Kholofetšo e Bohlokwa Kudu

KE DIRILE kholofetšo e bohlokwa kudu. E re ke hlalose seo se dirilego gore nna, mma yo mofsa wa mo-Sepania, ke dire kholofetšo e bjalo.

Khutšo le kwano di be di se gona ka lapeng lešo. Lapa lešo le ile la nyama kudu ge kgaetšedi ya-ka e nyenyane e e-hwa kotsing ya masetlapelo e e-na le nywaga e mene. Go oketša moo, mekgwa ya tate e mebe e be e dira gore mma a thatafalelwe ke go hwetša lethabo lenyalong. Lega go le bjalo, go thatafalelwa moo ga se gwa ka gwa mo palediša go ruta nna le kgaetšedi ya-ka e kgolo mekgwa e mebotse ya boitshwaro.

Ge nako e dutše e e-ya, kgaetšedi ya-ka e ile a nyala, le nna ke ile ka nyalwa. Kapejana ka morago ga moo, go ile gwa hwetšwa gore mma o swerwe ke kankere, yeo e ilego ya feleletša e mmolaile. Eupša pele ga ge a ka hwa, o ile a re nea bohwa.

Motho yo mongwe yoo a bego a tlwaelane le yena o be a boletše le yena mabapi le kholofelo ya Mangwalo ya tsogo, gomme mma o ile a dumela go swarelwa thuto ya Beibele. Bofelong bja bophelo bja gagwe, molaetša o neago kholofelo wa Beibele o ile wa dira gore bophelo bja gagwe bo be le morero gomme o ile wa mo thuša go hwetša lethabo.

Ge re be re bona tutuetšo e botse yeo molaetša wa Beibele o bilego le yona go yena, nna le kgaetšedi ya-ka re ile ra thoma go ithuta Lentšu la Modimo. Ke ile ka kolobetšwa ke le yo mongwe wa Dihlatse tša Jehofa kgwedi pele ngwana wa-ka wa bobedi a ka belegwa, mosetsana yo botsana yoo re ilego ra mo rea Lucía.

Letšatši la kolobetšo e be e le le bohlokwa kudu go nna. Lebaka la mathomo e be e le gore ke wa Jehofa, ka ge ke be ke ineetše go yena le go mo hlankela ka mo go sa felego. Lebaka le lengwe ke gore ke be nka kgona go boledišana le morwa le morwedi wa-ka ba ba rategago ka tumelo ya-ka.

Lega go le bjalo, lebaka leo la bobedi leo le dirilego gore ke thabe le ile la šitišwa. Ge Lucía a be a e-na le nywaga e mene, o ile a thoma go kwa bohloko bjo šoro ka teng. Ka morago ga diteko tše dintši, ngaka e ile ya hlalosa gore sebete sa gagwe se be se e-na le serurugi sa go lekana le namune. Ngaka e ile ya hlalosa gore Lucía o na le serurugi sa kankere seo se golago ka lebelo. Ao e be e le mathomo a ntwa ya nywaga e šupa ya Lucía kgahlanong le kankere, yeo e bego e akaretša go dula sepetlele nako e telele.

Moya wa Boikgafo

Nywageng ye e thata, Lucía gantši o be a nkgothatša ka go nkgokarela ka borutho le go nkatla ka tsela e homotšago. Tsela yeo a bego a kgotleletše bolwetši ka yona e ile ya ba ya makatša bašomi ba sepetlele. Ka mehla o be a ikemišeditše go dirišana le baoki, a ba thuša go išetša bana ba lego ka diphapošing tša balwetši tše di lego kgaufsi yogurt, juice le dilo tše dingwe. Baoki ba ile ba ba ba nea Lucía jase e tšhweu le petšhe yeo e bego e mo hlaola e le “mothuša-baoki.”

Mošomi yo mongwe wa sepetlele o gopola ka gore: “Lucía o kgomile pelo ya-ka. O be a le mafolofolo, a kgona go hlama dilo, o be a rata go thala diswantšho. O be a kgona go itlhalosa e bile a godile kudu ka tsebo.”

Lucía o be a hwetša matla le teka-tekano Lentšung la Modimo. (Baheb. 4:12) O be a kgodišegile gore “lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona” lefaseng le lefsa, bjalo ka ge Lentšu la Modimo le holofetša. (Kut. 21:4) Ka ge a be a kgahlegela ba bangwe, o be a diriša sebaka se sengwe le se sengwe seo a bego a se hwetša go boledišana le bona ka molaetša wa Beibele. Go ba ga Lucía le kholofelo e tiilego tsogong go ile gwa mo thuša go dula a leka-lekane maikwelong le go dula a thabile go sa šetšwe bolwetši bja gagwe. (Jes. 25:8) O ile a dula a e-na le boemo bjoo bja kgopolo go fihlela ge a bolawa ke kankere.

 Ke ka letšatši leo moo ke ilego ka dira kholofetšo e bohlokwa kudu. Lucía o be a palelwa ke go bula mahlo. Tatagwe o be swere seatla se sengwe sa gagwe mola nna ke swere se sengwe. Ke ile ka bolelela fase ka re: “O se ke wa tshwenyega, nka se ke ka go tlogela. Hema ka go iketla. Ge o tsoga, o tla ikwa o phetše gabotse. O ka se sa kwa bohloko gape, le gona ke tla be ke e-na le wena.”

Ga bjale ke swanetše go boloka kholofetšo yeo. Ke a tseba gore go leta go ka se be bonolo. Le gona ke a tseba gore ge ke bota Jehofa ka go se fele pelo le go dula ke mmotegela, ke tla ba ke le gona ge morwedi wa-ka a tsošwa.

Bohwa bjo bo Tlogetšwego ke Lucía

Mohlala wa go ba sebete wa Lucía, gotee le thekgo e botse ya phuthego, di ile tša kgoma monna wa-ka kudu, yo e bego e se modumedi-gotee le nna. Letšatšing leo Lucía a hwilego ka lona, o ile a mpotša gore o swanetše go naganišiša kudu. Dibeke tše mmalwa ka morago, monna wa-ka o ile a kgopela go swarelwa thuto ya Beibele go mogolo wa phuthego. Kapejana monna wa-ka o ile a thoma go ba gona dibokeng ka moka. Ka thušo ya Jehofa o ile a kgaotša go kgoga, e lego selo seo a sa kago a kgona go se dira pele.

Manyami ao ke a kwago ka baka la go lahlegelwa ke Lucía ga se a fela ka mo go feletšego, lega go le bjalo ke leboga Jehofa bakeng sa bohwa bjoo Lucía a bo tlogetšego. Nna le monna wa-ka re homotšana ka kholofelo e botse ya tsogo, le go bona ka mahlo a kgopolo nako ya ge re tla be re bona Lucía gape—mahlwana a gagwe a magolo le dikoti-marameng.

Phihlelo e nyamišago ya morwedi wa rena e ile ya ba ya kgoma le moagišani yo mongwe ka go lebanya. Mokibelong o mongwe wa ge go be go e-na pula, mosadi yoo morwa wa gagwe a bego a tsena sekolo seo se bego se tsenwa ke Lucía o ile a nketela ka gae. Bolwetši bjona bjoo bo be bo bolaile morwa yo mongwe wa gagwe, yoo ka nako yeo a bego a e-na le nywaga e 11. Ge a be a e-kwa ka seo se diragaletšego Lucía, mosadi yo o ile a nyaka moo re dulago gona gomme a re etela. O be a nyaka go tseba gore ke kgotlelela bjang lehu la Lucía gomme o ile a šišinya gore re thome sehlopha sa go homotša bo-mma bao ba lego boemong bja go swana le bja rena.

Ke ile ka hlalosa gore nna ke šetše ke hweditše khomotšo ya kgonthe go e nngwe ya dikholofetšo tša Beibele, ye e fetago kgole yeo batho le ge e le bafe ba ka e neago. Mahlo a gagwe a ile a phadima ge ke be ke mmalela mantšu a Jesu a begilwego go Johane 5:28, 29. O ile a amogela go swarelwa thuto ya Beibele gomme kapejana a thoma go ikwa a e-na le “khutšo ya Modimo ye e fetago kgopolo yohle.” (Bafil. 4:7) Gantši ge re ithuta Beibele re le gotee, re a ema gomme ra ipona ka leihlo la kgopolo re le lefaseng le lefsa, re amogela baratiwa ba rena ge ba tsošwa.

Ee, bophelo bjo bokopana bja Lucía bo tlogetše bohwa bjo bo swarelelago. Tumelo ya gagwe e re thušitše gore re hlankele Modimo re le gotee bjalo ka lapa, gomme e okeditše le boikemišetšo bja-ka bja go dula ke tiile tumelong. Ka ntle le pelaelo, ka moka ga rena bao re lahlegetšwego ke baratiwa ba rena bao ba ka tsošwago re na le sebaka se bohlokwa kudu sa go kopana le bona.

[Seswantšho go letlakala 20]

Paradeise yeo e thadilwego ke Lucía