Sepela Ditseleng tša Jehofa

“Wa lehlôxônôlô ké e a boifaxo Morêna, mang le mang a sepelaxo ditseleng tša xaxwe.”—PS. 128:1.

1, 2. Ke ka baka la’ng re ka kgodišega gore go a kgonega go thaba?

LETHABO—yo mongwe le yo mongwe o a le nyaka. Eupša ka ntle le pelaelo o tla dumela gore go kganyoga lethabo gaešita le go le phegelela ga go swane le go ba le lona.

² Lega go le bjalo, go thaba go a kgonega. Psalme 128:1 e re: “Wa lehlôxônôlô ké e a boifaxo Morêna, mang le mang a sepelaxo ditseleng tša xaxwe.” Re ka thaba ge e ba re hlompha Modimo e bile re sepela ditseleng tša gagwe ka go dira thato ya gagwe. Se se ka ba le mafelelo afe boitshwarong bja rena le dikeng tšeo re di bonagatšago?

Ipontšhe o Botega

3. Go botega go tswalana bjang le boineelo bja rena go Modimo?

³ Bao ba boifago Jehofa ba a botega, go swana le yena. Jehofa o ile a phethagatša kholofetšo e nngwe le e nngwe yeo a e holofeditšego Isiraele ya bogologolo. (1 Dikx. 8:56) Boineelo bja rena go Modimo ke kholofetšo e bohlokwa kudu yeo re ka e dirago, gomme go dula re rapela go tla re thuša go phethagatša seo re se holofeditšego. Re ka rapela go swana le kamoo mopsalme Dafida a rapetšego ka gona ge a re: “Wene Modimo O kwile ’kênô tša-ka; . . . Ké mo ke tl’o xo hlaba sefela sa ’ina la xaxo xo ya xo ile, ka phêtha ’kênô tša-ka ka mehla le mehla.” (Ps. 61:5, 8; Mmo. 5:4-6) Gore re be bagwera ba Modimo, re swanetše go ba bao ba botegago.—Ps. 15:1, 4.

4. Jefeta le morwedi wa gagwe ba ile ba lebelela bjang keno yeo e bego e diretšwe Jehofa?

⁴ Mehleng ya Baahlodi ba Isiraele, Jefeta o ile a dira keno ya gore ge e ba Jehofa a ka dira gore a fenye Baamoni, o tla tliša selo sa pele seo a tla kopanago  le sona ge a boa go tšwa ntweng e le “sehlabêlô.” Selo seo e ile ya ba morwedi wa Jefeta—ngwana wa gagwe a nnoši. Ka tumelo go Jehofa, Jefeta le morwedi wa gagwe yo a sa nyalwago ba ile ba phethagatša keno yeo. Gaešita le ge lenyalo le go belega bana di be di tšeelwa godimo kua Isiraeleng, morwedi wa Jefeta o ile a kgetha go dula a sa nyalwa gomme a ba le tokelo ya go tsenela tirelo e kgethwa sekgethweng sa Jehofa.—Baa. 11:28-40.

5. Hanna o ile a ipontšha a botega ka tsela efe?

⁵ Mosadi yo a boifago Modimo e lego Hanna o itlhatsetše a botega. O be a dula le monna wa gagwe wa Molefi, Elikana, le mosadi wa gagwe yo mongwe, Penina, lefelong la dithaba la Efuraimi. Penina o ile a belega bana ba mmalwa gomme a kwera Hanna yo e bego e le moopa kudu-kudu ge lapa le be le e-ya tabarenakeleng. Lebakeng le lengwe dinakong tše, Hanna o ile a dira keno ya gore ge a ka belega morwa, o tla mo nea Jehofa. Go se go ye kae o ile a ima gomme a belega mošemane yo a ilego a rewa leina la Samuele. Ka morago ga go mo tshweša, Hanna o ile a mo iša go Modimo kua Silo, a neela Samuele go Jehofa “bophelô bya xaxwe ka moka.” (1 Sam. 1:11) Ka baka leo o ile a phethagatša keno ya gagwe gaešita le ge a be a sa tsebe gore o tla feleletša a bile le bana ba bangwe.—1 Sam. 2:20, 21.

6. Go botega ga Tigiko go ile gwa bonagatšwa bjang?

⁶ Mokriste wa lekgolong la pele la nywaga e lego Tigiko e be e le monna yo a ka botwago le “modiredi yo a botegago.” (Bakol. 4:7) Tigiko o ile a sepela le moapostola Paulo go tloga Gerika go phatša Matsedonia, ba tsena Asia Minor, mohlomongwe le go leba Jerusalema. (Dit. 20:2-4) Mohlomongwe e ka ba e be e le yena “ngwanabo rena” yo a ilego a thuša Tito go rulaganya meneelo bakeng sa badumedi-gotee le bona ba kua Judea bao ba bego ba se na sa bona. (2 Bakor. 8:18, 19; 12:18) Ge Paulo a be a golegilwe la mathomo kua Roma, o dirile gore motseta yo a botegago e lego Tigiko a iše mangwalo go badumedi-gotee kua Efeso le Kolose. (Baef. 6:21, 22; Bakol. 4:8, 9) Nakong ya ge a be a golegilwe la bobedi kua Roma, Paulo o ile a roma Tigiko Efeso. (2 Tim. 4:12) Ge e ba re botega, le rena re tla šegofatšwa tirelong ya Jehofa.

7, 8. Ke ka baka la’ng re ka bolela gore Dafida le Jonathane e be e le bagwera ba paale?

⁷ Modimo o letetše gore re be bagwera bao ba botegago. (Die. 17:17) Morwa wa Kgoši Saulo e lego Jonathane o ile a gwerana le Dafida. Ge Jonathane a be a e-kwa gore Dafida o bolaile Goliata, “pelo ya Jonathane ya xomarêlana le ya Dafida; Jonathane a mo rata byalo ka xe a rata pelo ya xaxwe.” (1 Sam. 18:1, 3) Jonathane o ile a ba a lemoša Dafida nakong ya ge Saulo a be a nyaka go mmolaya. Ka morago ga ge Dafida a tšhabile, Jonathane o ile a kopana le yena gomme a dira kgwerano le yena. Go bolela le Saulo ka Dafida go ile gwa nyaka go dira gore Jonathane a lahlegelwe ke bophelo, eupša bagwera ba ba babedi ba ile ba kopana gape gomme ba mpshafatša tlemo ya bona ya segwera. (1 Sam. 20:24-41) Ge ba be ba kopana la mafelelo, Jonathane o ile a matlafatša Dafida “ka Modimo.”—1 Sam. 23:16-18.

⁸ Jonathane o hwile ntweng kgahlanong le Bafilisita. (1 Sam. 31:6) Sellong sa gagwe, Dafida o itše: “Jonathane Ngwana wešo! Ke nyama ka ’baka la xaxo. O be O nnatefêla ruri. O mmakaditše ka leratô la’xo La xo phala ’ratô la basadi.” (2 Sam. 1:26) Lerato le e be e le maikwelo a borutho magareng ga bagwera. Dafida le Jonathane e be e le bagwera ba paale.

 Dula o “Ikokobeditše Monaganong”

9. Bohlokwa bja boikokobetšo bo bontšhwa bjang go Baahlodi kgaolo 9?

⁹ Gore re be bagwera ba Modimo, re swanetše go ba bao ba ‘ikokobeditšego monaganong.’ (1 Pet. 3:8; Ps. 138:6) Bohlokwa bja boikokobetšo bo bontšhwa go Baahlodi kgaolo 9. Morwa wa Gideoni e lego Jothama o itše: “Dihlare di ile tša ya xo ipeêla kxoši.” Go ile gwa bolelwa ka mohlware, mogo le morara. E be e swantšhetša batho ba swanelegago bao ba bego ba sa nyake go buša Baisiraele-gotee le bona. Eupša mošwana—wo o dirišetšwago mollo feela—o be o swantšhetša bogoši bja Abimeleke wa go ikgogomoša, mmolai yo a bego a nyaka go gatelela ba bangwe. Gaešita le ge a ‘feditše nywaga e meraro a buša Isiraele,’ o hwile go sa letelwa. (Baa. 9:8-15, 22, 50-54) Ruri go kaone kudu go ba bao ba ‘ikokobeditšego monaganong’!

10. O ithutile’ng tabeng ya go palelwa ga Heroda ke go “nea Modimo letago”?

¹⁰ Lekgolong la pele la nywaga C.E., go ile gwa tsoga kgohlano magareng ga Kgoši Heroda Agaripa wa Judea yo a ikgogomošago le badudi ba Tiro le Sidone, bao ba bego ba nyaka go dira khutšo le yena. Lebakeng le lengwe ge Heroda a be a bolela phatlalatša, ba goeleditše ba re: “Ke lentšu la Modimo, e sego la motho!” Heroda ga se a ka a gana theto yeo, gomme morongwa wa Jehofa o ile a mo otla ke moka a hwa lehu le bohloko “gobane ga se a nea Modimo letago.” (Dit. 12:20-23) Go thwe’ng ge e ba ka tsela e itšego re le diboledi goba barutiši bao ba nago le bokgoni ba ditherešo tša Beibele? Gona a re reteng Modimo ka seo a re dumelelago go se dira.—1 Bakor. 4:6, 7; Jak. 4:6.

E-ba Sebete Gomme o Tie Matla

11, 12. Phihlelo ya Henoge e bontšha bjang gore Jehofa o nea bahlanka ba gagwe sebete le matla?

¹¹ Ge e ba re sepela ditseleng tša Jehofa ka boikokobetšo, o tla re nea sebete le matla. (Doit. 31:6-8, 23) Henoge, monna wa bošupa lešikeng la moloko wa batho go tloga ka Adama, o ile a sepela le Modimo ka sebete ka go phegelela tsela e lokilego gare ga batho ba kgopo ba mehleng ya gagwe. (Gen. 5:21-24) Jehofa o ile a matlafatša Henoge gore a tsebatše molaetša o matla go bona ka gobane ba be ba dira le go bolela dilo tše di sa bontšhego go boifa Modimo. (Bala Juda 14, 15.) Na o na le sebete se se nyakegago bakeng sa go tsebatša dikahlolo tša Modimo?

¹² Jehofa o ile a phethagatša kahlolo bathong bao ba sa mmoifego ka Meetse-fula a lefase ka moka a mehleng ya Noa. Lega go le bjalo, boporofeta bja Henoge bo a re kgothatša, ka gobane kgaufsinyane batho bao ba sa boifego Modimo ba mehleng ya rena ba tla fedišwa ke lešaba la bakgethwa ba Modimo. (Kut. 16:14-16; 19:11-16) Ge a araba dithapelo tša rena, Jehofa o re nea sebete sa go tsebatša molaetša wa gagwe, go sa šetšwe gore o tswalana le dikahlolo tša gagwe goba ditšhegofatšo tša gagwe ka tlase ga bolaodi bja Mmušo.

13. Ke ka baka la’ng re ka kgonthišega gore Modimo a ka re nea sebete le matla ao re a nyakago e le gore re ka lebeletšana le mathata ao a gateletšago?

¹³ Re nyaka sebete seo re se newago ke Modimo le matla gore re kgone go lebeletšana le mathata ao a gateletšago. Ge Esau a be a nyala basadi ba babedi ba Bahethe, “ba hlwile ba nyamiša [batswadi ba gagwe] Isaka le Rebeka pelo.” Rebeka o ile a ba a lla ka gore: “Nna bophelô bo ntenne ka barwedi bá ba Hethe; xe [morwa wa rena] Jakobo le yêna a ka tšea mosadi wa barwedi ba Hethe, e a etšaxo bôná-bao barwedi ba naxa yé, xôna nka re: Ke sa phelêla’ng?” (Gen. 26:34, 35; 27:46) Isaka o ile a gata mogato gomme a romela Jakobo gore a ye go nyaka mosadi gare ga barapedi ba Jehofa. Gaešita le ge Isaka le Rebeka ba be ba ka se fetoše seo Esau a bego a se dirile, Modimo o ba neile bohlale, sebete le matla a go dula ba Mmotegela. Ge e ba re rapelela thušo e nyakegago, le rena Jehofa o tla re nea seo re se kgopelago.—Ps. 118:5.

14. Ngwanenyana wa Moisiraele o bontšhitše sebete bjang?

¹⁴ Nywaga-kgolo e mentši ka morago, ngwanenyana yo monyenyane wa Moisiraele yo a bego a thopilwe ke sehlopha sa bathopi o ile a ba mohlanka lapeng la moetapele wa madira a Siria e lego Naamane, monna yo a bego a tlaišwa ke lephera. Ka ge a be a kwele ka mehlolo yeo Modimo a e dirilego ka moporofeta Eliša, ka sebete ngwanenyana yo o ile a botša mosadi wa Naamane gore: ‘Ge mong wa-ka a be a ka ya Isiraele, moporofeta wa Jehofa o be a tla mo fodiša lephera.’  Naamane o ile a ya Isiraele gomme o ile a fodišwa ka tsela ya mohlolo. (2 Dikx. 5:1-3) Ruri ngwanenyana yo ke mohlala o mobotse go bafsa bao ba holofelago gore Jehofa o tla ba nea sebete sa go nea bohlatse go barutiši, bao ba tsenago le bona sekolo le ba bangwe!

15. Ke mogato ofe o bontšhago sebete wo o ilego wa gatwa ke mohlanka wa lapa la Ahaba e lego Obadya?

¹⁵ Sebete seo re se newago ke Modimo se re thuša go kgotlelela tlaišo. Ela hloko mohlanka wa lapa la Kgoši Ahaba e lego Obadya, wa mehleng ya moporofeta Eliya. Ge Mohumagadi Isebele a be a laela gore baporofeta ba Modimo ba bolawe, Obadya o ile a uta ba 100 ‘a iša ba masome a mahlano ka mphomeng o mongwe, go o mongwe a iša ba masome a mahlano.’ (1 Dikx. 18:13; 19:18) Na ka sebete o tla thuša Bakriste-gotee le wena bao ba tlaišwago, go etša ge Obadya a thušitše baporofeta ba Jehofa?

16, 17. Aristareko le Gayo ba ile ba arabela bjang ge ba be ba tlaišwa?

¹⁶ Ge e ba re tlaišwa, re ka holofela gore Jehofa o tla ba le rena. (Baroma 8:35-39) Ka ntle ga meago yeo go bapalelwago dipapadi tša sethaleng go yona kua Efeso, badirišani ba Paulo e lego Aristareko le Gayo ba ile ba kopana le sehlopha sa ba dikete. Morudi wa silifera e lego Demetrio o be a tsošitše moferefere. Yena gotee le barudi ba bangwe ba silifera ba be ba dira mafelo a makgethwa a silifera a modimogadi Aratemise, gomme kgwebo ya bona e tšweletšago e ile ya ba kotsing ka gobane modiro wa Paulo wa boboledi o ile wa dira gore bontši bja badudi ba motseng woo ba tlogele go rapela medimo ya diswantšho. Sehlopha se ile sa gogela Aristareko le Gayo ka gare ga lefelo la dipapadi tša sethaleng gomme la thoma go goeletša ka gore: “Aratemise wa Baefeso ke yo mogolo!” Mohlomongwe Aristareko le Gayo ba be ba letetše gore ba tla bolawa, eupša mongwaledi wa motse o ile a homotša lešaba.—Dit. 19:23-41.

¹⁷ Ge nkabe o ile wa ba le phihlelo e bjalo, na o be o tla leka go hwetša bophelo bjo bo se nago ditlhohlo? Ga go na seo se bontšhago gore Aristareko goba Gayo ba ile ba se sa ba le sebete. Ka ge a be a e-tšwa Thesalonika, Aristareko o be a tseba gore go bolela ditaba tše dibotse go be go tla feleletša ka tlaišo. Lebakeng le lengwe pejana, go ile gwa tsoga moferefere ge Paulo a be a dira boboledi gona moo. (Dit. 17:5; 20:4) Ka ge Aristareko le Gayo ba be ba sepela ka ditsela tša Jehofa, ba ile ba ba le matla le sebete tšeo ba di neilwego ke Modimo gore ba kgotlelele tlaišo.

Go Bea Leihlo Dikgahlegong tša ba Bangwe

18. Perisika le Akhwila ba be ba “beile leihlo” bjang dikgahlegong tša ba bangwe?

¹⁸ Go sa šetšwe gore ga bjale re a tlaišwa goba ga re tlaišwe, re swanetše go tshwenyega ka Bakriste-gotee le rena. Perisika le Akhwila ba be ba “beile leihlo” dikgahlegong tša ba bangwe. (Bala Bafilipi 2:4.) Banyalani ba bao ba beago mohlala ba ka ba ba ile ba nea Paulo marobalo kua Efeso, moo morudi wa silifera e lego Demetrio a ilego a tsoša moferefere wo go boletšwego ka wona pejana. Boemo bjoo bo ka ba bo ile bja tutueletša Akhwila le Perisika go “ipea kotsing ya go kgaolwa melala” bakeng sa Paulo. (Baroma 16:3, 4; 2 Bakor. 1:8) Lehono, go tshwenyega ka bana babo rena bao ba tlaišwago go dira gore re be “šedi bjalo ka dinoga.” (Mat. 10:16-18) Re dira modiro wa rena ka šedi gomme re gana go ba eka ka go bolela maina a bona goba tsebišo e nngwe go bao ba ba tlaišago.

19. Ke dilo dife tše dibotse tšeo Dorokase a ilego a di direla ba bangwe?

¹⁹ Go na le ditsela tše di fapa-fapanego tša go bea leihlo dikgahlegong tša ba bangwe. Bakriste  ba bangwe ba na le dinyakwa tše itšego, gomme re ka no ba re kgona go kgotsofatša dinyakwa tšeo. (Baef. 4:28; Jak. 2:14-17) Phuthegong ya lekgolong la pele la nywaga kua Jopa, go be go e-na le mosadi yo a nago le seatla se se bulegilego yo a bitšwago Dorokase. (Bala Ditiro 9:36-42.) Dorokase “o be a tletše ditiro tše dibotse le dimpho tša kgaugelo” tšeo go lego molaleng gore di be di akaretša go rokela bahlologadi ba badiidi diaparo. Lehu la gagwe ka 36 C.E. le ile la nyamiša bahlologadi kudu. Modimo o ile a diriša moapostola Petro go tsoša Dorokase, gomme go na le kgonagalo e kgolo ya gore o feditše bophelo bja gagwe ka moka mo lefaseng a bolela ditaba tše dibotse ka lethabo le go direla ba bangwe dilo tše dibotse. Re thaba e le ruri lehono go ba le basadi ba bjalo ba Bakriste bao ba se nago boithati!

20, 21. (a) Kgothatšo e tswalana bjang le go lebelela dikgahlego tša ba bangwe? (b) O ka dira’ng gore o be yo a kgothatšago?

²⁰ Re bontšha go kgahlegela ba bangwe ka go ba kgothatša. (Baroma 1:11, 12) Modirišani-gotee le Paulo e lego Silase e be e le mothopo wa kgothatšo. Ka morago ga ge go be go dirilwe phetho mabapi le kgang ya lebollo ka 49 C.E., sehlopha se bušago kua Jerusalema se ile sa romela baemedi gore ba iše lengwalo go badumedi bao ba lego mafelong a mangwe. Silase, Judase, Baranaba le Paulo ba ile ba le iša Antiokia. Gona moo Silase le Judase “ba ile ba kgothatša bana babo bona ka dipolelo tše dintši gomme ba ba matlafatša.”—Dit. 15:32.

²¹ Ka morago, Paulo le Silase ba ile ba golegwa kua Filipi eupša ba ile ba lokollwa ka baka la tšhišinyego ya lefase. Ruri ba be ba thabetše go nea bohlatse le go bona mohlapetši wa kgolego le lapa la gagwe ba fetoga badumedi! Pele ga ge ba ka tloga nageng yeo, Silase le Paulo ba ile ba kgothatša bana babo bona. (Dit. 16:12, 40) Ka go swana le Paulo le Silase, katanela go kgothatša ba bangwe ka ditlhaloso tša gago, dipolelo le ka tirelo e mafolofolo. Le gona ge e ba o e-na le “lentšu . . . la kgothatšo,” leka ka mo o ka kgonago ka gona go le ‘bolela.’—Dit. 13:15.

Tšwela Pele o Sepela ka Ditsela tša Jehofa

22, 23. Re ka holwa bjang e le ka kgonthe ke dipego tša Beibele?

²² Ruri re swanetše go ba bao ba lebogago diphihlelo tša kgonthe tšeo di begilwego ka Lentšung la Jehofa, “Modimo wa kgothatšo yohle”! (2 Bakor. 1:3, Byington) E le gore re holwe ke diphihlelo tše, re swanetše go diriša dithuto tša Beibele maphelong a rena gomme re dumelele moya o mokgethwa wa Modimo gore o re hlahle.—Bagal. 5:22-25.

²³ Go naganišiša ka dipego tša Beibele go tla re thuša go bonagatša dika tše di kgahlišago Modimo. Go tla matlafatša tswalano ya rena le Jehofa, yo a re neago “bohlale le tsebô le thabô.” (Mmo. 2:26) Ka baka leo, re tla dira gore pelo e lerato ya Modimo e thabe. (Die. 27:11) Anke re ikemišetšeng go dira bjalo ka go tšwela pele re sepela ditseleng tša Jehofa.

O be o tla Araba Bjang?

• Ke bjang o ka ipontšhago o le yo a botegago?

• Ke ka baka la’ng re swanetše go ba bao ba ‘ikokobeditšego monaganong’?

• Dipego tša Beibele di ka re thuša bjang go ba le sebete?

• Ke ka ditsela dife re ka beago leihlo dikgahlegong tša ba bangwe?

[Dipotšišo tša Thuto]

[Seswantšho go letlakala 8]

Jefeta yo a botegago le morwedi wa gagwe ba ile ba phethagatša keno, gaešita le ge go dira bjalo go be go le thata

[Seswantšho go letlakala 10]

Bafsa, le ithutile’ng go ngwanenyana wa Moisiraele?

[Seswantšho go letlakala 11]

Dorokase o ile a kgotsofatša bjang dinyakwa tša Bakriste-gotee le yena?