Dula o Beile Jehofa Pele ga Gago
Dula o Beile Jehofa Pele ga Gago
“Ke dula kè itebanya le Morêna.”—PS. 16:8.
1. Dipego tša Beibele di ka re kgoma bjang?
LENTŠU la Jehofa le le ngwadilwego le hupere pego e kgahlišago kudu ya ditirišano tša Modimo le batho. Le bolela ka batho ba bantši bao ba ilego ba kgatha tema go phethagatšweng ga morero wa Modimo. Ke therešo gore mantšu a bona le ditiro ga e fo ba dikanegelo feela tšeo di begilwego ka Beibeleng bakeng sa go re thabiša. Go e na le moo, dipego tše bjalo di ka re batametša kgaufsi kudu le Modimo.—Jak. 4:8.
2, 3. Re swanetše go kwešiša mantšu a Psalme 16:8 bjang?
2 Ka moka ga rena re ka ithuta mo gontši diphihlelong tša baanegwa bao ba tsebjago kudu ba ka Beibeleng—Aborahama, Sara, Moše, Ruthe, Dafida, Esitere, moapostola Paulo le ba bangwe. Lega go le bjalo, dipego tša mabapi le batho bao ba sa tsebjego gakaalo le tšona di ka re hola. Go naganišiša ka dipego tša Beibele go ka re thuša go dira ka go dumelelana le mantšu a mopsalme a rego: “Ke dula kè itebanya le Morêna, ó hleng xa-ka, nka se kê ka šutha.” (Ps. 16:8) Re swanetše go kwešiša mantšu a bjang?
3 Lešole gantši le be le hwidinya tšhoša ya lona ka letsogo le letona, le tlogela lehlakore leo le se la šireletšwa ke kotse yeo le e swerego ka la ntsogošo. Lega go le bjalo, le be le šireletšega ge mogwera wa lona a e-lwa a le kgaufsi le lona ka go le letona. Ge e ba re dula re nagana ka Jehofa le go dira thato ya gagwe, o tla re šireletša. Ka gona anke re boneng kamoo go ela hloko dipego tša Beibele go ka matlafatšago tumelo ya rena ka gona e le gore re ‘bee Jehofa pele ga rena ka mehla.’—PK.
Jehofa o Araba Dithapelo tša Rena
4. Nea mohlala wa Mangwalo wa go bontšha gore Modimo o araba dithapelo.
4 Ge re bea Jehofa pele ga rena, o tla araba dithapelo tša rena. (Ps. 65:2; 66:19) Re na le bohlatse bja se tabeng ya mohlanka yo mogolo wa Aborahama, yoo mohlomongwe e bego e le Eliesere. Aborahama o ile a mo roma Mesopotamia go yo nyakela Isaka mosadi yo a boifago Modimo. Eliesere o ile a rapelela tlhahlo ya Modimo gomme o ile a bona e le yona ge Rebeka a be a noša dikamela tša gagwe meetse. Ka baka la go rapela ga gagwe go tšwa pelong, Eliesere o ile a hwetša yoo e ilego ya ba mosadi yo a rategago wa Isaka. (Gen. 24:12-14, 67) Ke therešo gore mohlanka wa Aborahama o be a le lesolong le le kgethegilego. Eupša na ga se ra swanela go kgodišega ka tsela e swanago gore Jehofa o kwa dithapelo tša rena?
5. Ke ka baka la’ng re ka re gaešita le thapelo e kopana ya setu go Jehofa e ka arabja?
5 Ka dinako tše dingwe, re ka swanelwa ke go rapelela thušo ya Modimo kapejana. Lebakeng le lengwe, Kgoši Arithasasitha wa Peresia o ile a lemoga gore motšheledi wa gagwe Nehemia o be a šulafetše. Kgoši e ile ya botšiša gore: “Byale O kxopêla’ng? [Nehemia a] rapêla Modimo wa lexodimo.” Nehemia o be a ka se telefatše thapelo yeo go bonagalago e be e le ya setu. Lega go le bjalo, Modimo o ile a e araba, ka gobane kgoši e ile ya thuša Nehemia go aga merako ya Jerusalema lefsa. (Bala Nehemia 2:1-8.) Ee, gaešita le thapelo e kopana ya setu e ka arabja.
6, 7. (a) Epafora o beile mohlala ofe mabapi le thapelo? (b) Ke ka baka la’ng re swanetše go rapelela ba bangwe?
6 Re kgothaletšwa gore re ‘rapelelane,’ gaešita le ge e se ka mehla mo re hwetšago bohlatse bja kapejana bja gore dithapelo tše bjalo di arabilwe. (Jak. 5:16) Epafora, “modiredi yo a botegago wa Kriste,” ka go tšwa pelong o ile a rapelela bao a tswalanago le bona tumelong. Ge a be a ngwala a le Roma, Paulo o itše: “Epafora, yo a tšwago go lena [Bakolose], mohlanka wa Kriste Jesu, o a le dumediša, o katana ka mehla ka baka la lena dithapelong tša gagwe, gore mafelelong le eme le feletše le ka kgodišego e tiilego thatong yohle ya Modimo. Ka kgonthe ke a mo hlatsela gore o dira boiteko bjo bogolo bakeng sa lena le bakeng sa bao ba lego Laoditsea gotee le bao ba lego Hierapoli.”—Bakol. 1:7; 4:12, 13.
7 Kolose, Laoditsea le Hierapoli e be e le metse e lego lefelong letee la Asia Minor. Bakriste ba Hierapoli ba be ba le gare ga barapedi ba modimogadi Cybele, go be go apareditše moya wa go rata dilo tše di bonagalago kua Laoditsea, gomme Bakolose ba be ba le kotsing ya difilosofi tša batho. (Bakol. 2:8) Ga go makatše ge Epafora, yo a bego a e-tšwa Kolose, a ile ‘a katana dithapelong’ bakeng sa badumedi ba lego motseng woo! Beibele ga e hlalose kamoo dithapelo tša Epafora di ilego tša arabja ka gona, eupša ga se a ka a kgaotša go rapelela badumedi-gotee; le rena ga ra swanela go kgaotša. Gaešita le ge re se ‘bompheane ditabeng tša batho ba bangwe,’ mohlomongwe re tseba gore setho sa lapa goba mogwera o lebeletšane le teko e kgolo ya tumelo. (1 Pet. 4:15) E tla ba mo go swanetšego gakaakang go mo rapelela ka sephiring! Paulo o ile a thušwa ke ditopo tša ba bangwe, gomme dithapelo tša rena le tšona di ka dira botse kudu.—2 Bakor. 1:10, 11.
8. (a) Re tseba bjang gore bagolo ba tšwago Efeso ba be ba lebelela thapelo e le e bohlokwa? (b) Ke ka baka la’ng re swanetše go ba bjalo ka bagolo ba Bakriste ba tšwago Efeso?
8 Na ba bangwe ba re bona re le banna le basadi ba ratago thapelo? Ka morago ga ge Paulo a kopane le bagolo ba tšwago Efeso, o ile “a khunama le bona ka moka gomme a rapela.” Ke moka “gwa tsoga sello se segolo gare ga bona ka moka, gomme ba wela godimo ga molala wa Paulo ba mo atla ka borutho, gobane ba be ba kwešitšwe bohloko kudu ke lentšu leo a ilego a le bolela la gore ba be ba ka se sa hlwa ba bona sefahlego sa gagwe.” (Dit. 20:36-38) Ga re tsebe maina a bagolo bao ka moka, eupša go molaleng gore ba be ba lebelela thapelo e le e bohlokwa. Ruri re swanetše go tšeela godimo tokelo ya go rapela Modimo gomme re “emiše diatla tše botegago” ka tumelo ya gore Tatago rena wa legodimong o tla re araba.—1 Tim. 2:8.
E-kwa Modimo ka mo go Feletšego
9, 10. (a) Barwedi ba Tselofagadi ba beile mohlala ofe? (b) Go kwa ga barwedi ba Tselofagadi go ka kgoma bjang pono ya Mokriste yo a sego lenyalong ka lenyalo?
9 Go dula re nagana ka Jehofa go tla re thuša go mo kwa, gomme mafelelong re tla hwetša ditšhegofatšo. (Doit. 28:13; 1 Sam. 15:22) Se se nyaka moya wa go kwa. Ela hloko boemo bja kgopolo bja bana ba motho ba bahlano, e lego barwedi ba Tselofagadi, bao ba phetšego mehleng ya Moše. Go Baisiraele, barwa ka tlwaelo ba be ba hwetša bohwa go bo-tatago bona. Monna yo a bitšwago Tselofagadi o hwile a se na barwa, gomme Jehofa o ile a nea tlhahlo ya gore basadi ba ba bahlano ba swanetše go hwetša bohwa ka moka—go ithekgile ka selo setee feela. Ba be ba swanetše go nyalana le barwa ba Manase e le gore bohwa bjoo bo dule bo le molokong o tee.—Num. 27:1-8; 36:6-8.
10 Barwedi ba Tselofagadi ba be ba e-na le tumelo ya gore dilo di be di tla sepela gabotse ge ba be ba ka kwa Modimo. Beibele e re: “Barwedi Ba Tselofaxadi ba dirile byalo ka xe Morêna a laetše Mošê. Ka xobane Mahla, le Thiritsa, le Hoxola, le Milika, le Noa, barwedi bá ba Tselofaxadi ba tšerwe ke barwa ba bô-ra-ngwan’a bôná. Ba tšerwe ke moloko wa Ba-Manase morwa wa Josefa; xomme naxa ya bôná ya dula è le ya leloko la xabô’.” (Num. 36:10-12) Basadi bao ba ba kwago ba dirile seo Jehofa a se laetšego. (Još. 17:3, 4) Ka tumelo e swanago, Bakriste ba sego lenyalong bao ba nago le tsebo dilong tša moya ba kwa Modimo ka go nyala goba go nyalwa “feela Moreneng.”—1 Bakor. 7:39.
11, 12. Kalebe o bontšhitše bjang gore o be a bota Modimo?
11 Re swanetše go kwa Jehofa ka mo go feletšego, bjalo ka Kalebe wa Moisiraele. (Doit. 1:36) Ka morago ga go hlakodišwa ga Baisiraele Egipita lekgolong la bo-16 la nywaga B.C.E., Moše o ile a roma banna ba 12 go yo hlola Kanana, eupša ke dihlodi tše 2 feela—Kalebe le Jošua—tšeo di kgothaleditšego batho go bota Modimo ka mo go feletšego le go tsena nageng. (Num. 14:6-9) Mo e ka bago nywaga-some e mene ka morago, Jošua le Kalebe ba be ba sa phela gomme ba latela Jehofa ka botlalo, e bile Modimo o dirišitše Jošua go eta Baisiraele pele le go ba tsenya Nageng ya Kholofetšo. Lega go le bjalo, go molaleng gore dihlodi tše lesome tše se nago tumelo di ile tša hwa nakong ya nywaga e 40 ya ge Baisiraele ba ralala lešokeng.—Num. 14:31-34.
12 Bjalo ka motšofadi yo a phologilego go ralala ga Baisiraele lešokeng, Kalebe o be a ka ema pele ga Jošua gomme a re: “Nna [ke latetše] Morêna ka botlálô.” (Bala Jošua 14:6-9) Kalebe wa nywaga e 85 o ile a kgopela gore a fiwe tikologo ya dithaba yeo Modimo a mo holofeditšego yona, gaešita le ge e be e dulwa ke manaba metseng ya ona e megolo e tiilego.—Još. 14:10-15.
13. Go sa šetšwe mathata a rena, re tla šegofatšwa ge e ba re dira’ng?
13 Bjalo ka ge a dirile go Kalebe yo a botegago le yo a kwago, Modimo o tla re thekga ge e ba re ‘latela Jehofa ka botlalo.’ Ge e ba re lebeletšana le mathata a magolo, re tla šegofatšwa ge re dutše re ‘latela Jehofa ka botlalo.’ Eupša go dira bjalo bophelo ka moka, go swana le ge Kalebe a dirile, e ka ba tlhohlo. Gaešita le ge Kgoši Solomone a bile le mathomo a mabotse, basadi ba gagwe ba dirile gore pelo ya gagwe e nyake go hlankela medimo ya maaka botšofading bja gagwe, gomme “a se kê a latêla Morêna ka mokxwa o tletšexo byalo ka Dafida tat’axwe.” (1 Dikx. 11:4-6) Go sa šetšwe mathata ao re swanetšego ke go lebeletšana le ona, anke re duleng re e-kwa Modimo ka mo go feletšego gomme re dule re mmeile pele ga rena.
Dula o Bota Jehofa
14, 15. O ithutile’ng mabapi le go nyakega ga go bota Modimo go tšwa phihlelong ya Naomi?
14 Re swanetše go bota Modimo kudu-kudu ge re gateletšegile ka baka la gore bokamoso bja rena bo bonagala bo sa holofetše. Ela hloko Naomi yo a tšofetšego, yoo a lahlegetšwego ke monna wa gagwe le barwa ba gagwe ba babedi ka lenaba lehu. Ge a be a boela Juda a e-tšwa Moaba, o llile ka gore: “Lesang xo mpitša ka la Naomi [“Lethabo La-ka,” mongwalo wa tlase wa NW.]; a nke Le re Mara [“Kgalako,” mongwalo wa tlase wa NW.], ka xobane Yo-matla-ka-moka ó ntirile tše di xalakaxo ruri. Ke tloxile kè humile; byale Morêna ó mpušetša xaê kè le fêla. Le re’ng Lé sa mpitša ka la Naomi kè lahlilwe ke Morêna, kè hlokofaditšwe ke Yo-matla-ka-moka?”—Ruthe 1:20, 21.
15 Gaešita le ge Naomi a be a gateletšegile, go bala puku ya Ruthe ka kelohloko go bontšha gore o be a dula a bota Jehofa. Le gona dilo ruri di ile tša mo fetogela! Ngwetši ya Naomi ya mohlologadi e lego Ruthe o ile a ba mosadi wa Boase gomme a belega morwa. Naomi o ile a ba moledi wa ngwana yoo, gomme pego e re: “Basadi ba ba bexo ba axišane naê’ ba mo rêa leina, ba re: Naomi ó belexetšwe ngwana wa mošemanyana; ba mmitša ka la Obede. Ké yêna tata xo Isai, e lexo tata xo Dafida.” (Ruthe 4:14-17) Ge Naomi a tsošetšwa go phela mo lefaseng, o tla kwa gore Ruthe, yoo le yena a tla bego a le gona, o ile a ba makgolokhukhu wa Jesu, yena Mesia. (Mat. 1:5, 6, 16) Go swana le Naomi, re ka se tsebe kamoo maemo a sa holofetšego a ka feleletšago ka gona. Ka go rialo, anke re duleng re bota Modimo, bjalo ka ge re eletšwa go Diema 3:5, 6 e rego: “Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.”
Ithekge ka Moya o Mokgethwa
16. Moya wa Modimo o ile wa thuša bjang banna ba itšego ba bagolo Isiraeleng ya bogologolo?
16 Ge re dula re beile Jehofa pele ga rena, o tla re hlahla ka moya wa gagwe o mokgethwa. (Bagal. 5:16-18) Moya wa Modimo o be o le go banna ba 70 ba bagolo bao ba bego ba kgethetšwe go thuša Moše gore ba mo “rwadišê boima bya sethšaba” sa Isiraele. Ke Elidada le Medada feela bao ba bolelwago ka maina, eupša moya o ile wa ba kgontšha ka moka ga bona go phetha mediro ya bona. (Num. 11:13-29) Ka ntle le pelaelo, ba be ba e-na le bokgoni, ba boifa Modimo, ba ka botwa e bile ba botega go swana le bao ba kgethilwego pejana. (Ek. 18:21) Dika tše bjalo di bonagatšwa ke bagolo ba Bakriste lehono.
17. Moya wa Jehofa o mokgethwa o kgathile tema efe ge go be go agwa tabarenakele?
17 Moya wa Jehofa o mokgethwa o kgathile tema e bohlokwa ge go be go agwa tabarenakele lešokeng. Jehofa o kgethile Betsaliele go ba setsebi se segolo sa mediro le moagi wa tabarenakele, a holofetša go “mo humiša môya wa Modimo, le bohlale, le thlaoloxanyô, le tsebô, le xo kxôna medirô ya mehuta-huta.” (Ek. 31:3-5) Banna ba ‘dipelo tše di hlalefilego’ ba šomile le Betsaliele gotee le modirišani wa gagwe Oholiaba bakeng sa go phetha kabelo yeo ye e kgahlišago. Go oketša moo, moya wa Jehofa o ile wa tutueletša batho ba dipelo tše ithapago go ntšha meneelo ka seatla se se bulegilego. (Ek. 31:6; 35:5, 30-34) Moya wona woo o šušumeletša bahlanka ba Modimo ba mehleng yeno go dira sohle seo ba ka se kgonago go tšwetša pele dikgahlego tša Mmušo. (Mat. 6:33) Re ka ba re e-na le bokgoni bjo itšego, eupša re swanetše go rapelela moya o mokgethwa gomme re o dumelele go re hlahla gore re phethe modiro woo Jehofa a o filego batho ba gagwe mo mehleng ya rena.—Luka 11:13.
Dula o Hlompha Jehofa wa Madira
18, 19. (a) Moya o mokgethwa wa Modimo o tšweletša boemo bofe bja kgopolo ka go rena? (b) O ithutile’ng mohlaleng wa Simeone le wa Anna?
18 Moya o mokgethwa o dira gore re be le tlhompho ya borapedi yeo e dirago gore re dule re beile Jehofa pele ga rena. Batho ba Modimo ba mehleng ya bogologolo ba ile ba botšwa gore: “Jehofa wa Madira le swanetše go mo hlompha bjalo ka yo mokgethwa.” (Jes. 8:13, Byington) Batšofadi ba babedi ba nago le tlhompho ya borapedi ba lekgolong la pele la nywaga ba kua Jerusalema e be e le Simeone le Anna. (Bala Luka 2:25-38.) Simeone o be a e-na le tumelo boporofeteng bja mabapi le Mesia le gona o be a “letetše khomotšo ya Isiraele.” Modimo o ile a tšhollela Simeone moya o mokgethwa gomme a mo kgonthišetša gore o be a tla phela go fihla a bona Mesia. Gomme seo se ile sa direga. Letšatšing le lengwe ngwageng wa 2 B.C.E., Jesu o ile a tlišwa tempeleng ke Maria le Josefa, mmago lesea le tatago lona yo e sego wa madi. A tutueletšwa ke moya o mokgethwa, Simeone o ile a bolela mantšu a boporofeta a mabapi le Mesia gomme a bolela e sa le pele ka manyami a Maria, yo a ilego a nyama ge Jesu a be a kokotelwa koteng ya tlhokofatšo. Eupša akanya ka lethabo le legolo leo Simeone a bilego le lona ge a be a kuka “Kriste wa Jehofa”! Le gona, Simeone o beetše bahlanka ba Modimo ba lehono mohlala o mobotse gakaakang wa tlhompho ya borapedi!
19 Mohlologadi wa nywaga e 84 yo a nago le tlhompho ya borapedi e lego Anna o be “a sa ke a hlokwa tempeleng.” O diretše Jehofa tirelo e kgethwa bošego le mosegare “ka go ikona dijo le go lopa.” Anna le yena o be a le gona ge Jesu wa lesea a be a tlišwa tempeleng. O ile a leboga e le ruri go bona Mesia wa nakong e tlago! Ee, o ile “a thoma go leboga Modimo le go bolela ka ngwana go bohle bao ba bego ba letetše tlhakodišo ya Jerusalema.” Anna ruri o ile a ikwa a gapeletšega go botša batho ba bangwe ditaba tše tše dibotse! Go swana le Simeone le Anna, Bakriste ba tšofetšego lehono ba thabišwa kudu ke gore go sa šetšwe gore batho ke ba bagolo gakaakang ba ka hlankela Jehofa e le Dihlatse tša gagwe.
20. Go sa šetšwe nywaga ya rena, re swanetše go dira’ng, gona ka baka la’ng?
20 Go sa šetšwe nywaga ya rena, re swanetše go dula re beile Jehofa pele ga rena. Ke moka o tla šegofatša maiteko a rena a manyenyane a go botša ba bangwe ka bogoši bja gagwe le ka mediro ya gagwe e makatšago. (Ps. 71:17, 18; 145:10-13) Lega go le bjalo, ge e ba re nyaka go hlompha Jehofa, re swanetše go bonagatša dika tše di kgahlišago Modimo. Re ka ithuta’ng ka dika tše bjalo ge re hlahloba dipego tše oketšegilego tša Beibele?
O be o tla Araba Bjang?
• Re tseba bjang gore Jehofa o kwa dithapelo?
• Ke ka baka la’ng re swanetše go kwa Modimo ka mo go feletšego?
• Gaešita le ge re gateletšegile, ke ka baka la’ng re swanetše go dula re bota Jehofa?
• Moya o mokgethwa wa Modimo o thuša batho ba gagwe bjang?
[Dipotšišo tša Thuto]
[Seswantšho go letlakala 4]
Thapelo ya Nehemia go Jehofa e ile ya atlega
[Seswantšho go letlakala 5]
Go gopola kamoo maemo a Naomi a ilego a feleletša ka gona go tla re thuša go bota Jehofa