Go Phatlalatša Ditaba tše Dibotse Thabeng ya Andes

KE RENA bao, batho ba 18, lebatong le le šilafetšego. Re thothomela ka mekotleng ya rena ya go robala, re theeditše pula e tlogago e tšhologa ge e itia marulelo a masenke a potegilego. Ge re lebelela boemo bja mokutwana wo o monyenyane, re be re ipotšiša ge e ba re le batho ba mathomo ba go dula ka go wona.

Batho ba 18 ba ka etela bjang lefelo le? Karabo e be e theilwe kganyogong ya rena ya go phetha taelo ya Jesu ya gore ditaba tše dibotse di bolelwe “go fihla karolong ya kgole ya lefase.” (Dit. 1:8; Mat. 24:14) Re be re le leetong la go dira boboledi lefelong le le lego lekatana leo le lego godimo kua Andes ya Bolivia.

Go Fihla Moo

Tlhohlo ya mathomo e bile ya go fihla moo. Re ile ra ithuta gore dinamelwa tša batho bohle tša go ya mafelong a bjalo a lego lekatana di be di sa sepele ka lenaneo le le tsepamego. Ge pese ya rena e fihla, re ile ra lemoga gore e be e le e nyenyane kudu, ka go rialo ba bangwe ba rena ba ile ba swanelwa ke go ema ka maoto. Eupša ka moka ga rena re ile ra fihla moo re yago.

Morero wa rena e be e le go fihla metsaneng e lego thabeng ya Andes kua Bolivia. Ka gona ka morago ga leeto le la pese, ba lego sehlopheng sa rena, bao ba rwelego merwalo ba ile ba sepela ka kelohloko ba šalane morago ditsejaneng tša merotoga ya dithaba.

 Gaešita le ge metsana yeo e be e bonagala e le e menyenyane, nywako ya gona e be e le kgole le kgole, ka gona go etela motsana o mongwe go be go tšea diiri tše dintši. Go sa šetšwe gore re be re e-ya kgole gakaakang, go be go dula go bonagala go e-na le ngwako kua kgojana. Gantši re be re timela ditsejaneng tša manyokenyoke tša go phatša lešoka.

“Ke ka Baka La’ng le sa ka la tla Nakong e Fetilego?”

Mosadi yo mongwe o be a kgahlilwe kudu ke leeto le letelele leo re le sepetšego moo e lego gore o ile a re dumelela go diriša khitšhi ya gagwe le dikgong tša gagwe go apea dijo tša rena tša matena. Ge monna yo mongwe a be a e-kwa seo Beibele e se rutago mabapi le boemo bja bahu, o ile a botšiša gore, “Ke ka baka la’ng le sa ka la tla nakong e fetilego?” O be a thabela kudu moo a ilego a sepela le rena a tšama a re botšiša dipotšišo tše oketšegilego tseleng ge re tloga motsaneng woo a dulago go wona. Monna yo mongwe o be a se a ka a kwa ka Dihlatse tša Jehofa gomme o ile a bontšha kgahlego e kgolo dikgatišong tša rena. O ile a re leboga kudu ge re tlile a ba a re nea senotlelo sa mokutwana woo re bego re ka robala go wona bošegong bjoo.

Bošegong bjo bongwe, go be go fsifsetše kudu moo e lego gore ka go se lemoge re ile ra hloma ditente tša rena lefelong leo le tletšego ditšhošwane tše dikgolo. Kapejana di ile tša bontšha kgalefo ka go re loma. Re be re lapile kudu gore re ka tloga moo, gomme se se kgahlišago ke gore go se go ye kae di ile tša hlokomologa go ba gona ga rena.

Mathomong mekokotlo ya rena le  dikgopo di be di le bohloko ka gobane re robetše fase, eupša gare ga bošego re ile ra tlwaela. Gomme bohloko le ge e le bofe bo ile bja lebalwa mesong ge re be re bogetše dithaba tše dibotse tše nago le maru a rotogago ka go nanya mahlakoreng a tšona gotee le dintlha tša tšona tšeo di lego kua kgojana tše di khupeditšwego ke lehlwa. Setu sa moo se be se šitišwa feela ke nokana gotee le melodi ya dinonyana.

Ge re se na go hlapa ka nokaneng, re ile ra ahla-ahla temana ya Beibele re le gotee, ra ja difihlolo, gomme ra thoma go rotoga gape ka go nanya re e-ya metsaneng e mengwe ya kgojana. E be e le mo go putsago go rotogela fao. Re ile ra kopana le mokgekolo yo mongwe yo a ilego a lla ge a be a ithuta gore leina la Modimo la Jehofa le ka Beibeleng. O be a tšeegile maikwelong. Gona bjale o tla kgona go bitša Modimo ka leina ge a rapela!

Mokgalabje yo mongwe o ile a bolela gore Modimo o swanetše go ba a mo gopotše, gomme o ile a thoma go opela koša yeo e rego barongwa ba re romile. Monna yo mongwe, yoo a bego a babja kudu moo a bego a palelwa ke go tšwa ka ngwakong wa gagwe, o ile a re botša gore ga go le o tee motsaneng wa bona yoo a ilego a itshwenya ka go mo etela. O be a makaditšwe ke gore re be re e-tšwa kgole kua La Paz. Monna yo mongwe le yena o ile a kgahlwa kudu ke gore Dihlatse tša Jehofa di etela batho ka magaeng a bona, mola madumedi a mangwe ona a ba biletša kerekeng ka go fo letša tšhipi.

Go be go se na mohlagase lefelong leo, ka gona batho ba be ba robala ge go fsifala gomme ba tsoga ge letšatši le hlaba. Ka go rialo, gore re hwetše batho ka gae, re be re swanetše go thoma boboledi ka iri ya botshelela mesong. Go sego bjalo batho ba be ba tla ba ba ile go šoma mašemong. Ka morago, bao ba bego ba šetše ba thomile go šoma ba be ba ikemišeditše go ema le go theetša molaetša wa rena o tšwago Lentšung la Modimo, mohlomongwe ba khutšiša dipoo go goga mogoma. Batho ba bantši bao ba hwetšwago ka gae ba be ba ala mekgopha ya dinku gore re dule godimo ga yona, ke moka ba botha lapa ka moka gore le tle le theetše. Balemi ba bangwe ba be ba neela ka mekotla e megolo ya bupi e le ge ba leboga dikgatišo tša Beibele tšeo re ba filego tšona.

“Ga se la Ntebala”

Ke therešo gore go nyakega maeto a fetago le tee gore batho ba dire tšwelopele tsebong ya Beibele. Ba bangwe ba ile ba re lopa gore re boe go ba ruta ka mo go oketšegilego. Ka baka la se, re ile ra etela karolo ye ya Bolivia ka makga a mmalwa.

Leetong la rena la mafelelo, mokgekolo yo mongwe o be a thabišitšwe ke gore re boile, gomme a re: “Le bjalo ka bana ba-ka. Ga se la ntebala.” Monna yo mongwe o ile a re leboga bakeng sa modiro wa rena gomme a re laletša gore re tle re dule ka ga gagwe nakong e tlago ge re boa. Mohlomongwe moputso o mogolo kudu wa maiteko a rena e be e le go kwa gore mosadi yoo re ilego ra kopana le yena maetong a rena a nakong e fetilego o be a hudugetše toropong le gore gona bjale o be a bolela ditaba tše dibotse.

Mafelelong a leeto la rena la mathomo, re ile ra felelwa ke parafene ya setofo le dijo. Re ile ra kgoboketša dikgong tše lekanego go gotša mollo, ra apea dijo tša rena tša mafelelo gomme ra thoma go boela morago ka maoto. Re be re le kgole kudu le toropo yeo re bego re tla namela pese go yona. Re ile ra feleletša re gorogile lefsifsi le šetše le swere.

Go Boela Gae

Leeto la go boela gae le be le e-na le mathata a lona ka gobane pese e ile ya senyega. Ge nako e dutše e e-ya, re ile ra namela lori yeo e bego e tletše batho. Se se ile sa re nea sebaka sa go bolela le banamedi-gotee le rena bao ba bego ba nyaka go tseba lebaka la rena la go ba fao. Gaešita le ge ba e-na le dihlong ka tlhago, batho bao ka kakaretšo ke ba borutho e bile ba na le bogwera.

Ka morago ga leeto la diiri tše senyane re nametše ka morago ga lori yeo, re ile ra fihla gae—re kolobile e bile re e-kwa go tonya kudu. Lega go le bjalo, re be re sa sepelela lefeela. Ge re be re le tseleng, re ile ra kgona go rulaganya thuto ya Beibele le mosadi yo a dulago toropong.

E be e tloga e le tokelo go tsebatša ditaba tše dibotse bathong ba lego mafelong a bjalo a lego lekatana. Re be re dirile boboledi metseng e mene le metsaneng e mentši kudu. Re ile ra gopola mantšu a rego: “A ratêxa bya’ng maoto a motseta wa ditaba tše di botse dithabeng, sexoeledi sa phološô!”—Jes. 52:7; Baroma 10:15.

[Seswantšho go letlakala 17]

Re ikemišeditše go bolela ditaba tše dibotse