Hwetša Lethabo Lenyalong La Gago

“Ngwakô ó axwa ka bohlale; ó thêwa ka thlaoloxanyô.”—DIE. 24:3.

1. Modimo o ile a bontšha bohlale bjang mabapi le motho wa pele?

TATAGO rena yo bohlale wa legodimong o tseba seo se re loketšego. Ka mohlala, e le gore morero wa Gagwe o phethagatšwe, Modimo o ile a lemoga gore go be go se “botse xe motho a le nnoši” kua tšhemong ya Edene. Karolo ya motheo ya morero woo e be e le gore banyalani ba be le bana gomme ba ‘tlale lefase.’—Gen. 1:28; 2:18.

2. Ke thulaganyo efe yeo Jehofa a e diretšego go hola batho?

² Jehofa o itše: “Ke tlo mo dirêla modiriši e a mo lebanexo.” Ke moka Modimo o ile a dira gore monna wa pele a robale boroko bjo bogolo, gomme A ntšha kgopo mmeleng wa gagwe o phethagetšego ke moka a bopa mosadi ka yona. Ge Jehofa a be a tliša mosadi yo yo a phethagetšego e lego Efa go Adama, monna yo o ile a re: “Byalo xomme šó, e lexo lešapô la mašapô a-ka, le nama ya nama ya-ka. Yêna-yό ba tlo re ké mosadi, xobane ké yêna e a nthšitšwexo monneng.” Ka kgonthe Efa o be a lebane Adama. Yo mongwe le yo mongwe wa bona o be a tla bonagatša mekgwa ya moswana-noši gotee le dika, lega go le bjalo bobedi bja bona ba be ba phethagetše e bile ba bopilwe ka seswantšho sa Modimo. Ka tsela yeo, Jehofa o be a rulagantše lenyalo la pele. Adama le Efa ga se ba ka ba thatafalelwa ke go amogela thulaganyo ye ya Modimo yeo e bego e tla ba nea thušo ya kgonthe le thekgo.—Gen. 1:27; 2:21-23.

3. Ba bantši ba lebelela bjang mpho ya lenyalo, gomme seo se rotoša dipotšišo dife?

 ³ Ka manyami, moya wa borabele o aparela lefase lehono. Mathata ao le a tšweletšago ga a bakwe ke Modimo. Batho ba bantši ba nyatša mpho ya Modimo ya lenyalo, ba e lebelela e le e šiilwego ke nako, e le yeo e bakago pherekano le dithulano. Go ba bantši bao ba tsenelago lenyalo, tlhalo e tlwaelegile. Bana ba ka no se bontšhwe lerato la tlhago gomme ba ka dirišetšwa go hwetša dilo tše di nyakwago go molekane yo mongwe wa lenyalo. Batswadi ba bantši ba gana go feto-fetoga le maemo, gaešita le ge ba swanetše go dira bjalo gore go be le khutšo le botee. (2 Tim. 3:3) Ka gona, lethabo lenyalong le ka bolokwa bjang dinakong tše tšeo di hlobaetšago? Go feto-fetoga le maemo go kgatha tema efe tabeng ya go thibela go phuhlama ga lenyalo le ge e le lefe? Re ka ithuta’ng mehlaleng ya mehleng yeno ya bao ba ilego ba dula ba thabile manyalong a bona?

Go Ikokobeletša Tlhahlo ya Jehofa ka mo go Feletšego

4. (a) Ke tlhahlo efe yeo Paulo a ilego a e nea mabapi le lenyalo? (b) Bakriste ba kwago ba latela tlhahlo ya Paulo bjang?

⁴ Moapostola wa Mokriste e lego Paulo o neile tlhahlo e buduletšwego go bahlologadi gore ge e ba ba kgetha go nyalwa gape, ba swanetše go dira bjalo “feela Moreneng.” (1 Bakor. 7:39) Ye e be e se kgopolo e mpsha go Bakriste ba setlogo sa Sejuda. Molao wa Modimo o be o laela Baisiraele ka go lebanya gore ba be ba se ba swanela go ‘tšeana’ le motho le ge e le ofe yo a tšwago ditšhabeng tšeo di ba dikologilego tša baheitene. Jehofa o ile a tlaleletša ka tlhaloso yeo e gatelelago kotsi ya go hlokomologa tekanyetšo ye ya Modimo. “Ka xobane [bao e sego Baisiraele] ba tlo aroša barwa ba lena ba nthlanoxêla, ba dirêla medimo e šele; xomme boxale bya Modimo bo tlo Le tukêla, a Le fediša ka pelá.” (Doit. 7:3, 4) Ke mogato ofe woo bahlanka ba Jehofa lehono ba swanetšego go o gata ge ba kgetha balekane ba lenyalo? Ka ntle le pelaelo, mohlanka wa Modimo o swanetše go kgetha molekane wa lenyalo yo a lego “Moreneng,” morapedi-gotee yo a ineetšego le yo a kolobeditšwego. Ke gabohlale go ikokobeletša tlhahlo ya Jehofa mabapi le go kgetha molekane wa lenyalo.

5. Jehofa le Bakriste ba lego lenyalong ba lebelela dikeno tša lenyalo bjang?

⁵ Dikeno tša lenyalo ke tše kgethwa mahlong a Modimo. A šupa go lenyalo la mathomo, Morwa wa Modimo e lego Jesu, o itše: “Se Modimo a se tlemagantšego jokong go se be le motho yo a se aroganyago.” (Mat. 19:6) Mopsalme o re gopotša bohlokwa bja dikeno ka gore: “Nthšetša Morêna dibexô tša teboxô, O phêthê tše O di enetšexo Yo-xodimo-dimo.” (Ps. 50:14) Le ge banyalani ba e-na le tebelelo ya go ba le lethabo le legolo lenyalong, dikeno tšeo di dirilwego letšatšing la lenyalo di bohlokwa e bile di tliša boikarabelo.—Doit. 23:21.

6. Re ka ithuta’ng mohlaleng wa Jefeta?

⁶ Ela hloko taba ya Jefeta, yo a ilego a hlankela e le moahlodi kua Isiraele lekgolong la bo-12 la nywaga B.C.E. O ile a enela Jehofa keno e rego: “Xe Ba-Amoni O ka ba xafêla diatleng tša-ka, Xôna mohlá ke boaxo kè e-tšwa xo Ba-Amoni ntwa xe e fedile, ke tlo nthša se ke tl’o xo xahlana nasô’ sè e-tšwa ka mojakô wa ntlo ya-ka, ka se dira sehlabêlô.” Ge a lemoga gore ke morwedi wa gagwe, ngwana wa gagwe a nnoši, yo a ilego a tla go mo gahlanetša ge a boela gae Mitsipa, na Jefeta o ile a leka go roba keno ya gagwe? Aowa. O itše: “Xobane ke enetše Morêna, xomme nka se kxônê xo hlanoša.” (Baa. 11:30, 31, 35) Jefeta o ile a phetha seo a se holofeditšego Jehofa, le ge se se be se bolela gore a ka se be le ditlogolo tšeo di bego di tlo tšwetša leina la gagwe pele. Keno ya Jefeta e be e fapana le dikeno tša lenyalo, eupša go e boloka ga gagwe go beela banna le basadi ba Bakriste ba lego lenyalong mohlala o mobotse mabapi le dikeno tša bona.

Ke’ng Seo se Dirago Gore Lenyalo le Atlege?

7. Ke diphetogo dife tšeo bao ba sa tšwago go nyalana ba swanetšego go di dira?

⁷ Banyalani ba bantši ba gopola nako ya bona ya lefereyo ka lethabo le legolo. Go be go thabiša gakaakang go ithuta molekane wa bona wa ka moso wa lenyalo. Ge ba be ba fetša nako ba le gotee, ba be ba ikwa ba batamelane kudu. Eupša, go sa šetšwe gore ba nyalane ka morago ga nako e itšego ya lefereyo goba ba kopantšwe ka lenyalo  leo ba le rulaganyeditšwego, ge mafelelong ba e-ba monna le mosadi, diphetogo di be di nyakega. Monna yo mongwe o dumela ka gore: “Bothata bjo bogolo bjoo re bilego le bjona mathomong lenyalong la rena e be e le bja go lemoga gore ga bjale re be re swanetše go naganela dikgopolo tša yo mongwe. Ka nako e kopana re ile ra thatafalelwa ke go boloka segwera sa rena le batho ba bangwe gaešita le go boloka ditswalano le ditho tša lapa di le maemong a swanetšego.” Monna yo mongwe, yo ga bjale a nago le nywaga e 30 a nyetše, o ile a lemoga mathomong a lenyalo la gagwe gore go ba yo a leka-lekanego go be go nyaka gore a naganele batho ba babedi. Pele ga ge a ka amogela taletšo goba go itlama, o boledišana le mosadi wa gagwe gomme ka morago a dira phetho, a naganela dikganyogo tša bona ka bobedi. Boemong bjo bjalo go feto-fetoga le maemo go a thuša.—Die. 13:10.

8, 9. (a) Ke ka baka la’ng poledišano e botse e le bohlokwa? (b) Ke maemong afe moo go feto-fetoga le maemo go ka thušago, gona ka baka la’ng?

⁸ Ka dinako tše dingwe lenyalo le kopanya batho ba babedi bao ba tšwago ditlogong tše sa swanego. Boemong bjo go nyakega gore go boledišanwe ka bolokologi. Mekgwa ya poledišano ga e swane. Go hlokomela kamoo molekane wa lenyalo a boledišanago le ba leloko go ka go thuša go kwešiša molekane wa gago gakaone. Ka dinako tše dingwe maikwelo a motho a ka gare ga a bontšhwe ke seo se bolelwago eupša a bontšhwa ke tsela yeo se bolelwago ka yona. Le gona go ka ithutwa mo gontši go seo se sa bolelwego. (Die. 16:24; Bakol. 4:6) Temogo e bohlokwa bakeng sa lethabo.—Bala Diema 24:3.

⁹ Mabapi le go kgetha ditloša-bodutu le boithabišo, ba bantši ba hweditše go le bohlokwa go ba bao ba feto-fetogago le maemo. Pele ga ge le nyalana, molekane wa gago a ka ba a be a fetša nako e ntši dipapading goba mehuteng e mengwe ya boithabišo. Na go dira diphetogo tše dingwe gona bjale e ka ba mo go swanetšego? (1 Tim. 4:8) Go ka botšišwa se se swanago mabapi le nako yeo e fetšwago le ba leloko. Ka mo go kwešišegago, banyalani ba nyaka nako gore ba phegelele dilo tša moya le tše dingwe ba le gotee.—Mat. 6:33.

10. Ke bjang go ba yo a feto-fetogago le maemo go tlaleletšago ditswalanong tše dibotse gare ba batswadi le bana bao ba lego lenyalong?

 ¹⁰ Ge monna a nyala, o tlogela tatagwe le mmagwe, gomme go ka bolelwa se se swanago le ka mosadi. (Bala Genesi 2:24.) Lega go le bjalo, tlhahlo ya Modimo ya gore motho a godiše tatagwe le mmagwe ga se ya beelwa nako. Ka gona le ka morago ga ge batho ba babedi ba nyalane, ba tlo fela ba fetša nako le batswadi ba bona gotee le ba bangwe ba leloko. Monna yo mongwe yo a nago le nywaga e 25 a nyetše o re: “Ka dinako tše dingwe, go thata go leka-lekanya dikganyogo le dinyakwa tša molekane le tša batswadi, bagolwane goba baratho le tša ba leloko. Gore ke dire phetho e swanetšego, ke ile ka hwetša Genesi 2:24 e thuša. Yo mongwe le yo mongwe o swanetše go botegela ditho tše dingwe tša lapa e bile o na le boikarabelo go tšona, lega go le bjalo temana ye e mpontšhitše gore go botegela molekane wa-ka go tla pele.” Ka gona, batswadi ba Bakriste bao ba feto-fetogago le maemo ba tla hlompha taba ya gore bana ba bona ba nyetšego ga bjale ba na le lapa leo go lona monna a ikarabelago kudu ka go le hlahla.

11, 12. Ke ka baka la’ng thuto ya lapa le thapelo di le bohlokwa go banyalani?

¹¹ Thuto ya ka mehla ya lapa e bohlokwa. Diphihlelo tša malapa a mantši a Bakriste di hlatsela seo. Go ka no se be bonolo go thoma thuto e bjalo goba go e swara ka mehla. Hlogo e nngwe ya lapa e dumela se, e re: “Ge re ka boela morago gomme ra fetola selo se itšego, e tla ba go kgonthišetša gore re swara thuto ya lapa ka mehla go tloga mathomong a lenyalo la rena.” E tlaleletša ka gore: “Ke mpho e kgahlišago kudu go bona mosadi wa-ka a thabile ge a tutuetšwa ke therešo e kgahlišago ya Beibele yeo re e hwetšago ge re ithuta re le gotee.”

¹² Go rapela gotee ke thušo e nngwe. (Baroma 12:12) Ge monna le mosadi ba kopane gotee borapeding bja Jehofa, tswalano ya kgaufsi yeo ba nago nayo le Modimo e ka tiiša tlemo yeo ba e thabelago ya lenyalo. (Jak. 4:8) Monna yo mongwe wa Mokriste o hlalosa gore: “Go kgopela tshwarelo kapejana le go bolela ka diphošo tše ge re rapela gotee ke tsela ya go bontšha go nyama mo go tšwago pelong gaešita le diphošong tše dinyenyane tšeo di kgopišago.”—Baef. 6:18.

E-ba yo a Feto-fetogago le Maemo Lenyalong

13. Paulo o neile keletšo efe mabapi le ditswalano tša kgaufsi lenyalong?

¹³ Bakriste ba lego lenyalong ba swanetše go efoga ditiro tšeo di nyatšišago ditswalano tša lenyalo, tše bjalo ka tšeo di tletšego lefaseng la lehono leo le gafišwago ke dikopano tša botona le botshadi. Tabeng ye, Paulo o neile keletšo e rego: “Anke monna a nee mosadi wa gagwe tshwanelo ya gagwe; eupša mosadi le yena a dire ka mo go swanago go monna wa gagwe. Mosadi ga a laole mmele wa gagwe, eupša ke monna wa gagwe yo a o laolago; ka mo go swanago monna ga a laole mmele wa gagwe, eupša ke mosadi wa gagwe yo a o laolago.” Ke moka Paulo o ile a nea tlhahlo ye: “Le se ke la e timana, ge e se ka go dumelelana ka  nako e beilwego.” Ka baka la’ng? “E le gore le iphe nako ya thapelo gomme le be gotee gape; gore Sathane a se ke a tšwela pele a le leka ka baka la go se kgone go itshwara ga lena.” (1 Bakor. 7:3-5) Ka go bolela ka thapelo, Paulo o bontšha dilo tšeo di tlago pele go Mokriste. Eupša o ile a ba a bontšha gabotse gore Mokriste yo mongwe le yo mongwe yo a lego lenyalong o swanetše go naganela dinyakwa tša nama le tša maikwelo tša molekane wa gagwe.

14. Melao ya motheo ya Mangwalo e šoma bjang mabapi le ditswalano tša kgaufsi lenyalong?

¹⁴ Monna le mosadi ba swanetše go boledišana ka bolokologi le go lemoga gore go se naganelane ditswalanong tša kgaufsi go ka baka mathata. (Bala Bafilipi 2:3, 4; bapiša le Mateo 7:12.) Se se ipontšhitše e le therešo malapeng ao a aroganego ka tša bodumedi. Gaešita le ge diphapano di le gona, gantši Mokriste a ka kaonefatša boemo ka go itshwara gabotse, go ba botho le go ba le tirišano. (Bala 1 Petro 3:1, 2.) Go rata Jehofa le molekane, go akaretša le moya wa go feto-fetoga le maemo, go tla thuša karolong ye ya lenyalo.

15. Tlhompho e kgatha tema efe lenyalong?

¹⁵ Le dikarolong tše dingwe, monna yo botho o tla swara mosadi wa gagwe ka tlhompho. Ka mohlala, o tla naganela maikwelo a gagwe, gaešita le ditabeng tše dinyenyane. Monna yo mongwe yo a nyetšego ka nywaga e 47 o dumela ka gore: “Ke sa ithuta tabeng ye.” Basadi ba Bakriste ba eletšwa gore ba hlomphe banna ba bona ka mo go tseneletšego. (Baef. 5:33) Go bolela gampe ka banna ba bona, go bolela diphošo tša bona pele ga batho, ga go bontšhe tlhompho. Diema 14:1 e re gopotša gore: “Bohlale bya mosadi bo ikaxêla ngwakô; ’atla tša wa lešilo di a o rutla.”

Le se ke la Nea Diabolo Sebaka

16. Banyalani ba ka diriša bjang Baefeso 4:26, 27 lenyalong la bona?

¹⁶ “Galefang, eupša le se ke la dira sebe; letšatši le se ke la sobela le galefile, le gona le se ke la nea Diabolo sebaka.” (Baef. 4:26, 27) Ge mantšu a a dirišwa, a ka re thuša go rarolla goba go efoga diphapano lenyalong. Kgaetšedi yo mongwe o re: “Ga ke gopole le ka mohla go e-ba le go se kwešišane gomme ka se boledišane le monna wa-ka ka seo, gaešita le ge se se be se bolela go fetša diiri tše dintši re leka go lokiša bothata.” Mathomong a lenyalo la bona, yena le monna wa gagwe ba ile ba ikemišetša gore ba ka se sobetše letšatši ba se ba lokiša bothata bja bona. “Re ile ra dira phetho ya gore go sa šetšwe gore bothata ke bofe, re tla lebalelana le go lebala le go thoma letšatši le lengwe le le lengwe bofsa.” Ka go dira bjalo, ba ile ba gana go “nea Diabolo sebaka.”

17. Gaešita le ge banyalani ba bonala ba sa swanelane, ba ka thušwa ke’ng?

¹⁷ Eupša go thwe’ng ge e ba o tsene lenyalong le motho yo o naganago gore ga le swanelane? Ga bjale o ka ikhwetša o tsene tswalanong yeo e bonalago e sa thabiše go swana le ya ba bangwe. Lega go le bjalo, go gopola pono ya Mmopi ka tlemo ya lenyalo go tla le thuša. A le ka tlase ga pudulelo, Paulo o eleditše Bakriste gore: “Lenyalo a le hlomphege go bohle, gomme malao a lenyalo a se be le ditšhila, gobane Modimo o tla ahlola diotswa le dihlotlolo.” (Baheb. 13:4) Mantšu ao le ona re swanetšego go a ela hloko ke a rego: “Lenti la meloxô e meraro xa le fo kxaoxa.” (Mmo. 4:12) Ge monna le mosadi ba tshwenyega kudu ka go kgethagatša leina la Jehofa, ba a gomarelana e bile ba gomarela Modimo. Ba swanetše go šomela tabeng ya go dira gore lenyalo la bona le atlege, ba tseba gore se se tla dira gore ba amogelwe ke Jehofa, Mothomi wa lenyalo.—1 Pet. 3:11.

18. Ke’ng seo o ka kgodišegago ka sona mabapi le lenyalo?

¹⁸ Ruri go a kgonega gore Mokriste a hwetše lethabo lenyalong. Go dira bjalo go nyaka maiteko le go bontšha dika tša Bokriste, tšeo se sengwe sa tšona e lego go feto-fetoga le maemo. Lehono, ka diphuthegong tša Dihlatse tša Jehofa go dikologa lefase, go na le banyalani ba bantši bao ba hlatselago gore go a kgonega.

O be o tla Araba Bjang?

• Ke ka baka la’ng go hwetša lethabo lenyalong go kgonega?

• Ke’ng seo se ka thušago gore lenyalo le atlege?

• Ke dika dife tšeo banyalani ba swanetšego go di hlagolela?

[Dipotšišo tša Thuto]

[Seswantšho go letlakala 9]

Banyalani ka bohlale ba boledišana pele ba ka amogela taletšo goba pele ba rulaganya dilo

[Seswantšho go letlakala 10]

Katanelang go rarolla diphapano ka lona letšatši leo, gore le ‘se nee Diabolo sebaka’