Ge Bakriste ba Feferwa Bjalo ka Korong

PEJANA ga lehu la gagwe, Jesu o ile a lemoša barutiwa ba gagwe gore: “Bona! Sathane o le kganyogile gore a le fefere bjalo ka korong.” (Luka 22:31) O be a e-ra go re’ng ka mantšu ao?

Mehleng ya Jesu, go buna korong go be go nyaka nako e ntši le maiteko. Sa pele, babuni ba be ba e-kga le go kgoboketša mahlaka a korong. Ke moka, ba be ba fola mahlaka ao seboeng goba ba diriša dipholo go goga selei sa go fola mahlaka ao bakeng sa go a pšhatlaganya. Mogato wo o be o dira gore dithoro tša korong di tlogelane le mahlaka ao gotee le ditlhoko. Se se latelago, balemi ba be ba fefera motswako woo. Dithoro, goba dipeu ka moka tša mabele, di be di wela seboeng, ge moya o feta le mooko. Sa mafelelo, dithoro di be di feferwa ka kelohloko bakeng sa go tloša selo le ge e le sefe seo se sa nyakegego go tšona.

Go etša ge Jesu a boletše, Sathane o ile a dula a hlasela barutiwa ba Jesu mehleng yeo, gomme o a re hlasela le lehono. (Baef. 6:11) Ke therešo gore ga se mathata ka moka ao re lebeletšanago le ona bophelong ao a bakwago ke Sathane ka go lebanya. (Mmo. 9:11) Lega go le bjalo, Sathane o katanela go diriša selo le ge e le sefe seo a ka kgonago go se diriša gore a robe potego ya rena. Ka mohlala, a ka leka go re dira gore re phele bophelo bja go rata dilo tše di bonagalago, re kgethe boithabišo bjo bo gobatšago, goba go itshwara ka tsela e gobogilego ya tša botona le botshadi. A ka diriša le bao re tsenago le bona sekolo goba bao re šomago le bona gotee le ba leloko bao ba sa dumelego go re gateletša gore re phegelele ka mo go feletšego tšohle tšeo lefase le ka re neago tšona mabapi le thuto goba mešomo. Go oketša moo, Sathane a ka diriša tlaišo e lebanyago e le ge a leka go roba potego ya rena go Modimo. Ee, go na le ditsela tše dintši tšeo Sathane a di dirišago gore a re fefere ka tsela ya seswantšhetšo.

Re ka emeletšana bjang le lenaba le le matla? Re ka se dire bjalo ka matla a rena ka noši. Sathane o re feta ka matla; lega go le bjalo, re a tseba gore Jehofa o na le matla a sa lekanywego go feta Sathane. Ge e ba re bota Jehofa ka mo go feletšego, re mo rapela ka go tšwa pelong gore a re fe bohlale le sebete sa go kgotlelela, gotee le go ithekga ka mo go feletšego ka tlhahlo ya gagwe, o tla re nea matla a go ganetša ditlhaselo tša Sathane.—Ps. 25:4, 5.

Ge re lekwa, re swanetše go ba le bokgoni bja go ‘kgethologanya se se nepagetšego le se se fošagetšego’ gomme ka go rialo re pheme go arošwa ke makatika a Sathane. (Baheb. 5:13, 14) Jehofa a ka re thuša go hlagolela bokgoni bjoo. Ka go rialo re swanetše go kgomarela tsela e nepagetšego, go sa šetšwe seo se ka diregago. Ge re latela tlhahlo ya Jehofa, o tla thekga ka mo go feletšego boikemišetšo bja rena bjo sebete bja go dira seo se nepagetšego.—Baef. 6:10.

Sathane a ka leka go re fefera bjalo ka korong. Eupša ka matla a tšwago go Jehofa, re ka emeletšana le yena, re tiile tumelong. (1 Pet. 5:9) Ee, Lentšu la Jehofa le re nea kgonthišetšo e rego: “Le ganetše Diabolo, o tla le tšhaba.”—Jak. 4:7.