Dintlha tše Kgolo go tšwa Pukung ya Mareka
Lentšu la Jehofa le a Phela
Dintlha tše Kgolo go tšwa Pukung ya Mareka
EBANGEDI ya Mareka ke e nyenyane go Diebangedi tše nne. E ngwadilwe ke Johane Mareka nywaga e ka bago e 30 ka morago ga lehu la Jesu le tsogo ya gagwe, gomme ke pego e laodišago dilo ka go akgofa le e tletšego ditiragalo ya bodiredi bja Jesu bja nywaga e meraro le seripa.
Ka ge go bonagala e ngwaletšwe batho ba e sego Bajuda, kudu-kudu Baroma, puku ya Mareka e hlalosa Jesu e le Morwa yo a dirago mehlolo wa Modimo yoo a lego lesolong le mafolofolo la bodiredi. Go gatelelwa seo Jesu a bego a se dira e sego seo a bego a se bolela. Go ela hloko Ebangedi ya Mareka go tla matlafatša tumelo ya rena go Mesia le go re šušumeletša go ba bagoeledi ba mafolofolo ba molaetša wa Modimo bodireding bja Bokriste.—Baheb. 4:12.
BODIREDI BJO BOGOLO GALILEA
Ka morago ga go bolela ka modiro wa Johane Mokolobetši le matšatši a 40 a Jesu lešokeng ditemaneng tše 14 feela, Mareka o thoma go bolela ka pego e kgahlišago ya bodiredi bja Jesu bja Galilea. Go dirišwa leboelela ga polelwana e rego “gatee-tee” go dira gore pego ye e be e akgofilego kudu.—Mar. 1:10, 12.
Ka nywaga ya ka tlase ga e meraro, Jesu o phetha masolo a mararo a bodiredi kua Galilea. Mareka o bega bogolo bja pego yeo go ya ka tatelano ya mabaka. Thuto ya Thabeng e tlogetšwe, go swana le ge go tlogetšwe dipolelo tše dintši tša Jesu tše ditelele.
Dipotšišo tša Mangwalo di a Arabja:
1:15—Ke “nako e beilwego” ya eng yeo e phethegilego? Jesu o be a bolela gore nako e beilwego e be e phethegile ya gore a thome bodiredi bja gagwe. Ka ge a be a le gona bjalo ka Kgoši e Kgethilwego, Mmušo wa Modimo o be o le kgaufsi. Ka gona batho ba dipelo tše di lokilego ba be ba ka arabela modirong wa gagwe wa boboledi le go gata megato yeo e bego e tla dira gore ba amogelwe ke Modimo.
1:44; 3:12; 7:36—Ke ka baka la’ng Jesu a be a sa nyake gore go bolelwe ka mehlolo ya gagwe? Go e na le go dira gore batho ba fihlelele diphetho tšeo di theilwego dipegong tšeo di dirwago ka maikwelo goba tšeo di ka bago di kgopame, Jesu o be a nyaka gore ba bone ka bobona gore e be e le yena Kriste le gore ba dire phetho e theilwego bohlatseng bjoo. (Jes. 42:1-4; Mat. 8:4; 9:30; 12:15-21; 16:20; Luka 5:14) Yo a sa kago a botšwa seo ke monna yoo a kilego a laolwa ke batemona wa nageng ya Bagerasa. Jesu o ile a mmotša gore a ye gae gomme a botše ba leloko seo se diregilego. Jesu o ile a kgopelwa gore a tloge lefelong leo, e le gore a se ke a bonana le batho ba moo gakaalo goba a se ke a ba bona ka mo go feletšego. Bohlatse bja monna yo Jesu a mo diretšego botse le go ba gona ga gagwe di be di tla lwantšha dipolelo tše sa kgahlišego tša mabapi le go hwa ga dikolobe.—Mar. 5:1-20; Luka 8:26-39.
2:28—Ke ka baka la’ng Jesu a bitšwa “Morena gaešita le wa sabatha”? Moapostola Paulo o ngwadile gore: “Molao o [na] le moriti wa dilo tše dibotse tše di tlago go tla.” (Baheb. 10:1) Ka ge Molao o be o bolela, Sabatha e be e e-tla ka morago ga matšatši a tshelelago a mošomo, gomme Jesu o ile a dira diphodišo tša gagwe tše dintši ka letšatši leo. Se se bontšhitše e sa le pele go khutša mo go nago le khutšo le ditšhegofatšo tše dingwe tšeo batho ba tlago go di hwetša ka tlase ga Pušo ya Nywaga e Sekete ya Kriste ka morago ga phedišo ya pušo ya Sathane ya bogateledi. Ka go rialo, Kgoši ya Mmušo woo gape ke “Morena wa sabatha.”—Mat. 12:8; Luka 6:5.
3:5; 7:34; 8:12—Mareka o tsebile bjang ditaba ka botlalo mabapi le maikwelo a Jesu? Mareka e be e se yo mongwe wa baapostola ba 12 e bile e be e se mogwera wa Jesu wa kgaufsi. Mabarebare a bogologolo a re mogwera wa kgaufsi wa Mareka, e lego moapostola Petro, e be e le yena mothopo wa bontši bja tsebišo ya Mareka.—1 Pet. 5:13.
6:51, 52—Ke’ng “seo se bego se bolelwa ke dinkgwa” tšeo barutiwa ba bego ba palelwa ke go di kwešiša? Diiri tše sego kae feela pejana, Jesu o be a fepile banna ba 5 000 ka dinkgwa tše hlano le dihlapi tše pedi feela go sa balwe basadi le bana. “Seo se bego se bolelwa ke dinkgwa” tšeo barutiwa ba bego ba swanetše go di kwešiša tiragalong yeo e be e le gore Jehofa Modimo o be a neile Jesu matla a go dira mehlolo. (Mar. 6:41-44) Ge nkabe ba ile ba kwešiša bogolo bja matla ao Jesu a bego a a filwe, nkabe ba se ba ka ba makala kudu ge a be a sepela godimo ga meetse ka tsela ya mohlolo.
8:22-26—Ke ka baka la’ng Jesu a ile a diriša megato e mebedi go fodiša monna wa sefofu? Jesu a ka ba a dirile se ka go naganela monna yo. Go dira gore monna yo a bego a tlwaetše lefsifsi ka nako e telele a bone ganyenyane-ganyenyane go ka ba go ile gwa mo kgontšha go tlwaelana le go phadima ga seetša sa letšatši.
Seo re Ithutago Sona:
2:18; 7:11; 12:18; 13:3. Mareka o hlalosa metlwae, mantšu, ditumelo le mafelo ao babadi bao e sego Bajuda ba bego ba ka ba ba sa tlwaelana le ona. O bolela ka tsela e kwagalago gore Bafarisei “ba be ba tlwaetše go ikona dijo,” gore korobane ke “mpho e neetšwego Modimo,” gore Basadutsei ba re “ga go na tsogo,” le gore tempele e be e “lebane” le ‘Thaba ya Mehlware.’ Ka ge lešika labo Mesia le be le tla kgahla Bajuda kudu, o le tlogela ka mo go feletšego. Ka go rialo, Mareka o re beela mohlala. Re swanetše go ela hloko setlogo sa batheetši ba rena ge re tšea karolo bodireding bja Bokriste goba ge re nea dipolelo dibokeng tša phuthego.
3:21. Ba leloko labo Jesu e be e se badumedi. Lega go le bjalo, o be a e-na le kwelobohloko go bao ka baka la tumelo ya bona ba ganetšwago goba ba kwerwago ke ditho tša malapa a bo bona tše di sa dumelego.
3:31-35. Ge Jesu a kolobetšwa, o ile a ba Morwa wa Modimo wa moya gomme “Jerusalema ya godimo” ya ba mmagwe. (Bagal. 4:26) Go tloga ka nako yeo go ya pele, Jesu o ile a ba kgaufsi kudu le lapa labo la moya le go le rata kudu go feta ba leloko labo ba nama. Se se re ruta go etiša dikgahlego tša moya pele maphelong a rena.—Mat. 12:46-50; Luka 8:19-21.
8:32-34. Re swanetše go akgofela go lemoga le go gana botho le ge e le bofe bjo bo kgopamilego bjo bo bontšhwago ke ba bangwe. Molatedi wa Kriste o swanetše go ikemišetša go ‘itatola,’ ke gore, go ikgafa le go gana dikganyogo tša boithati le dipakane tša bjona. O swanetše go ikemišetša go “[tšea] kota ya gagwe ya tlhokofatšo”—go tlaišwa, ge e ba go nyakega, goba go hlomphollwa goba go hlomarwa goba gaešita le go bolawa ka baka la go ba Mokriste. Gomme o swanetše go ‘latela Jesu a sa kgaotše,’ a dira ka go dumelelana le tsela ya Gagwe ya bophelo. Tsela ya borutiwa e nyaka gore re hlagolele le go dula re e-na le moya wa boikgafo o swanago le wa Kriste Jesu.—Mat. 16:21-25; Luka 9:22, 23.
9:24. Ga se ra swanela go ba le dihlong tša go bolela ka tumelo ya rena goba go rapelela tumelo e oketšegilego.—Luka 17:5.
KGWEDI YA MAFELELO
Go ya mafelelong a 32 C.E., Jesu o tla “mellwaneng ya Judea ka mošola wa Jorodane,” gomme mašaba a tla go yena gape. (Mar. 10:1) Ka morago ga go dira boboledi moo, o ya Jerusalema.
Ka Nisani 8, Jesu o Bethania. O dijong ge mosadi a tsena gomme a tšhela makhura a nkgago bose hlogong ya gagwe. Ditiragalo tša go tloga ge Jesu a tsena Jerusalema ka tsela ya phenyo go fihla go tša tsogo ya gagwe di begwa go ya ka tatelano ya mabaka.
Dipotšišo tša Mangwalo di a Arabja:
10:17, 18—Ke ka baka la’ng Jesu a ile a phošolla monna yo mongwe ge a be a Mmitša “Morutiši yo Botse”? Ka go gana go amogela sereto se sa tumišo, Jesu o ile a iša letago go Jehofa gomme a bontšha gore Modimo wa therešo ke mothopo wa dilo tšohle tše dibotse. Go oketša moo, Jesu o ile a lebiša tlhokomelo therešong ya motheo ya gore Mmopi wa dilo tšohle, Jehofa Modimo, ke yena feela yo a nago le tshwanelo ya go bea ditekanyetšo tša se se lokilego le se se fošagetšego.—Mat. 19:16, 17; Luka 18:18, 19.
14:25—Jesu o be a e-ra gore’ng ge a be a botša baapostola ba gagwe ba botegago gore: “Nka se sa hlwa ke e-nwa setšweletšwa sa morara gape go ba go fihla letšatšing leo ge ke se nwa e le se sefsa mmušong wa Modimo”? Jesu o be a sa re gore go na le beine ya kgonthe legodimong. Lega go le bjalo, ka ge lethabo ka dinako tše dingwe le swantšhetšwa ke beine, Jesu o be a bolela ka lethabo la go ba gotee Mmušong le balatedi ba gagwe ba tloditšwego ba tsošitšwego.—Ps. 104:15; Mat. 26:29.
14:51, 52—Lesogana leo le ‘tšhabago le hlobotše’ e be e le mang? Ke Mareka feela yo a bolelago ka tiragalo ye, ka gona ke mo go kwagalago go ka phetha ka gore o be a bolela ka yena ka noši.
15:34—Na mantšu a Jesu a rego “Modimo wa-ka, Modimo wa-ka, o ntlogeletše’ng?” a bontšha gore o be a hloka tumelo? Aowa. Gaešita le ge re ka se kgonthišege ka maikemišetšo a Jesu a go bolela se, mantšu a gagwe a ka bontšha gore Jesu o be a lemoga gore Jehofa o tlošitše tšhireletšo ya Gagwe e le gore potego ya Morwa wa Gagwe e ka lekwa ka mo go feletšego. Gape go na le kgonagalo ya gore Jesu o boletše mantšu a e le go phethagatša seo Psalme 22:1 e se boletšego e sa le pele mabapi le yena.—Mat. 27:46.
Seo re Ithutago Sona:
10:6-9. Morero wa Modimo ke gore banyalani ba kgomarelane. Ka baka leo, go e-na le go kitimela go hlalana, banna le basadi ba swanetše go katanela go diriša melao ya motheo ya Beibele bakeng sa go fenya mathata le ge e le afe ao a ka tsogago lenyalong.—Mat. 19:4-6.
12:41-44. Mohlala wa mohlologadi wa modiidi o re ruta gore re swanetše go hloka boithati ge re thekga borapedi bja therešo.
[Seswantšho go letlakala 29]
Ke ka baka la’ng Jesu a ile a botša monna yo gore a begele ba leloko la gabo seo se mo diragaletšego?