Na o Lebelela ba Bangwe ka Tsela Yeo Jehofa a ba Lebelelago ka Yona?

“Go se be le karogano mmeleng . . . gore ditho tša wona di hlokomelane ka mo go swanago.”—1 BAKOR. 12:25.

1. O ile wa ikwa bjang ge o be o thoma go tsena paradeiseng ya moya?

GE RE be re e-tšwa lefaseng le kgopo gomme re thoma go kopanela le batho ba Jehofa, go molaleng gore re be re thabetše lerato le borutho gotee le tlhokomelo yeo ba nago le yona. Ruri se se fapana le batho ba lego makgwakgwa, ba lehloyo le ba ditshele bao ba laolwago ke Sathane! Re ile ra tla paradeiseng ya moya yeo e tletšego khutšo le botee.—Jes. 48:17, 18; 60:18; 65:25.

2. (a) Ke’ng seo se ka kgomago pono ya rena ka ba bangwe? (b) Go ka nyakega gore re dire’ng?

² Lega go le bjalo, ge nako e dutše e e-ya re ka thoma go ba le dipono tše kgopamego ka bana babo rena ka baka la go se phethagale ga rena. Go se phethagale ga rena go ka dira gore re thome go godiša diphošo tša bana babo rena go e na le go lebelela dika tša bona tše dibotse tša moya. Ka boripana, re lebala go ba lebelela ka tsela yeo Jehofa a ba lebelelago ka yona. Ge se se direga go rena, ke nako ya gore re ele hloko pono ya rena le go dira gore e dumelelane le pono ya Jehofa e sekilego.—Ek. 33:13.

Kamoo Jehofa a Lebelelago Bana Babo Rena ka Gona

3. Beibele e bapetša phuthego ya Bokriste le eng?

³ Ka ge go begilwe go 1 Bakorinthe 12:2-26, moapostola Paulo o ile a bapetša phuthego ya  Bakriste ba tloditšwego le mmele o nago le “ditho tše dintši.” Bjalo ka ge ditho tša mmele di sa swane, ditho tša phuthego di fapana kudu ka dika le bokgoni bja tšona. Lega go le bjalo, Jehofa o di amogela di sa swane. O rata setho se sengwe le se sengwe e bile o se tšeela godimo. Paulo le yena o re eletša ka gore ditho tša phuthego “di hlokomelane ka mo go swanago.” Se se ka ba thata ka gobane dika tša ba bangwe di ka fapana le tša rena.

4. Ke ka baka la’ng re ka nyaka go lokiša pono ya rena ka bana babo rena?

⁴ Le gona re ka ba ra ba le tshekamelo ya go šetša mafokodi a bana babo rena. Ge re dira bjalo, ge e le gabotse re lebiša tlhokomelo karolong e itšego feela ya seswantšho. Lega go le bjalo, Jehofa yena o bona seswantšho ka moka ka nako e tee. Re ka sekamela go lebišeng tlhokomelo dikeng tšeo re sa di ratego, mola Jehofa a bona dika tše feletšego tša motho, go akaretša le dika tše dibotse tša motho. Ge re katanela go ba ba swanago le Jehofa, ke mo re ka godišago moya wa lerato le botee ka phuthegong.—Baef. 4:1-3; 5:1, 2.

5. Ke ka baka la’ng go se gwa swanela go ahlola ba bangwe?

⁵ Jesu o be a etše hloko gore gantši batho ba sa phethagalago ba na le tshekamelo ya go ahlola ba bangwe. O eleditše ka gore: “Tlogelang go ahlola gore le se ahlolwe.” (Mat. 7:1) Hlokomela gore Jesu ga se a ka a re: “Le se ke la ahlola”; o itše: “Tlogelang go ahlola.” O be a tseba gore ba bantši ba batheetši ba gagwe ba be ba šetše ba e-na le mokgwa wa go swaya ba bangwe diphošo. Na mokgwa wo o ka ba o šetše o metše ka go rena? Ge e ba re e-na le tshekamelo e bjalo, re swanetše go šoma ka thata gore re fetoge, e le gore re se tlo ahlolwa o šoro. Ruri re bomang go ahlola motho yoo Jehofa a mo dirišago maemong a itšego goba go bolela gore ga se a swanela go ba setho sa phuthego? Ngwanabo rena a ka ba le mafokodi, eupša ge e ba Jehofa a tšwela pele go mo amogela, na e ka ba mo go swanetšego gore rena re se mo amogele? (Joh. 6:44) Na re tloga re dumela gore Jehofa o etelela pele phuthego ya batho ba gagwe le gore ge e ba go swanetše go dirwa diphetogo, o tla gata mogato ka nako ya gagwe e swanetšego?—Bala Baroma 14:1-4.

6. Jehofa o lebelela bahlanka ba gagwe bjang?

⁶ Selo se se kgahlišago ka Jehofa ke gore o kgona go bona seo Mokriste yo mongwe le yo mongwe a ka bago sona ge a e-ba yo a phethagetšego lefaseng le lefsa. Le gona o tseba tšwelopele ya moya yeo Mokriste yoo a šetšego a e dirile. Ka gona, ga a na lebaka la go šetša mafokodi a nama. Re bala go Psalme 103:12 gore: “’Karoxô tša rena ó di tloša mo xo rena a di iša kxolê, kxolê bo-ka Bohlabêla bò le kxolê le Bodikêla.” Rena ka noši re ka leboga seo gakaakang!—Ps. 130:3.

7. Re ithuta’ng tseleng yeo Jehofa a bego a lebelela Dafida ka yona?

⁷ Re bona bohlatse ka Mangwalong bja gore Jehofa o na le bokgoni bjo bo kgethegilego bja go lebiša tlhokomelo dikeng tše dibotse tša motho. Modimo o hlalositše Dafida e le “Dafida mohlanka wa-ka e a bexo a hlôkômêla ditaêlô tša-ka, e a bexo a swere ka tsela ya xo latêla Nna ka pelo ya xaxwe ka moka, a fêla a dira tše Nna  ke rexo di lokile.” (1 Dikx. 14:8) Go ba gona, re a tseba gore Dafida o dirile dilo tše itšego tšeo di bego di fošagetše. Lega go le bjalo, Jehofa o ile a kgetha go lebiša tlhokomelo dikeng tše dibotse ka gobane o be a tseba gore pelo ya Dafida e lokile.—1 Kor. 29:17.

Lebelela Bana Beno ka Tsela Yeo Jehofa a ba Lebelelago ka Yona

8, 9. (a) Ke ka tsela efe re ka swanago le Jehofa? (b) Se se ka swantšhwa bjang, gomme re ka ithuta’ng?

⁸ Jehofa o kgona go tseba maikemišetšo a pelo, eupša rena ga re kgone. Le ke lona lebaka le lebotse la gore re se ke ra ahlola ba bangwe. Ga re tsebe maikemišetšo ka moka a motho yo mongwe. Re swanetše go leka go ekiša Jehofa ka go se lebiše tlhokomelo mafokoding a batho ba bangwe, ao mafelelong a tlago go fela. Na e ka se be pakane e botse gore re swane le yena tabeng ye? Go dira bjalo go tla tlaleletša kudu ditswalanong tše dibotse tša khutšo tšeo re nago le tšona le bana babo rena le dikgaetšedi.—Baef. 4:23, 24.

⁹ Ka mohlala, nagana ka ntlo yeo e hlagetšego—dikhatase di a wa, mafasetere a pšhatlegile le siling e sentšwe ke meetse. Batho ba bantši ba ka lebelela ntlo yeo gomme ba phetha ka gore e swanetše go thubja; ga e kgahliše. Eupša motho yo a nago le pono e tlogago e fapane a ka tšwelela. A ka no se foufatšwe ke ponagalo ya ka ntle gomme a bona gore moago o tiile le gore ntlo yeo e ka lokišwa. O reka ntlo yeo gomme a e lokiša le go kaonefatša ponagalo ya yona. Ka morago ga moo, batho ba fetago ka tsela ba bolela kamoo ntlo yeo e lego e botse ka gona. Na re ka swana le motho yo yoo a šomilego go lokiša goba go tsošološa ntlo? Go e na le go šetša diphošo tša ka ntle tša bana babo rena, na re ka lemoga dika tša bona tše dibotse le bokgoni bja bona le go lemoga gore ba ka kgona go gola moyeng? Ge re dira bjalo, re tla thoma go rata bana babo rena ka baka la dika tša bona tše dibotse tša moya, bjalo ka ge Jehofa a dira.—Bala Baheberu 6:10.

10. Keletšo yeo e hwetšwago go Bafilipi 2:3, 4 e ka re thuša bjang?

¹⁰ Moapostola Paulo o neile keletšo yeo e ka re thušago go ba le ditswalano tše dibotse le bohle ka phuthegong. O kgothaleditše Bakriste gore: “Le [se] dire selo ka tshele goba ka go ikgopola, eupša e be ka monagano o ikokobeditšego le tšea gore ba bangwe ba le feta ka bogolo, le beile leihlo, e sego ka kgahlego ya motho ka noši ditabeng tša lena feela, eupša le ka kgahlego ya motho ka noši go tša ba bangwe.” (Bafil. 2:3, 4) Boikokobetšo bo tla re thuša go ba le pono e nepagetšego ka ba bangwe. Go bontšha go tshwenyega ka ba bangwe le go lebelela dika tše dibotse go bona le gona go tla re thuša go ba lebelela ka tsela yeo Jehofa a ba lebelelago ka yona.

11. Ke diphetogo dife tšeo di kgomilego diphuthego tše dingwe?

¹¹ Dinakong tša morago bjale, diphetogo tšeo di diregago lefaseng ka bophara di dira gore batho ba bantši ba huduge. Metseng e mengwe ga bjale go dula batho ba tšwago dinageng tše dintši tše di fapa-fapanego. Ba bangwe ba batho bao e sa lego ba bafsa metseng ya gabo rena ba bontšhitše kgahlego therešong ya Beibele, gomme ba re tladitše go rapeleng Jehofa. Ba ba tšwa “ditšhabeng tšohle le melokong yohle le merafong yohle le malemeng ohle.” (Kut. 7:9) Ka baka leo, diphuthego tša gabo rena tše dintši di bopilwe ke batho ba bolelago maleme a mantši.

12. Ke pono efe ka ba bangwe yeo re swanetšego go e kgomarela, gona ke ka baka la’ng se e ka ba tlhohlo ka dinako tše dingwe?

¹² Phuthegong ya gabo rena, go ka nyakega gore re ele hloko kudu go kgomarela ga rena pono e nepagetšego ka ba bangwe. Seo se re gopotša keletšo ya moapostola Petro ya gore re bontšhe “maikwelo a borutho a borwarre a hlokago boikaketši” le gore re ‘ratane ka mo go tseneletšego go tšwa pelong.’ (1 Pet. 1:22) Go hlagolela lerato la kgonthe le maikwelo a borutho e ka ba tlhohlo moo go nago le batho ba tšwago ditlogong tše dintši tše sa swanego. Ditlwaelo tša barapedi-gotee le rena di ka fapana kudu le tša rena, bjalo ka thuto ya bona, maemo a tša boiphedišo le setlogo sa bona. Na o hwetša go le thata go kwešiša tsela yeo ba bangwe ba naganago le go arabela ka yona? Ba ka ba ba ikwa ka tsela e swanago le ka wena. Lega go le bjalo,  ka moka ga rena re eletšwa ka gore: “Ratang mokgatlo wohle wa bana babo rena.”—1 Pet. 2:17.

13. Ke diphetogo dife tša monagano tšeo go ka nyakegago gore re di dire?

¹³ Go ka nyakega gore re dire diphetogo tše itšego menaganong ya rena e le gore re katološe lerato la rena bakeng sa bana babo rena ka moka. (Bala 2 Bakorinthe 6:12, 13.) Na ka dinako tše dingwe re ikhwetša re bolela selo sa go swana le gore “Ga ke kgetholle, eupša . . . ” ke moka ra bolela seka se se fošagetšego seo re naganago gore se tlwaelegile bathong ba morafo o itšego? Maikwelo a bjalo a ka utolla go nyakega ga gore re lahle kgethollo yeo re ka bago re sa na le yona ka gare-gare. Re ka ipotšiša gore, ‘Na ka mehla ke dira boiteko bja go tseba batho ba morafo o mongwe?’ Go itlhahloba mo go bjalo go ka re thuša gore re kaonefatše go amogela le go rata borwarre bja rena bja ditšhaba-tšhaba.

14, 15. (a) Nea mehlala ya bao ba ilego ba dira diphetogo tseleng yeo ba lebelelago ba bangwe ka yona. (b) Re ka ba ekiša bjang?

¹⁴ Beibele e re nea mehlala e mebotse ya bao ba ilego ba dira diphetogo menaganong ya bona gomme yo mongwe wa bona e bile moapostola Petro. Ka ge e le Mojuda, Petro a ka ba a be a sa nyake go tsena ka lapeng la yo mongwe wa Bantle. Nagana feela kamoo a ilego a ikwa ka gona ge a be a kgopelwa gore a ye go etela lapa la yo mongwe wa Bantle yo a sa bollago yo a bitšwago Koronelio! Petro o ile a dira diphetogo, a lemoga gore e be e le thato ya Modimo gore batho ba ditšhaba ka moka e be karolo ya phuthego ya Bokriste. (Dit. 10:9-35) Saulo, yo ka morago a ilego a ba moapostola Paulo, le yena o ile a swanelwa ke go dira diphetogo le go lahla kgethollo. O ile a dumela gore o be a hloile Bakriste kudu moo a ilego a “dula [a] tlaiša phuthego ya Modimo e bile [a] e šwalalanya go feta tekanyo.” Lega go le bjalo, ge Paulo a be a phošollwa ke Morena Jesu, o ile a dira diphetogo tše dikgolo a ba a thoma go amogela ditaelo go tšwa go bao pele a bego a ba tlaiša.—Bagal. 1:13-20.

¹⁵ Ga go pelaelo gore re ka dira diphetogo boemong bja rena bja kgopolo ka thušo ya moya wa Jehofa. Ge e ba re lemoga gore go na le dika tše iphihlilego tša kgethollo ka go rena, a re kataneleng go di tomola ka medu le go “boloka botee bja moya setlemong se se tlemaganyago sa khutšo.” (Baef. 4:3-6) Beibele e re kgothaletša gore “[re apare] lerato, gobane ke setlemo se se phethagetšego sa botee.”—Bakol. 3:14.

Go Ekiša Jehofa Bodireding bja Rena

16. Thato ya Modimo ka batho ke efe?

¹⁶ Moapostola Paulo o ngwadile gore: “Ga go na go beba sefahlego go Modimo.” (Baroma 2:11) Morero wa Jehofa ke go akaretša batho ba ditšhaba ka moka thulaganyong ya gagwe ya borapedi. (Bala 1 Timotheo 2:3, 4.) Go phethagatša  morero woo, o rulagantše gore “ditaba tše dibotse tša ka mo go sa felego” di tsebatšwe go “ditšhaba tšohle le meloko yohle le maleme ohle le batho bohle.” (Kut. 14:6) Jesu o itše: “Tšhemo ke lefase.” (Mat. 13:38) Seo se bolele’ng go wena le go ditho tša lapa tša kgaufsi?

17. Re ka thuša batho ba mehuta ka moka bjang?

¹⁷ Ga se bohle bao ba kgonago go iša melaetša ya Mmušo dinageng tša kgole tša lefase. Lega go le bjalo, re ka kgona go iša molaetša wo bathong bao ba tšwago dinageng ka moka tša lefase bao ba dulago tšhemong ya gabo rena. Na re phafogela dibaka tša go nea bohlatse bathong ba mehuta ka moka, e sego feela bao re boletšego le bona ka nywaga e mentši? Ke ka baka la’ng o sa bontšhe boikemišetšo bja go dira boboledi go ba bangwe bao ba sego ba hwetša bohlatse bjo bo tletšego?—Baroma 15:20, 21.

18. Jesu o bontšhitše go tshwenyega gofe ka batho?

¹⁸ Jesu o be a fišegela go thuša batho bohle. Ga se a dira boboledi tikologong e tee feela. Pego e nngwe ya Beibele e re botša gore “a tšea leeto la go ya le metse le metsana ka moka.” Ke moka, “ge a bona mašaba a a šokela” gomme a bontšha gore o nyaka go a thuša.—Mat. 9:35-37.

19, 20. Ke ditsela dife tše dingwe tšeo ka tšona re ka bontšhago gore re tshwenyega ka batho ba mehuta ka moka bjalo ka Jehofa le Jesu?

¹⁹ Ke ditsela dife tše dingwe tšeo ka tšona o ka bontšhago boemo bja kgopolo bjo bo swanago? Ba bangwe ba lekile go nea bohlatse dikarolong tša tšhemo ya gabo bona yeo gantši ba bego ba sa kgone go e fetša. Ye e ka akaretša mafelo a dikgwebo, diphaka, moo go emago dinamelwa tša batho bohle goba pele ga meago ya bodulo yeo e sa fihlelegego ga bonolo. Ba bangwe ba dirile maiteko a go ithuta leleme le lefsa e le gore ba dire boboledi go batho ba merafo e itšego yeo ga bjale e dulago tikologong ya gabo bona goba dihlopha tšeo pele di bego di sa newe bohlatse gantši. Go ithuta go dumediša batho ba ka leleme la gabo bona go ka ba bontšha gore o ba kgahlegela gakaakang. Ge e ba re sa kgone go ithuta leleme le lengwe, na re ka kgothatša bao ba dirago bjalo? Ruri ga re nyake go nyamiša goba go belaela maikemišetšo a bao ba dirago boiteko bjo bjalo bja go dira boboledi go batho ba tšwago dinageng tše dingwe. Maphelo ka moka a bohlokwa mahlong a Modimo, le gona re nyaka go ba le pono e swanago.—Bakol. 3:10, 11.

²⁰ Le gona, go ba le pono ya Modimo ka batho go bolela go dira boboledi go batho ka moka, go sa šetšwe maemo a bona. Ba bangwe ba ka ba ba se na magae, ba se ba hlweka goba go le molaleng gore tsela yeo ba phelago ka yona e gobogile. Ge e ba batho ba bangwe ba re swara ka tsela e sego botho, seo ga se sa swanela go re dira gore re be le pono e fošagetšego ka setšhaba goba morafo wa bona ka kakaretšo. Paulo o ile a swarwa gampe ke ba bangwe, eupša ga se a ka a dumelela seo se mo dira gore a tlogele go dira boboledi go batho ba morafo woo. (Dit. 14:5-7, 19-22) O be a e-na le kholofelo ya gore batho ba bangwe ba tlo arabela gabotse.

21. Go lebelela batho ka tsela yeo Jehofa a ba lebelelago ka yona go tla go thuša bjang?

²¹ Ga bjale go bonagala gabotse go feta le ge e le neng pele gore go ba le pono e nepagetšego—pono ya Jehofa—go a nyakega ditirišanong tša rena le bana babo rena ba tikologong ya gabo rena, ba lefaseng ka bophara le go batho bao re kopanago le bona tšhemong. Ge re tšwela pele re bontšha pono ya Jehofa, re tla ba tutuetšo ya khutšo le botee. Le gona re tla kgona go thuša ba bangwe go rata Jehofa, Modimo yo a ‘sa kago a beba sefahlego’ eupša yo a bontšhago kgahlego e lerato go bohle, “xobane bohle ké babopya ba diatla tš’axwe.”—Jobo 34:19.

Na o ka Araba?

• Re swanetše go katanela go phema go ba le pono efe ka bana babo rena?

• Re ka ekiša Jehofa bjang tseleng yeo re lebelelago bana babo rena?

• O ithutile’ng mabapi le pono ya rena ka borwarre bja lefase ka bophara?

• Re ka ekiša pono ya Jehofa bjang ka batho ge re le bodireding?

[Dipotšišo tša Thuto]

[Seswantšho go letlakala 26]

O ka kgona go tseba batho ba merafo e mengwe bjang?

[Seswantšho go letlakala 28]

Ke ka ditsela dife o ka fihlelelago batho ba oketšegilego ka ditaba tše dibotse?