Ithute Diphošong tša Baisiraele

BAISIRAELE ba be ba tseba seo Jehofa a bego a letetše gore ba se dire ge ba be ba tsene Nageng ya Kholofetšo. Modimo o be a laetše ka Moše gore: “Le rakê baaxi ba naxa yeo ka moka xe Le fihla, xomme le senyê medimo ya bôná ka moka ya dikôkwanê, le medimo ka moka ya diswanthšô; le meboto ya medimo ya bôná Le e Phušolê.”—Num. 33:52.

Batho ba Isiraele ba be ba sa swanela go dira kgwerano le badudi ba naga yeo goba go nyalana le bona. (Doit. 7:2, 3) Ka kgonthe, batho ba kgethilwego ba Modimo ba be ba lemošitšwe ka gore: “Itôtê xore O se dirê kxwêranô le beng ba naxa yeo O yaxo xo yôna, xore ba se tlo ba morêô xe ba na naxô’.” (Ek. 34:12) Lega go le bjalo, Baisiraele ba ile ba se kwe Modimo gomme ba tanywa. Ba wišitšwe ke’ng? Ke dithuto dife tša temošo tšeo re ka ithutago tšona phihlelong ya bona?—1 Bakor. 10:11.

Go Thoma ka go Itswaka le Ditšhaba tše Dingwe go Iša go Borapedi bja Diswantšho

Ge ba se na go tsena Nageng ya Kholofetšo, kapejana Baisiraele ba ile ba fenya badudi ba yona. Lega go le bjalo, barwa ba Isiraele ba ile ba palelwa ke go kwa ditaelo tša Modimo ka mo go feletšego. Ga se ba ka ba raka manaba a bona. (Baa. 1:1–2:10) Ka mo go fapanego, ge Baisiraele ba be ba thoma go dula magareng ga “dithšaba tše di šupaxo” tšeo di bego di dula nageng yeo, go dula ba ikgokaganya le batho ba ditšhaba tšeo go dirile gore ba gwerane le tšona. (Doit. 7:1) Se se ile sa kgoma Baisiraele bjang? Beibele e re: “Ba tšea barwedi ba bôná, ’me ba ba tšeiša bana ba bôná, ’me ba dirêla medimo ya bôná. Ya re xe Ba-Isiraele ba dira tše di bexo di befêla Morêna, ’me ba lebala Morêna Modimo wa bôná, ba hlankêla bô-Baali le Asitarothe.” (Baa. 3:5-7) Go Baisiraele, go itswakanya le badudi ba naga yeo go dirile gore ba thome go nyalana le bona le go rapela medimo ya diswantšho. Gatee-tee ge go be go dirwa dikgwerano tša lenyalo, kgonagalo ya gore Baisiraele ba rake baheitene bao nageng yeo e ile ya fokotšega. Borapedi bja therešo bo ile bja gobošwa, gomme Baisiraele ka bobona ba thoma go hlankela medimo ya maaka.

 Bjalo ka bagwera ba bona, badudi ba Naga ya Kholofetšo ba ile ba bonagala ba bea boemo bja moya bja Baisiraele kotsing go feta kamoo ba bego ba le ka gona ge e be e sa le manaba a bona. Ela hloko tsela e nngwe yeo ka yona kgobogo ya moya e ka bago e ile ya direga.

Go Tswalanya Temo le Borapedi bja Baali

Ge ba se na go tsena Nageng ya Kholofetšo, barwa ba Isiraele ba ile ba kgaotša go hlwa ba le leetong gomme ba bantši e ile ya ba balemi. Mohlomongwe mekgwa ya temo yeo ba bego ba e diriša e be e swana le ye e bego e dirišwa ke batho bao ba bego ba lema naga ye pele ga bona. Go molaleng gore ga se ba ka ba fo diriša feela mekgwa ya temo ya Bakanana. Le gona go gwerana le batho ba lefelong leo go ile gwa goketša Baisiraele gore ba amogele ditumelo tša bona tšeo di bego di tswalana le temo.

Bakanana ba be ba rapela Bobaali ba bantši—medimo yeo go bego go dumelwa gore e nontšha mobu. Ka ntle le go lema naga le go buna tšeo e di tšweletšago, ge nako e dutše e e-ya Baisiraele ba ile ba thoma go rapela medimo ya Bakanana ka ge e le banei ba motlalo wa dijo. Ka baka leo, ba bantši kua Isiraeleng ba ile ba itira tše e kego ba rapela Jehofa, eupša ge e le gabotse e be e le bahlanogi ka mo go feletšego.

Temošo e Matla go Rena Lehono

Ga go bonagale Baisiraele ba be ba ikemišeditše ka tsela le ge e le efe go akaretšwa borapeding bja Baali le bokgopong bja bjona ge ba be ba thoma go kopana le batho ba Naga ya Kholofetšo. Lega go le bjalo, segwera sa bona se ile sa ba lebiša moo. Na ga se ra swanela go letela mafelelo a bjalo a kotsi ge e ba re tlwaelana le bao ba ka bonagalago ba e-na le bogwera eupša ba se na ditumelo, ditekanyetšo le melao ya motheo ya Bokriste tše di swanago le tša rena? Ke therešo gore go kopana mo go itšego le bao e sego badumedi go ka nyakega lefelong la mošomo, sekolong goba gaešita le ka gae. Lega go le bjalo, phihlelo ya Baisiraele ke temošo go rena ya gore go tsoma segwera se bjalo ke go ipiletša mathata. Beibele e bolela therešo ye yeo e sa ganetšegego ge e re: “Ditlwaelano tše mpe di senya mekgwa e holago.”—1 Bakor. 15:33.

Lehono, re lebeletšana le ditlhohlo tše swanago le tšeo Baisiraele ba ilego ba lebeletšana le tšona. Lekoko la lehono la batho le na le medingwana e mentši. E akaretša tšhelete, go ba naletšana ya dipapadi tša sethaleng, go ba naletšana ya boithabišo, ditshepedišo tša dipolitiki, baetapele ba itšego ba bodumedi gaešita le ditho tša lapa. Go na le kgonagalo ya gore re thome go tshwenyega kudu bophelong ka selo le ge e le sefe sa dilo tše. Go hlagolela ditswalano tša kgaufsi le bao ba sa ratego Jehofa go ka re senya moyeng.

Dikopano tša botona le botshadi tše di sego molaong di be di kgatha tema e kgolo borapeding bja Baali bjoo bo ilego bja kgahla le go goketša Baisiraele ba bantši. Melaba e swanago e sa dutše e goketša ba bangwe ba batho ba Modimo. Ka mohlala, ka go kgotla konotswana ya khomphutha a le ka gae, e ka ba feela seo motho yo a fagahlelago go tseba goba yo a foregago gabonolo a ka se dirago go šilafatša letswalo la gagwe le lebotse. E ka ba mo go nyamišago e le ruri ge e ba Mokriste a ka goketšwa ke diswantšho tše di kgothaletšago bootswa Inthaneteng!

“Ba Lehlôxônôlô ké Ba-lôta-mabohlatse-’axwe”

Ke phetho ya motho ka noši go kwa Jehofa goba go se mo kwe tabeng ya go kgetha batho bao re gweranago le bona. (Doit. 30:19, 20) Ka baka leo, re swanetše go ipotšiša gore: ‘Ke fetša dinako tša boiketlo le bomang? Ba na le ditekanyetšo dife e bile ba itshwara bjang? Na ba rapela Jehofa? Na go tswaka-tswakana le bona go tla nkgothaletša go ba Mokriste yo kaone?’

Mopsalme o opetše ka gore: “Ba lehlôxônôlô ké ba-loka-ka-tsela, bà swere melaô ya Morêna. Ba lehlôxônôlô ké ba-lôta-mabohlatse-’axwe, ba a nyaka ka pelo ka moka.” (Ps. 119:1, 2) Ka kgonthe, “wa lehlôxônôlô ké e a boifaxo Morêna, mang le mang a sepelaxo ditseleng tša xaxwe.” (Ps. 128:1) Mabapi le go kgetha batho bao re gweranago le bona, anke re ithuteng diphošong tša Baisiraele gomme re kwe Jehofa ka mo go feletšego.—Die. 13:20.

[Seswantšho go letlakala 26]

Go itswakanya le batho bao ba sa ratego Jehofa go ka re lebiša borapeding bja diswantšho