Lentšu la Jehofa le a Phela

Dintlha tše Kgolo go tšwa Pukung ya Johane

JOHANE—“morutiwa yo Jesu a bego a mo rata”—ke motho wa mafelelo wa go ngwala pego e buduletšwego ka bophelo le bodiredi bja Kriste. (Joh. 21:20) Ebangedi ya Johane yeo e ngwadilwego mo e nyakilego go ba ka 98 C.E., e bušeletša dilo tše sego kae feela tšeo di ngwadilwego ka Diebangeding tše dingwe tše tharo.

Moapostola Johane o ngwadile Ebangedi ya gagwe a e-na le morero o kgethegilego. Mabapi le dilo tšeo a di begilego, o re: “Tše di ngwadilwe gore le dumele gore Jesu ke Kriste Morwa wa Modimo, le gore ka baka la go dumela le be le bophelo ka leina la gagwe.” (Joh. 20:31) Ka kgonthe molaetša wa yona ke wa bohlokwa bjo bogolo go rena.—Baheb. 4:12.

“BONANG, KWANA YA MODIMO”

(Joh. 1:1–11:54)

Ge a bona Jesu, Johane Mokolobetši o bolela ka kgodišego gore: “Bonang, Kwana ya Modimo e tlošago sebe sa lefase!” (Joh. 1:29) Ge Jesu a dutše a phatša Samaria, Galilea, Judea le nageng ya ka bohlabela bja Jorodane—a bolela, a ruta le go dira mehlolo e matla—‘batho ba bantši ba tla go yena gomme ba mo dumela.’—Joh. 10:41, 42.

O mongwe wa mehlolo e megolo yeo Jesu a e dirago ke go tsoša Latsaro. Ba bantši ba dumela Jesu ge ba bona monna yo a bego a hwile ka matšatši a mane a phela gape. Lega go le bjalo, baperisita ba bagolo le Bafarisei, ba lakana go bolaya Jesu. Ka gona, Jesu o a tloga gomme o ya “nageng kgaufsi le lešoka, motseng o bitšwago Efuraime.”—Joh. 11:53, 54.

Dipotšišo tša Mangwalo di a Arabja:

1:35, 40—Ka ntle le Andrea, ke morutiwa ofe yo mongwe yo a bego a eme le Johane Mokolobetši? Molaodiši o dula a bolela ka Johane Mokolobetši e le “Johane” gomme ga a itsebiše ka leina ka Ebangeding ya gagwe. Ka gona, morutiwa yo a sa itsebišego ka ntle le pelaelo ke mongwadi wa Ebangedi ye e lego Johane.

2:20—Ke tempele efe ‘yeo e ilego ya agwa ka nywaga e masome-nne-tshela’? Bajuda ba be ba bolela ka go agwa lefsa ga tempele ya Serubabele ke Kgoši Heroda wa Judea. Go ya ka radihistori Josephus, modiro woo o thomile ngwageng wa bo-18 wa pušo ya Heroda, goba ka 18/17 B.C.E. Sekgethwa sa tempele le meago e mengwe e megolo e agilwe ka nywaga e seswai. Lega go le bjalo, modiro wa go aga tempele o ile wa tšwela pele go fihla ka Paseka ya 30 C.E. le go fetela ka kua ga yona ge Bajuda ba be ba bolela gore e agilwe ka nywaga e 46.

5:14—Na bolwetši bo bakwa ke go dira sebe? Ga se gore go bjalo. Monna yoo Jesu a ilego a mo fodiša o be a e-na le nywaga e 38 a babja ka baka la go se phethagale ga leabela. (Joh. 5:1-9) Seo Jesu a bego a se bolela e be e le gore ka ge ga bjale monna yo a bontšhitšwe kgaugelo, o swanetše go latela tsela e lebišago phološong gomme a se ke a dira sebe ka boomo gore a se tlo wela ke selo se sebe kudu go feta bolwetši. Monna yoo o be a ka ba le molato wa go dira sebe seo se sa lebalelwego, gomme a swanelwa ke lehu le go se tsošwe bahung.—Mat. 12:31, 32; Luka 12:10; Baheb. 10:26, 27.

5:24, 25—Ke bomang ‘bao ba tlogago lehung le go fetela bophelong’? Jesu o bolela ka bao ba bego ba hwile moyeng eupša ka morago ga go kwa mantšu a gagwe ba thoma go mo dumela gomme ba tlogela go sepela tseleng ya bona ya sebe. Ba ‘tloga lehung le go fetela bophelong’ ka kgopolo ya gore kahlolo ya lehu e tlošwa go bona, gomme ba newa kholofelo ya bophelo bjo bo sa felego ka baka la tumelo ya bona go Modimo.—1 Pet. 4:3-6.

5:26; 6:53—Polelwana ‘go ba le bophelo go  yena’ e ra go re’ng? Go Jesu Kriste, se se bolela gore Modimo o be a tla mo nea bokgoni bja go dira dilo tše pedi—bokgoni bja go dira gore batho ba amogelwe ke Jehofa le matla a go ba nea bophelo nakong ya tsogo ya bahu. Go balatedi ba Jesu, ‘go ba le bophelo go bona’ go bolela go ba le bophelo bjo bo feletšego. Bakriste ba tloditšwego ba tsena go bjona ge ba tsošetšwa bophelong bja legodimong. Babotegi bao ba nago le kholofelo ya go phela lefaseng ba tla phela bophelo bjo bo feletšego feela ka morago ga ge ba fetile tekong ya mafelelo yeo e tla latelago ka morago ga Pušo ya Kriste ya Nywaga e Sekete.—1 Bakor. 15:52, 53; Kut. 20:5, 7-10.

6:64—Na Jesu o tsebile nakong ya ge a be a kgetha Judase Isikariote gore o be a tlo mo eka? Go bonala a be a sa tsebe. Lega go le bjalo, lebakeng le lengwe ka ngwaga wa 32 C.E., Jesu o boditše baapostola ba gagwe gore: “Yo mongwe wa lena ke mothomeletši.” Go na le kgonagalo ya gore ka nako yeo Jesu o be a lemoga ‘mathomo’ a tsela e mpe ya Judase Isikariote.—Joh. 6:66-71.

Seo re Ithutago Sona:

2:4. Jesu o be a bontšha Maria gore ka ge yena e le Morwa yo a tloditšwego le yo a kolobeditšwego wa Modimo, o swanetše go latela ditaelo tša Tatagwe wa legodimong. Gaešita le ge Jesu a be a sa thoma bodiredi bja gagwe, o be a tseba gabotse iri, goba nako ya modiro wo a o abetšwego, go akaretša le ya lehu la gagwe. Ga go setho sa kgaufsi sa lapa se bjalo ka Maria seo a bego a tla se dumelela gore se mo šitiše go phetha thato ya Modimo. Re swanetše go hlankela Jehofa Modimo ka maikemišetšo a swanago.

3:1-9. Mohlala wa Nikodemo, mmuši wa Bajuda, o re ruta dithuto tše pedi. Ya pele, Nikodemo o bontšhitše boikokobetšo, temogo le go lemoga go nyaka ga gagwe dilo tša moya, a lemoga gore morwa wa mmetli yo a nyatšegago ke morutiši yo a romilwego ke Modimo. Bakriste ba therešo lehono ba swanetše go ba le boikokobetšo. Ya bobedi, Nikodemo o ile gogela morago gore a se be morutiwa nakong ya ge Jesu a sa le lefaseng. Mohlomongwe se ke ka gobane a be a boifa batho, a rata boemo bjo a bego a e-na le bjona go Sanhedrine, goba go rata mahumo a gagwe. Re ka ithuta thuto temošong ye: Ga se ra swanela go dumelela ditshekamelo tše bjalo di re thibela go ‘tšea kota ya rena ya tlhokofatšo le go latela Jesu ka go se kgaotše.’—Luka 9:23.

4:23, 24. E le gore borapedi bja rena bo amogelege go Modimo, bo swanetše go sepedišana le therešo yeo e utolotšwego ka Beibeleng gomme e swanetše go hlahlwa ke moya o mokgethwa.

6:27. Go šomela ‘dijo tše di dulago go iša bophelong bjo bo sa felego’ ke go dira boiteko bja go kgotsofatša senyakwa sa rena sa moya. Re tla ba ba thabilego ge re dira bjalo.—Mat. 5:3.

6:44. Jehofa o re hlokomela ka boyena. O re gogela go Morwa wa gagwe ka go re fihlelela re le motho ka o tee ka o tee a diriša modiro wa boboledi le go re thuša go kwešiša le go diriša ditherešo tša moya a diriša moya wa Gagwe o mokgethwa.

 11:33-36. Go bontšha maikwelo a rena ga se bofokodi.

‘TŠWELA PELE O MO LATELA’

(Johane 11:55–21:25)

Ge Paseka ya 33 C.E. e batamela, Jesu o boela Bethania. Ka Nisani 9, o tla Jerusalema a nametše pokolwana. Ka Nisani 10, Jesu o tla tempeleng gape. Ge thapelo ya gagwe ya gore leina la Tatagwe le tagafatšwe e arabja, lentšu le le tšwago legodimong le re: “Ke le tagafaditše gomme ke tla buša ke le tagafatša.”—Joh. 12:28.

Ge ba e-ja dijo tša Paseka, Jesu o nea balatedi ba gagwe keletšo pele ga ge a kgaogana le bona gomme o a ba rapelela. Ka morago ga go golegwa ga gagwe, go sekišwa le kokotelwa koteng, Jesu o a tsošwa.

Dipotšišo tša Mangwalo di a Arabja:

14:2—Jesu o tla “lokišetša lefelo” bjang legodimong bakeng sa balatedi ba gagwe? Se se be se tla akaretša go hloma ga Jesu kgwerano e mpsha ka go tšwelela pele ga Modimo le go Mo nea mohola wa madi a gagwe. Go lokišetša moo go be go tla akaretša go newa ga Kriste matla a bogoši, ao ka morago ga go a newa go bego go tla thoma go tsošetšwa ga balatedi ba gagwe ba tloditšwego legodimong.—1 Bathes. 4:14-17; Baheb. 9:12, 24-28; 1 Pet. 1:19; Kut. 11:15.

14:16, 17; 16:7, 8, 13, 14—Re ithuta thuto efe mabapi le moya o mokgethwa go Johane 14:26 le Johane 16:13, gomme e ka re thuša bjang? Moya o mokgethwa wa Jehofa o šoma e le morutiši le mogopotši. Gape o utolla ditherešo. Ka baka leo, o ka re thuša go gola ka tsebo, bohlale, temogo, kahlolo e botse le bokgoni bja go nagana. Ka gona, re swanetše go phegelela thapelong, re kgopela moya woo ka go lebanya.—Luka 11:5-13.

19:11—Na Jesu o be a bolela ka Judase Isikariote ge a be a bolela le Pilato ka motho yo a Mo gafetšego go yena? Go e na le go šupa go Judase goba motho yo a itšego, go bonala Jesu a be a bolela ka bohle bao ba tšerego karolo sebeng sa go mmolaya. Ba ba be ba akaretša Judase, “baperisita ba bagolo le Sanhedrine ka moka,” gaešita le “mašaba” ao a bego a hlohleleditšwe go kgopela gore Baraba a lokollwe.—Mat. 26:59-65; 27:1, 2, 20-22.

20:17—Ke ka baka la’ng Jesu a ile a botša Maria Magadalena gore a tlogele go mo gomarela? Go bonagala Maria a be a gomaretše Jesu ka gobane o be a nagana gore o be a le kgaufsi le go rotogela legodimong gomme o be a ka se sa mmona gape. Go mo kgonthišetša gore e be e se ya hlwa e e-ba nako ya gore a rotoge, Jesu o ile a mmotša gore a tlogele go mo gomarela eupša go e na le moo a ye go botša barutiwa ditaba tša gore o tsogile.

Seo re Ithutago Sona:

12:36. Gore re be “bana ba seetša,” goba barwadi ba seetša, re swanetše go hwetša tsebo e nepagetšego ya Lentšu la Modimo, Beibele. Ke moka re swanetše go diriša tsebo yeo go ntšha ba bangwe lefsifsing la moya ka go ba gogela seetšeng sa Modimo.

14:6. Ga go kamoo re ka amogelwago ke Modimo ge e se ka Jesu Kriste. Re ka batamela kgaufsi le Jehofa feela ka go ba le tumelo go Jesu le ka go latela mohlala wa gagwe.—1 Pet. 2:21.

14:15, 21, 23, 24; 15:10. Go ikokobeletša thato ya Modimo go re thuša go dula re ratwa ke Yena le Morwa wa gagwe.—1 Joh. 5:3.

14:26; 16:13. Moya o mokgethwa wa Jehofa o šoma e le morutiši le mogopotši. Gape o utolla ditherešo. Ka baka leo, o ka re thuša go gola ka tsebo, bohlale, temogo, kahlolo e botse le bokgoni bja go nagana. Ka gona, re swanetše go phegelela thapelong, re kgopela moya woo ka go lebanya.—Luka 11:5-13.

21:15, 19. Petro o ile a botšišwa gore na o be a rata Jesu go feta “tše,” ke gore, dihlapi tšeo di bego di le pele ga bona. Ka gona Jesu o gateletše bohlokwa bja gore Petro a kgethe go ba molatedi wa gagwe wa nako e tletšego go e-na le go phegelela mošomo wa go rea dihlapi. Ka morago ga go ahla-ahla dipego tša Ebangedi ye, anke re beng le boikemišetšo bjo bo tiilego bja go rata Jesu go feta dilo le ge e le dife tšeo di ka re goketšago. Ee, a re tšweleng pele re mo latela ka pelo ka moka.

[Seswantšho go letlakala 31]

Re ka ithuta’ng mohlaleng wa Nikodemo?