba ile ba hwetša kabelo ya go hlankela e le babulamadibogo ba kgethegilego phuthegong e nyenyane karolong yeo e lego lekatana ya Canada. Go huduga ga bona go bile le mafelelo afe? Marc o re: “Ka morago ga go tlogela mošomo wo o tsepamego ka tša ditšhelete wo ke o šomilego mo e ka bago tekanyo ya seripa-gare sa bophelo bja-ka, ke be ke sa kgodišege ka bokamoso, eupša Jehofa o ile a šegofatša bodiredi bja rena. Re na le lethabo le legolo leo le tlišwago ke go boledišana le ba bangwe ka dimpho tša moya. Le gona, tirelo ya nako e tletšego e matlafaditše lenyalo la rena. Dipoledišano tša rena di ithekgile dilong tšeo e lego tše bohlokwa e le ka kgonthe—ditaba tša moya. Re ikwa re le kgaufsi kudu le Jehofa go feta le ge e le neng pele.” (Dit. 20:35) Paula o oketša  ka gore: “Ge o tlogela mošomo wa gago le boiketlo bja legae le o le tlwaetšego, o swanelwa ke go bota Jehofa ka mo go feletšego. Re dirile bjalo, gomme Jehofa o re šegofaditše. Bana babo rena ba ba rategago le dikgaetšedi ka phuthegong ya rena e mpsha ba dira gore re ikwe re ratwa e bile re nyakega. Ga bjale ke diriša matla ao pele ke bego ke a diriša mošomong wa-ka, go thuša batho moyeng. Ke tloga ke thabela go hlankela kabelong ye.”

‘O na le sa Gagwe Eupša ga a Thaba’

Amy, yo go boletšwego ka yena pejana, o ile a kgetha tsela e fapanego. O ile a amogela mošomo wa nako e tletšego wo o lefago gabotse wo a ilego a o newa. Amy o re: “Ngwageng wa pele, ke ile ka tšwela pele ke le mafolofolo bodireding eupša ka hwetša gore pakane ya-ka bophelong e be e thoma go tloga dikgahlegong tša Mmušo ganyenyane-ganyenyane gomme e e-ya go hlatlošweng mošomong. Ke ile ka newa dikholofetšo tše goketšago tša go tšwela pele mošomong wa-ka gomme ka thoma go diriša matla a-ka ka go namelela maemong a phagamego a mošomo. Ge maikarabelo a mošomo wa-ka a be a oketšega, nako yeo ke e dirišago bodireding e ile ya thoma go fokotšega ganyenyane-ganyenyane. Mafelelong, ke ile ka kgaotša ka mo go feletšego go dira boboledi.”

Ge a lebelela morago nakong yeo, Amy o re: “Ke be ke e-na le sa-ka. Ke be ke tšea maeto gantši e bile ke thabela botumo bjo bo bego bo tlišwa ke maemo a mošomo wa-ka. Lega go le bjalo, ke be ke sa thaba. Le ge ke be ke e-na le tšhelete, ke be ke e-na le mathata a mantši. Ke be ke ipotšiša gore molato ke’ng. Ke moka, ke ile ka feleletša ke lemoga gore ke nyakile ke ‘arošwa tumelong’ ka go phelela mošomo wa bophelo ka moka lefaseng le. Ka baka la seo, go fo etša ge Lentšu la Modimo le bolela, ke be ke tlaišwa ke ‘mahloko a mantši.’”—1 Tim. 6:10.

Amy o ile a dira’ng? O re: “Ke ile ka kgopela bagolo gore ba nthuše go tsošološa boemo bja-ka bja moya gomme ka thoma go ba gona dibokeng. Ge go be go opelwa, ke ile ka thoma go lla. Ke ile ka gopola kamoo ke bego ke thabile ka gona nywageng e mehlano yeo ke kopanetšego ka yona punong ke le mmulamadibogo, gaešita le ge nakong yeo ke be ke diila dilong tše di bonagalago. Ke be ke tseba gore ke swanetše go kgaotša go senya nako ka go kitimiša tšhelete le gore ke swanetše go etiša dikgahlego tša Mmušo pele. Ke ile ka amogela maemo a tlasana mošomong, e lego seo se bego se bolela go lahlegelwa ke 50 lekgolong ya tšhelete ya-ka ya mogolo, gomme ka thoma go kopanela gape modirong wa boboledi.” Amy o bolela a thabile gore: “Ke bile le lethabo la go hlankela ke le mmulamadibogo ka nywaga e sego kae. Ga bjale ke na le maikwelo a kgotsofalo ao le ka mohla ke sa kago ka ba le ona ge ke be ke diriša bogolo bja nako ya-ka ke šomela lefase.”

Na o ka beakanya maemo a gago gomme wa nolofatša tsela yeo o phelago ka yona? Ge e ba o diriša nako yeo o tlago go e hwetša ka go dira bjalo e le gore o tšwetše pele dikgahlego tša Mmušo, le wena o ka dira gore bophelo bja gago bo be le morero kudu.—Die. 10:22.

[Mantšu a ipiletšago a tsopotšwego go letlakala 19]

Na o ka beakanya maemo a gago gomme wa nolofatša tsela yeo o phelago ka yona?

[Lepokisi/Seswantšho go letlakala 19]

“Ke Šetše ke bo Rata!”

David, mogolo wa Mokriste kua United States, o be a rata gore le yena a be tirelong ya nako e tletšego go etša mosadi wa gagwe le bana. O ile a kgona go rulaganya gore a šome ka nakwana khamphaning yeo a bego a e šomela, gomme a thoma go hlankela e le mmulamadibogo wa ka mehla. Na phetogo ye e ile ya dira gore bophelo bja gagwe bo be le morero kudu? Dikgwedi tše sego kae ka morago, David o ile a ngwalela mogwera wa gagwe gore: “Ga go na selo se se kgotsofatšago go feta gore motho a swarege ka go hlankela Jehofa ka mo go tletšego a e-na le lapa la gagwe. Ruri ke be ke nagana gore go tla ntšea nako gore ke tlwaele bobulamadibogo, eupša ke šetše ke bo rata! Bo lapološa gakaakang.”

[Seswantšho go letlakala 18]

Marc le Paula bodireding