Ekiša Moromiwa yo Mogolo Kudu
Ekiša Moromiwa yo Mogolo Kudu
“E-bang baekiši ba-ka, go etša ge nna ke le moekiši wa Kriste.”—1 BAKOR. 11:1.
1. Ke ka baka la’ng re swanetše go ekiša Jesu Kriste?
MOAPOSTOLA PAULO o ile a ekiša Moromiwa yo mogolo kudu, Jesu Kriste. Le gona Paulo o ile a eletša Bakriste-gotee le yena ka gore: “E-bang baekiši ba-ka, go etša ge nna ke le moekiši wa Kriste.” (1 Bakor. 11:1) Ka morago ga ge Jesu a bontšhitše baapostola ba gagwe mohlala wa boikokobetšo ka go ba hlapiša maoto, o ile a ba botša gore: “Gobane ke le beetše mohlala gore go etša ge ke dirile go lena, le lena le dire bjalo.” (Joh. 13:12-15) Ka ge re le Bakriste ba mehleng yeno, re na le boikarabelo bja go ekiša Jesu Kriste ka mantšu a rena le mediro gotee le ka dika tšeo re di bontšhago.—1 Pet. 2:21.
2. Le ge o sa ka wa kgethwa ke Sehlopha se Bušago gore o be moromiwa, o ka ba le boemo bofe bja kgopolo?
2 Ka ge re bone sehlogong se se fetilego, moromiwa ke motho yo a rongwago e le moebangedi—yo a išago ditaba tše dibotse go batho ba bangwe. Mabapi le se, Paulo o ile a botšiša dipotšišo tše di kgahlišago. (Bala Baroma 10:11-15.) Hlokomela gore moapostola o ile a botšiša gore: “Ba tla kwa bjang ge go se yo a bolelago?” Ke moka o ile a tsopola mantšu a tšwago boporofeteng bja Jesaya a rego: “A ratêxa bya’ng maoto a motseta wa ditaba tše di botse”! (Jes. 52:7) Le ge o se wa kgethwa go hlankela o le moromiwa nageng e šele, o ka ba le moya wa boebangedi, wa ekiša Jesu ka go ba mogoeledi yo mafolofolo wa ditaba tše dibotse. Ngwagola, bagoeledi ba Mmušo ba 6 957 852 ba ‘dirile modiro wa boebangedi’ dinageng tše 236.—2 Tim. 4:5.
“Re Tlogetše Dilo tša Rena Gomme ra go Latela”
3, 4. Ke’ng seo Jesu a bego a se tlogetše legodimong, gona re swanetše go dira’ng gore re be balatedi ba gagwe?
3 Go phetha kabelo ya gagwe yeo a e neilwego ya lefaseng, Jesu “o ile a itlhohlora a ba ka sebopego sa mohlanka a swana le batho,” a tlogela bophelo bja gagwe bja legodimong le letago. (Bafil. 2:7) Sohle seo re se dirago bakeng sa go ekiša Kriste se ka se ke sa lekana le seo Jesu a se dirilego ka go tla lefaseng. Eupša re ka dula re tiile re le balatedi ba gagwe, e sego ka go lebelela morago ka go hlologela dilo tšeo re bego re e-na le tšona lefaseng la Sathane.—1 Joh. 5:19.
4 Lebakeng le lengwe, moapostola Petro o ile a botša Jesu gore: “Bona! Re tlogetše dilo ka moka gomme ra go latela.” (Mat. 19:27) Petro, Andrea, Jakobo le Johane ba ile ba tlogela malokwa a bona ge Jesu a be a ba laletša gore ba mo latele. Ba ile ba tlogela kgwebo ya go rea dihlapi gomme ba dira gore modiro wa boboledi e be mošomo wa bona o mogolo. Go ya ka pego e lego ka Ebangeding ya Luka, Petro o itše: “Bona! Re tlogetše dilo tša rena gomme ra go latela.” (Luka 18:28) Bontši bja rena ga se ra tlogela “dilo tša rena” tšohle e le gore re latele Jesu. Lega go le bjalo, re ile ra swanela ke go ‘itatola’ gore re fetoge balatedi ba Kriste le go hlankela Jehofa ka dipelo ka moka. (Mat. 16:24) Mogato o bjalo o re tlišeditše ditšhegofatšo tše dintši. (Bala Mateo 19:29.) Go ba le moya wa boebangedi go swana le Kriste go dira gore dipelo tša rena di thabe, kudu-kudu ge re bile le karolo e nyenyane go thušeng motho yo mongwe go batamela kgaufsi le Modimo le Morwa wa gagwe yo a rategago.
5. Hlalosa phihlelo yeo e bontšhago seo mofaladi a ka kgethago go se dira ka morago ga go ithuta therešo ya Beibele.
5 Valmir, monna wa Brazil yo a dulago bogareng bja Suriname, o be a šoma moepong wa gauta. E be e le lekgoba la bjala e bile a phela bophelo bjo bo gobogilego. Lebakeng le lengwe ge a be a le toropong, Dihlatse tša Jehofa di ile tša thoma thuto ya Beibele le yena. O be a ithuta letšatši le lengwe le le lengwe, a dira diphetogo tše dintši, gomme go se go ye kae o ile a kolobetšwa. Ge a bona gore mošomo wa gagwe o be o dira gore a thatafalelwe ke go phela ka go dumelelana le bodumedi bja gagwe bjo bofsa, o ile a rekiša kgwebo ya gagwe yeo e bego e mmušetša kudu gomme a boela Brazil go yo thuša lapa la gagwe go amogela mahumo a moya. Ge ba se na go ithuta therešo ya Beibele, bafaladi ba bantši ba tlogela mešomo ya bona dinageng tše di humilego gomme ba boele dinageng tša gabo bona ka morero wa go thuša ba leloko le ba bangwe moyeng. Bagoeledi ba Mmušo ba bjalo ba bontšha moya wa kgonthe wa Boebangedi.
6. Ke’ng seo re ka se dirago ge re sa kgone go hudugela moo go nyakegago bagoeledi ba bantši ba Mmušo?
6 Dihlatse tše mmalwa di kgonne go hudugela moo go nyakegago bagoeledi ba bantši ba Mmušo. Ba bangwe ba bile ba hlankela dinageng di šele. Rena re ka no se kgone go huduga, eupša re ka ekiša Jesu ka go dira sohle seo re ka se kgonago ka mehla bodireding.
Jehofa o Nea Tlwaetšo e Nyakegago
7. Go na le dikolo dife bakeng sa go hlahla bao ba nyakago go kaonefatša bokgoni bja bona bjalo ka bagoeledi ba Mmušo?
7 Bjalo ka ge Jesu a tlwaeditšwe ke Tatagwe, le rena re ka holwa ke thuto yeo Jehofa a e neago ga bjale. Jesu ka boyena o itše: “Go ngwadilwe Baporofeteng gwa thwe, ‘Ka moka ba tla rutwa ke Jehofa.’” (Joh. 6:45; Jes. 54:13) Lehono, go na le dikolo tšeo di hlamilwego ka mo go kgethegilego bakeng sa go re tlwaetša go ba bagoeledi ba Mmušo. Ka ntle le pelaelo, ka moka ga rena re hotšwe ka tsela e itšego ke Sekolo sa Bodiredi sa Pušo ya Modimo seo se swarwago diphuthegong tša gabo rena. Babulamadibogo ba na le tokelo ya go ya Sekolong sa Tirelo ya Bobulamadibogo. Babulamadibogo ba mmalwa ba nago le phihlelo ba ile ba thabela go ya sekolong gape. Bagolo le bahlanka ba bodiredi ba ile ba ya Sekolong sa Bodiredi sa Mmušo bakeng sa go kaonefatša bokgoni bja bona bja go ruta le bja go hlankela badumedi-gotee le bona. Bagolo le bahlanka ba bodiredi ba bantši ba sego lenyalong ba hlahlilwe Sekolong sa Tlwaetšo ya Bodiredi, seo se ba hlamelago go thuša ba bangwe modirong wa boboledi. Le gona bontši bja bana babo rena le dikgaetšedi bao ba neilwego dikabelo tša boromiwa dinageng dišele ba tlwaeditšwe Sekolong sa Beibele sa Watchtower sa Gilead.
8. Bana babo rena ba bangwe ba tšeela godimo gakaaka’ng tlwaetšo yeo Jehofa a e neago?
8 Dihlatse tše dintši tša Jehofa di fetošitše maemo a tšona gore di kgone go ya dikolong tše. Gore a ye Sekolong sa Tlwaetšo ya Bodiredi kua Canada, Yugu o ile a rola modiro ka gobane mothwadi a ile a se dumele ge a be a kgopela matšatši a go khutša. Yugu o re: “Ga ke itshole. Ge e le gabotse ge nkabe ba ile ba nnea matšatši a go khutša e le ka ge ba nkgahlegela, ba ka ba ba ile ba letela gore ke botegele khamphani ya bona ka go tšwela pele ke e šomela. Eupša bjale ke a hwetšagala bakeng sa kabelo le ge e le efe yeo Jehofa a ka nneago yona.” Ka go diriša ka mo go holago tlwaetšo yeo e neilwego ke Modimo, ba bantši ba ile ba neela ka go rata ka seo pele ba bego ba se tšeela godimo.—Luka 5:28.
9. Nea mohlala wo o bontšhago mafelelo ao a tlišwago ke go ruta ka Mangwalo le ka maiteko a tšwago pelong.
9 Thuto ya Mangwalo gotee le boiteko bjo bo tšwago pelong di atlega kudu. (2 Tim. 3:16, 17) Ela hloko seo se diragetšego go Saulo kua Guatemala. O belegwe a e-na le bofokodi bjo bonyenyane bja monagano, gomme yo mongwe wa barutiši ba gagwe o ile a botša mmagwe gore ga se a swanela go gapeletša mošemane go ithuta go bala, ka ge seo se ka mo gakantšha. Saulo o ile a tlogela sekolo a sa kgone go bala. Lega go le bjalo, Hlatse e ile ya ruta Saulo go bala, e diriša poroutšha ya Apply Yourself to Reading and Writing. Mafelelong, Saulo o ile a tšwela pele go fihla moo a bego a nea dipolelo Sekolong sa Bodiredi sa Pušo ya Modimo. Mmago Saulo o ile a kopana le morutiši wa gagwe bodireding bja ntlo le ntlo. Ge a e-kwa gore Saulo o ithutile go bala, morutiši o ile a mo kgopela gore a tle le yena bekeng e latelago. Bekeng e latetšego, morutiši o ile a botšiša Saulo gore: “O tl’o nthuta’ng?” Saulo o ile a thoma go bala serapa ka pukung ya Ke Eng Seo ge e le Gabotse Beibele e se Rutago? Morutiši o ile a re: “Ga ke kgolwe gore ga bjale o ruta nna.” A sa kgone go thiba megokgo ya gagwe, o ile a gokara Saulo.
Thuto Yeo e Fihlelelago Pelo
10. Ke sedirišwa sefe se sebotse seo re ka se dirišago ge re ruta therešo ya Beibele?
10 Jesu o ile a thea dithuto tša gagwe go seo Jehofa a mo rutilego sona ka go lebanya le tlhahlong yeo e hwetšwago ka Lentšung la Modimo le le ngwadilwego. (Luka 4:16-21; Joh. 8:28) Re ekiša Jesu ka go diriša keletšo ya gagwe le ka go kgomarela thuto ya Mangwalo. Ka gona ka moka ga rena re bolela le go nagana ka go dumelelana, gomme se se godiša botee bja rena. (1 Bakor. 1:10) Re thaba kudu ge “mohlanka yo a botegago le wa temogo” a re nea dikgatišo tše di theilwego Beibeleng go re thuša go kgomarela botee dithutong tša rena le go phetha modiro wa rena re le baebangedi! (Mat. 24:45; 28:19, 20) E nngwe ya dikgatišo tše ke puku ya Seo Beibele e se Rutago, yeo ga bjale e hwetšagalago ka maleme a 179.
11. Kgaetšedi wa kua Ethiopia o ile a fenya kganetšo bjang a diriša puku ya Seo Beibele e se Rutago?
11 Go ithuta Mangwalo re diriša puku ya Seo Beibele e se Rutago go ka fetoša le dipelo tša baganetši. Lebakeng le lengwe Lula, kgaetšedi wa mmulamadibogo wa kua Ethiopia, o be a swere thuto ya Beibele ge wa leloko labo morutwana a be a itahlela ka moo ba bego ba le ka gona gomme a bolela gore ga se ba swanela go ba le thuto e bjalo. Lula ka boleta o ile a boledišana le wa leloko yoo, a diriša seswantšho se se lego go kgaolo 15 ya puku ya Seo Beibele e se Rutago sa mabapi le tšhelete ya bofora. Mosadi yo o ile a iša maswafo fase gomme a ba dumelela go tšwela pele ka thuto. Ge e le gabotse, o ile a ba gona thutong e latetšego gomme a kgopela gore le yena a swarelwe thuto ya Beibele, a bile a bolela gore o tla e lefelela! Kapejana o be a ithuta gararo ka beke a ba a dira tšwelopele e botse ya moya.
12. Nea mohlala go bontšha kamoo bafsa ba ka rutago ditherešo tša Beibele ka katlego.
12 Bafsa ba ka thuša ba bangwe ka go diriša puku ya Seo Beibele e se Rutago. Ge Keanu yo a nago le nywaga e 11 wa kua Hawaii a be a bala puku ye sekolong, yo mongwe wa barutwana-gotee le yena o ile a mmotšiša gore: “Ke ka baka la’ng le sa keteke matšatši a maikhutšo?” Keanu o ile a bala karabo ka sehlogong sa mametletšo se se rego “Na re Swanetše go Bina Matšatši a Maikhutšo?” Ke moka o ile a ya ka letlakaleng la dikagare tša puku gomme a botšiša mošemane yoo gore ke sehlogo sefe seo se mo kgahlago kudu. Go ile gwa thongwa thuto ya Beibele. Ngwageng o fetilego wa tirelo, Dihlatse tša Jehofa di swere dithuto tša Beibele tše 6 561 426 tšeo go bontši bja tšona go bego go dirišwa puku ya Seo Beibele e se Rutago. Na o diriša sedirišwa se go ruta ka Beibele?
13. Ke ka tsela efe go ithuta Beibele go ka bago le tutuetšo e tseneletšego bathong?
13 Go ithuta Mangwalo go dirišwa puku ya Seo Beibele e se Rutago go ka ba le tutuetšo e tseneletšego go bao ba kganyogago go dira thato ya Modimo. Banyalani bao e lego babulamadibogo ba kgethegilego kua Norway ba ile ba thoma thuto ya Beibele le lapa leo le tšwago Zambia. Banyalani bao ba Zambia ba be ba e-na le barwedi ba bararo gomme ba sa nyake go ba le ngwana yo mongwe. Ka gona ge mosadi yo a ima, ba ile ba kwana gore a ntšhe mpa. Matšatši a mmalwa pele ba ka ya ngakeng, ba ile ba ithuta kgaolo e nago le sehlogo se se rego “Pono ya Modimo ka Bophelo.” Seswantšho sa ngwana yo a sa lego ka mpeng seo se tšwelelago sehlogong se, se ile sa kgoma banyalani ba kudu moo ba ilego ba dira phetho ya go se sa ntšha mpa yeo. Ba ile ba tšwela pele gabotse moyeng gomme ba reelela ngwana wa bona ka motho yo a bego a ba swarela thuto.
14. Bontšha kamoo go phela ka go dumelelana le seo re se rutago go ka bago le mafelelo a mabotse.
14 Seka se bohlokwa tseleng yeo Jesu a bego a e diriša go ruta e be e le go phela ga gagwe ka go dumelelana le seo a bego a se ruta. Batho ba bantši ba ile ba kgahlwa ke boitshwaro bjo bobotse bja Dihlatse tša Jehofa, tšeo di ekišago boitshwaro bja Jesu. Koloi ya rakgwebo wa kua New Zealand e ile ya pšhatlwa gomme mokotla wa gagwe wa dipuku (briefcase) wa utswiwa. O ile a begela lephodisa leo le ilego la re: “Tsela feela yeo o ka hwetšago thoto ya gago ke ge e ka hwetšwa ke yo mongwe wa Dihlatse tša Jehofa.” Hlatse yeo e bego e sepediša dikuranta e ile ya hwetša mokotla woo. Ge a tsebišwa ka se, rakgwebo o ile a ya legaeng la kgaetšedi. O ile a ikwa a imologile ge a bona gore pampiri yeo e lego bohlokwa go yena e be e sa le gona. Kgaetšedi o ile a botša rakgwebo gore, “Go be go swanetše gore ke bušetše thoto ye go mong wa yona, kudu-kudu ka ge ke le yo mongwe wa Dihlatse tša Jehofa.” Rakgwebo o be a maketše, a gopola seo a se boditšwego ke lephodisa mesong yeo. Go molaleng gore Bakriste ba therešo ba phela ka go dumelelana le dithuto tšeo di hwetšwago ka Beibeleng le ka go ekiša Jesu.—Baheb. 13:18.
Ekiša Mokgwa wa Jesu wa go Swara Batho
15, 16. Re ka gogela batho bjang molaetšeng wo re bolelago ka wona?
15 Mokgwa wa Jesu wa go swara batho o ile wa dira gore ba gogelege go yena. Ka mohlala, lerato la gagwe le boikokobetšo bja gagwe di ile tša gogela batho ba tlasana go yena. O ile a bontšha kwelobohloko go bao ba bego ba e-tla go yena gomme o be a ba homotša ka mantšu a borutho, a fodiša ba bantši. (Bala Mareka 2:1-5.) Ga re kgone go dira mehlolo, eupša re ka bontšha lerato, boikokobetšo le kwelobohloko—dika tšeo di thušago go gogela batho therešong.
16 Kwelobohloko e kgathile tema e kgolo ge mmulamadibogo yo a kgethegilego yo a bitšwago Tariua a etela lapeng la mokgalabje yo a bitšwago Beere, yo a dulago go se sengwe sa dihlakahlaka tšeo di lego lekatana tša Kiribati kua Borwa bja Pacific. Le ge mokgalabje yoo a ile a bontšha gore o be a se a ikemišetša go theetša, Tariua o ile a lemoga gore mokgalabje yo o be a golofetše gomme o ile a mo kwela bohloko. O ile a botšiša gore: “Na o kwele ka seo Modimo a se holofetšago batho bao ba babjago le batšofadi?” Ke moka o ile a bala temana ka boporofeteng bja Jesaya. (Bala Jesaya 35:5, 6.) A kgahlegile, mokgalabje o ile a re, “Ke na le nywaga e mentši ke bala Beibele gomme ke be ke dutše ke etelwa ke moromiwa wa kereke ya rena ka nywaga e mentši, eupša ga se ka ka ka bona seo ka Beibeleng.” Go ile gwa thongwa thuto ya Beibele le Beere, gomme o ile a dira tšwelopele e botse ya moya. Ee, o be a golofetše kudu, eupša ga bjale o kolobeditšwe, o etelela pele go hlokomeleng sehlopha seo se lego lekatana, le gona o kgona go sepela sehlakahlaka ka moka a bolela ditaba tše dibotse.
Tšwela Pele o Ekiša Kriste
17, 18. (a) O ka ba bjang moebangedi yo a atlegago? (b) Bao ba tšeelago modiro wa bona wa boboledi godimo ba letetšwe ke’ng?
17 Bjalo ka ge diphihlelo tše di thabišago tša bodiredi di bontšha leboelela, re ka ba baebangedi ba ba atlegilego ge e ba re hlagolela le go bontšha dika tšeo di bontšhitšwego ke Jesu. Ka gona, go swanetše gakaakaang gore re ekiše Kriste re le baebangedi ba mafolofolo!
18 Ge ba bangwe ba be ba fetoga barutiwa ba Jesu lekgolong la pele la nywaga, Petro o ile a botšiša gore: “Gabotse-botse re tla hwetša’ng?” Jesu o ile a araba ka gore: “Yo mongwe le yo mongwe yo a tlogetšego dintlo goba bana babo goba dikgaetšedi goba tate goba mma goba bana goba mašemo ka baka la leina la-ka, o tla hwetša tše dintši kudu-kudu e bile o tla ja bohwa bja bophelo bjo bo sa felego.” (Mat. 19:27-29) Ka kgonthe yeo e tla ba phihlelo ya rena ge e ba re tšwela pele go ekiša Moromiwa yo mogolo kudu, Jesu Kriste.
O be o tla Araba Bjang?
• Jehofa o re tlwaetša bjang gore re be baebangedi?
• Ke ka baka la’ng puku ya Seo Beibele e se Rutago e atlega bodireding bja rena?
• Re ka ekiša Jesu bjang tseleng yeo re swarago batho ka yona?
[Dipotšišo tša Thuto]
[Seswantšho go letlakala 17]
Ge Jesu a be a laletša Petro, Andrea, Jakobo le Johane gore ba mo latele, ba ile ba arabela ka ntle le tika-tiko
[Seswantšho go letlakala 19]
Dikgatišo tše bjalo ka puku ya “Seo Beibele e se Rutago” di re thuša go boloka botee ge re ruta