Feto-fetoga Le Maemo, E-ba Yo A Leka-lekanego

“Tšwela pele o ba gopotša gore . . . e be ba feto-fetogago le maemo.” —TITO 3:1, 2, mongwalo wa tlase wa NW.

1, 2. Mangwalo a re’ng ka go ba yo a feto-fetogago le maemo, gona ke ka baka la’ng se e le se se swanetšego?

JEHOFA, Tatago rena wa legodimong yo lerato, ke yo bohlale ka tsela e sa lekanywego. Bjalo ka dibopiwa tša gagwe, re tsoma tlhahlo go yena maphelong a rena. (Ps. 48:14) Morutiwa wa Mokriste Jakobo o re botša gore “bohlale bjo bo tšwago godimo, sa pele-pele bo sekile, gape bo na le khutšo, bo leka-lekane [bo “feto-fetoga le maemo,” mongwalo wa tlase wa NW], bo ikemišeditše go kwa, bo tletše kgaugelo le dienywa tše botse, ga bo kgetholle ka go beba sefahlego, ga bo na boikaketši.”—Jak. 3:17.

² Moapostola Paulo o kgothatša ka gore: “Anke go leka-lekana [“(go) feto-fetoga le maemo,” Kingdom Interlinear] ga lena go tsebje bathong bohle.” * (Bafil. 4:5) Kriste Jesu ke Morena e bile ke Hlogo ya phuthego ya Bokriste. (Baef. 5:23) Ruri go bohlokwa gore ka moka ga rena re dire dilo ka tsela e leka-lekanego, re kwe tlhahlo ya Kriste gomme re feto-fetoge le maemo ge re dirišana le batho ba bangwe!

3, 4. (a) Bontšha mehola e tlišwago ke ge re feto-fetoga le maemo. (b) Ke’ng seo re tlago go se ahla-ahla?

³ Re holwa ke go ba bao ba feto-fetogago le maemo ka tsela e nago le teka-tekano. Ka mohlala: Ka morago ga gore leano la botšhošetši le utollwe kua Brithania, banamedi ba bantši ba sefofane ba be ba bonagala ba ikemišeditše go latela ditaelo tša gore ba se ke ba namela sefofane ba rwele dilo tšeo nakong e fetilego ba bego ba dumelelwa go namela ba di rwele. Ge re otlela koloi, re bona go nyakega gore re fokotše lebelo bakeng sa baotledi ba bangwe, go swana le ge re fihla magahlanong a ditsela, go kgonthišetša gore yo mongwe le yo mongwe o šireletšegile le gore dikoloi di itshepelela gabotse.

⁴ Bontši bja rena re thatafalelwa ke go feto-fetoga le maemo. Bakeng sa go re thuša, anke re ahla-ahleng dikarolo tše tharo tša go feto-fetoga le maemo, e lego, boikemišetšo bja rena, boemo bja rena bja kgopolo ka bolaodi gotee le bokgole bjoo re ka fihlago go bjona tabeng ya go feto-fetoga le maemo.

Ke ka Baka La’ng re Swanetše go Feto-fetoga le Maemo?

5. Tlase ga Molao wa Moše, ke’ng seo se bego se ka tutueletša lekgoba go kgetha go dula le mong wa lona?

⁵ Mohlala wa pele ga mehla ya Bokriste o lebiša tlhokomelo boikemišetšong bjo bo nepagetšego bja go ba bao ba feto-fetogago le maemo. Ka tlase ga Molao wa Moše, Baheberu bao e bego e le makgoba ba be ba swanetše go hunollwa ka ngwaga wa bošupa wa bohlanka bja bona goba ka ngwaga wa Mogobo, go ithekgile ka gore ke ofe woo o tlago pele. Eupša lekgoba le be le ka kgetha go dula e le lekgoba. (Bala Ekisodo 21:5, 6.) Ke’ng seo se bego se ka tutueletša lekgoba go dira bjalo? Lerato le tutueditše lekgoba gore le dule le le boemong bjoo, ka tlase ga bolaodi bja mong wa lona yo a naganelago.

6. Lerato le akaretšwa bjang go beng ga rena bao ba feto-fetogago le maemo?

⁶ Ka tsela e swanago, go rata Jehofa go re šušumeletša go neela maphelo a rena go yena le go phelela boineelo bja rena. (Baroma 14:7, 8) Moapostola Johane o ngwadile gore: “Se ke seo lerato la Modimo le se bolelago, gore re boloke ditaelo tša gagwe; gomme ditaelo tša gagwe ga di  boima.” (1 Joh. 5:3) Lerato le ga le nyake tša go ikhola. (1 Bakor. 13:4, 5) Ge re dirišana le batho ba bangwe, go rata moagišani go re šušumeletša go feto-fetoga le maemo gomme ra etiša dikgahlego tša bona pele. Go e na le go ba le boithati, re šetša dikgahlego tša ba bangwe.—Bafil. 2:2, 3.

7. Go ba bao ba feto-fetogago le maemo go kgatha tema efe bodireding bja rena?

⁷ Mantšu a rena le ditiro tša rena ga se tša swanela go kgopiša ba bangwe. (Baef. 4:29) Ee, lerato le tla re šušumeletša go phema go dira selo le ge e le sefe seo se ka šitišago batho ba ditlogo tše sa swanego le ditšo go dira tšwelopele e ba lebišago go hlankeleng Jehofa. Se gantši se akaretša go feto-fetoga ga rena le maemo. Ka mohlala, dikgaetšedi tšeo e lego baromiwa tšeo di tlwaetšego go tlola ka ditlolo goba dinaelone ga di gapeletše go tlola ka tšona mafelong ao seo se ka dirago gore go belaelwe boitshwaro bja tšona le go kgopiša ba bangwe.—1 Bakor. 10:31-33.

8. Go rata Modimo go ka re thuša bjang go itshwara bjalo ka ‘ba banyenyane’?

⁸ Go rata Jehofa go re thuša go fenya boikgantšho. Ka morago ga kgohlano ya barutiwa ya gore ke mang yo e lego yo mogolo go bona, Jesu o ile a emiša ngwana yo monyenyane gare ga bona. O ile a hlalosa gore: “Mang le mang yo a amogelago ngwana yo yo monyenyane ka baka la leina la-ka, le nna o a nkamogela, gomme mang le mang yo a nkamogelago, o amogela le yo a nthomilego. Gobane yo a itshwarago bjalo ka yo monyenyane gare ga lena, ke yena yo mogolo.” (Luka 9:48; Mar. 9:36) Re le ka o tee ka o tee, re ka thatafalelwa ke go itshwara bjalo ka “yo monyenyane.” Go se phethagale ga leabela gotee le tshekamelo ya go ikgantšha di ka re tutueletša go tsoma bophagamo, eupša boikokobetšo bo tla re thuša go feto-fetoga le maemo.—Baroma 12:10.

9. Gore re feto-fetoge le maemo, ke’ng seo re swanetšego go se ela hloko?

⁹ Gore re feto-fetoge le maemo, re swanetše go ela hloko bolaodi bjoo bo hlomilwego ke Modimo. Bakriste ba therešo ka moka ba lemoga molao o bohlokwa wa motheo wa bohlogo. Moapostola Paulo o bontšhitše Bakorinthe se gabotse ka gore: “Ke nyaka ge le tseba gore hlogo ya monna yo mongwe le yo mongwe ke Kriste; hlogo ya mosadi yona ke monna; hlogo ya Kriste yona ke Modimo.”—1 Bakor. 11:3.

10. Go ikokobeletša ga rena bolaodi bja Jehofa go bontšha’ng?

¹⁰ Go ikokobeletša bolaodi bja Modimo go bontšha gore re a mmota e bile re a mo holofela bjalo ka Tatago rena yo lerato. O lemoga sohle seo se diregago le gona a ka re putsa ka mo go swanetšego. Go dula re gopola seo go bohlokwa ge ba bangwe ba sa re hlomphe goba ba befelwa e bile ba tuka bogale. Paulo o ngwadile gore: “Ge e ba go kgonega, go fihla moo go ithekgilego ka lena, e-bang le khutšo le batho bohle.” Paulo o gateletše keletšo yeo ka taelo ye: “Le se ke la itefeletša, baratiwa, eupša šuthelelang kgalefo; gobane go ngwadilwe gwa thwe: ‘Tefetšo ke ya-ka, ke tla lefetša, go re’alo Jehofa.’”—Baroma 12:18, 19.

11. Re ka bontšha bjang gore re ikokobeletša bohlogo bja Kriste?

¹¹ Selo se sengwe gape seo re swanetšego go se hlompha ka phuthegong ya Bokriste ke bolaodi bjo bo hlomilwego ke Modimo. Kutollo kgaolo 1 e bontšha Kriste Jesu a swere “dinaledi” tša phuthego ka seatleng sa gagwe sa le letona. (Kut. 1:16, 20)  Ka kakaretšo, “dinaledi” tše di swantšhetša dihlopha tša bagolo, goba balebeledi, ka diphuthegong. Balebeledi ba bjalo ba kgethilwego ba ikokobeletša bolaodi bja Kriste e bile ba ekiša tsela ya gagwe e botho ya go dirišana le ba bangwe. Bohle ka phuthegong ba ikokobeletša tokišetšo yeo Jesu a e dirilego ya gore “mohlanka yo a botegago le wa temogo” a nee dijo tša moya ka nako e swanetšego. (Mat. 24:45-47) Lehono, boikemišetšo bja rena bja go bala tsebišo ye le go e diriša bo bontšha gore re ikokobeletša bohlogo bja Kriste, bjoo bo godišago khutšo le botee.—Baroma 14:13, 19.

Feto-fetoga le Maemo—Go Fihla Bokgoleng Bofe?

12. Ke ka baka la’ng go itumelelanya le maemo go e-na le mellwane?

¹² Lega go le bjalo, go feto-fetoga le maemo goba go itumelelanya le ona ga go bolele gore re kwanantšha tumelo ya rena goba melao ya rena ya motheo e tšwago go Modimo. Bakriste ba pele ba ile ba dira’ng ge baetapele ba bodumedi ba be ba ba laela gore ba kgaotše go ruta ka leina la Jesu? Petro le baapostola ba bangwe ba ile ba bolela ka sebete gore: “Re swanetše go kwa Modimo e le mmuši go e-na le batho.” (Dit. 4:18-20; 5:28, 29) Ka gona lehono, ge balaodi ba mmušo ba leka go re gapeletša go kgaotša go bolela ditaba tše dibotse, ga re kgaotše, gaešita le ge re ka fetoša mekgwa ya rena e le gore re ka swaragana le boemo ka bohlale. Ge e ba go e-na le dithibelo tše itšego bodireding bja ntlo le ntlo, re ka tsoma ditsela tše dingwe tša go ikgokaganya le beng ba dintlo gomme ra tšwela pele re e-kwa taelo yeo re e filwego ke Modimo. Ka mo go swanago, ge “balaodi ba bagolo” ba thibela diboka tša rena, re bokana ka sephiring re le dihlopha tše dinyenyane.—Baroma 13:1; Baheb. 10:24, 25.

13. Jesu o itše’ng mabapi le go ikokobeletša bao ba nago le matla a taolo?

¹³ Thutong ya gagwe ya Thabeng, Jesu o ile a bontšha go nyakega ga go ikokobeletša bolaodi, o itše: “Ge motho a nyaka go ya kgorong le wena gomme a tšea kobo ya gago ya ka gare, lesa a tšee le kobo ya gago ya ka ntle; ge yo mongwe yo a nago le matla a go gapeletša go dira tirelo sekgoba sa maele, e-ya le yena dimaele tše pedi.” (Mat. 5:40, 41) * Go naganela ba bangwe gotee le kganyogo ya go ba thuša le gona go re thuša go dira kamoo go oketšegilego.—1 Bakor. 13:5; Tito 3:1, 2.

14. Ke ka baka la’ng re sa swanela go kwana le bohlanogi?

¹⁴ Lega go le bjalo, kganyogo ya rena ya go feto-fetoga le maemo le ka mohla ga se ya swanela go re dira gore re kwane le bahlanogi. Go ema ga rena ka go tia boemong bjo go a nyakega gore re boloke therešo e sekile le botee bja phuthego. Paulo o ngwadile mabapi le “bana babo rena ba maaka” gore: “Ga se ra ineela go bona ka go ikokobetša, aowa, le ge e le ka iri feela, e le gore therešo ya ditaba tše dibotse e dule e le go lena.” (Bagal. 2:4, 5) Gaešita le ge bohlanogi bo tšwelela ka sewelo, Bakriste ba ineetšego ba tla dula ba tiile bakeng sa seo se lokilego.

Balebeledi ba Swanetše go Feto-fetoga le Maemo

15. Ke ka tsela efe balebeledi ba Bakriste ba ka feto-fetogago le maemo ge ba bokane?

¹⁵ E nngwe ya ditshwanelego tša bao ba kgethelwago go hlankela e le balebeledi e akaretša go ba le boikemišetšo bja go feto-fetoga le maemo. Paulo o ngwadile gore: “Ka gona, molebeledi o swanetše go [ba] . . . yo a leka-lekanego [“feto-fetogago le maemo,” mongwalo wa tlase wa NW.].” (1 Tim. 3:2, 3) Se se bohlokwa kudu ge banna ba kgethilwego ba bokana bakeng sa go ahla-ahla ditaba tša phuthego. Pele ga ge go fihlelelwa phetho, yo mongwe le yo mongwe yo a lego gona o lokologile go ntšha sa mafahleng a gagwe ka mo go kwagalago, gaešita le ge mogolo yo mongwe le yo mongwe a sa gapeletšege go bolela selo se itšego. Nakong ya poledišano, pono ya yo mongwe e ka fetoga ge a e-kwa ba bangwe ba bolela melao ya motheo ya Mangwalo yeo e šomago. Go e na le go gana dipono tša ba bangwe le go kgomarela pono ya gagwe, mogolo yo a godilego ka tsebo o a ikokobetša. Mathomong, go ka ba go be go e-na le dipono tše sa swanego, eupša go naganišiša ka tšona ka thapelo go godiša botee magareng ga bagolo ba nago le boipoetšo le ba feto-fetogago le maemo.—1 Bakor. 1:10; Bala Baefeso 4:1-3.

16. Molebeledi wa Mokriste o swanetše go bonagatša moya wa mohuta mang?

¹⁶ Medirong ya gagwe ka moka, mogolo wa Mokriste o swanetše go katanela go kgomarela  thulaganyo ya pušo ya Modimo. Moya o bjalo o swanetše go bonagatšwa gaešita le ge a diša mohlape, o mo thuša go bontšha go naganela ba bangwe le go ba bontšha botho. Petro o ngwadile gore: “Dišang mohlape wa Modimo wo o lego tlhokomelong ya lena, e sego ka go gapeletšwa, eupša e be ka go rata; le gona e se be ka go rata leruo la go se botege, eupša e be ka go fišega.”—1 Pet. 5:2.

17. Bohle ka phuthegong ba ka bontšha bjang go feto-fetoga le maemo ge ba dirišana le ba bangwe?

¹⁷ Ditho tše tšofetšego tša phuthego di leboga thušo e bohlokwa yeo di e fiwago ke ba banyenyane e bile di ba swara ka seriti. Ka baka leo, bafsa ba hlompha batšofadi bao ba bego ba dutše ba hlankela Jehofa ka nywaga e mentši. (1 Tim. 5:1, 2) Bagolo ba Bakriste ba tsoma banna ba swanelegago bao ba ka ba abelago mediro e itšego le go ba tlwaeletša go hlokomela mohlape wa Modimo. (2 Tim. 2:1, 2) Mokriste yo mongwe le yo mongwe o swanetše go tšeela godimo keletšo ya Paulo e rego: “Kwang bao ba etelelago pele gare ga lena gomme le ikokobetše [“le ipeeng ka tlase,” mongwalo wa tlase wa NW.], gobane ba hlokomela meoya ya lena e le bao ba tlago go ikarabela; e le gore ba dire se ka lethabo e sego ka go fegelwa, gobane se se tla le gobatša.”—Baheb. 13:17.

Go Feto-fetoga le Maemo Bjalo ka Ditho tša Lapa

18. Ke ka baka la’ng go feto-fetoga le maemo e le mo go swanetšego ka lapeng?

¹⁸ Go feto-fetoga le maemo go swanetše go bontšhwa le ka lapeng. (Bala Bakolose 3:18-21.) Beibele e bontšha boikarabelo bja setho se sengwe le se sengwe sa lapa la Bakriste. Tate ke hlogo ya mosadi wa gagwe e bile ke yena yo a nago le boikarabelo bjo bogolo bja go hlahla bana. Mosadi o swanetše go lemoga taolo ya molekane wa gagwe, gomme bana ba swanetše go katanela go kwa, e lego tsela yeo e kgahlago Morena. Setho se sengwe le se sengwe sa lapa se ka godiša botee le khutšo ya lapa ka go feto-fetoga le maemo ka tsela e swanetšego le e leka-lekanego. Beibele e na le mehlala e ka thušago go bontšha ntlha ye.

19, 20. (a) Bontšha phapano magareng ga mohlala wa Eli le wa Jehofa wa mabapi le go feto-fetoga le maemo. (b) Batswadi ba ka ithuta dithuto dife mehlaleng ye?

¹⁹ Ge Samuele e be e sa le mošemanyana, Eli o be a hlankela e le moperisita yo a phagamego Isiraeleng. Lega go le bjalo, barwa ba Eli, e lego Hofini le Pinease, e be e le “batho ba dihlôla” bao ba bego ba sa “re selô ka Morêna.” Eli o be a e-kwa dipego tše mpe ka bona, go akaretša le taba ya gore ba be ba dira bootswa le basadi bao ba bego ba hlankela mojakong wa ngwako wa kgwerano. O ile a arabela bjang? Eli o ile a ba botša gore ge e ba sebe sa bona se be se le kgahlanong le Jehofa, go be go se na motho yoo a bego a tlo ba rapelela. Eupša o ile a palelwa ke go ba phošolla le go ba laya. Ka baka  leo, barwa ba Eli ba ile ba tšwela pele tseleng ya bona e mpe. Mafelelong, Jehofa ka toka o ile a bontšha gore ba swanelwa ke kotlo ya lehu. Ka morago ga go kwa gore ba hwile, Eli le yena o ile a hwa. A mafelelo a nyamišago gakaakang! Go molaleng gore go kgotlelela ga Eli ditiro tša bona tše kgopo ka mo go sa kwagalego—ka kgopolo ya gore o ile a ba dumelela go tšwela pele—e be e le mo go sa lokago.—1 Sam. 2:12-17, 22-25, 34, 35; 4:17, 18.

²⁰ Ka mo go fapanego, ela hloko ditirišano tša Modimo le barwa ba gagwe ba barongwa. Moporofeta Mika o ile a ba le pono e kgahlišago ya seboka sa Jehofa le barongwa ba Gagwe. Jehofa o ile a botšiša gore ke morongwa ofe yo a bego a ka fora-foretša Kgoši Ahaba wa Isiraele gore a dire gore kgoši yeo e kgopo e we. Jehofa o ile a theetša ditšhišinyo tša barwa ba fapa-fapanego ba moya. Ke moka morongwa yo mongwe o ile a bolela gore o tla dira bjalo. Jehofa o ile a mmotšiša gore o be a tla dira seo bjang. A kgotsofetše, Jehofa o ile a laela morongwa yoo gore a dire sona seo. (1 Dikx. 22:19-23) Ge re bolela ka batho, na ditho tša lapa di ka se ithute dithuto mabapi le go feto-fetoga le maemo go tšwa pegong yeo? Monna wa Mokriste yo a nyetšego e bile e lego tate o dira gabotse ge a ela hloko dikgopolo le ditšhišinyo tša mosadi wa gagwe le bana. Ka lehlakoreng le lengwe, basadi le bana ba swanetše go lemoga gore ge ba neile tšhišinyo goba ba boletše kamoo ba ka ratago gore dilo di dirwe ka gona, ba ka swanelwa ke go feto-fetoga le maemo ka go hlompha tlhahlo ya yoo go ya ka Mangwalo a nago le matla a go dira diphetho.

21. Go tla ahla-ahlwa’ng sehlogong se se latelago?

²¹ Ruri re leboga dikgopotšo tša Jehofa tše lerato le tše bohlale tša gore re be ba feto-fetogago le maemo! (Ps. 119:99) Sehlogo sa rena se se latelago se tla ahla-ahla kamoo go ba ba feto-fetogago le maemo ka tsela e nago le teka-tekano go kgathago tema ka gona go dira gore go be le lethabo lenyalong.

[Mengwalo ya tlase]

O be o tla Araba Bjang?

• Go ba ba feto-fetogago le maemo go ka ba le mafelelo afe a mabotse?

• Balebeledi ba ka bontšha bjang moya wa go feto-fetoga le maemo?

• Ke ka baka la’ng go nyakega gore go be le moya wa go feto-fetoga le maemo ka lapeng?

[Dipotšišo tša Thuto]

[Seswantšho go letlakala 4]

Bagolo ba ekiša tsela ya Kriste e botho ya go dirišana le ba bangwe

[Seswantšho go letlakala 6]

Ge bagolo ba phuthego ba bokana, go naganišiša le go rapela gotee le moya wa boikokobetšo di godiša botee