Bafsa, Gopolang Mmopi wa Lena yo Mogolo Gona Bjale
Bafsa, Gopolang Mmopi wa Lena yo Mogolo Gona Bjale
“Xopola Mmopi wa xaxo Ò sa le yo mofsa.”—MMO. 12:1.
1. Jehofa o bontšha bjang gore o bota bafsa bao ba mo rapelago?
JEHOFA o lebelela bafsa ba Bakriste e le ba bohlokwa le ba lapološago go swana le phoka. Ee, o boletše e sa le pele gore letšatšing la ge Morwa wa gagwe a “e-tšwa dirá,” masogana le dikgarebe ba “tlo ithapa” tirelong ya Kriste. (Ps. 110:3) Boporofeta bjoo bo be bo swanetše go phethega nakong ya ge batho ka kakaretšo ba sa kwe Modimo, ba laolwa ke boithati le tšhelete, le go se kwe. Lega go le bjalo, Jehofa o be a tseba gore bafsa bao ba mo rapelago e tla ba ba fapanego. Ruri o a le bota lena bana babo rena le dikgaetšedi ba bafsa!
2. Go gopola Jehofa go akaretša’ng?
2 Nagana ka lethabo leo Modimo a bago le lona ge a bona bafsa ba gopola gore ke Mmopi wa bona yo Mogolo. (Mmo. 12:1) Ge e le gabotse, go gopola Jehofa go akaretša se se fetago go fo nagana ka yena. Go akaretša go gata mogato—go dira seo se mo kgahlago, go dumelela melao ya gagwe le melao ya gagwe ya motheo e re hlahla bophelong bja rena bja letšatši le letšatši. Le gona e akaretša go bota Jehofa, re tseba gore o re kganyogela tše kaone-kaone. (Ps. 37:3; Jes. 48:17, 18) Na o ikwa ka tsela yeo ka Mmopi wa gago yo Mogolo?
“Bôʹta Modimo ka Pelo ka Moka”
3, 4. Jesu o ile a bontšha bjang gore o bota Jehofa, gomme ke ka baka la’ng go le bohlokwa go bota Jehofa lehono?
3 Ke therešo gore Jesu Kriste ke mohlala o mobotse kudu wa motho yoo a ilego a bota Modimo. O ile a phela ka go dumelelana le mantšu a Diema 3:5, 6, a rego: “Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.” Kapejana ka morago ga kolobetšo ya gagwe, Jesu o ile a batamelwa ke Sathane, yoo a ilego a leka go mo goketša gore a amogele bolaodi ka moka bja lefase le letago la lona. (Luka 4:3-13) Jesu ga se a ka a arošwa. O be a tseba gore “lehumô [la kgonthe], le xo rêtwa, le xo phela” ke ‘moputso wa boikokobetšo le go boifa Jehofa.’—Die. 22:4.
4 Lefase la lehono le laolwa ke megabaru le boithati. Boemong bjo bjalo, re tla ba re bontšha bohlale ge re latela mohlala wa Jesu. Le gona gopola gore Sathane o tla dira selo le ge e le sefe gore a aroše bahlanka ba Jehofa tseleng e pitlaganego yeo e išago bophelong. O nyaka go bona batho ka moka ba sepela tseleng e petleke yeo e išago tshenyegong. O se ke wa forwa ke yena! Go e na le moo, ikemišetše go gopola Mmopi wa gago yo Mogolo. Mmote ka mo go feletšego, gomme o swarelele ka go tia “bophelong bja kgonthe,” bjo bo kgonthišeditšwego le bjo bo lego kgaufsi.—1 Tim. 6:19.
Bafsa, Hlalefang!
5. O ikwa bjang ka bokamoso bja lefase le?
5 Bafsa bao ba gopolago Mmopi wa bona yo Mogolo ke ba bohlale kudu ge ba bapetšwa le dithaka tša bona. (Bala Psalme 119:99, 100.) Ka ge ba e-na le pono ya Modimo, ba tseba gabotse gore bokamoso bja lefase le bo fsifsetše kudu. Gaešita le nakong ya bophelo bja lena e kopana, ga go pelaelo gore lena bafsa le šetše le bone dipoifo le dipelaelo tša batho di gola. Ge e ba o sa tsena sekolo, o ka ba o šetše o kwele ka tšhilafalo, go ruthela ga lefase, go rengwa ga dithokgwa le ka mathata a mangwe a swanago le ao. Batho ba tshwenyegile kudu ka mathata a, eupša ke Dihlatse tša Jehofa feela tšeo di kwešišago gabotse gore mathata a ke karolo ya pontšho yeo e bontšhago bofelo bja lefase la Sathane.—Kut. 11:18.
6. Bafsa ba bangwe ba ile ba forwa bjang?
6 Ka manyami, bahlanka ba bangwe ba Modimo bao e sa lego bafsa ba ile ba se sa ba šedi gomme ba itumelela go se sa bona gore lefase le le šaletšwe ke nako e kopana gakaakang. (2 Pet. 3:3, 4) Ba bangwe ba ile ba wela dibeng tše dikgolo ka ba ka la go ba le bagwera ba babe le ka baka la diswantšho tše di kgothaletšago bootswa. (Die. 13:20) Go tla nyamiša gakaakang go se sa amogelwa ke Modimo gona bjale mola re šetše re le kgaufsi kudu le bofelo! Go e na le moo, ithute go seo se diragaletšego Baisiraele ka 1473 B.C.E. ge ba be ba hlomile mešaša Melaleng ya Moaba, mollwaneng wa Naga ya Kholofetšo. Ke’ng seo se ilego sa direga moo?
Ba Wele ba Šetše ba le Mollwaneng
7, 8. (a) Ke leano lefe leo Sathane a ilego a le diriša Melaleng ya Moaba? (b) Ke leano lefe leo Sathane a le dirišago lehono?
7 Ge e le gabotse, Sathane ka nako yeo o be a nyaka go šitiša Baisiraele go hwetša bohwa bja bona bjoo ba bo holofeditšwego. Ka morago ga ge a paletšwe ke go dira gore ba rogwe ke moporofeta Bileama, Sathane o ile a diriša leano la bohwirihwiri; o ile a leka go dira gore ba se swanelege go šegofatšwa ke Jehofa. Basadi ba goketšago ba Moaba ba ile ba dirišwa go ba tanya, gomme mo lebakeng le Diabolo o ile a atlega ka tsela e itšego. Batho ba ile ba thoma go ba le dikopano tše di gobogilego tša botona le botshadi le barwedi ba Moaba le go khunamela Baali Peoro! Le ge bohwa bja bona bjo bohlokwa, Naga ya Kholofetšo, bo be bo le kgaufsi kudu, Baisiraele ba ka bago ba 24 000 ba ile ba lahlegelwa ke maphelo a bona. A manyami ruri!—Num. 25:1-3, 9.
8 Lehono, re batamela ka lebelo lefaseng le lekaone leo le holofeditšwego—tshepedišo e mpsha ya dilo. Ka ge a tlwaetše, Sathane o sa dutše a diriša dikopano tše di gobogilego tša botona le botshadi go senya batho ba Modimo. Ditekanyetšo tša boitshwaro lefaseng di phuhlame kudu moo bootswa bo lebelelwago e le selo se se tlwaelegilego gomme bosodoma bo lebelelwa e le feela taba ya boikgethelo. Kgaetšedi yo mongwe wa Mokriste o boletše gore, “Ke Holong ya Mmušo le ka gae feela moo bana ba-ka ba ithutago gore bosodoma le dikopano tša botona le botshadi tša ka ntle ga lenyalo di fošagetše mahlong a Modimo.”
9. Ke’ng seo se ka diregago ‘lebakeng la bofsa,’ gomme bafsa ba ka lebeletšana le sona bjang?
9 Bafsa bao ba gopolago Mmopi wa bona yo Mogolo ba tseba gore dikopano tša botona le botshadi ke mpho e kgethwa yeo e sepedišanago le bophelo le go belega. Ka gona, ba lemoga gore dikopano tša botona le botshadi di swanetše go thabelwa ka tsela yeo Modimo a laetšego—thulaganyong ya lenyalo feela. (Baheb. 13:4) Lega go le bjalo, ‘lebakeng la bofsa’—nakong ya ge kganyogo ya dikopano tša botona le botshadi e le e matla e bile e ka šitiša kahlolo e botse ya motho—go ka ba thata go boloka tshekego. (1 Bakor. 7:36) Ke’ng seo o ka se dirago ge o e-ba le dikgopolo tše fošagetšego? Rapela Jehofa ka mo go tseneletšego gore a go thuše go nagana dilo tše hlwekilego. Jehofa ka mehla o theetša bao ba mo tsomago ka potego. (Bala Luka 11:9-13.) Dipoledišano tše agago le tšona di ka re thuša go lebiša menagano ya rena dilong tše hlwekilego.
Kgethang Dipakane tša Lena ka Bohlale!
10. Ke kgopolo efe e fošagetšego yeo re nyakago go e efoga, gomme re ka ipotšiša dipotšišo dife?
10 Lebaka le le lengwe leo le dirago gore bafsa ba bantši lefaseng ba se laolege le go phelela maipshino a nama ke gore ga ba na “pônô-kxêthwa”—ga ba na tlhahlo ya Modimo goba kholofelo e tiilego ka bokamoso. (Die. 29:18) Ba swana le Baisiraele bao ba bego ba hlanogetše Modimo ba mehleng ya Jesaya bao ba bego ba phelela ‘lethabo le go nyakalala, go ja dinama le go nwa merara.’ (Jes. 22:13) Go e na le go duma batho ba bjalo, ke ka baka la’ng o sa naganišiše ka kholofelo e bohlokwa yeo Jehofa a e beilego pele ga bahlanka ba gagwe ba botegago? Ge e ba o le mohlanka wa Modimo yo e sa lego yo mofsa, na o hlologetše lefase le lefsa ka phišego? Na o leka ka gohle go “phela ka monagano o hlaphogetšwego . . . ge [o] letile kholofelo e thabišago” yeo Jehofa a e beilego pele ga gago? (Tito 2:12, 13) Karabo ya gago e tla kgoma dipakane tša gago le dilo tšeo o rulagantšego gore di tle pele bophelong bja gago.
11. Ke ka baka la’ng bafsa ba Bakriste bao ba sa lego sekolong ba swanetše go šoma ka thata?
11 Lefase le nyaka gore bafsa ba diriše matla a bona dipakaneng tša lefase. Ka tlwaelo, lena bao le sa lego sekolong le swanetše go katanela go hwetša thuto e botse ya motheo. Le swanetše go gopola gore maikemišetšo a lena ga se go fo hwetša mošomo o swanetšego eupša gape ke go hlankela phuthego le go ba bagoeledi ba Mmušo bao ba atlegago. Go fihlelela pakane yeo, le swanetše go kgona go bolela gabotse, go nagana ka tsela e nago le tlhaologanyo le go nea ba bangwe mabaka ka go iketla le ka tlhompho. Lega go le bjalo, bafsa bao ba ithutago Beibele le go katanela go diriša melao ya yona ya motheo maphelong a bona ba hwetša thuto e bohlokwa go feta tšohle le go thea motheo o mobotse wa bokamoso bjo bo atlegago le bja ka mo go sa felego.—Bala Psalme 1:1-3. *
12. Ke mohlala ofe woo malapa a Bakriste a tla dirago gabotse go o ekiša?
12 Kua Isiraele, thuto yeo bana ba bego ba e rutwa ke batswadi ba bona e be e etišwa pele ga dilo tšohle. Thuto yeo e be e akaretša mo e nyakilego go ba dikarolo ka moka tša bophelo, kudu-kudu dilo tša moya. (Doit. 6:6, 7) Ka gona, bafsa ba Baisiraele bao ba bego ba theetša batswadi ba bona le batho ba bangwe bagolo bao ba boifago Modimo ba be ba sa hwetše tsebo feela eupša gape ba be ba hwetša bohlale, temogo, kwešišo le bokgoni bja go nagana—dika tše di hwetšwago ka sewelo tšeo thuto ya Modimo e di neago. (Die. 1:2-4; 2:1-5, 11-15) Malapa a Bakriste lehono a swanetše go ela hloko thuto ka tsela e swanago.
Theetšang Bao ba le Ratago
13. Ke dikeletšo tša mohuta mang tšeo bafsa ba bangwe ba di newago, gomme ke ka baka la’ng ba swanetše go ba šedi?
13 Bafsa ba eletšwa ke batho ba mehuta ka moka—go akaretša le batho bao ba hlahlago barutwana, bao gantši ba bontšhago bafsa kamoo ba ka atlegago ka gona mošomong wa lefase. Hle naganišišang ka dikeletšo tše bjalo ka thapelo ka thušo ya Lentšu la Modimo le ka dijo tša moya tšeo di newago ke sehlopha sa mohlanka yo a botegago le wa temogo. Go tšwa go seo le ithutilego sona Beibeleng, le a tseba gore bafsa le batho ba se nago phihlelo ke bahlaselwa ba bagolo ba Sathane. Ka mohlala, tšhemong ya Edene, Efa yo a se nago phihlelo o ile a theetša Sathane, motho o šele yo a sa kago a mmontšha tlhasana le ge e le efe ya lerato. Mafelelo e be e tla ba a fapanego ge nkabe a ile a theetša Jehofa, yo a ilego a hlatsela ka ditsela tše dintši gore o a mo rata!—Gen. 3:1-6.
14. Ke ka baka la’ng re swanetše go theetša Jehofa le batswadi bao e lego badumedi?
14 Le wena Mmopi wa gago yo Mogolo o a go rata, e bile o go rata ka tsela e se nago boikaketši. O nyaka gore o thabe go ya go ile, e sego ga bjale feela! Ka gona, ka lerato la motswadi yo a hlokomelago, o botša wena le bohle bao ba mo rapelago gore: “Tsela šé! Tšeang ka yôna!” (Jes. 30:21) Ge e ba batswadi ba gago e le badumedi bao ba tlogago ba rata Jehofa, o na le tšhegofatšo e oketšegilego. Ka tlhompho theetša keletšo ya bona ge o ipeela dilo tšeo o di etišago pele bophelong le dipakane. (Die. 1:8, 9) Go ba gona, ba nyaka gore o hwetše bophelo, e lego selo se bohlokwa kudu go feta lehumo goba maemo lefaseng le.—Mat. 16:26.
15, 16. (a) Ke’ng seo re ka kgodišegago gore Jehofa o tla re direla sona? (b) Ke thuto efe e bohlokwa yeo re ithutago yona phihlelong ya Baruke?
15 Bao ba gopolago Mmopi wa bona yo Mogolo ba boloka bophelo bja bona bo le bonolo, ba kgodišegile gore Jehofa “le ka mohla” a ka se ke a ba tlogela “le ge e le” go ba lahla. (Bala Baheberu 13:5.) Ka ge kgopolo ye e botse e fapana le kgopolo ya lefase, re swanetše go ba šedi gore re se ke ra dumela go tutuetšwa ke moya wa lefase. (Baef. 2:2) Tabeng ye, ela hloko mohlala wa mongwaledi wa Jeremia, e lego Baruke, yo a ilego a phela mehleng ya bofelo ya Jerusalema yeo e bego e lebiša tshenyong ya motse wo ka 607 B.C.E.
16 Go ka direga gore Baruke o be a nyaka go hwetša bophelo bjo bokaone ka go ikhweletša mahumo. Jehofa o ile a lemoga se gomme a eletša Baruke ka botho gore a se ke a “inyakêla tše kxolo.” Baruke o ile a ipontšha a ikokobeditše le go ba bohlale, ka ge a ile a theetša Jehofa gomme a phologa tshenyo ya Jerusalema. (Jer. 45:2-5) Ka lehlakoreng le lengwe, batho ba mehleng ya Baruke bao ba ilego ba “inyakêla tše kxolo,” ba bea dikgahlego tša Jehofa boemong bja bobedi, go se go ye kae Bakaladea (Babilona) ba ile ba tšea dilo tšeo. Ba bantši le bona ba ile ba lahlegelwa ke maphelo a bona. (2 Kor. 36:15-18) Phihlelo ya Baruke e re thuša go bona gore go ba le tswalano e botse le Modimo go bohlokwa kudu go feta mahumo le botumo lefaseng le.
Ithute Mehlaleng e Kaone-kaone
17. Ke ka baka la’ng Jesu, Paulo le Timotheo e le mehlala e mebotse yeo e ka ekišwago ke bahlanka ba Jehofa lehono?
17 Go re thuša go sepela tseleng e išago bophelong, Lentšu la Modimo le re nea mehlala e mentši ya batho bao re ka ba ekišago. Ka mohlala, Jesu e be e le motho yo bohlale kudu yo a kilego a phela, lega go le bjalo o ile a šetša seo se bego se tla mo hola go ya go ile —“ditaba tše dibotse tša mmušo.” (Luka 4:43) E le gore a nee Jehofa tše kaone-kaone, moapostola Paulo o ile a tlogela mošomo wa gagwe wa maemo gomme a diriša nako ya gagwe le matla go ruta ditaba tše dibotse. Timotheo, “ngwana wa kgonthe tumelong,” o ile a ekiša mohlala o mobotse wa Paulo. (1 Tim. 1:2) Na Jesu, Paulo le Timotheo ba ile ba itshola ka baka la tsela ya bona ya bophelo? Le gatee! Ge e le gabotse, Paulo o ile a bolela gore o lebelela seo lefase le se neago e le “maudi” ge se bapišwa le tokelo ya go hlankela Modimo.—Bafil. 3:8-11.
18. Ke diphetogo dife tše dikgolo tšeo ngwanabo rena yo mongwe a ilego a di dira, gona ke ka baka la’ng a sa itshole?
18 Bafsa ba bantši ba Bakriste lehono ba ekiša tumelo ya Jesu, Paulo le Timotheo. Ka mohlala, ngwanabo rena wa mofsa yo a kilego a šoma mošomo o lefago gabotse o ngwadile gore: “Ka ge ke phela ka melao ya motheo ya Beibele, go se go ye kae ke ile ka hlatlošwa mošomong. Go sa šetšwe go ba le tšhelete, ke be ke ikwa eka ke phuthela moya ka kobo. Ge ke bolela le balaodi ba khamphani gomme ke ba botša ka kganyogo ya-ka ya go tsenela tirelo ya nako e tletšego, kapejana ba ile ba nkholofetša tšhelete e oketšegilego, ba nagana gore ke tla dula. Eupša ke be ke phethile le monagano. Batho ba bantši ba be ba sa kwešiše lebaka la gore ke tlogele mošomo o lefago e le gore ke phegelele tirelo ya nako e tletšego. Karabo ya-ka ke gore ke tloga ke nyaka go phelela boineelo bja-ka go Modimo. Ka ge bophelo bja-ka ga bjale bo ithekgile dilong tša moya, ke na le lethabo le kgotsofalo tšeo nka se kego ka di hwetša tšheleteng goba botumong.”
19. Ke dikgetho dife tše bohlale tšeo bafsa ba kgothaletšwago go di dira?
19 Lefaseng ka bophara, bafsa ba dikete ba dirile dikgetho tše swanago tše bohlale. Ka gona, bafsa, ge le nagana ka bokamoso bja lena, dulang le nagana ka letšatši la Jehofa. (2 Pet. 3:11, 12) Le se ke la duma bao ba atlegago lefaseng le. Go e na le moo, theetšang bao ba tlogago ba le rata. Go ipolokela “mahumo legodimong” ke peeletšo e bohlokwa kudu yeo motho a ka e dirago e bile ke yona feela yeo e nago le mehola ya ka mo go sa felego. (Mat. 6:19, 20; bala 1 Johane 2:15-17.) Ee, gopolang Mmopi wa lena yo Mogolo. Ge le dira bjalo, Jehofa o tla le šegofatša.
[Mongwalo wa tlase]
^ ser. 11 Mabapi le thuto e phagamego le mošomo, bona Morokami wa October 1, 2005, matlakala 26-31.
[Na o a Gopola?]
• Re bontšha bjang gore re bota Modimo?
• Thuto e kaone-kaone ke efe?
• Ke dithuto dife tšeo re ka ithutago tšona go Baruke?
• Ke bomang bao e lego mehlala e ka latelwago, gona ka baka la’ng?
[Dipotšišo tša Thuto]
[Diswantšho go letlakala 13]
Jehofa o ruta thuto e kaone-kaone
[Seswantšhoo go letlakala 15]
Baruke o ile a theetša Jehofa gomme a phologa ge Jerusalema e senywa. O ka ithuta’ng mohlaleng wo?