Jehofa o a Kwa ge le Llela Thušo

“Mahlô a Morêna a bôna baloki; ’tsêbê tša xaxwe di kwa xe ba lla.”—PS. 34:15.

1, 2. (a) Ba bantši lehono ba ikwa bjang? (b) Ke ka baka la’ng re sa makatšwe ke se?

NA O gateletšegile? Ge e ba go le bjalo, ga o noši. Batho ba dimilione ba katana le go lwantšha dikgateletšo tša letšatši le letšatši tša go phela tshepedišong ye e kgopo ya dilo. Go ba bangwe, di bonala di sa kgotlelelege. Ba tloga ba ikwa go swana le mopsalme Dafida, yo a ngwadilego gore: “Matla a mpheletše; ke robexetše ruri; ke bobola kè hlokoxile pelo. Pelo ya-ka e a tula; matla a-ka a ntloxile; le mahlô a-ka xa a sa na seetša.”—Ps. 38:8, 10.

² Ka ge re le Bakriste, ga re makatšwe ke dikgateletšo tša bophelo. Re kwešiša gore “dihlabi tša tlalelo” ke karolo ya pontšho e boletšwego e sa le pele ya go ba gona ga Jesu. (Mar. 13:8; Mat. 24:3) Lentšu la Segerika leo le fetoletšwego e le “dihlabi tša tlalelo” le šupa go bohloko bjo bo tseneletšego bjoo motho a bo kwago ge a belega. Ruri seo se hlalosa gabotse bohloko bjo bo tseneletšego bjoo batho ba bo kwago dinakong tše tše “hlobaetšago,” goba tša “mathata,” tšeo go lego “thata go lebeletšana le tšona”!—2 Tim. 3:1; Beibele ya Sepedi.

Jehofa o Kwešiša Dikgateletšego tša Rena

3. Ke’ng seo batho ba Modimo ba tlogago ba se lemoga?

³ Batho ba Jehofa ba tloga ba tseba gore ba kgongwa ke dikgateletšego tše, gomme gantši maemo a sa kgahlišego a tla oketšega. Go tlaleletša go seo se tlaišago batho ka kakaretšo, le rena bjalo ka bahlanka ba Modimo re lebeletšana le ‘lenaba, Diabolo,’ leo le ikemišeditšego go senya tumelo ya rena. (1 Pet. 5:8) Go bonolo gakaakaang go ikwa ka tsela yeo Dafida a ilego a ikwa ka yona ge a re: “Nyatšêxô e nthobile pelo, ke nyak’o hlôbôxa. Ke hloloxetšwe monkwêla-bohloko, ka mo hlôka; wa xo nkhomotša xa ke mmône.”—Ps. 69:20.

4. Re homotšwa ke’ng ge re gateletšegile?

⁴ Na Dafida o be a e-ra gore ga a na kholofelo le gatee? Aowa. Ela hloko mantšu a gagwe a tšwelago pele psalmeng yona yeo, a rego: “Badiidi Morêna ó a ba kwa; ’me baxolêxwa ba xaxwe xa’ ba nyatše,” goba “batho ba gagwe bao ba golegilwego.” (Ps. 69:33, mongwalo wa tlase wa NW.) Ka kakaretšo, ka dinako tše dingwe re ka ikwa eka re bagolegwa bao ba laolwago ke dikgateletšego goba ditlaišego tša rena. Go ka bonala eka ba bangwe ba tloga ba sa kwešiše maemo a rena—le gona mohlomongwe ga ba a kwešiše. Eupša go swana le Dafida, re ka homotšwa ke go tseba gore Jehofa o kwešiša dikgateletšego tša rena gabotse.—Ps. 34:15.

5. Kgoši Solomone o be a kgodišegile ka’ng?

⁵ Solomone morwa wa Dafida o gateletše ntlha ye nakong ya ge go be go kgakolwa tempele ya Jerusalema. (Bala 2 Koronika 6:29-31.) O ile a lopa Jehofa gore a kwe thapelo ya motho yo mongwe le yo mongwe yo a botegago go tšwa pelong yo a Mmatamelago mabapi le “kôtlô ya dipelo tša bôná.” Modimo o tla arabela bjang dithapelong tša batho ba bao ba gateletšegilego? Solomone o ile a bontšha a kgodišegile gore Modimo a ka se kwe dithapelo tša bona feela eupša o tla gata mogato bakeng sa bona. Ka baka la’ng? Ka gobane ka kgonthe ke “Mo-tseba-dipelo-tša-bana-ba-batho-ka-moka.”

6. Re ka lebeletšana bjang le dipelaelo, gona ka baka la’ng?

⁶ Ka mo go swanago re ka batamela Jehofa ka thapelo mabapi le ‘kotlo ya dipelo tša rena,’ e lego dikgateletšego tša rena ka noši. Re swanetše go homotšwa ke go tseba gore o kwešiša kgateletšego  ya rena le gore o a re hlokomela. Moapostola Petro o ile a hlatsela se ge a be a re: “[Lahlelang] dipelaelo tša lena ka moka go yena, gobane o a le hlokomela.” (1 Pet. 5:7) Jehofa o tloga a tshwenyega ka seo se re diragalelago. Jesu o gateletše tlhokomelo ya Jehofa e lerato, ge a re: “Na dithaga tše pedi ga di rekišwe ka tšhelete ya tšhipi ya theko e nyenyane? Lega go le bjalo, ga go le e tee ya tšona yeo e tlago go wela fase Tatago lena a sa tsebe. Eupša yona meriri ye ya dihlogo tša lena e badilwe ka moka. Ka gona, le se ke la boifa: Le bohlokwa go feta dithaga tše dintši.”—Mat. 10:29-31.

Ithekge ka Thušo ya Jehofa

7. Ke thekgo efe yeo re kgonthišetšwago yona?

⁷ Ka kgonthe re ka kgodišega gore Jehofa o ikemišeditše e bile o kgona go re thuša ge re tlaišwa ke dikgateletšo. “Modimo ké sebô sa rena le matla a rena; ké Mohlakodiši, re mo lemoxile dikotsing tše ntši.” (Ps. 34:15-18; 46:1) Modimo o re nea thušo yeo bjang? Ela hloko seo 1 Bakorinthe 10:13 e se bolelago, e re: “Modimo o a botega, gomme a ka se le lese le lekwa go feta kamoo le ka kgonago go kgotlelela ka gona, eupša gotee le moleko o tla ba a bula tsela ya go tšwa e le gore le kgone go o kgotlelela.” Jehofa a ka tsena ditaba gare go tloša mathata a rena, goba a re nea matla ao re a nyakago gore re kgotlelele. Ka tsela le ge e le efe, re a thušwa.

8. Re ka dira’ng gore re holwe ke thušo ya Modimo?

⁸ Re ka dira’ng gore re holwe ke thušo yeo? Hlokomela seo re eletšwago gore re se dire: “[Lahlelang] dipelaelo tša lena ka moka go yena.” Se se bolela gore re nea Jehofa boikarabelo bja go tshwenyega ka rena le go re hlokomela. Re leka go kgaotša go tshwenyega gomme ra mmota ka go se fele pelo gore o tla hlokomela dinyakwa tša rena. (Mat. 6:25-32) Go mmota ka tsela yeo go nyaka boikokobetšo, e sego go ithekga ka matla goba bohlale bja rena. Eupša ge re ikokobetša ka “tlase ga seatla se matla sa Modimo,” re bontšha gore re lemoga boemo bja rena bja tlasana. (Bala 1 Petro 5:6.) Ka go rialo, se se re thuša go lebeletšana le diteko le ge e le dife tšeo Modimo a di dumelelago. Re ka hlologela go imollwa kapejana, eupša re holofela gore Jehofa o tseba gabotse gore ke neng le gore ke bjang a ka gatago mogato bakeng sa rena.—Ps. 54:7; Jes. 41:10.

9. Ke morwalo wa mohuta ofe woo Dafida a ilego a swanelwa ke go o lahlela go Jehofa?

⁹ Gopola mantšu a Dafida ao a begilwego go Psalme 55:22, a rego: “Lahlêla Morêna morwalô wa xaxo; Yêna ó tlo Xo babalêla; a ka se kê a bá a lesa moloki xe a ka šuthišwa.” Ge Dafida a be a ngwala mantšu ao, o be a gateletšegile kudu. (Ps. 55:4) Go dumelwa gore psalme ye e ngwadilwe ka morago ga ge morwa wa gagwe Abesalomo a be a logile maano-mabe a go mo tšeela bogoši. Moeletši yoo Dafida a bego a mmotile, Ahitofele, o ile tsenya letsogo leanong leo. Dafida o ile a swanelwa ke go tšhaba Jerusalema bakeng sa gore a phološe bophelo bja gagwe. (2 Sam. 15:12-14) Le ka tlase ga maemo ao a gateletšago, Dafida o ile a tšwela pele a bota Modimo, gomme ga se a ka a nyama.

10. Re swanetše go dira’ng ge re lebeletšane le dikgateletšego?

¹⁰ Ke gabohlokwa gore le rena, bjalo ka Dafida, re batamele Jehofa ka thapelo mabapi le mohuta o mongwe le o mongwe wa kgateletšego woo re lebeletšanago le wona. A re eleng hloko seo moapostola Paulo a re eletšago go se dira tabeng ye. (Bala Bafilipi 4:6, 7.) Thapelo e bjalo e tseneletšego e tla ba le mafelelo afe? “Khutšo ya Modimo ye  e fetago kgopolo yohle e tla diša dipelo tša [rena] le matla a [rena] a monagano ka Kriste Jesu.”

11. “Khutšo ya Modimo” e šireletša dipelo tša rena le matla a rena a monagano bjang?

¹¹ Na thapelo e tla dira gore maemo a gago a fetoge? E ka dira bjalo. Lega go le bjalo, re swanetše go lemoga gore ga se ka mehla Jehofa a ka arabago dithapelo tša rena ka tsela yeo rena re nyakago. Go sa šetšwe seo, thapelo e re thuša go dula re leka-lekane monaganong, gore dikgateletšego tša rena di se ke tša re imela. “Khutšo ya Modimo” e ka dira gore re iketle ge re imelwa ke maikwelo a kgateletšego. Go swana le sehlopha sa mašole seo se abetšwego go šireletša motse tlhaselong e sa letelwago, “khutšo ya Modimo” e tla šireletša dipelo tša rena le matla a rena a monagano. Le gona e tla dira gore re fenye dipelaelo tša rena, dipoifo le dikgopolo tše nyamišago gotee le go re efoša go kitimela go dira dilo le go arabela ka tsela e sego bohlale.—Ps. 145:18.

12. Bontšha kamoo motho a ka bago le khutšo ya monagano.

¹² Re ka ba bjang le khutšo ya monagano ge re gateletšegile? Ela hloko mohlala woo o ka swanelago maemo a rena ka tsela e itšego. Mothwalwa a ka šoma ka tlase ga molaodi yo a gobošago ka mantšu. Lega go le bjalo, mothwalwa o na le sebaka sa go bolela maikwelo a gagwe go mong wa khamphani, yo a lego botho le yo a leka-lekanego. Mong wa khamphani o kgonthišetša mothwalwa gore o kwešiša maemo gomme o utolla gore kgaufsinyane molaodi o tlo tlošwa maemong a gagwe. Seo se dira gore mothwalwa a ikwe bjang? Go kgolwa kholofetšo yeo le go tseba seo se lego kgaufsi le go direga go tla matlafatša boikemišetšo bja gagwe bja go tšwela pele a šoma, le ge a swanetše go lebana le mathata a mangwe ka nakwana. Ka mo go swanago, re a tseba gore Jehofa o kwešiša maemo a rena, gomme o re kgonthišetša gore kgaufsinyane “mmuši wa lefase le o tla lahlelwa ntle.” (Joh. 12:31) Ruri seo se a kgothatša!

13. Go tlaleletša thapelong, ke’ng se sengwe seo re swanetšego go se dira?

¹³ Ka gona, na go lekane go iša mathata a rena go Jehofa ka thapelo? Aowa. Go na le go gontši mo go nyakegago. Re swanetše go dira dilo ka go dumelelana le dithapelo tša rena. Ge Kgoši Saulo a be a romela banna legaeng la Dafida gore ba ye go mmolaya, Dafida o rapetše ka gore: “Modimo wa-ka, nnamolêlê manabeng, O mphêmêlê ba ba ntsoxetšexo matla. Nnamolêlê xo ba-dira-bobe, O mphološê xo banna ba madi.” (Ps. 59:1, 2) Go tlaleletša thapelong, Dafida o ile a theetša mosadi wa gagwe gomme a gata megato e swanetšego ya go ngwega. (1 Sam. 19:11, 12) Ka tsela e swanago, re ka rapelela bohlale bjo bo šomago bja gore thuša go lebeletšana le maemo a rena a gateletšago goba mohlomongwe go a kaonefatša.—Jak. 1:5.

Kamoo re ka Bago le Matla a go Kgotlelela

14. Ke’ng seo se ka re thušago go kgotlelela ge re lebane le dikgateletšego?

¹⁴ Dikgateletšego tša rena di ka no se tlošwe le semeetseng. Di ka tšwela pele ka nakwana. Ge e ba go le bjalo, ke’ng seo se ka re thušago go kgotlelela? Sa pele, gopola gore ge re tšwela pele re hlankela Jehofa ka potego go sa šetšwe mathata, re bontšha gore re a mo rata. (Dit. 14:22) Gopola tatofatšo ya Sathane mabapi le Jobo: “A O re Jobo xe a boifa Modimo, ó dira fêla? A xa se Wene O mo axeleditšexo ka lexora, yêna le ba lapá la xaxwe, le tšohle tše e lexo tša xaxwe thokô tše xo fêla? Medirô ya diatla tša xaxwe O e šexofaditše, diruô tša xaxwe tša tlala lefase. Byale, O k’O lekê xo iša letsôxô O kxwathê tšohle tše e lexo tša xaxwe, O bônê xe a tlo Xo hlala pepeneneng.” (Jobo 1:9-11) Ka potego ya gagwe, Jobo o ile a hlatsela gore tatofatšo yeo ke maaka a matala. Ka go kgotlelela ge re le tlase ga maemo a gateletšago, le rena re na le sebaka sa go hlatsela gore Sathane ke moaketši. Ka lehlakoreng le lengwe, kgotlelelo ya rena e matlafatša kholofelo le kgodišego ya rena.—Jak. 1:4.

15. Ke mehlala efe yeo e ka re matlafatšago?

 ¹⁵ Sa bobedi, gopola gore “dilo tše di swanago mabapi le ditlaišego di direga mokgatlong ka moka wa bana babo lena lefaseng.” (1 Pet. 5:9) Ee, “ga go moleko wo o le wetšego ge e se woo o tlwaelegilego bathong.” (1 Bakor. 10:13) Ka baka leo, o ka hwetša matla le sebete ka go naganišiša ka mehlala ya ba bangwe go e na le go nagana kudu ka mathata a gago. (1 Bathes. 1:5-7; Baheb. 12:1) Iphe nako ya go naganišiša ka mohlala wa bao o ba tsebago bao ba ilego ba kgotlelela ka potego go sa šetšwe go lebeletšana le kgateletšego e bohloko. Na o ile wa leka go lebelela diphihlelo tšeo di gatišitšwego go bona dipego tša bao ba ilego ba lebeletšana le maemo a swanago le a gago? O ka hwetša se se matlafatša kudu.

16. Modimo o re matlafatša bjang ge re lebane le diteko tša mehuta-huta?

¹⁶ Sa boraro, gopola gore Jehofa ke “Tate wa dikgaugelo tše bonolo le Modimo wa khomotšo yohle, yo a re homotšago ditlaišegong tša rena tšohle, e le gore re kgone go homotša bao ba lego ditlaišegong tša mohuta le ge e le ofe ka khomotšo yeo le rena re homotšwago ke Modimo ka yona.” (2 Bakor. 1:3, 4) Go bjalo ka ge eka Modimo o eme ka lehlakoreng la rena go re kgothatša le go re matlafatša, e sego feela ditlaišegong tša rena tša bjale eupša le “ditlaišegong tša rena tšohle.” Ka gona se se dira gore re kgone go homotša ba bangwe “ditlaišegong tša mohuta le ge e le ofe.” Paulo ka boyena o bone therešo ya mantšu a.—2 Bakor. 4:8, 9; 11:23-27.

17. Beibele e ka re thuša bjang go lebeletšana le dikgateletšego tša bophelo?

¹⁷ Sa bone, re na le Lentšu la Modimo, Beibele, le le “[holago] ka go ruta, go sola, go lokiša dilo, go laya ka toko, gore motho wa Modimo a swanelege ka botlalo, a hlangwe ka mo go feletšego bakeng sa modiro o mongwe le o mongwe o mobotse.” (2 Tim. 3:16, 17) Lentšu la Modimo ga le fo re dira gore re “swanelege” le go re ‘hlama ka mo go feletšego bakeng sa modiro o mongwe le o mongwe o mobotse.’ Le dira le gore re kgone go lebeletšana le dikgateletšego tša bophelo. Le dira gore re “swanelege ka botlalo” le go “hlangwa ka mo go feletšego.” Lentšu la mathomo leo le fetoletšwego e le “hlangwa ka mo go feletšego” ka go lebanya le bolela “go se hlaele selo.” Lentšu le le ka ba le ile la dirišwa mehleng ya bogologolo bakeng sa sekepe seo se bego se tsentšwe dilo ka moka tšeo di bego di nyakega bakeng sa leeto goba motšhene wo o bego o kgona go dira selo le ge e le sefe seo se bego se nyakega. Ka mo go swanago, Jehofa ka Lentšu la gagwe o re nea dilo ka moka tšeo re di nyakago bakeng sa go swaragana le selo le ge e le sefe seo re ka lebeletšanago le sona. Ka baka leo, re ka re, “Ge Modimo a dumela, nka kgotlelela ka matla a gagwe.”

Go Imollwa Dikgateletšegong tša Rena Tšohle

18. Ke’ng seo go se gopola go tla re thušago go kgotlelela ka potego?

¹⁸ Sa bohlano, dula o gopola taba e kgahlišago  ya gore Jehofa o tla imolla batho dikgateletšong tšohle kgaufsinyane. (Ps. 34:19; 37:9-11; 2 Pet. 2:9) Mafelelong, go phološwa ga rena ke Modimo ga go bolele go imollwa feela dikgateletšegong tša gona bjale eupša gape go re nea sebaka sa go hwetša bophelo bjo bo sa felego, go sa šetšwe gore ke legodimong le Jesu goba paradeiseng mo lefaseng.

19. Go kgotlelela ka potego go kgonega bjang?

¹⁹ Go fihla ka nako yeo, re tšwela pele re lebeletšana le maemo a gateletšago a lefase le le kgopo. Ruri re hlologela nako ya ge dilo tše ka moka di tla be di se sa le gona! (Ps. 55:6-8) A re gopoleng gore go kgotlelela ga rena ka potego go hlatsela gore Diabolo ke moaketši. Eka re ka hwetša matla dithapelong tša rena le borwarreng bja Bokriste, re gopola gore bana babo rena ba lebeletšana le diteko tše swanago le tša rena. Tšwela pele o swanelega ka botlalo le go hlangwa ka mo go feletšego ke go diriša Lentšu la Modimo gabotse. O se ke wa dumelela go bota ga gago tlhokomelo e lerato yeo e newago ke “Modimo wa khomotšo yohle” go fela. Gopola gore “mahlô a Morêna a bôna baloki; ’tsêbê tša xaxwe di kwa xe ba lla.”—Ps. 34:15.

Na o ka Araba?

• Dafida o ile a ikwa bjang ka dikgateletšego tšeo a ilego a lebeletšana le tšona?

• Ke kgodišego efe yeo Kgoši Solomone a ilego a e bontšha?

• Re ka thušwa ke’ng go lebeletšana le maemo ao Jehofa a a dumelelago?

[Dipotšišo tša Thuto]

[Seswantšho go letlakala 13]

Solomone o be a kgodišegile gore Jehofa o tla gata mogato bakeng sa batho ba Gagwe ba gateletšegilego

[Seswantšho go letlakala 15]

Dafida o ile a lahlela morwalo wa gagwe go Jehofa ka thapelo gomme ka morago a dira dilo ka go dumelelana le thapelo ya gagwe