Ke Eng Seo se Dirago Gore Bophelo bo be le Morero?

“Boifa Modimo, O lôtê taêlô tša xaxwe.”—MMO. 12:13.

1, 2. Re ka holwa bjang ke go hlahloba puku ya Mmoledi?

KANYA ka monna yoo a bonagalago a e-na le dilo ka moka. Ke mokgomana yo a tumilego, yo mongwe wa banna ba humilego le dinala mo lefaseng, le yo a hlalefilego kudu bathong ba mehleng ya gagwe. Lega go le bjalo, go sa šetšwe dilo ka moka tšeo a nago le tšona, ge e le gabotse o sa dutše a ipotšiša potšišo e rego, ‘Ke’ng seo se dirago gore bophelo bo be le morero?’

² Monna yo bjalo ge e le gabotse o ile a ba gona—nywageng e ka bago e dikete tše tharo e fetilego. Leina la gagwe e be e le Solomone, gomme ka pukung ya Mmoledi re hwetša tlhaloso ya gagwe ya go tsoma ga gagwe kgotsofalo. (Mmo. 1:13) Re ka ithuta mo gontši go tšwa phihlelong ya Solomone. Ee, bohlale bjo bo hwetšwago ka pukung ya Mmoledi bo ka re thuša go ipeela dipakane tšeo di tla dirago gore maphelo a rena a be le morero wa kgonthe.

“Xo Phuthêla Môya ka Kobô”

3. Ka moka ga rena re swanetše go lebeletšana le taba efe e phafošago mabapi le bophelo bja motho?

³ Solomone o hlalosa gore Modimo o hlodile dilo tše dintši tše dibotse mo lefaseng—mothopo o sa gopego le o makatšago wa dilo tše di kgahlišago le tše tlabago tšeo re tlago go dula re di thabela. Lega go le bjalo, ge e le gabotse re ka se kgone go tsomišiša tlholo ya Modimo ka gobane maphelo a rena ke a makopana kudu. (Mmo. 3:11; 8:17) Bjalo ka ge Beibele e bolela, matšatši a rena ke a sego kae le gona a feta ka lebelo. (Jobo 14:1, 2; Mmo. 6:12) Taba ye yeo e phafošago e swanetše go re šušumeletša go diriša maphelo a rena ka tsela e bohlale. Go dira bjalo ga go bonolo, ka ge lefase la Sathane le ka re šušumeletša go tšea tsela e fošagetšego.

4. (a) Lentšu “lefêla” le ra go re’ng? (b) Re tlo ela hloko dilo dife tšeo di phegelelwago bophelong?

⁴ Go gatelela kotsi ya go ka senya maphelo a rena, Solomone o diriša lentšu “lefêla” mo e ka bago ka makga a 30 go Mmoledi. Lentšu la Seheberu leo le fetoletšwego e le “lefêla” le šupa go selo seo se se nago selo, se se nago mohola, se se nago morero, e sego sa kgonthe, goba seo se se nago mohola o swarelelago. (Mmo. 1:2, 3) Ka dinako tše dingwe Solomone o diriša lentšu “lefêla” e le le le swanago le “xo phuthêla môya ka kobô.” (Mmo. 1:14; 2:11) Go molaleng gore maiteko le ge e le afe a go phuthela moya ke a lefeela. Yo mongwe le yo mongwe yo a lekago go dira bjalo o feleletša ka go se sware selo. Go phegelela dipakane tše sego bohlale le gona go tla itlhatsela e le mo go gakantšhago. Bophelo tshepedišong ye ya gona bjale ke bjo bokopana kudu mo e lego gore ga se ra swanela go bo senya ka go phegelela dilo tše sa re holego ka selo. Ka baka leo, go re thuša go phema go dira phošo yeo, anke re eleng hloko mehlala e mengwe yeo Solomone a bolelago ka yona ya dilo tše di tlwaelegilego tšeo di phegelelwago bophelong. Sa pele, re tla ela hloko go phegelela boipshino le dilo tše di bonagalago. Ka morago ga moo, re tla ahla-ahla kamoo mošomo o holago ka gona.

Na go Phegelela Boipshino go tla re Nea Lethabo?

5. Solomone o ile a tsoma kgotsofalo kae?

⁵ Go swana le batho ba bantši lehono, Solomone  o ile a leka go hwetša kgotsofalo ka go phegelela bophelo bja boipshino. O bega gore: “Xa xo lethabô le nkilexo ka le tima pelo ya-ka.” (Mmo. 2:10) O be a tsoma boipshino kae? Go ya ka Mmoledi kgaolo 2, o ile a ‘babalela mmele wa gagwe ka sebela’—ka nako e swanago a dula a e-na le boitshwaro—gomme a phegelela dilo tše bjalo ka temo, go aga nywako e megolo, go theetša mmino le go ja dijo tše di rothišago mare.

6. (a) Ke ka baka la’ng e se phošo go thabela dilo tše dingwe tše dibotse bophelong? (b) Ge go tliwa tabeng ya boithabišo, ke go leka-lekana gofe mo go nyakegago?

⁶ Na Beibele e sola go thabela go ba le bagwera? Ga go bjalo le gatee. Ka mohlala, Solomone o bolela gore go ja dijo o iketlile ka morago ga go šoma ka thata letšatši ka moka ke neo e tšwago go Modimo. (Bala Mmoledi 2:24; 3:12, 13.) Go oketša moo, Jehofa ka boyena o laletša bafsa gore ba ‘ithabele e bile ba tsefelwe’ ka tsela e nago le boikarabelo. (Mmo. 11:9) Re nyaka boiketlo le boithabišo bjo bo agago. (Bapiša le Mareka 6:31.) Lega go le bjalo, boithabišo ga se ya swanela go ba morero o mogolo wa bophelo bja rena. Go e na le moo, boithabišo bo swanetše go swana le go tšhela swikiri ka motepeng. Ke therešo gore go sa šetšwe kamoo motho a ratago dilo tše bose ka gona, ge e ba a tšhela swikiri e ntši motepeng, a ka se ke a o thabela e bile o ka se ke wa mo nea phepo e ntši. Ka mo go swanago, Solomone o ile a lemoga gore bophelo bjoo bo theilwego maipshinong e be e le “xo phuthêla phefô ka kobô.”—Mmo. 2:10, 11.

7. Ke ka baka la’ng re swanetše go kgetha boithabišo bja rena ka kelohloko?

⁷ Go oketša moo, ga se mehuta ka moka ya boithabišo yeo e agago. E mentši e gobatša kudu—bobedi moyeng le boitshwarong. Ke batho ba dimilione tše kae bao ba lahletšego maphelo a bona go hlokeng kholofelo feela ka baka la gore ba be ba ‘nyaka go ipshina,’ ba diriša dihlare-tagi gampe, ba ineelela bjaleng goba ba petšha? Jehofa o re lemoša ka botho gore ge re dumelela dipelo tša rena goba mahlo a rena a re diriša dilo tše di gobatšago, re swanetše go letela go ba le ditla-morago tše sa kgahlišego.—Bagal. 6:7.

8. Ke ka baka la’ng go naganišiša ka bophelo bja rena go le bohlale?

⁸ Go oketša moo, go phegelela boipshino ka tsela e se nago teka-tekano go tla re šitiša go lebiša tlhokomelo e swanetšego dilong tše dikgolo kudu. Gopola gore bophelo bo feta ka pela gomme ga go na kgonthišetšo ya gore bophelo bja rena bjo bokopana bo tla dula go hlaolwa ka go phela gabotse mmeleng le go hloka mathata. Ke ka baka leo re ka holwago kudu ke go ya polokong, bjalo ka ge Solomone a bontšhitše ka mo go oketšegilego—kudu-kudu ya ngwanabo rena goba kgaetšedi yo a botegago wa Mokriste—go e na le go ya “ngwakong wa mathabô.” (Bala Mmoledi 7:2, 4.) Ke ka baka la’ng go le bjalo? Ge re dutše re theeditše polelo ya poloko e bile re naganišiša ka tsela ya bophelo ya mohlanka wa Jehofa yo a botegago yo a hwilego, re ka tutueletšega go hlahloba bophelo bja rena ka noši. Ka baka la seo, re ka phetha ka gore re swanetše go dira diphetogo dipakaneng tša rena e le gore re ka diriša nako e šetšego ya maphelo a rena gabotse.—Mmo. 12:1.

Na Dilo tše di Bonagalago di tla re Tlišetša Kgotsofalo?

9. Solomone o lemogile’ng mabapi le go ba le mahumo?

⁹ Solomone e be e le yo mongwe wa banna ba humilego le dinala mo lefaseng ge a be a ngwala puku ya Mmoledi. (2 Kor. 9:22) O be a kgona go hwetša selo se sengwe le se sengwe seo a bego a se nyaka. O ngwadile gore: “Mahlô a-ka xa nka ka a kuna le setee sa tše a bexo a se duma.” (Mmo. 2:10) Lega go le bjalo, o ile a lemoga gore dilo tše di bonagalago ka botšona ga di tliše kgotsofalo. O phethile ka gore: “E a rataxo mahumô xa a hore ka ôna; mo-lla-boati xa a holexe selô.”—Mmo. 5:9.

10. Ke’ng seo se lebišago kgotsofalong ya kgonthe le mahumong a kgonthe?

¹⁰ Go sa šetšwe mohola o sa swarelelego wa dilo tše di bonagalago, lehumo le ka tšwela pele le e-na le kgoketšo e matla. Nyakišišong ya morago bjale kua United States, 75 lekgolong ya barutwana ba lego ngwageng wa bona wa mathomo yunibesithing ba bolela gore pakane ya bona e kgolo bophelong ke “go huma.” Le ge ba ka fihlelela pakane ya bona, na ba tla hwetša lethabo la kgonthe? Ga se gore go bjalo. Banyakišiši ba boletše gore go  phegelela dilo tše di bonagalago ge e le gabotse go šitišana le lethabo gotee le kgotsofalo. Ke kgale kudu Solomone a fihleletše phetho yona yeo. O ngwadile gore: “Ka ba le mahumô a thsipi-thsêhla le khwibedu, le matlôtlô a dikxoši . . . Ke hwetša è le lefêla, è le xo phuthêla phefô ka kobô.” * (Mmo. 2:8, 11) Go fapana le seo, ge e ba re diriša bophelo bja rena go hlankela Jehofa ka pelo ka moka gomme ka go rialo a re šegofatša, re tla hwetša mahumo a kgonthe.—Bala Diema 10:22.

Ke Mošomo wa Mohuta Mang wo o Tlišago Kgotsofalo ya Kgonthe?

11. Mangwalo a bontšha’ng mabapi le mohola wa mošomo?

¹¹ Jesu o itše: “Tate o tšwetše pele a šoma go fihla mo nakong ye, le nna ke tšwela pele ke šoma.” (Joh. 5:17) Ga go pelaelo gore Jehofa le Jesu ba kgotsofatšwa ke go šoma. Beibele e bontšha kgotsofalo ya Jehofa ka mediro ya gagwe ya tlholo ge e re: “Modimo a lebêlêla tšohle tše a di dirilexo, a bôna e le tše botse kudu.” (Gen. 1:31) Barongwa ba “xobêla” ge ba bona tšohle tše Modimo a di dirilego. (Jobo 38:4-7) Solomone le yena o be a tšeela godimo mošomo o nago le mohola.—Mmo. 3:13.

12, 13. (a) Batho ba babedi ba hlalosa bjang kgotsofalo yeo ba e hwetšago ka baka la go šoma ka thata? (b) Ke bjang mošomo wa boiphedišo o ka bakago tlhakatlhakano ka dinako tše dingwe?

¹² Batho ba bantši ba kwešiša mohola wa go šoma ka thata. Ka mohlala, José e lego rabokgabo yo a atlegilego o re: “Ge o ka kgona go thala seswantšho seo o se nagannego seileng, o ikwa eka o nametše thaba e kgolo.” Miguel, * yo e lego rakgwebo, o re: “Mošomo o go fa kgotsofalo ka gobane o go kgontšha go fa lapa la gago dinyakwa tša lona. O ka dira le gore o ikwe o fihleletše tsoko.”

¹³ Ka lehlakoreng le lengwe, mešomo e mentši e a lapiša e bile e nea dibaka tše sego kae tša go hlama dilo. Ka dinako tše dingwe lefelo la mošomo ka bolona ke mothopo wa kgakanego e bile ke lefelo leo le tletšego go hloka toka. Bjalo ka ge Solomone a bontšha, sebodu—mohlomongwe ka gobane se diriša dikgokagano tšeo se nago le tšona le balaodi—se ka hwetša moputso wa motho yo a šomago ka thata. (Mmo. 2:21) Dilo tše dingwe le tšona di ka tliša manyami. Seo se thomago e le seo go thwego ke sebaka se se kgahlišago sa tša kgwebo se ka feleletša se folotša ka baka la go phuhlama ga maemo a tša boiphedišo goba ditiragalo tše sa letelwago. (Bala Mmoledi 9:11.) Gantši motho yo a katanelago go atlega o feleletša a ferekane e bile a hlakahlakane, e le ge a lemoga gore o be a ‘itapiša ka lefeela.’—Mmo. 5:16, bapiša le PK.

14. Ke mošomo ofe woo o dulago o tliša kgotsofalo ya kgonthe?

¹⁴ Na go na le mošomo woo le ka mohla o ka se tlišego manyami? José, rabokgabo yoo go boletšwego ka yena pejana, o re: “Ge nywaga e dutše e e-ya, diswantšho di ka timela goba tša senyega. Ga go bjalo ka dilo tša moya tšeo re di tšweletšago. Ka  go dirišana le Jehofa boboleding bja ditaba tše dibotse, ke thušitše go aga selo sa sa ruri—Bakriste ba babotse bao ba boifago Modimo. Seo ke se bohlokwa ka go fetišiša.” (1 Bakor. 3:9-11) Miguel le yena o re go bolela molaetša wa Mmušo go mo tlišetša kgotsofalo e kgolo kudu go feta mošomo wa gagwe wa boiphedišo. O re: “Ga go seo se ka tšeago legato la lethabo leo o le hwetšago ge o ahla-ahla therešo ya Mangwalo le motho yo mongwe le ge o lemoga gore e kgomile pelo ya gagwe.”

‘Lahlela Bogobe bja Gago’

15. Ke’ng seo ge e le gabotse se dirago gore bophelo bo be le morero?

¹⁵ Sa mafelelo, ke’ng seo se dirago gore bophelo bo be le morero? Re ikwa re kgotsofetše e le ka kgonthe ge re diriša nako ya rena e nyenyane mo tshepedišong ye ya dilo go dira botse le go kgahla Jehofa. Re ka aga tswalano ya kgaufsi le Modimo, re ka ruta bana ba rena bohlokwa bja dilo tša moya, re ka thuša ba bangwe go tseba Jehofa, le gona re ka hlagolela ditswalano tšeo di swarelelago le bana babo rena le dikgaetšedi. (Bagal. 6:10) Dilo tše ka moka di na le mohola wa sa ruri e bile di tliša ditšhegofatšo go bao ba di fihlelelago. Solomone o dirile papišo e kgahlišago kudu ya go hlalosa bohlokwa bja go dira botse. O itše: “Boxôbê bya xaxo bo lahlêlê bodibeng; O tlo buša wa bo hwetša xò fetile mehla e mentši.” (Mmo. 11:1) Jesu o kgothaditše barutiwa ba gagwe ka gore: “Tlwaelang go fa, gomme batho ba tla le fa.” (Luka 6:38) Go oketša moo, Jehofa o holofeditše gore o tla putsa bao ba direlago ba bangwe botse.—Die. 19:17; bala Baheberu 6:10.

16. Nako e swanetšego ya go rulaganya tsela ya rena ya bophelo ke efe?

¹⁶ Beibele e re kgothaletša go dira diphetho tše bohlale re sa le ba bafsa tša kamoo re tlago go diriša bophelo bja rena ka gona. Ka tsela yeo, re tla kgona go phema kgakanego ya ka morago ge re šetše re godile. (Mmo. 12:1) E tla ba mo go nyamišago gakaakang ge re be re ka fetša nywaga e kgahlišago kudu ya bophelo bja rena re šala-šalane le dikgoketšo tša lefase morago, gomme ka morago ra lemoga gore di tloga di sa swarege go fo swana le phefo!

17. Ke’ng seo se tla go thušago go kgetha tsela e kaone-kaone ya bophelo?

¹⁷ Go swana le tate yo mongwe le yo mongwe yo lerato, Jehofa o nyaka gore o thabele bophelo, o dire botse, e bile o pheme go nyama go sa nyakege. (Mmo. 11:9, 10) Ke’ng seo se tla go thušago go dira bjalo? Ipeele dipakane tša moya gomme o katanele go di fihlelela. Mo e nyakilego go ba nywaga e 20 e fetilego, Javier o ile a swanelwa ke go kgetha sebaka sa go ka hwetša mošomo wa tša kalafo le go tsenela bodiredi bja nako e tletšego. O re: “Gaešita le ge go ba ngaka go ka kgotsofatša, ga go seo se ka bapišwago le lethabo leo ke ilego ka le  hwetša ge ke be ke thuša batho ba mmalwa go tseba therešo. Tirelo ya nako e tletšego e nthušitše go thabela bophelo ka mo go feletšego. Ke fo ba ke itshola ka baka la gore ga se ka thoma go dira bjalo ka pela.”

18. Ke ka baka la’ng bophelo bja Jesu bja lefaseng bo ipontšhitše e le bjo bo nago le morero?

¹⁸ Ka gona, ke selo sefe se bohlokwa kudu seo re swanetšego go katanela go ba le sona? Puku ya Mmoledi e re: “’Ina le botse le phala makhura a mabotse; ’tšatši la xo hwa le phala la xo tswalwa.” (Mmo. 7:1) Ga go seo se bontšhago se gabotse go feta bophelo bja Jesu. O ile a itirela leina le lebotse kudu le Jehofa. Ge Jesu a be a e-hwa a botega, o godišitše bogoši bja Tatagwe a ba a nea sehlabelo sa topollo, seo se re buletšego tsela ya phologo. (Mat. 20:28) Nakong ya gagwe e nyenyane ya ge a be a le lefaseng, Jesu o ile a bea mohlala o phethagetšego—woo re katanelago go o latela—wa bophelo bjoo bo nago le morero wa kgonthe.—1 Bakor. 11:1; 1 Pet. 2:21.

19. Solomone o neile keletšo efe e bohlale?

¹⁹ Le rena re ka itirela leina le lebotse le Modimo. Go ba le botumo bjo bobotse mahlong a Jehofa ke selo seo se nago le mohola kudu go rena go feta go ba le mahumo. (Bala Mateo 6:19-21.) Letšatši le lengwe le le lengwe, re ka hwetša ditsela tša go dira dilo tšeo di kgahlago Jehofa le tšeo di tlago go humiša maphelo a rena. Ka mohlala, re ka botša ba bangwe ditaba tše dibotse, ra matlafatša lenyalo la rena le malapa a rena, ra ba ra godiša boemo bja rena bja moya ka thuto ya motho ka noši le go ba gona dibokeng. (Mmo. 11:6; Baheb. 13:16) Ka gona, na o nyaka go thabela bophelo bjo bo nago le morero wa kgonthe? Ge e ba go le bjalo, tšwela pele o latela keletšo ya Solomone e rego: “Boifa Modimo, O lôtê taêlô tša xaxwe. Ké se se swanetšexo batho bohle.”—Mmo. 12:13.

[Mengwalo ya tlase]

[O be o tla Araba Bjang?]

• Ke’ng seo se swanetšego go re tutueletša go naganišiša ka dipakane tša rena bophelong?

• Re swanetše go ba le pono efe ka go phegelela boipshino le dilo tše di bonagalago?

• Ke mošomo wa mohuta ofe woo o tla tlišago kgotsofalo ya sa ruri?

• Ke selo sefe se bohlokwa seo re swanetšego go katanela go ba le sona?

[Dipotšišo tša Thuto]

[Seswantšho go letlakala 23]

Boithabišo bo swanetše go tšea boemo bofe bophelong bja rena?

[Seswantšho go letlakala 24]

Ke’ng seo se dirago gore modiro wa boboledi e be o kgotsofatšago kudu?