“Dula o Hlokometše Bodiredi bjo o bo Amogetšego Moreneng”

“Dula o hlokometše bodiredi bjo o bo amogetšego Moreneng, gore o bo phethagatše.”—BAKOL. 4:17.

1, 2. Bakriste ba na le boikarabelo bofe malebana le batho?

RE NA le boikarabelo bjo bogolo malebana le batho bao ba re dikologilego. Diphetho tšeo ba di dirago gona bjale di tla bolela bophelo goba lehu go bona nakong ya ‘masetlapelo a magolo.” (Kut. 7:14) Mongwadi yo a buduletšwego wa puku ya Diema o itše: “Namôlêla ba-išwa-lehung! Xe O ka diêxa, ba tlo wêla polaong.” A mantšu a bohlokwa gakaakang! Go palelwa ke go phetha boikarabelo bja go lemoša batho ka kgetho yeo ba kago e dira go ka dira gore re be le molato wa madi. Ge e le gabotse, temana yona yeo e tšwela pele ka gore: “Xe O ka re: Re be re sa tsebe! Mo-fênyêka-pelo Yêna ó tlo tseba; ó hlapetša pelo y’axo a e tseba; ó lefetša motho se a se diraxo.” Ga go pelaelo gore bahlanka ba Jehofa ba ka se bolele gore ba ‘be ba sa tsebe’ ka kotsi yeo e tlago go wela batho.—Die. 24:11, 12.

² Jehofa o tšeela bophelo godimo. O kgothaletša bahlanka ba gagwe gore ba dire maiteko ohle ao ba ka a kgonago go thuša go phološa maphelo a mantši kamoo ba ka kgonago. Modiredi yo mongwe le yo mongwe wa Modimo o swanetše go tsebatša molaetša o phološago bophelo o lego ka Lentšung la Modimo. Modiro wa rena o swana le wa mohlapetši yoo a neago temošo ge a bona kotsi e lego kgaufsi. Ga re nyake go ba le molato wa madi a batho bao ba lego kotsing ya go fedišwa. (Hesek. 33:1-7) Ka baka leo, go bohlokwa kudu gore re phegelele maitekong a rena a go “bolela lentšu”!—Bala 2 Timotheo 4:1, 2, 5.

3. Ke ditaba dife tšeo di tlago go ahla-ahlwa sehlogong se le go tše pedi tše di latelago?

³ Sehlogo se se tla ahla-ahla kamoo o ka fenyago mapheko bodireding bja gago bja go phološa maphelo le kamoo o ka kgonago go thuša batho ba bantši kudu. Sehlogo seo se latelago se tla hlahloba kamoo o ka hlagolelago bokgoni bja go ruta ditherešo tše bohlokwa. Sehlogo sa boraro se ithutwago se tla bolela ka a mangwe a mafelelo a kgothatšago ao bagoeledi ba Mmušo lefaseng ka bophara ba bago le ona. Lega go le bjalo, pele re ahla-ahla ditaba tše, go tla ba kaone go hlahloba lebaka leo ka lona mehla ya rena e lego e hlobaetšago.

Lebaka Leo ka Lona ba Bantši ba se Nago Kholofelo

4, 5. Batho ba lebeletšana le eng, gomme ba bantši ba arabela bjang?

⁴ Ditiragalo tša lefase di bontšha gore re phela mehleng “ya bofelo bja tshepedišo ya dilo” le gore bofelo bjoo bo kgaufsi kudu. Batho ba lebeletšana le ditiragalo le maemo ao Jesu le barutiwa ba gagwe ba ilego ba bolela gore a tla swaya ‘mehla ya bofelo.’ Batho ba tlaišwa ke “dihlabi tša tlalelo,” tšeo di akaretšago dintwa, tlhaelelo ya dijo, ditšhišinyego tša lefase gotee le mathata a mangwe. Moya wa go hloka molao, wa boithati le wa go se boife Modimo, o aparetše. “Dinako tše [ke tše] di hlobaetšago tšeo go lego thata go lebeletšana le tšona” gaešita le go batho bao ba katanelago go phela ka ditekanyetšo tša Beibele.—Mat. 24:3, 6-8, 12; 2 Tim. 3:1-5.

⁵ Lega go le bjalo, batho ba bantši ga ba lemoge seo ge e le gabotse se bolelwago ke ditiragalo tša lefase. Ka baka leo, ba bantši ba tshwenyegile ka tšhireletšego ya bona ka noši gotee le ya malapa a bona. Go lahlegelwa ke baratiwa ka lehu  goba mathata a mangwe a motho ka noši go tlogela ba bantši ba e-kwa bohloko. Batho ba ga ba na kholofelo ka gobane ba sa tsebe lebaka leo ka lona dilo tše bjalo di diregago gotee le moo tharollo e ka hwetšwago gona.—Baef. 2:12.

6. Ke ka baka la’ng “Babilona o Mogolo” a paletšwe ke go thuša balatedi ba gagwe?

⁶ “Babilona o Mogolo,” e lego mmušo wa lefase wa bodumedi bja maaka, o paletšwe ke go homotša batho. Go e na le moo, ka “beine ya bootswa bja gagwe,” o dirile gore bontši bja batho bo thekesele bo gakanegile moyeng. Go oketša moo, ka go itshwara bjalo ka mogweba-ka-mmele, bodumedi bja maaka bo gokeditše “dikgoši tša lefase” le go di laola, bja diriša dithuto tša maaka le mekgwa ya go dirišana le meoya go dira gore batho ba dule ba ikokobeletša baetapele ba bona ba dipolotiki ka mo go feteletšego. Ka go rialo, bodumedi bja maaka bo ile bja hwetša matla le tutuetšo, eupša ka nako e swanago, bo lahlile therešo ya bodumedi ka mo go feletšego.—Kut. 17:1, 2, 5; 18:23.

7. Bontši bja batho bo tlo diragalelwa ke eng, eupša ba bangwe ba ka thušwa bjang?

⁷ Jesu o rutile gore bontši bja batho bo sepela tseleng e petleke yeo e lebišago tshenyegong. (Mat. 7:13, 14) Batho ba bangwe ba tseleng yeo e petleke ka gobane ba kgethile go gana seo Beibele e se rutago, eupša ba bangwe ba bantši ba moo ka gobane ba forilwe, goba ba tlogetšwe lefsifsing, mabapi le seo ge e le gabotse Jehofa a se nyakago go bona. Mohlomongwe ba bangwe ba be ba ka fetoša tsela ya bona ya bophelo ge ba be ba ka newa mabaka a kwagalago a Mangwalo a go dira bjalo. Eupša bao ba tšwelago pele ba le go Babilona o Mogolo le bao ba tšwelago pele ba gana ditekanyetšo tša Beibele ba ka se phologe “masetlapelong a magolo.”—Kut. 7:14.

Tšwela Pele o Bolela o “sa Kgaotše”

8, 9. Bakriste ba lekgolong la pele la nywaga ba ile ba arabela bjang ge ba be ba lebeletšane le kganetšo, le gona ka baka la’ng?

⁸ Jesu o boletše gore barutiwa ba gagwe ba be ba tla bolela ditaba tše dibotse tša Mmušo le go dira barutiwa. (Mat. 28:19, 20) Ka baka leo, Bakriste ba therešo ba be ba dutše ba lebelela go tšea karolo modirong wa go bolela e le taba ya go botegela Modimo, gape e le senyakwa sa motheo sa tumelo ya bona. Ka go rialo, balatedi ba pele ba Jesu ba ile ba phegelela gaešita le ge ba be ba ganetšwa. Ba ile ba holofela gore Jehofa o be a tla ba nea matla, ba rapelela gore Jehofa a ba kgontšhe go tšwela pele ba “bolela lentšu la [gagwe] ka sebete ka moka.” Ge a arabela go seo, Jehofa o ile a ba tlatša ka moya o mokgethwa, gomme ba bolela lentšu la Modimo ka sebete.—Dit. 4:18, 29, 31.

⁹ Ge kganetšo e be e e-ba e šoro, na boikemišetšo bja balatedi ba Jesu bja go bolela ditaba tše dibotse bo ile bja fokotšega? Le gatee. Ba tennwe ke go dira boboledi ga baapostola, baetapele ba bodumedi ba Bajuda ba ile ba golega baapostola, ba ba tšhošetša le go ba itia. Lega go le bjalo, baapostola ba ile ba “tšwela pele ba sa kgaotše ba ruta e bile ba tsebatša ditaba tše dibotse ka Kriste, Jesu.” Ba be ba tloga ba kwešiša gore ba be ba swanetše  go “kwa Modimo e le mmuši go e-na le batho.”—Dit. 5:28, 29, 40-42.

10. Bakriste ba lebeletšana le diteko dife lehono, eupša mafelelo a boitshwaro bja bona bjo bobotse e ka ba afe?

¹⁰ Bontši bja bahlanka ba Modimo lehono ga se bja ka ba swanelwa ke go kgotlelela go itiwa goba go golegwa ka baka la mediro e sepedišanago le boboledi. Lega go le bjalo, Bakriste ka moka ba lebeletšana le diteko tše di fapa-fapanego. Ka mohlala, letswalo la gago leo le tlwaeditšwego ka Beibele le ka go šušumeletša go itshwara ka tsela e sa ratwego goba yeo e dirago gore o bonagale o le yo a fapanego. Bašomi-gotee le wena, bao o tsenago le bona sekolo, goba baagišani ba gago ba ka nagana gore o lejela-thoko ka gobane o thea diphetho tša gago melaong ya motheo ya Beibele. Lega go le bjalo, karabelo ya bona e sa kgahlišego ga se ya swanela go go fetša matla. Lefase le rapaletše lefsifsing la moya, eupša Bakriste ba swanetše go ‘bonega bjalo ka diediši.’ (Bafil. 2:15) Mohlomongwe babogedi ba bangwe ba botegago ba tla bona le go tšeela godimo mediro ya gago e mebotse gomme ba feleletša ka go nea Jehofa letago.—Bala Mateo 5:16.

11. (a) Ba bangwe ba ka arabela bjang modirong wa boboledi? (b) Moapostola Paulo o ile a lebeletšana le kganetšo ya mohuta mang, gomme o ile a arabela bjang?

¹¹ Go nyakega sebete gore re tšwele pele re bolela molaetša wa Mmušo. Batho ba bangwe, gaešita le ba leloko, ba ka go kwera goba ba leka go go nyamiša ka tsela e itšego. (Mat. 10:36) Moapostola Paulo o ile a itiwa ka makga a mmalwa ka ge a be a phetha bodiredi bja gagwe ka potego. Ela hloko kamoo a arabetšego ka gona kganetšong e bjalo: O ngwadile gore, ‘E itše ge re tlaišegile gomme re tlontlollotšwe, ra rapa sebete ka Modimo wa rena gore re bolele le lena ditaba tše dibotse tša Modimo ka go katana mo gogolo.’ (1 Bathes. 2:2) Ka ntle le pelaelo, e be e le tlhohlo go Paulo go tšwela pele a bolela ditaba tše dibotse ka morago ga ge a ile a swarwa, a hlobodišwa, a itiwa ka dikgati le go lahlelwa kgolegong. (Dit. 16:19-24) Ke’ng seo se ilego sa mo fa sebete sa go tšwela pele? Ke kganyogo ya gagwe e kgolo ya go phetha taelo yeo a e filwego ke Modimo ya go dira boboledi.—1 Bakor. 9:16.

12, 13. Ke ditlhohlo dife tšeo ba bangwe ba lebeletšanago le tšona, gomme ba lekile bjang go di fenya?

¹² Le gona e ka ba tlhohlo go dula re e-na le phišego tšhemong yeo go yona batho ba bago ka gae ka sewelo goba moo e lego batho ba sego kae bao ba arabelago molaetšeng wa Mmušo. Re ka dira’ng maemong a bjalo? Re ka hwetša e le mo go nyakegago go rapa sebete ka mo go oketšegilego gore re bolele le batho maemong a sa rulaganyetšwago. Le gona, mo gongwe re ka swanelwa ke go beakanya thulaganyo ya rena goba go lebiša maiteko a rena go direng boboledi mafelong ao go ona re ka kopanago le batho ba bantši.—Bapiša le Johane 4:7-15; Ditiro 16:13; 17:17.

¹³ Mathata a mangwe ao ba bantši ba swanetšego go katana le ona ke botšofadi le go se phele gabotse mmeleng, e lego seo se ka lekanyetšago seo ba ka kgonago go se fihlelela modirong wa boboledi. Ge e ba boemo bja gago bo le bjalo, o se ke wa nyama. Jehofa o tseba mafokodi a gago gomme o thabela seo o kgonago go se dira. (Bala 2 Bakorinthe 8:12.) Go sa šetšwe mohuta wa bothata bjoo o lebeletšanego le bjona—kganetšo, go se elwe hloko, goba go se phele gabotse mmeleng—dira sohle seo maemo a gago a go dumelelago go se dira mabapi le go boledišana le ba bangwe ka ditaba tše dibotse.—Die. 3:27; bapiša le Mareka 12:41-44.

‘Dula o Hlokometše Bodiredi bja Gago’

14. Ke mohlala ofe woo moapostola Paulo a o beetšego Bakriste-gotee le yena, gomme ke keletšo efe yeo a e neilego?

¹⁴ Moapostola Paulo o be a tšeela bodiredi bja gagwe godimo kudu, gomme o ile a kgothaletša badumedi-gotee le yena go dira se se swanago. (Dit. 20:20, 21; 1 Bakor. 11:1) Motho yo mongwe yoo Paulo a ilego a mo kgothatša ka mo go kgethegilego ke Mokriste wa lekgolong la pele la nywaga yo a bitšwago Aragipa. Paulo o ngwadile lengwalong la gagwe le le yago go Bakolose, gore: “Botšang Aragipa le re: ‘Dula o hlokometše bodiredi bjo o bo amogetšego Moreneng, gore o bo phethagatše.’” (Bakol. 4:17) Ga re tsebe gore Aragipa e be e le mang goba gore maemo a gagwe e be e le afe, eupša go bonala a ile a amogela bodiredi. Ge e ba o le Mokriste yoo a ineetšego,  le wena o amogetše bodiredi. Na o tšwela pele o hlokometše bodiredi bjoo gore o bo phethagatše?

15. Boineelo bja Bokriste bo akaretša’ng, gomme se se rotoša dipotšišo dife?

¹⁵ Pele re kolobetšwa, re ile ra neela maphelo a rena go Jehofa ka thapelo e tšwago pelong. Se se be se bolela gore re be re ikemišeditše go dira thato ya gagwe. Ka gona re dira gabotse ge ga bjale re ipotšiša gore, ‘Na ruri go phetha thato ya Modimo ke selo se bohlokwa kudu bophelong bja-ka?’ Re ka ba re e-na le maikarabelo a fapa-fapanego ao Jehofa a letetšego gore re a phethe—a bjalo ka go hlokomela malapa a rena. (1 Tim. 5:8) Eupša re diriša nako e nngwe ya rena le matla a rena bjang? Ke’ng seo se tlago pele maphelong a rena?—Bala 2 Bakorinthe 5:14, 15.

16, 17. Ke dibaka dife tšeo bafsa ba Bakriste goba bao ba nago le boikarabelo bjo bonyenyane ba swanetšego go nagana ka tšona?

¹⁶ Na o mofsa yo a ineetšego wa Mokriste yoo a feditšego sekolo goba yo a lego kgaufsi le go se fetša? Go bonala o se wa hlwa o e-ba le maikarabelo a magolo a lapa. Ka gona, o ikemišeditše go dira’ng ka bophelo bja gago? Ke diphetho dife tšeo di tla go kgontšhago go phetha kholofetšo ya gago ya go dira thato ya Jehofa ka tsela e kaone? Ba bantši ba beakantše maemo a bona e le gore ba bule madibogo gomme ba feleleditše ba hweditše lethabo le kgotsofalo.—Ps. 110:3; Mmo. 12:1.

¹⁷ Mohlomongwe o mofsa yo a tšwilego mahlalagading. O na le mošomo wa boiphedišo wa nako e tletšego eupša ga o na maikarabelo a mantši ge e se go itlhokomela. Ga go pelaelo gore o thabela go tšea karolo medirong ya phuthego go fihla bokgoleng bjoo maemo a gago a go dumelelago. Na mohlomongwe o ka oketša lethabo leo? Na o ile wa nagana ka go katološa bodiredi bja gago? (Ps. 34:8; Die. 10:22) Mafelong a mangwe, go sa na le modiro o montši wo o swanetšego go dirwa gore go fihlelelwe batho ka moka ka molaetša o phološago maphelo wa therešo. Na o ka dira diphetogo bophelong bja gago, e le gore mohlomongwe o hlankele moo go nyakegago bagoeledi ba bantši ba Mmušo?—Bala 1 Timotheo 6:6-8.

18. Banyalani ba bangwe ba bafsa ba ile ba dira diphetogo dife, gomme mafelelo e bile afe?

¹⁸ Ela hloko mohlala wa Kevin le Elena, ba kua United States. * Ba ile ba nagana gore ba be ba swanetše go reka ntlo, ka ge se e be e le se se tlwaelegilego go bafsa ba sa tšwago go nyalana ba lefelong la gabo bona. Bobedi bja bona ba be ba šoma ka nako e tletšego e bile ba ka kgona go phela  bophelo bja boiketlo. Lega go le bjalo, mešomo ya bona le mediro ya bona ya ka gae e be e ba fa nako e nyenyane ya tirelo ya tšhemo. Ba ile ba lemoga gore ba be ba diriša nako ya bona e ntši kudu le matla dilong tšeo ba nago le tšona. Lega go le bjalo, ge ba be ba lemoga gore banyalani ba itšego ba babulamadibogo ba be ba phela bophelo bjo bonolo, Kevin le Elena ba ile ba dira phetho ya go fetoša seo se tlago pele maphelong a bona. Ka morago ga go tsoma tlhahlo ya Jehofa ka thapelo, ba ile ba rekiša ntlo ya bona gomme ba hudugela foleteng. Elena o ile a fokotša diiri tšeo a bego a di fetša mošomong wa gagwe wa boiphedišo gomme a ba mmulamadibogo. A kgothaditšwe ke diphihlelo tšeo mosadi wa gagwe a bego a e-ba le tšona, Kevin o ile a tlogela mošomo wa gagwe wa nako e tletšego gomme a thoma go bula madibogo. Lebakeng le lengwe ka morago, ba ile ba hudugela nageng e lego Amerika Borwa go yo hlankela moo go nyakegago bagoeledi ba bantši ba Mmušo. Kevin o re: “Re be re dutše re thabile lenyalong la rena, eupša ge re be re phegelela dipakane tša moya, re ile ra thaba le go feta.”—Bala Mateo 6:19-22.

19, 20. Ke ka baka la’ng boboledi bja ditaba tše dibotse e le modiro o bohlokwa kudu lehono?

¹⁹ Boboledi bja ditaba tše dibotse ke modiro o bohlokwa kudu woo o dirwago lefaseng lehono. (Kut. 14:6, 7) O kgatha tema go kgethagatšweng ga leina la Jehofa. (Mat. 6:9) Molaetša wa Beibele o kaonefatša maphelo a batho ba dikete tše dintši bao ba o amogelago ngwaga le ngwaga, gomme se se ka ba phološa. Lega go le bjalo, moapostola Paulo o ile a botšiša ka gore: “Ba tla kwa bjang ge go se yo a bolelago?” (Baroma 10:14, 15) Ba tla kwa bjang ruri? Na o ka ikemišetša go dira sohle seo o ka se kgonago go phetha bodiredi bja gago?

²⁰ Tsela e nngwe yeo o ka thušago batho ka yona go kwešiša bohlokwa bja dinako tše tše di hlobaetšago le bja diphetho tšeo ba di dirago ke ka go kaonefatša bokgoni bja gago bja go ruta. Sehlogo se se latelago se tla ahla-ahla kamoo o ka dirago se ka gona.

[Mongwalo wa tlase]

O be o tla Araba Bjang?

• Bakriste ba na le boikarabelo bofe malebana le batho?

• Re swanetše go lebeletšana bjang le mapheko modirong wa rena wa boboledi?

• Re ka phethagatša bjang boboledi bjoo re bo amogetšego?

[Dipotšišo tša Thuto]

[Seswantšho go letlakala 5]

Go nyakega sebete gore o dire boboledi le ge o ganetšwa

[Seswantšho go letlakala 7]

Ke eng seo o ka se dirago ge o dira boboledi mafelong ao batho ba hwetšwago ka gae ka sewelo?