Go Ba Gona ga Kriste—Go Bolela’ng go Wena?
Go Ba Gona ga Kriste—Go Bolela’ng go Wena?
“Pontšho ya go ba gona ga gago le ya bofelo bja tshepedišo ya dilo e tla ba eng?”—MAT. 24:3.
1. Ke potšišo efe e kgahlišago yeo baapostola ba Jesu ba ilego ba mmotšiša yona?
NYWAGA e ka bago e dikete tše pedi e fetilego, baapostola ba Jesu ba bane ba ile ba botšiša Morena wa bona potšišo ka thopeng ge ba be ba le Thabeng ya Mehlware. Ba botšišitše gore: “Dilo tše di tla direga neng, le gona pontšho ya go ba gona ga gago le ya bofelo bja tshepedišo ya dilo e tla ba eng?” (Mat. 24:3) Potšišong yeo, baapostola ba ile ba diriša dipolelwana tše pedi tše di kgahlišago, “go ba gona ga gago” le “bofelo bja tshepedišo ya dilo.” Dipolelwana tšeo di šupa eng?
2. Tlhaloso ya motheo ya lentšu “bofelo” ke efe?
2 Ge re thoma ka polelwana ya bobedi, ela hloko lentšu “bofelo,” e lego phetolelo ya lentšu la Segerika la syn·teʹlei·a. Lentšu le le bolela “bofelo,” mola lentšu la Segerika le le tswalanago le le la te’los, le bolela “mafelelo.” Go fapana ga mantšu a a mabedi go ka bontšhwa ka go hlalosa polelo yeo e newago Holong ya Mmušo. Bofelo bja polelo ke karolo ya mafelelo ya yona, moo seboledi se dirišago nako e kopana go gopotša batheetši ka seo se bego se se ahla-ahla gomme ka morago se bontšha kamoo tsebišo yeo e šomago ka gona go bona. Phetho goba mafelelo a polelo ke ge seboledi se tloga sethaleng. Ka tsela e swanago, go ya ka Beibele, polelwana “bofelo bja tshepedišo ya dilo” e šupa go lebaka la nako leo le lebišago mafelelong a yona e bile le akaretša mafelelo ao.
3. Ke dilo dife tše dingwe tšeo di diregago nakong ya go ba gona ga Jesu?
3 Go thwe’ng ka polelwana “go ba gona,” yeo baapostola ba botšišitšego ka yona? Polelwana ye ke phetolelo ya lentšu la Segerika la pa·rou·siʹa. * Pa·rou·siʹa ya Kriste, goba go ba gona ga gagwe, go thomile ka go bewa ga Jesu e le Kgoši legodimong ka 1914 gomme go tšwela pele go akaretša “masetlapelo a magolo,” ao go ona go tlago go fedišwa bakgopo. (Mat. 24:21) Dilo tše dintši tše sa swanego, go akaretša le ‘mehla ya bofelo’ ya tshepedišo ye e kgopo ya dilo, go kgoboketšwa ga bakgethwa le go tsošetšwa ga bona bophelong bja legodimong, di direga lebakeng la go ba gona ga Jesu. (2 Tim. 3:1; 1 Bakor. 15:23; 1 Bathes. 4:15-17; 2 Bathes. 2:1) Go ka bolelwa gore lebaka la nako leo le akaretšago “bofelo bja tshepedišo ya dilo” (syn·teʹlei·a) le sepedišana le lebaka la nako leo le bitšwago la go ba gona ga Kriste (pa·rou·siʹa).
Lebaka le Letelele la Nako
4. Go ba gona ga Jesu go swana bjang le ditiragalo tša mehleng ya Noa?
4 Taba ya gore lentšu pa·rou·siʹa le šupa go lebaka le letelele la nako e dumelelana le seo Jesu a se boletšego mabapi le go ba gona ga gagwe. (Bala Mateo 24:37-39.) Hlokomela gore Jesu ga se a ka a swantšha go ba gona ga gagwe le lebaka le lekopana la nako leo Meetse-fula a diregilego ka lona mehleng ya Noa. Go e na le moo, o bapišitše go ba gona ga gagwe le lebaka le letelele kudu la nako leo le ilego la lebiša Meetse-fuleng. Seo se bego se akaretšwa lebakeng leo la nako e be e le go aga ga Noa areka le go dira ga gagwe boboledi, go ba go fihla nakong ya ge Meetse-fula a fihla mafelelong. Ditiragalo tšeo di diregile lebakeng la nywaga e mentši. Ka tsela e swanago, go ba gona ga Kriste go akaretša ditiragalo tšeo di lebišago masetlapelong a magolo le go akaretša nako yeo.—2 Bathes. 1:6-9.
5. Mantšu ao a begilwego go Kutollo kgaolo 6 a bontšha bjang gore go ba gona ga Jesu ke ga lebaka le letelele la nako?
5 Dipego tše dingwe tša boporofeta bja Beibele di bontšha gabotse gore go ba gona ga Kriste go šupa lebakeng le letelele la nako e sego feela go go tleng ga gagwe go tlo fediša bakgopo. Puku ya Kutollo e bolela ka Jesu e le yo nametšego pere e tšhweu gomme a newa mphapahlogo. (Bala Kutollo 6:1-8.) Ka morago ga ge a beilwe e le Kgoši ka 1914, Jesu o bontšhwa e le yo a tšwelago go “yo fenya le go feleletša phenyo ya gagwe.” Pego ka morago e bontšha gore o latelwa ke banamedi bao ba nametšego dipere tša mebala e fapa-fapanego. Ka tsela ya boporofeta banamedi ba le dipere tša bona ba swantšhetša ntwa, tlhaelelo ya dijo le leuba la bolwetši, tšeo ka moka ga tšona di diregilego lebakeng le letelele la nako leo go bolelwago ka lona e le ‘mehla ya bofelo.’ Re bona go phethagala ga boporofeta bjo mehleng ya rena.
6. Kutollo kgaolo 12 e re thuša go kwešiša’ng mabapi le go ba gona ga Kriste?
6 Kutollo kgaolo 12 e nea tsebišo e oketšegilego mabapi le go hlongwa ga Mmušo wa Modimo kua legodimong. Moo re bala ka ntwa yeo e bilego gona tikologong e sa bonagalego. Mikaele—e lego Jesu Kriste boemong bja gagwe bja legodimong—le barongwa ba gagwe ba lwa le Diabolo le batemona ba gagwe. Ka baka la seo, Sathane Diabolo le madira a gagwe ba lahlelwa lefaseng. Ka nako yeo, pego e re botša gore, Diabolo o galefile kudu, “ka ge a tseba gore o na le nako e kopana.” (Bala Kutollo 12:7-12.) Ka gona, go molaleng gore go hlongwa ga Mmušo wa Kriste kua legodimong go latelwa ke lebaka la nako leo le swawago ke go oketšega ga “madimabe” lefaseng le go badudi ba lona.
7. Psalme ya bobedi e bolela ka eng, gomme ke sebaka sefe seo se hlaloswago go yona?
7 Psalme ya bobedi le yona e bolela ka tsela ya boporofeta ka go bewa ga Jesu e le Kgoši Thabeng ya Tsione ya legodimong. (Bala Psalme 2:5-9; 110:1, 2.) Lega go le bjalo, psalme ye e bontšha le gore go na le lebaka la nako leo ka lona babuši ba lefase gotee le balata ba bona, ba newago sebaka sa gore ba ikokobeletše pušo ya Kriste. Ba lemošwa gore ba ‘hlalefe’ le gore ba dumele go ‘eletšwa.’ Ee, ka nako yeo ba ‘lehlogonolo e tlo ba ba ba botilego Modimo,’ ge ba hlankela Jehofa le Kgoši yeo a e kgethilego. Ka gona, lebakeng la go ba gona ga Kriste a le matleng a bogoši go tla be go sa dutše go e-na le sebaka se se bulegilego sa gore ba dire diphetogo.—Ps. 2:10-12.
Go Lemoga Pontšho
8, 9. Ke bomang bao ba bego ba tla lemoga pontšho ya go ba gona ga Kriste le go kwešiša seo e se bolelago?
8 Ge a be a botšišwa ke Bafarisei mabapi le nako yeo Mmušo o bego o tla tla ka yona, Jesu o arabile ka gore o be o ka se tle ka go “lemogega pepeneneng” go ya ka pono ya bona. (Luka 17:20, 21) Bao e sego badumedi ba be ba ka se kwešiše. Ruri ba be ba ka kwešiša bjang? Ga se ba ka ba lemoga le gore Jesu ke Kgoši ya bona ya ka moso. Ka gona ke bomang bao ba bego ba tla lemoga pontšho ya go ba gona ga Kriste le go kwešiša bohlokwa bja yona?
9 Jesu o ile a tšwela pele a bolela gore barutiwa ba gagwe ba be ba tla bona pontšho gabotse go swana le ge ba bona “legadima ka go gadima ga lona [mo go phadimago] go tšwa karolong e nngwe tlase ga legodimo go ya karolong e nngwe.” (Bala Luka 17:24-29.) Ke mo go kgahlišago go lemoga gore Mateo 24:23-27 e tswalanya ntlha e swanago ka go lebanya le pontšho ya go ba gona ga Kriste.
Moloko wo o Bonago Pontšho
10, 11. (a) Ke tlhaloso efe yeo e ilego ya newa nakong e fetilego mabapi le “moloko” woo go boletšwego ka wona go Mateo 24:34? (b) Ke bomang bao barutiwa ba Jesu ka ntle le pelaelo ba swanetšego go ba ba ile ba kwešiša gore ba akaretšwa go “moloko” woo?
10 Nakong e fetilego, makasine wo o ile wa hlalosa gore lekgolong la pele la nywaga, “moloko wo” woo go bolelwago ka wona go Mateo 24:34 o be o šupa go “moloko wo o bego o phela nakong ya wa ba-Juda ba sa dumelego.” * Tlhaloso yeo e be e bonala e kwagala ka baka la gore dipegong tše dingwe ka moka tšeo go tšona Jesu a dirišitšego lentšu “moloko” e be e e-na le tlhaloso e sa kgahlišego, gomme mabakeng a mantši, Jesu o be a diriša lehlaodi le le sa kgahlišego, le bjalo ka “o kgopo,” go hlalosa moloko. (Mat. 12:39; 17:17; Mar. 8:38) Ka gona, go be go naganwa gore phethagatšong ya mehleng ya lehono, Jesu o be a šupa go “moloko” o kgopo wa ba sa dumelego bao ba bego ba tla bona dika tšeo di bego di tla swaya “bofelo bja tshepedišo ya dilo” (syn·teʹlei·a) gotee le go bona mafelelo (teʹlos) a yona.
11 Ke therešo gore ge Jesu a be a diriša lentšu “moloko” ka tsela e sa kgahlišego, o be a bolela le batho ba kgopo ba mehleng ya gagwe goba a bolela ka bona. Eupša na ge e le gabotse seo e be e le therešo ka polelo ya gagwe yeo e begilwego go Mateo 24:34? Gopola gore ba bane ba barutiwa ba Jesu ba be ba ile ba tla go yena “thopeng.” (Mat. 24:3) Ka ge Jesu a se a ka a diriša mahlaodi a sa kgahlišego ge a be a bolela le bona mabapi le “moloko wo,” ga go na pelaelo gore baapostola ba swanetše go ba ba ile ba kwešiša gore bona le barutiwa ba bangwe e be e tla ba karolo ya “moloko” woo wo o bego o ka se ke wa feta “go fihla ge dilo tše ka moka di [tla be di] direga.”
12. Ke’ng seo taba e dikologilego e se utollago mabapi le bao Jesu a bego a bolela ka bona ge a be a diriša lentšu “moloko”?
12 Re ka fihlelela phetho yeo go tšwa motheong ofe? Ka go ela hloko taba e dikologilego. Go etša ge go begilwe go Mateo 24:32, 33, Jesu o itše: “Bjale ithuteng taba ye ka mogo e le seswantšho: Gatee-tee feela ge lekalana la wona e e-ba le lenanana gomme le hloga matlakala, le tseba gore selemo se batametše. Ka mo go swanago, le lena ge le bona dilo tše ka moka, le tsebe gore o kgaufsi mejakong.” (Bapiša le Mareka 13:28-30; Luka 21:30-32.) Ke moka go Mateo 24:34, re bala gore: “Ruri ke le botša gore moloko wo o ka se fete le ka mohla go fihla ge dilo tše ka moka di direga.”
13, 14. Ke ka baka la’ng re ka re “moloko” woo Jesu a bego a bolela ka wona e swanetše go ba e be e le barutiwa ba gagwe?
13 Jesu o boletše gore e be e le barutiwa ba gagwe, bao ba bego ba le kgaufsi le go tlotšwa ka moya o mokgethwa, bao ba bego ba tla kgona go fihlelela diphetho tše itšego ge ba be ba bona “dilo tše ka moka” di direga. Ka gona Jesu o swanetše go ba a be a šupa go barutiwa ba gagwe ge a be a tlaleletša ka seo re se balago temaneng e latelago: “Moloko wo o ka se fete le ka mohla go fihla ge dilo tše ka moka di direga.”
14 Ka go fapana le bao e sego badumedi, barutiwa ba Jesu ba be ba ka se bone feela pontšho eupša ba be ba tla kwešiša le bohlokwa bja yona. Ba be ba tla ‘ithuta’ dikeng tša pontšho yeo le go “tseba” seo di se bolelago e le ka kgonthe. Ba be ba tla kwešiša gabotse gore “o kgaufsi mejakong.” Le ge e le therešo gore Bajuda ba sa dumelego le Bakriste ba tloditšwego ba botegago ba bone phethagalo e lekanyeditšwego ya mantšu a Jesu lekgolong la pele la nywaga, ke feela balatedi ba gagwe ba tloditšwego nakong yeo bao ba bego ba ka ithuta ditiragalong tše—ba ka kwešiša seo se bolelwago e le ka kgonthe ke seo ba bego ba se bona.
15. (a) Ke bomang bao ba bopago “moloko” wa mehleng yeno woo Jesu a boletšego ka wona? (b) Ke ka baka la’ng re sa kgone go tseba tekanyo e lebanyago ya nako ya go ba gona ga “moloko wo”? (Bona lepokisi leo le lego go letlakala 25.)
15 Bao lehono ba sa kwešišego dilo tša moya ba nagana gore ga go na pontšho e ‘lemogegago pepeneneng’ ya go ba gona ga Jesu. Ba bolela gore dilo di sa tšwela pele bjalo ka ge di be di le bjalo nakong e fetilego. (2 Pet. 3:4) Ka lehlakoreng le lengwe, bana babo Kriste ba botegago ba tloditšwego, e lego sehlopha sa mehleng yeno sa Johane, ba lemogile pontšho ye bjalo ka ge eka ke legadima leo le phadimago le gona ba kwešišitše seo e se bolelago e le ka kgonthe. E le sehlopha, batlotšwa ba ba bopa “moloko” wa mehleng yeno wa batho bao ba phelago nakong e swanago, woo o ka se kego wa feta “go fihla ge dilo tše ka moka di direga.” * Se se šišinya gore ba bangwe bao e lego bana babo Kriste ba tloditšwego ba tla ba ba sa dutše ba phela lefaseng ge masetlapelo a magolo ao a boletšwego e sa le pele a thoma.
“Dulang le Phakgame”
16. Ke’ng seo barutiwa ba Kriste ka moka ba swanetšego go se dira?
16 Lega go le bjalo, go nyakega go gontši go feta go fo lemoga pontšho. Jesu o tšwetše pele ka gore: “Seo ke le botšago sona ke se botša bohle ke re, Dulang le phakgame.” (Mar. 13:37) Se ke sa bohlokwa kudu go rena ka moka lehono go sa šetšwe gore re batlotšwa goba ba dinku tše dingwe. Go fetile nywaga e 90 ga e sa le go tloga mola Jesu a bewago e le Kgoši legodimong ka 1914. Le ge go ka ba thata, re swanetše go ipontšha re itokišitše le go dula re phakgame. Go kwešiša gore Kriste o gona ka mo go sa bonagalego a buša e le Kgoši go re thuša go dira bjalo. Gape go re hlokomediša ntlha ya gore kgaufsinyane o tla tla go tlo fediša manaba a gagwe “ka nako yeo [re] sa naganego gore e ka ba yona.”—Luka 12:40.
17. Kwešišo ye e swanetše go re dira gore re ikwe bjang, le gona re swanetše go ikemišetša go dira’ng?
17 Go kwešiša ga rena se se bolelwago ke go ba gona ga Kriste go re thuša go matlafatša maikwelo a rena a go akgofa ga dinako. Re a tseba gore Jesu o šetše a le gona le gore o be a dutše ka mo go sa bonagalego e le Kgoši kua legodimong ga e sa le go tloga ka 1914. Go se go ye kae o tla tla go tlo fediša ba babe le go dira diphetogo tše dikgolo lefaseng ka moka. Ka gona re swanetše go ikemišetša go feta le ge e le neng pele go tšea karolo ka mafolofolo modirong woo Jesu a boletšego ka wona e sa le pele ge a be a re: “Ditaba tše tše dibotse tša mmušo di tla bolelwa lefaseng ka moka le go agilwego go lona gore e be bohlatse go ditšhaba tšohle; ke moka bofelo [teʹlos] bo tla tla.”—Mat. 24:14.
[Mengwalo ya tlase]
^ ser. 3 Tlhaloso ya lentšu pa·rou·siʹa e bonwa phapanong yeo e dirilwego go 2 Bakorinthe 10:10, 11 le Bafilipi 2:12, magareng ga ‘go ba gona’ le ‘go se be gona’ ga moapostola Paulo. Bakeng sa tlhaloso e tseneletšego, bona Insight on the Scriptures, Bolumo 2, matlakala 676-679.
^ ser. 10 Bona Morokami wa November 1, 1995, matlakala 11-15, 19, 30, 31.
^ ser. 15 Go bonala moloko o sepedišana le go phethagala ga pono ya pele ka pukung ya Kutollo. (Kut. 1:10–3:22) Karolo ye ya letšatši la Morena e tšwela pele go tloga ka 1914 go fihla ge wa mafelelo wa batlotšwa ba botegago a e-hwa e bile a tsošwa.—Bona Seremo se Segolo sa Kutollo se Batametše! letlakala 24, serapa 4.
O be o tla Araba Bjang?
• Re tseba bjang gore go ba gona ga Jesu ke ga lebaka le letelele la nako?
• Ke bomang bao ba lemogago pontšho ya go ba gona ga Jesu, le go kwešiša seo e se bolelago?
• Ke bomang bao ba bopago moloko wa mehleng yeno wo go boletšwego ka wona go Mateo 24:34?
• Ke ka baka la’ng re sa kgone go tseba tekanyo e lebanyago ya nako ya go ba gona ga “moloko wo”?
[Dipotšišo tša Thuto]
[Lepokisi go letlakala 25]
Na re ka Bala Tekanyo ya Nako ya “Moloko wo”?
Lentšu “moloko” gantši le šupa go batho ba nywaga e fapa-fapanego bao ba phelago lebakeng le itšego la nako goba tiragalong e itšego. Ka mohlala, Ekisodo 1:6 e re botša gore: “Ya re xe Josefa a hwile, le bana babô ka moka, xò hwile ba moloko woo ka moka.” Josefa le bana babo e be e se dithaka, eupša ba be ba e-na le phihlelo e swanago ya lebakeng le le swanago la nako. Bao ba bego ba akaretšwa “molokong woo” e be e le barwarre ba Josefa ba bagolo bao ba belegwego pele ga gagwe. Ba bangwe ba bona ba tšwetše pele ba phela ka morago ga ge Josefa a hwile. (Gen. 50:24) Ba bangwe, ba “moloko woo,” ba bjalo ka Benjamini, ba belegwe morago ga Josefa gomme ba ka ba ba ile ba tšwela pele ba phela ka morago ga ge yena a hwile.
Ka gona ge polelwana “moloko” e dirišwa go batho bao ba phelago lebakeng le itšego la nako, tekanyo e lebanyago ya nako yeo e ka se ke ya tsebja ka nepo ge e se feela gore ga e na mafelelo e bile e ka se be e telele ka mo go feteletšego. Ka gona, ka go diriša polelwana “moloko wo,” go etša ge go begilwe go Mateo 24:34, Jesu o be a sa nee barutiwa ba gagwe mokgwa wa go ba thuša go bona gore ‘mehla ya bofelo’ e tla fela neng. Go e na le moo, Jesu o ile a tšwela pele a gatelela gore ba be ba ka se tsebe “letšatši leo le iri.”—2 Tim. 3:1; Mat. 24:36.
[Seswantšho go letlakala 22, 23]
Ka morago ga go bewa e le Kgoši ka 1914, Jesu o bontšhwa e le yo a ‘fenyago’
[Seswantšho go letlakala 24]
“Moloko wo o ka se fete le ka mohla go fihla ge dilo tše ka moka di direga”