Dintlha tše Kgolo go tšwa Pukung ya Mateo
Lentšu la Jehofa le a Phela
Dintlha tše Kgolo go tšwa Pukung ya Mateo
MOTHO wa pele wa go ngwala pego e kgahlišago ka bophelo le bodiredi bja Jesu ke Mateo—mogwera wa paala wa Jesu Kriste le yoo e kilego ya ba molekgetho. Ebangedi ya Mateo yeo mathomong e ngwadilwego ka Seheberu gomme ka morago ya fetolelwa go Segerika, e phethilwe mo e ka bago ka 41 C.E. gomme e šoma bjalo ka leporogo leo le kgokaganyago Mangwalo a Seheberu le Mangwalo a Bakriste a Segerika.
Le ge go bonala e be e ngwaletšwe kudu-kudu Bajuda, Ebangedi ye yeo e tutuetšago le e bohlokwa e tšweletša Jesu e le Mesia yo a holofeditšwego, Morwa wa Modimo. Go ela hloko molaetša wa yona go tla matlafatša tumelo ya rena go Modimo wa therešo, Morwa wa gagwe le dikholofetšong tša Gagwe.—Baheb. 4:12.
“MMUŠO WA MAGODIMO O BATAMETŠE”
Mateo e gatelela sehlogo sa Mmušo le dithuto tša Jesu, gaešita le ge go dira bjalo go bolela gore a pheme go bea ditaba ka tatelano ya ditiragalo. Ka mohlala, Thuto ya Thabeng e begwa mathomong a puku, le ge Jesu a ile a e ruta mo e ka bago bogareng bja bodiredi bja gagwe.
Nakong ya bodiredi bja gagwe bja Galilea, Jesu o dira mehlolo, o nea baapostola ba 12 ditaelo mabapi le bodiredi, o kgalema Bafarisei gomme o bolela ka diswantšho tša mabapi le Mmušo. Ke moka o tloga Galilea gomme o tla “mellwaneng ya Judea ka mošola wa Jorodane.” (Mat. 19:1) Ge ba le tseleng, Jesu o botša barutiwa ba gagwe gore: ‘Re rotogela Jerusalema, Morwa wa motho o tla ahlolelwa lehu, gomme o tla tsošwa ka letšatši la boraro.’—Mat. 20:18, 19.
Dipotšišo tša Mangwalo di a Arabja:
3:16—Ke ka tsela efe ‘magodimo a ilego a bulega’ nakong ya ge Jesu a kolobetšwa? Go bonagala se se bontšha gore Jesu o ile a thoma go gopola bophelo bja gagwe bja legodimong.
5:21, 22—Na go bontšha kgalefo go kotsi kudu go feta go boloka sekgopi? Jesu o ile a lemoša gore motho yo a bolokago sekgopi kgahlanong le ngwanabo o dira sebe se segolo. Lega go le bjalo, go bontšha kgalefo ka go bolela mantšu a lenyatšo ke sebe se segolo le go feta, go dira gore motho a ikarabele kgorong e phagamego go feta go ikarabela kgorong ya lefelong leo ya toka.
5:48—Na ruri go a kgonega gore re ‘phethagale, go etša ge Tatago rena wa legodimong a phethagetše’? Ee ka tsela ya seswantšhetšo. Jesu mo o be a bolela ka lerato, gomme o ile a botša batheetši ba gagwe gore ba ekiše Modimo gomme e be ba phethagetšego, goba ba feletšego, leratong la bona. (Mat. 5:43-47) Bjang? Ka go le godiša gore le akaretše le manaba a bona.
7:16—Ke “dienywa” dife tšeo di hlaolago bodumedi bja therešo? Dienywa tše di akaretša seo se fetago boitshwaro bja rena. Di akaretša le ditumelo tša rena—dithuto tšeo re di kgomarelago.
10:34-38—Na molaetša wa Mangwalo o swanetše go solwa ge go e-ba le go se kwane ka lapeng? Le gatee. Go e na le moo, go se kwane go bakwa ke mogato woo o gatilwego ke ditho tšeo di sa dumelego tša lapa. Di ka kgetha go gana goba go lwantšha Bokriste, tša baka go se kwane ka lapeng.—Luka 12:51-53.
11:2-6—Ge e ba a be a kwele lentšu la Modimo la go amogela Jesu le go tseba gore ke Mesia, ke ka baka la’ng Johane a ile a botšiša ge e ba Jesu e le “Yo a Tlago”? Johane a ka ba a ile a botšiša se gore a kgonthišetšwe ke Jesu ka boyena. Lega go le bjalo, go sa šetšwe seo, Johane o be a nyaka go tseba ge e ba go be go tla ba le “yo mongwe” yo a tlago go tla ka matla a Mmušo le go phethagatša dikholofelo tša Bajuda. Karabo ya Jesu e ile ya bontšha gore go be go ka se be le yo a tlago go tla ka morago ga gagwe.
19:28—“Meloko e lesome-pedi ya Isiraele” yeo e tlago go ahlolwa e swantšhetša’ng? Ga e swantšhetše meloko e 12 ya Isiraele ya moya. (Bagal. 6:16; Kut. 7:4-8) Baapostola bao Jesu a bego a bolela le bona ba be ba tla ba karolo ya Isiraele ya moya, e sego baahlodi ba ditho tša yona. Jesu o dirile ‘kgwerano ya mmušo le bona,’ gomme ba be ba tlo ba ‘mmušo le baperisita ba Modimo.’ (Luka 22:28-30; Kut. 5:10) Ditho tša Isiraele ya moya di tla “ahlola lefase.” (1 Bakor. 6:2) Ka baka leo, “meloko e lesome-pedi ya Isiraele,” yeo e ahlolwago ke bao ba lego didulong tša bogoši legodimong, ga go pelaelo gore e emela lefase la batho leo e sego dikgoši, e sego baperisita, ka ge go bontšhitšwe ke meloko e 12 Letšatšing la Poelano.—Lef., kgao. 16.
Seo re Ithutago Sona:
4:1-10. Pego ye e re ruta gore Sathane o gona le gore ga se seka sa bobe. O diriša “kganyogo ya nama le kganyogo ya mahlo le pontšho ya bompogeng ya dilo tša motho tša boiphedišo” go re leka. Lega go le bjalo, go diriša melao ya motheo ya Mangwalo go tla re thuša go dula re botegela Modimo.—1 Joh. 2:16.
5:1–7:29. Ela hloko dinyakwa tša gago tša moya. E-ba modira-khutšo. Phema dikgopolo tše di gobogilego. Phethagatša seo o se holofeditšego. Ge o rapela, etiša pele dilo tša moya go e na le go etiša tše di bonagalago. E ba yo a humetšego Modimong. Tsoma Mmušo pele le go loka ga Modimo. O se ke wa ahlola ba bangwe. Dira thato ya Modimo. A dithuto tše dibotse gakaakang tšeo di akaretšwago Thutong ya Thabeng!
9:37, 38. Re swanetše go dira dilo ka go dumelelana le seo re se kgopetšego go Mong gore a “romele badiri punong ya gagwe,” ka go tšea karolo ka mafolofolo modirong wa go dira barutiwa.—Mat. 28:19, 20.
10:32, 33. Ga se ra swanela go boifa go bolela ka tumelo ya rena.
13:51, 52. Go kwešiša ditherešo tša Mmušo go tliša boikarabelo bja go ruta ba bangwe le go boledišana le bona ka mahumo a a bohlokwa.
14:12, 13, 23. Dinako tša go ba noši di bohlokwa bakeng sa go naganišiša gabotse.—Mar. 6:46; Luka 6:12.
17:20. Re nyaka tumelo bakeng sa go lwa le mathata a swanago le thaba ao a šitišanago le tšwelopele ya rena ya moya le go lebeletšana le mathata. Ga se ra swanela go hlokomologa go aga le go matlafatša tumelo ya rena go Jehofa le dikholofetšong tša gagwe.—Mar. 11:23; Luka 17:6.
18:1-4; 20:20-28. Go se phethagale ga motho le bodumedi bjoo motho a godišeditšwego go bjona bjoo bo gatelelago go tuma di dirile gore barutiwa ba Jesu ba tshwenyege kudu ka bogolo. Re swanetše go hlagolela boikokobetšo ge re dutše re itiša kgahlanong le ditshekamelo tša sebe le go boloka pono e nepagetšego ka ditokelo tšeo re nago le tšona le boikarabelo.
‘MORWA WA MOTHO O TLA GAFŠA’
A “nametše pokolwana,” Jesu o tla Jerusalema ka Nisani 9, 33 C.E. (Mat. 21:5) Letšatšing le le latelago, o tla tempeleng gomme o a e hlwekiša. Ka Nisani 11, o ruta ka tempeleng, o kgalema bamangwalo le Bafarisei, ka morago ga moo o botša barutiwa ba gagwe ka “pontšho ya go ba gona ga [gagwe] le ya bofelo bja tshepedišo ya dilo.” (Mateo 24:3) Letšatšing le le latetšego, o ba botša gore: “Le a tseba gore matšatši a mabedi go tloga bjale ke paseka, gomme Morwa wa motho o tla gafelwa go kokotelwa koteng.”—Mat. 26:1, 2.
Ke Nisani 14. Ka morago ga ge a hlomile Segopotšo sa lehu la gagwe leo le bego le le kgaufsi, Jesu o a ekwa, o a golegwa, o a sekišwa gomme o kokotelwa koteng. Letšatšing la boraro, o tsošwa bahung. Pele ga ge a ka rotogela legodimong, Jesu yo a tsošitšwego o nea balatedi ba gagwe taelo ye: “Ka gona, e-yang le dire batho ba ditšhaba ka moka barutiwa.”—Mat. 28:19.
Dipotšišo tša Mangwalo di a Arabja:
22:3, 4, 9—Ditaletšo tše tharo tša lenyalo di be di lebišitšwe go bo mang? Taletšo ya pele ya go kgoboketša sehlopha sa monyadiwa e tšwile ge Jesu le balatedi ba gagwe ba be ba thoma modiro wa boboledi ka 29, C.E., gomme e ile ya tšwela pele go fihla ka 33 C.E. Taletšo ya bobedi e thomile nakong ya go tšhollwa ga moya o mokgethwa ka Pentekoste ya 33 C.E. go fihla ka 36 C.E. Ditaletšo tše ka bobedi di be di lebišitšwe ka go lebanya go Bajuda, Bajuda ba basokologi le Basamaria feela. Lega go le bjalo, taletšo ya boraro e be e newa batho bao ba bego ba le mebileng ka ntle ga motse, ke gore, Bantle bao ba sa bollago, go thoma ka 36 C.E. ka go sokologa ga letona la madira a Roma Koronelio gomme e tšwela pele le mehleng ya rena.
23:15—Ke ka baka la’ng motho yo a dirilwego mosokologi ke Bafarisei, e le yo a ‘swanetšwego ke Gehenna gabedi go feta’ Bafarisei ka bobona? Ba bangwe bao ba ilego ba sokollwa ke Bafarisei e ka ba e be e le badiradibe ba bagolo. Lega go le bjalo, ka go fetoga Bafarisei ba tseneletšego ba ile ba feta kamoo ba bego ba le ka gona pele, mohlomongwe ba fetelela go feta le barutiši ba bona bao ba ahlotšwego. Ka baka leo, ba be ba ‘swanelwa ke Gehenna,’ gabedi go feta Bafarisei ba Bajuda.
27:3-5—Ke’ng seo se dirilego gore Judase a šegame? Ga go na seo se bontšhago gore go šegama ga Judase e be e le boitsholo bja kgonthe. Go e na le go tsoma tebalelo ya Modimo, o ile a ipolela go baperisita ba bagolo le banna ba bagolo. Ka ge a dirile “sebe se se bakago lehu,” ke mo go swanetšego ge Judase a ile a tlaletšwa ke letswalo le go nyama. (1 Joh. 5:16) Go nyama ga gagwe go be go bakwa ke go ba boemong bja go hloka kholofelo.
Seo re Ithutago Sona:
21:28-31. Go dira ga rena thato ya Modimo ke selo se bohlokwa kudu mahlong a Jehofa. Ka mohlala, re swanetše go tšea karolo ka mafolofolo modirong wa go bolela ka Mmušo le wa go dira barutiwa.—Mat. 24:14; 28:19, 20.
22:37-39. Ruri melao e mebedi e megolo e hlalosa ka go lebanya seo Modimo a se nyakago go bao ba mo rapelago!
[Seswantšho go letlakala 31]
Na o tšea karolo ka mafolofolo modirong wa go buna?
[Tlhaloso ya Mothopo]
© 2003 BiblePlaces.com
[Seswantšho go letlakala 31]
Mateo o gatelela sehlogo sa Mmušo